Эшшо огпол тау шуом

Ангелина Снигирева
By Ангелина Снигирева Май 7, 2019 09:12

9-тӥ Майлы сӥзем ужрадъёс Ижысь пӧртэм площадкаосын радъяськозы. Соослы кутскон сётоз Ялан ӝуась тыл доры сяська понон. Котькуд площадкаын нунал ӵоже ужалоз «Мон лыдӟисько войнаез» акция — эрико микрофон доры котькуд адями султыны но вань мылкыдзэ вераны быгатоз. Нунал пумын Иж тымет дурын бадӟым гала-концерт радъяськоз. 22 часын салют гудыртоз.

Шор площадьын

10 часын кутскоз Вормон Парад. Парадлэн сюресэз туэ кузьгес каремын — машинаос но расчётъёс, Шор площадьысен кутскыса, мынозы Иж городлэн администрациез дорозь. Парадын вамышъяны трос калык куриське — мылкыд карисьёс 1 сюрс 865 адями ини. Калыклы 50-лэсь трос пумо техника возьматозы. Соос пӧлын ретроавтомобильёс но, ТОР комплексъёс но. Парад пумын строен ортчозы, пыӵал тӥрлыкен приёмъёсты возьматозы кадет классъёсы ветлӥсь пиналъёс.

11 часын «Вунонтэм полк» вамыштоз. Шаерамы со 6-тӥ ползэ радъяськоз ни. Оже ветлэмъёсты буре ваён сюрес кыстӥськоз город администрация дорозь. «Вунонтэм полке» люкаськыны кутскозы 10 часын Бородин ульчаын (Данъян пул но 2 номеро город больница вискын).

12 час 30 минутэ дышем сямъя возьма «Тупаса улонлы сӥзем эстафета». Со ортчоз 70-тӥ ползэ. Ӵошатскон кыстӥськоз 15 час 30 минутозь.

16 часысен сцена вылын — праздниклы сӥзем «Вормон сярысь кыл» бадӟым программа. Удмуртиысь театръёс Быдӟым ожлы сӥзем тужгес усто постановкаоссэс возьматозы. Та программае пыриськозы Драмая ӟуч театр, Удмурт театр, Операя но балетъя театр. Вӧзазы итӥськозы эстрадая «Шулдыр ӝыт» ансамбль, «Италмас» кун ансамбль, «Айкай» театр. Возьматонъёс татын кыстӥськозы 20 час котырозь.

19 час 55 минутэ — чус улон минут.

Ялан ӝуась тыл дорын

9 часын — монумент доры сяська понон.

10 часысен 20 часозь «Мон лыдӟисько войнаез» акция ужалоз. Шара микрофонэ оже ветлэм муртъёс сярысь вераны, ветеранъёслы тау шуыны быгатозы вань мылкыд карисьёс.

Нунал ӵоже ужалоз шер пумиськылӥсь документъёсын но туспуктэмъёсын адӟытон.

Та скверын ик кунояськыны луоз ӝукен.

Правительстволэн юртэз дорын

10 часысен 15 часозь — обороная предприятиосын поттэм техникаен, пыӵал тӥрлыкен тодматскон. Татын Калашниковлэсь автоматсэ сэрттыны-бичаны луоз. Адӟытонэ ваёзы противотанковой пушкаез но. Сое война вакытэ поттӥзы Воткаысь машзаводын.

Наговицын ульчаын

10 часысен 15 часозь арган шудэм улсын кырӟан-эктонъёс ортчозы. Татчы ӧтемын быдэс республикаысь кырӟась-верась коллективъёс. Нош ульчалэн мыд-мыд палъёсаз калык киужъёсын вуз карон-ярмарка ужалоз, мастер-классъёс радъяськозы. Йӧскалык музей котырын фотосалон луоз — мылкыд карисьёс ож вакытысь дӥськутэн фотое пуксьыны быгатозы.

Кун Кенешлэн юртэз азьын

10 часысен 15 часозь концертэн программа но викторинаос-ӵошатсконъёс ортчозы. Артистъёсын ӵош вальс берганы, арган шудэмъя кырӟаны луоз. Озьы ик солдат ӝукен куноятозы.

Город администрацилэн юртэз азьын

11 часысен 15 часозь «Семья альбом» площадка ужалоз. Дышетозы портрет суреданы, синпель кузьым лэсьтыны. Кырӟам, ӵошатскем, фотое пуксем сяна, солдат ӝук веръяны луоз на.

Администрацилэн юртэз сьӧрын интыяськем «Усьтэм сад» площадка озьы ик нырысьсэ ужалоз. Татын 11 часысен 17 часозь ужрадъёс радъямын. Тужгес тунсыкоез — тирын ыбылӥськон. Со понна пневматика пистолетъёс, пукыӵъёс но арбалетъёс поттэмын луозы.

Иж тыметлэн ярдураз

13 часысен 17 часозь егитъёслы чаклам ужрадъёс луозы. Пинал калык понна радъяськозы стритболъя, армрестлингъя, автоматэз бичан-сэрттонъя, штанга ӝутъянъя но мукет площадкаос. Озьы ик ГТО-лэсь куронъёссэ быдэстыны луоз. Нош сцена вылын радъяськоз концерт.

Ижысь музейёсын

9 часысен ӧсъёссэ усьтоз Йӧскалык музей. Татын «Вормон Нунал Арсеналын» программа ужалоз. Музейчиос возьмало «Победа ковалась в тылу» но «Треугольники судьбы» экскурсиосы но турлы мастер-классъёсы.

10 часын ужрадъёссэ кутскоз Суредан искусствоосъя музей. Булат Окуджавалэн кылбуръёсызъя но кырӟанъёсызъя концерт радъяськоз, бадӟымъёслы но пиналъёслы мастер-классъёс усьтӥськозы. Мылкыд карисьёсты ӧтё «Вормонлэн буёлэз» огазеям панно лэсьтонэ пыриськыны.

Праздниклэсь пыр-поч программазэ учкыны луоз 9may.izh.ru сайтысь.

УД

Ангелина Снигирева
By Ангелина Снигирева Май 7, 2019 09:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<