Улон кузя — кырӟанэн

Ангелина Снигирева
By Ангелина Снигирева Май 7, 2019 10:48

Иван Александрович Русскихлэн трудовой книжкаяз одӥг гинэ гожтэмез — кырӟанъя но эктонъя кун ансамбль «Италмас». 34 ар ӵоже ини со та ансамбльын кырӟа, пӧртэм инструментъёсын шудэ, эктэ.
Иван Русских — Удмурт Республикаысь калык артист, культура удысын быгатыса тыршемез пусъемын пӧртэм таукаронъёсын но дипломъёсын.

И. Русских

— Кытын, кыӵе семьяын будо-быдэсмо такем усто кырӟаны, сцена вылын ассэ такем йӧно возьыны быгатӥсь пиос?

— Вордӥськи мон Сьӧлта ёросысь Валамаз черкогуртын. Тунсыко: ӝыны гуртмы Кудрявцевъёс вал, кылемъёсыз — Русскихъёс. Нялтас вераса, гуртамы вордскем но быдэс дуннелы тодмо луэм дрессировщик Иван Кудрявцев матысь ӵыжы-выжые луэ, анайлэн двоюродной выныз со.
Нош вордӥськи мон туж огшоры семьяын. Анае Раиса Назаровна быдэс улонзэ гуртын тыршиз: фермаын скал но кыскиз, тылобурдо но сюдӥз. Гурт котырын лэсьтыны быгатымтэ ужез ӧй вал. 1923-тӥ арын вордскемын, олокыӵе но шуг-секытъёс пыр ортчемын. Но котьма ке но, со вакытэ вордскем-улэм адямиослэн чиданзы зол: улӥз 91 аресозь. Азьлань потыса верало: «Италмас» ансамблен сцена вылын кырӟам-верамме огпол но адӟемез ӧй вал. Угось пыр улӥз Валамазын, сьӧрло потаны ӧз дӥсьтылы. Нош мон кутӥ но ансамбльысьтымы ӵош ужан эшъёсме вордскем гуртам чортӥ. Нокин пумит ӧз луы. Озьы, анаелы кузьым лэсьтыса, вуттӥ на: дорамы солы концерт возьматӥмы, артистъёсын одӥг ӝӧк сьӧры пуксьыса, лулысь-сюлмысь лабыртӥз. Малы ке кырӟамме кылэмез уг луы солэн: кырӟан мытӥсько гинэ, адӟисько ни — бамъёсыз кузя синкылиосыз быльырало. Уг тодӥськы, оло, секыт улонзэ тодаз вайылӥз, оло, мон понна озьы шумпотылӥз…
Анае мыным Иван ним сётэм Быдӟым ожын бырем агаезъя. Со туж яратэ вылэм кырӟаны, арганэн но шудэм. Кин тодэ, оло, солэн нимыныз мынам улонам шӧдӥськиз… Анай вера вал, войнае кошкем 3 братъёсыныз киноын кадь учыр луиз шуыса. Фронтъёсты огазеяку, соос ваньзы ӝамдэлы пумиськиллям одӥг ож лудын, бӧрысь соосты нош ик висъяллям. Кыкез ӧз бертэ ни…
Атае Александр Леонтьевич но быдэс улонзэ гуртын тыршемын. Скал кыскон аппаратъёсъя инженер но вал, гуртысь клубен но кивалтӥз, сое эстӥсь-шунтӥсь но вал. Аресэзъя со Быдӟым оже ӧз шедьы ни, но армиын 7 ар ӵоже служить кариз. Бӧрысь ремесленной училищеын дышетскиз. Туж яратылӥз лыдӟиськыны. Вот, малпасько, туала вакытэ улысал ке, лычсузьымонозяз лыдӟиськысал! Соку угось книга но мырдэм шедьылӥз, со но киысь кие ветлӥз.
Котьма ке но, гуртын улӥсьёс, тужгес но ай анай-атаелэн егит вакытазы, артистлэн ужез шоры кырыжгес учкылӥзы: ма, кыӵе уж луоз со! Нош атай, мынэсьтым кырӟамме кылыса, лэся, котьку косылӥз: мын артистэ!
Анай-атаен вордӥзы 6 пи, со пӧлысь 5-сэ пыд вылазы султытӥзы. Мон берпуметӥез, шумес пыдэс. Но ӝуждалаея но, секталаея но — самой бадӟымез. Ма, куарае но кужмогес. Агайёсын кыӵе ке ужпум сярысь кенешоно луэ ке, та ужен кивалтыны кутскисько мон. Тамаша кадь: анае пичи гинэ мугоро вал. Мон сярысь гуртоос верало вылэм: уть ай, Назаровна, шумес пыдэсэд аслэсьтыд 3 поллы бадӟымгес!

Егит дыр

— Семьяды огшоры шуиськоды, нош кытысь кылдӥз крезьгур дуннее кыстӥськон мылкыдды, кин пыӵатӥз?

Гуртын кызьы кырӟатэк?! Азьвыл угось вань ужез, огазе кариськыса, кырӟаса-вераса быдэсъяллязы. Анае, эсьмаса, куаразэ пуктылыса-вошъяса ик, кырӟаны быгатылӥз. Паня но Женя эшъёсыныз трио кариськыса но кырӟаллязы. Асьсэос, конешно, ӧз валаллялэ та амаллэсь аспӧртэмлыксэ. Кырӟанъёсты быдэстылӥзы озьы, кызьы сюлэмзы куре. Но мынам, соку пичи пилэн, сюлмам маиз ке вырӟылӥз. Озьы крезьгурез шӧдонэ ӝужаны ӧдъяз, вылды.
Анаелэсь сяна, та мылкыд пыӵаз, малпасько, калык сям-йылолъёслэсь но. Соосты гуртоос юн чакласа возизы. Али кадь ик син азям пуксе быдэс гуртэн Тройча нуналэз пусъеммы. Вань калык, китӥз кутскыса, хороводэн ветлӥз, кырӟаз, эктӥз. Сям-йылолъёсын герӟаськем нуналъёс мон понна зэмос праздник вал.
Серемме али ке но мырдэм кутӥсько, бусы шорын ымтрос кырӟамме тодам вайыса. Соку колхоз бусыосысь бадӟым бекчеосын удобрение возьылӥзы. Кыӵе ке вакытэ сое пазяло но бекчеос бушало вал. Мон со дырез возьмаса гинэ улылӥ. Отчы бызьыса мынӥсько но вылазы кечырак тубисько, пушказы пуксьыса, кӧня куарае тырме, озьы кырӟасько вал. Ма, кылӥсь-адӟись ӧвӧл, возьдаськыны нокинлэсь.
Тодам кылиз мукетыз нунал но: бадӟым агаелы арган кузьмазы. Дыр шедьтыкуз, со сое, вик-вак кыскаса, пукылӥз. Собере кытчы ке кошконо ке, арганзэ шкап пушкы пуктылӥз, вылаз калъёссэ ачиз сямен тырылӥз — пус кельтылӥз. Нокинлы но арганэз борды йӧтылыны ӧз лэзьылы. Нош мон кошкемзэ гинэ витисько. Арганзэ лусьтыр-ласьтыр поттӥсько но, кӧт тырымонам кыскасько! Собере интыяз пуктӥсько но калъёссэ вылаз агай сямен ик интыясько — кутылэмме медаз вала. Тазьы «лушкаськыса» мон ас поннам шудыны дыши. Котькыӵе гурез пуктыны быгатылӥ. Нош агай весь кыска но кыска, номыр йӧналазэ пӧрмытыны уг быгаты. Ӧй чида, шуисько, татын тазьы шудоно, таяз таӵе кнопкаосты зӥбылоно. Арганзэ кутылэмме валатскиз. Шудэмме возьматыны косӥз. Учкиз-кылӟиз но шуиз: сё, табере та арган тынад! Та нуналысен гуртысь одӥг юмшан-сюан но монтэк ӧз ортчылы. Ай йыры арган сьӧрысь мырдэм адске, нош ваньзы созэ я тазэ гурез шудыны косо. Шудэме понна эктыса йыбыртъяло.
Валамазысь 8 классъем школаын дышетскыкум но, маза ӧз сётылэ ни. Кыӵе ке ужрад ке — мон отын, кинэ ке армие келяно ке — мон нош ик отын. Ӝоген дышетски на гитараен, ударной инструментъёсын шудыны. Бадӟым классъёсын тодон-валан люкай гуртэлэсь палэнын, Сьӧлта черкогуртын, отын интернатын улӥ. Ачим кадь пиосын огазеяськыса, кылдытӥмы группамес. Быдэстылӥмы «Машина времени», «Бони М» кадь тодмо группаослэсь кырӟанъёссэс. Мон отын гитараен но шудӥ, барабан но кокай, вокалист но вал.
Школаез йылпумъякум, сокем акыльтӥ, лэся, кырӟан-веранлэсь, улонме та удысэн чик но герӟаме ӧз поты ни. Эшшо ке дышетскон вискын гуртэ бертылыкум, атай ёртэ вал ни: «Ну-ка, Ванька, шудыса лэзь ай милемлы!» Табере ачим атай бере, валасько, озьы солэн ӵыжы-выжыосызлы, эшъёсызлы возьматэмез потӥз, луоз, пиезлэсь быгатонлыкъёссэ. Нош мынам, уноезлэн егитъёслэн сямен ик, пумитъяськон мылкыды пуромиз, луоз.

Училищеын

— Кема-а кыстӥськиз пумитъяськон мылкыдды?

— Мынам пичи дырысеным ик токарь луэме потылӥз. Туж синмаськыса учкылӥ гуртысьтымы токарьлэн Алексей Кудрявцевлэн ужамез шоры. Кыӵе но арбериос лэсьтыны уг пӧрмыты со, кӧня калык солы вазиське! Кыӵе сое гажало но дунъяло! Малпасько, талэсь кулэ удыс дунне вылын ӧвӧл ни. Ӵапак Сьӧлталась школаез йылпумъякум, пумитам сюриз гуртысьтымы пияш. Ойдо, пе, Свердловске токарьлы дышетскыны. Мылкыды бурдъяськиз: эх, малпасько, льӧль малпанэ табере быдэсмоз! Анаен атай ӧз алэ, озьы мон сюрес вылэ потӥ. Но кызьы потӥ, озьы ик вордскем палъёсам берлань вуи. Свердловске мон кадь мылкыд карисьёс тачак люкаськиллям, пырыны ӧй быгаты.
Озьы анай-атайлэн кылзыя кариськытэк ӧйлась: йыгаськоно кариськи Ижысь культурая училищее, бырйи хоръя отделениез. Туж капчиен ортчи конкурс пыр, монэ басьтӥзы. Мыным отын нырысетӥ нуналысеныз ик сокем кельшиз, чылкак аслам ӧрам-дуннеям шеди кадь. Ваньмыз сокем тунсыко, коть дорад эн берталля! Милемыз кырӟаны, сцена вылын астэ возьыны дышетӥзы зэмос профессионалъёс. Со сяна, училищеямы ортчылӥзы нимо-дано артистъёсын пумиськонъёс. Мон соку губка кадь йырам тодон-валан люканы тырши, быгатонлыкъёсме волятӥ. Туж шуныт мылкыдын тодам вайисько студент вакытме. Но дышетсконме куспетӥ кароно луиз, армиын танковой войскоосын службаме нуи.

— Тӥ кадь бадӟым мугороосты та войскоосы басьто шат?

— Кытын служитьтэмме тодыса, ваньзылэн серемзы потэ: кызьы, пе, танке тэрид? Мыным со пушкын ӝокано ӧз луы, соосты тупатъясь-эскерись вал. Службае ортчиз Приморск улосысь Уссурийск городын. Культурая училищеын дышетсконме азьланьтӥ ни, армиысь вуыса.

Кузпалыныз

— Кызьы шедиды «Италмас» ансамбле?

— Афганистанысь ож пыр потэм эше Алексей Хитрин мыным ӵектӥз: «Италмас» ансамбль артистъёсты утча. Эскеры ай, оло, кутозы? «Италмас» ансамбльлэн данэз туж бадӟым вал, прослушивание кышкасагес вамыштӥ. Вуи но, нош отын куаш! репетиция мынэ. Ӵапак Иван воргорон сярысь удмурт кылын кырӟан кырӟало. Сюлэмам оломар вырӟиз кадь: макем чебер чузъяське удмурт кыл! Собере Анатолий Васильевич Мамонтов — «Италмаслэн» со вакытэ чеберлыкъя кивалтӥсез — кырӟамме кылзӥськиз. «Италмасын» нырысетӥ вамышъёсы ӵапак А. Мамонтовен герӟаськемын. Мыным юрттӥз быгатонлыкъёсылы оскыны, соосты калыке поттыны, учкисьлэсь мылкыдзэ бурдъяны. Таиз уг пӧрмы ке, сценалы вань сюлэмдэ сётыны уд быгатӥськы ке, озьыен, артистлэн ужез тыныд уг тупа, та удыслы дышетскид ке но, шуылӥз Анатолий Васильевич. Со бадӟым букваысен Дышетӥсь. Югыт сюлмо адямиен кылёз сюлэмам.
Тодӥсько вал, Анатолий Васильевич кулэ дыръяз чурыт кылзэ но вераны быгатэ. Соин ик прослушивание дыръя куарае кӧня ке дырекъяз. Сё, малпасько, ӧй кельшы. Нош со кырӟамме куспетӥ кариз но вакчияк шуиз: басьтӥськом, ӵуказе уже потэ. Озьы мон 1986-тӥ арын январь толэзьысен улонме герӟай «Италмас» ансамблен. Табере со мыным семьяе кадь потэ. Мон соин улӥсько-шокасько. А. Хитрин но табере Удмуртиысь калык артист. Со но быдэс улонзэ герӟаз та ансамблен. Ми соин ӵем дыръя дуэтэн кырӟаськомы.
Лыктэме бере ай ансамбльын кырӟало-экто вал нимо-дано артистъёс: Евгений Серебренников, Геннадий Кузнецов, Владимир Валуйкин, Михаил Ворончихин. Ми, еж артистъёс, соослэсь адӟем карылӥмы, соос кадь ик усто кырӟаны но эктыны дышетскимы. Но ӝоген вуизы 1990-тӥ аръёс, ваньзы кир-пазь луизы.

«Италмасысь» эшъёсыныз

— 1990-тӥ аръёс, зэм но, калыклы секытэн сётскизы. Нош артистъёс, огъя культура удыс сярысь веранэз ик ӧвӧл… Ма юрттӥз тӥледлы со вакытэ возиськыны, семьядэс сюдыны?

Юрттӥз арганэ. Ёрмон вакыт вал ке но, уксёёгес муртъёс паськыт ортчытъяллязы сюанъёссэс, юбилейёссэс… Ӵапак таӵе шулдыръяськонъёсын арганэн шудыса, кырӟаса уксё поттылӥ соку. Тодам вайисько ке со аръёс сярысь, куддыр калыклэсь кепыр но потӥсько: уксё понна озьы шудыса-кырӟаса ветлӥ шуыса. Нош кытчы пырод? Нылпиосты сюдоно, пыд вылазы ӝутоно вал.
«Италмасысь» артистъёс куд-огез ӧз чидаллялэ, воксёлы та удысысь кошкылӥзы. Ансамбль куашканы кутскиз, шуыны луоз. Одӥгъёсыз кошкизы Турцие, отын ужбергатонзэс усьтӥзы, мукетъёсыз бӧрысьгес «Айкай» ансамбль кылдытӥзы. Мон малпамъя, Анатолий Васильевич понна та ваньмыз зэмос трагедия выллем луиз. Ма, аслад киосыныд кылдытэм-лэсьтэм ужед ки пыртӥд кошкыны кутске ке, котькинлэн сюлмыз сэректоз, малпасько. Кӧня ке дыр ортчыса, со буйгаз, вань кужымзэ нош ик творчествоезлы сӥзьыны ӧдъяз. Соку со золгес басьтӥськиз ни ми борды, бадӟым концертъёслы дасяськыны кутскимы. Тодам кылиз: мыным соку удмурт костюм вуризы ни. Гастрольёсын кытчы гинэ ӧм вуылэ: Францие, Германие, Венгрие, Уйпал Корея но трос мукет кунъёсы. Тодам кылиз Пуэрто-Рикое вуылэммы. Отын залзы сокем усто вал, кырӟаме, оло, кӧня ке иськемлы шуккиськиз, дыр. Кырӟан вискам йыры ик поромыса кошкылӥз. Нош мар вал учкисьёсын! Кизэс чабемысь уг дугдо, милемыз эшшо но эшшо кырӟаны-эктыны куро. Питранъёс вылын — гастрольёсын — улыны сокем дышиськод, мукет сямен луыны но уг быгаты ни кадь. 34 ар ӵоже та ансамбльын тыршытозям, огпол но жаляме ӧвӧл улон сюресэ «Италмасэ» вуттӥз шуыса.

А. Мамонтовен

— Питранъёс вылын улыса, ку вис шедьтӥды семья кылдытыны? Яке кузпалды но артист?

— Кузпалы нырысь ик, мыным ӧвӧл, «Италмаслы» синмаськем. Со мынам Дальний Востокысь. Со палъёсы — Благовещенск городэ — гастрольёсын вуылӥмы вал 1986-тӥ арын. Ксения соку йылпумъям вылэм ни крезьгуръя училищеез. Ужаны интыяськон вылысь, пӧртэм коллективъёсы прослушиваниосы ветлыны кутскем. Ӵапак соку «Италмаслэн» концертаз шедем. Сокем синмаськем удмурт калык кырӟанъёслы, эктонъёслы, Анатолий Васильевичлы, сое кутыны курыса, гожтэт ыстэм. Озьы со Удмуртие вуиз: кырӟамез кельшем, сое ансамбле кутӥзы.
Мон сое нырысь кылэм-адӟем но ӧй карылы. Куд-огезлэсь верамзэ тодӥсько на: учкы ай, выль лыктэм нылашмы кыӵе лыдӟиськись — библиотекаысь уг ик пота. Мукетыз отын ик шуэ: адӟид-а, пе, со ӵукналы быдэ зарядка лэсьтэ, спортэн эшъяське. Собере ачим ик валатэк кыли та выль вуэм нылашен эшъяськемме. Огполаз библиотекаын одӥг ӝӧк сьӧры тупамы, мукет дыръя мон сое концерт бере келяй, куинетӥ полаз дораз, чай юыса, пуки ни. Озьы ар ортчыса, кузпалъяськимы. Ӝоген Даша нылмы вордскиз, собере — Полинамы. Нялтас вераса, туэ мон песятай луи ни, бадӟымез нылмы Варя нунок кузьмаз. Нош кузпалы та вакытэ «Италмасын» уг кырӟа, уг экты ни. Аслэсьтыз нимаз предприятизэ кылдытыса, нылпиослы крезьгуръя урокъёс сётъя, пӧртэм крезьгуро инструментъёсын шудыны дышетэ.
Полина нылмы пытьымыя кошкиз. Ма, пичи дырысеныз ик со ми сьӧры репетициосы ветлэмын. Уксё поттон вылысь кырӟаса-шудыса ветлыкум но, со я Лымы ныл луылӥз, я монэн ӵош дуэтэн кырӟалляз. Быгатонлыксэ волятӥз Ижысь крезьгуръя школаын, дышетскиз скрипкаен шудыны, нош бӧрысь капчиен пыриз Москваысь культурая институтэ. Сое йылпумъяса, Иже берытскиз. Ойдо, шуисько, «Италмасын» астэ эскерод. Но солэн но, аслам сямен ик, пумитъяськон мылкыдыз вал. Уг, шуэ. Мыным, пе, золгес кельше кун филармониысь «Золотая мелодия» оркестр. Отчы, пе, курисько. Но ӝоген пумитъяськон мылкыдыз тӧлӟиз, лэся. Ачим ик валаса ӧй вутты нылылэсь «Италмасэ» вуэмзэ. Табере мыным шуэ: папа, кыӵе мыным татын кельше! Озьы ми соин кыкнамы табере ансамблямы кырӟаськомы. Куаразэ ушъяло, жингрес шуо. Кыӵе атайлы уз кельшы, пиналзэ ушъяло ке. Мон но данъяськисько соин. Кивоштӥсе будӥз.

Полина нылыныз

— Кытын но кызьы шутэтскиськоды сцена улонлэсь? Ма кужым сётэ творчествоен вырыны?

— Гуртын будэм адями бере, туж яратӥсько музъем ужен вырыны. Городлэсь кыдёкын ик ӧвӧл сад-бакчае вань, музъемез трос ик ӧвӧл, но мон котькуд кесэгзэ утялтыса возисько. Помидор, пӧсьтурын, сяська — ваньзэ ачим кизисько-мерттӥсько. Тани али но квартираысьтым укно дуръёс вож удъёсын тырмытэмын. Котькудзэ собере чупаса сямен музъеме мерттӥсько. Сюлэм ик нясь-нясь луэ.

Елена Никитина

Ангелина Снигирева
By Ангелина Снигирева Май 7, 2019 10:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<