Шумпотонэн пачылась нунал

Ангелина Снигирева
By Ангелина Снигирева Май 13, 2019 09:56

Вормон Нуналэз паськыт пусйизы элькунысьтымы вань ёросъёс но городъёс. Но тужгес бадӟымез, яркытэз ужрад — Вормон Парад — ортчиз Ижын.

Фото: udmurt.ru

Шор карлудысен Иж город администрацилэн юртэз дорозь Пушкинской урам кузя строен ортчиз уно калык: элькунысьтымы военно-патриотической огазеяськонъёсы пыриськисьёс, обороная заводъёсын, уно пӧртэм предприятиосын тыршисьёс. Ваньзы чебер пӧрмытскемын, чот-чот вамышъямзы но синэз кыске. Парадэ пыриськыны мылкыд карисьёс туэ лачак люкаськизы — 1 сюрс 900 мурт котыр. Нош Шор карлудэ, Пушкинской урамлэн кыкпал дураз уно учкисьёс вал — Вормон Нуналэз данъяны вуиз мӧйыез но, тэшкылиез но. Но тӧр шорын вал Быдӟым оже пыриськем ветеранъёс: соос трос кузя ӧй вал, мӧляосазы бырттэм гадьпусъёссы кыдёкысен чилязы-кисьтаськизы. Колоннаосын ортчисьёс соос вадьсытӥ «честь» сётыса ортчизы.
Калык синмаськыса учкиз кадет классъёсы ветлӥсь пиналъёслэсь быгатэмзэс но: пыӵал тӥрлык кутыса, пӧртэм приёмъёсты возьматӥзы. Озьы соос данъязы Быдӟым оже пыриськемъёсты, возьматӥзы соос сямен ик Атыкай музъеммес утьыны дась луэмзэс.
Вормон Парадэ туэ вуттэмын вал 50-лэсь ятыр техника. Элькун Правительстволэн юртэз дорын адӟытон но радъяськиз. Отчы вуттэмын вал вашкала автомобильёс, пӧртэм вакытъёсы кутӥськись ож техника. Тужгес но трос учкисьёсты ас котыраз люказ противотанковой пушка. Та азбарын ик радъяськиз. М. Калашниковлэсь автоматсэ сэрттон но бичан — пиос куспазы вожвылъяськизы.
Но калыкез тужгес но паймытӥз «ТОР-М2ДТ» комплекс. Со танк кадь гинэ ӧвӧл угось, шӧдскымон бадӟым, питранъёсыз но кужмолэсь кужмо. Ширтэмзэ палэнысен учкыса, со кыӵе ке аспӧртэмлыко пӧйшурлы укша. Лэсьто сое асьме дорын — электромеханикая «Купол» заводын. «ТОР» асьме парадэ вуттэмын нырысьсэ. Азьвыл 2017-тӥ арын та техникаен тодматскизы вал ни Москваын Вормон Парадэ пыриськемъёс. Табере сое ас синмынызы адӟизы ас шаерамы улӥсьёс. «ТОР-М2ДТ» комплекс кылдытэмын Заполярьеын служба нуонлы. Со капчиен ширтэ мур лымыетӥ но, йӧэн шобырскем интыетӥ но. Со сяна, со ужамысь уг дугды 50 градусозь кезьытын но, пӧсьын но. Одӥг кылын вераса, таиз «ТОР» номырлэсь уг кышка. Пусйыны кулэ: та комплекслэсь улонын кутӥськемзэ эскерон йылпумъяськиз кылем арын сӥзьыл. Табере «Купол» заводын соосты лэсьтон паськыт радъямын: Россилэн армиезлы вуттэмын ни нырысетӥосыз 12 комплексъёс.


Та комплекс сяна но, «Купол» завод уно мукет техниказэ возьматӥз. Палэнэ ӧз кыле «Аксион» завод, «Калашников» концерн. Асьсэлэсь техниказэс соос возьматӥзы быдӟым конструкторлы М. Калашниковлы вордскемез дырысен 100 ар тырмонэз пусъён улсын.
Быдӟым Вормонэз пусъён ужрад Ижын пӧртэм площадкаосын радъяськиз. Азьвыл аръёсы сямен ик, туэ но паськыт колоннаен ортчиз «Вунонтэм полк». Туэ со Ижын 6-тӥ ползэ ортче ни. Ялан ӝуась тыл котыре но трос калык люкаськиз: отын ортчиз сяська понон ужрад но, радъямын вал ож вакытэ сямен ик полевой ӝукез сиён. Нунал куспын Ижлэн пӧртэм интыосаз тунсыко ужрадъёс ортчизы. Мылкыд карисьёс фронтовой кырӟанъёсты но быдэстӥзы, микрофон азьын оже ветлэмъёс сярысь но веразы, Вормон Нуналлы сӥзем панно но лэсьтӥзы, спортъя вожвылъяськонъёсы но пыриськизы. Нош 19 час 55 минутэ быдэс шоркар чусомиз кадь: вань калык, шыпыт кариськыса, тодаз вайиз ожын быремъёсты.
Ижысь одӥг инты но, одӥг синпелет но калыктэм ӧй вал кадь та нуналэ. Вань ужрадъёс тырмемын вал Быдӟым Вормонэз данъян мылкыдэн, пачылась шумпотонэн. Калыклэн мылкыдыз эшшо бурдъяськиз 10 часын ӝыт, соку Иж тымет котырысь инме салют пазьгиськиз. «Вормон Нуналэн!» — шуккиськиз быдэс улос тыр.

Елена Никитина

Туспуктэмъёс басьтэмын udmurt.ru сайтысь

Ангелина Снигирева
By Ангелина Снигирева Май 13, 2019 09:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<