Улонэз яратон уг кысы

Ангелина Снигирева
By Ангелина Снигирева Май 8, 2019 14:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Улонэз яратон уг кысы

Шаерамы Быдӟым ожысь 241 ветеранъёс улэпесь на. Соос пӧлысь огез — Дэри ёросысь Шайтангуртын улонзэ ортчытэм 98 аресъем Евдокия Матвеевна Князева (Васютина). Тылож дыръя со Москваез тушмонлэсь утиз. Отечественной войналэн орденэныз но «За отвагу», «За битву под Москвой» медальёсын пусъемын. Кузпал но ачиз кадь фронтовикез Геннадий Князевез пумитаз, ӵошен будэтӥзы 6 пинал. Соослэн 12 внуксы, 20 правнуксы но 1 праправнучказы вань ни.


«Выль гуртэз» узырмытон

— Улон даурме малпасько ке, бӧрдытэк уг чидаськы, — бездэм синъёсысьтыз кисыриосын кырылэм бамъёс вылтӥз виясь синвуоссэ ӵушылыса, тодаз вае Евдокия Князева. — Дядяе 1927-тӥ арын ик, туберкулёзлэсь, кулиз, мыным соку 6 арес гинэ вал. Туссэ син азям пуктыны уг валаськы ни. Нэнэлы ми огмылэсь пичи мукетмы 5 кузя нылпиос кылимы. Юртъермы юн вал. Гидын ыж, парсь, вал, скал вордылӥмы. Кызьы ке будысалмы, вылды. 1932-тӥ арын сӥзьыл картошкамес копаса быдтӥмы, гулбече пыртӥмы гинэ, милемыз кулакъёс радэ пыртӥзы. Вочак (ваньзэ) пудоез нуизы соку гинэ кылдӥсь «Выль гурт» нимо колхозэ. Кеносэз, чумез, конюшняез, лапасъёсты сэрттыса, колхозлы сётӥзы. Нош кыӵе шумпотӥзы кутсаськон лапасмылы. Весь вань котырез, тӥрлыкез поттаса гинэ ӧз буйгалэ — гулбечысь картошкаез но одӥгтэм талазы. Нэнэ картошка пуд улэ дӥсь, сиён ватӥз вал, сое но шедьтӥзы. Выламы мар вань, соин буш коркае кылимы. Тусьты-пуньы гинэ но ӧз кельтэ. Али ке но малпасько: оген 5 пиналэз будэтӥсь кышномуртэ малы меда жаляллямтэ? Милесьтым но узыр улӥсьёс вал ук. Картэн улӥсьёсты малы ке ӧз исалэ. Оло, дядяймы кулэмысь таос пала дурбасьтӥсь уз сюры, шуизы. Ми вылтӥ трос-а байкизы ни меда, эх…
Ыме поныны сиён кыльымтэысь, милемыз кызьы будэтыны паймемысьтыз, нэнэмы гурт пумын огназ улӥсь узыргес пересь пиосмурт доры куриськиз. Кыӵе-кыӵе возьдаськиз, дыр! Милемыз бордад уд принятьты-а, шуисько, пе. Оло, жалям, оло, оген улыса жадем, но пиосмурт соглаш кариськем. Но витьнамес ик дораз пыртыны лэзьымтэ. Кыксэ пичиоссэ нылдэ-пидэ ваёд, пе, шуиз. Озьы монэ но вынме нэнэ со пиосмурт доры сьӧраз нуиз. Но татын улон воксё но ческыт ӧз йӧты. Кӧня йырам коказ со воргорон. Кошкы татысь шуыса, йырам гинэ мыжге вал. Йырси улысь лыз-вож луэмез уг адӟиськы ук. Нэнэмес но озьы ик жугылӥз. Кӧттырымон сиськыны но ӧм дӥсьтылэ. Чечызэ гинэ но огпол но ӧм веръялэ. Нош пасеказ бадӟым вал.
Нэнэ нянь сукыри пыже но, дӥсь улам лушкем поныса, кельтэм коркаямы ыстэ вал. Отчы мынэсьтым 4 ареслы гинэ бадӟым апае улыны огназ кылиз угось. Самой бадӟымез апаймы курадӟыса улонлэсь пегӟон вылысь но вазь бызиз. Агае, пуэз уд йырйы ук шуыса, Иже кошкиз, заводэ интыяськиз. Озьы огез гинэ апае нокинлы кулэтэм мурт кадь эстымтэ коркан улӥз. Ӟырт кезьытъёсын нэнэ пу но пильыса солы сётъяз. Дэмен гурзэ но эстылӥмы. Но ваньмыз со лушкем вал. Ваньбурзэ лушкаломы шуыса, пиосмурт туж чаклаз. Одӥг ымтыр сиёнзэ апайлы висъясалыз ке, ӧй куанермысалыз. Но чурыт куртчем адямиез уд тупаты. Апаймы бызем бере сюлэм ганяк шокчиз ни вал. Но кема дыр ӵоже сютэм но кезьытын улэмысьтыз, мугораз пӧськыос потӥзы. Паласькись висён кутскем кожаса, сое доре вайыса куштӥзы. Больницаын эмъямзы бере мукет муртлы бызиз ни.
«Выль гурт» колхозын вазь ик ужаны кутски, аслым ачим сиён коть поттыны быгато шуыса. Суй кужым вань-а, ӧвӧл-а, ӧз учке — кор дасяны ыстӥзы. Лымыез коласа, пыдъёс пыдесозь кынмылӥзы. Кутэн ветлӥськом вал ук. Нош война кутскемез тодӥ ни, Сарапул трактэз лэсьтыкумы. Нюлэс пыртӥ сюрес лёгыны косизы угось. Ярам, писпуослэсь выжыоссэ пиосъёсын ӵош порылыса вуттӥмы вал. Война кутскемен воргоронъёсты ваньзэсты нуизы. Колхозэ пинал нылъёс но пичи пиос гинэ на кылимы.

Войнае басьтон 1942-тӥ ар


Москваез тушмонлэсь утён

— Войнае семьяысьтымы нокинэ но уз басьтэ шуыса, малпай вал, — мур лулӟыса, айшетсэ посыны кутскыса, дырекъясь куараен веранзэ азьланьтэ Евдокия Матвеевна. — Выны пичи на, агае «Ижмаш» заводын ужа. Аслым повестка вуоз шуыса, ӧй ик малпалля. 1942-тӥ арын ноябре шӧдтэк шорысь сое басьтӥ. Мыным соку 21 арес вал ни. Нушыен васькытэм кадь луиз: малы меда монэ? Соку шараяськиз: председательын ужась годоке (ас ёзэ) Можги Таня мынэсьтым мозмытскыны амал утча ни вылэм. Нянь понна керетылоно луиз угось. Соку мон колхозын зернотокын кладовщик луыса ужасько вал. Ужаны потэм адямилы толэзяз 1 килограммен нянь сёто вал. Весэн мерталлязы, ява. Нош урожай трос, но сое вочак фронтэ келяны косылӥзы. Мешокъёсын-мешокъёсын ныр ултӥ кошкись нянь понна, сютэм улӥсь калык понна сюлэм чигиськылӥз. Нылпиед вань ке, коть сютэм кул — килограмм няньдэ трос-а сиёд?Та понна предэн керетылӥм. Керетӥсез кин яратоз ни?
Огпол Можги Таня доры военкоматысь юалляськыны лыктӥллям, войнае адямиосты шедёзы-а шуыса. Озьы пред 3 фамилля верам: Шайтангуртысь монэ, Екатерина Ураковаез но Капиталина Ивановаез. (Табере соос огзы но улэп ӧвӧл ни, войнаысь берытскемзы бере кулӥзы). Милемыз фронтэ бичаны лыктэмын вал Москваысь офицеръёс. Москваез тушмонъёслэсь утись кулэ луэм. Пиос передовое келямын вал. Поездэн 10 нунал нуизы. Со дыр куспын Агрызын гинэ сюдӥзы, отӥяз — пыр сютэм. Котомкаысьтым нянь сукырие юрттӥз. Куд-огез воксё катьтэммылӥзы. Москваысен ни рос-прос сюдӥзы, дӥсязы. Шайтангуртысь нылъёсын дэмен аэростатной часте сюромы шуыса малпаськомы вал, но милемыз пӧртэм точкаосъя люкизы. Отрядамы 7 нылъёс, 3 пиос люкаськимы. Якшур-Бӧдья ёросысь Тыло гуртысь но Елабугаысь нылъёсын ӵош тупамы — талы туж шумпотӥ, службаын дор палъёсысьтыд адямиос котьку оскымонэсьгес угось.
Первой постэ ыстэмзы бере бӧрдыса сылӥ. Олокыӵеез лыктоз, пыӵалме но асме ыбоз кадь малпаса. Но эскериськыса сылонлэсь секытгес вал ог 10 метръем аэростатэз уйлы быдэ омыре поттон. Урдэсъёстӥз тросъёсын 6 кузя кутыса, сое мырдэм вормиськомы вал ук. Москва вадьсы инме огдыре 430-лэсь трос аэростат ӝутоно вал, висказы ог 800 метр. Со аэростатъёслы луыса, тушмонъёс Москва вылэ урдскыны ӧз быгатэ ни. Газэн тырмытэм аэростат борды шуккиськыса, пуштылӥзы каргам самолётъёс. Бомба куштыны, инмысен городэз адӟыны но аэростатъёс люкетылӥзы.
Ӵукна вуыса, со аэростатэз выльысь инмысь лэзёно, биваке нуоно вал. Туж чакласьконо луылӥз, ез, липет борды я эшшо кытчы ке медаз йӧты шуыса. Огпол ез борды шедьытӥм — пуштӥз, ымныръёсмы но ӵушкаськизы. Нош аэростат секыт. Вормыны суй кужым уг тырмы. Огез нылмурт, куто кожаса, эшъёсызлэн киысьтызы лэзиськем аэростат сьӧры ик ӝутӥськиз. Уз вормы шуыса валамез бере лэзиськиз но, аэростатэз думылоно кол вылэ усьыса, интыяз ик быриз. Тужгес секыт луэ вал тӧло дыръя — соку думылэм аэростатэз кутон понна ӟигар бырылӥз. Сютэм кырныжъёс кадь, тушмон самолётъёс Москва вадьсы вуылӥзы, бомбаос куяллязы, ыбылӥзы. Оло, кирос карод, оло пыӵалдэ кутод, оло, аэростат сярысь сюлмаськод. Инмар быронлэсь утиз.
Сиён 10 нуналлы огпол вуттылӥзы. Сое котькызьы тырмыты. Нэнэ гуртысь уксё ыстӥз вал. Сое но лушказы. Но дӥсе но, кыӵе ке сыӵе сиёнэ но котьку вал. Воргоронъёслы тамак сётъязы, милемлы одӥг шоколад кампет. Гуртын таӵезэ но ӧй адӟысал. Шайтангутын, оло, эшшо но сютэмгес улысал. Гуртысь иворъёс вуылӥзы угось. Нэнэ лушкем гожъялляз секыт вакытъёссы сярысь. Шайтан гурт котырысь ик пичиесь гуртъёсысь колхоз предъёс калыксэс сёдон вылысь ю тысьсэс ватыса кельтылӥллям. Тае тодӥллям но, со предъёсты тюрьмае пуктӥллям.

Москваез утён вакытаз


Вормонэз пумитан

— Службаме умой нуэме понна монэ 3 пол таукаронэн пусйизы, — документъёссэ, медальёссэ возьматыса, шуэ Евдокия Князева. — Цирке представление учкыны но лэзьязы. Нылъёс мавзолее но ветлӥзы, туж потэ вал Владимир Ленинэз адӟемзы. Ӧз кылды — ож вакытэ солэн шӧйыз Москваысь поттэмын вал. Олокытчы ветлыны дыр но ӧй вал. 2 часлы быдэ постын ог-огмес вошъяллямы. Учконо вал, кудпала тушмон самолёт лобӟе, кудпалась со вуэ.
Война бырон азьын ӝыны ар азьвыл монэ сиён пӧран выжтӥзы. Отын каньлыгес, кӧня ке чеберскод но, шуизы. Уг мыны, мон пӧраськыны уг быгатӥськы, шуисько. Колхозэ ужаны пичиысен кутскемен, сиён рос-прос пӧзьтыны дышытэк ик кыли ук. Пӧзьтод но, уз кельшы, возьытэ усёд шуыса пумитъяськи. Но приказ вань ке, кытчы трос пумитъяськод на? Постысен ик нуизы. Дышетом шуизы.
1945-тӥ арын 8-тӥ мае изьыны выдӥмы ни вал. Отрядысь мотористмы телефон дорын дежурствоын вал. Со сайкатӥз но шуэ: нылъёс, султэ, султэ, война быриз! Эн эрекчаськы, шуиськомы. Ум оскиське. Куддыр озьы эрекчаське вал ук. Таяз рад уг пӧяськиськы ни, шуэ. Тэтча, шумпотэ. Солэн шумпотэмез милемлы но паласькиз, ми но миндэръёсын, шобретъёсын ог-огмы шоры лэзьяськиськом. Шумпотэммы пушкамы уг тэры. Нош ӵуказеяз Москваын туж бадӟым салют вал. Асьмелэнъёс немецъёс ки улысь кыӵе ке городэз мозмытэмзылы быдэ, Москваын салют сётъяллязы. Нош 9-тӥ мае кадьзэ ӧм на адӟылэ вал. Калык зол шулдыръяськиз.
Берлинэз басьтэмзы бере милемды оген-оген доре лэзьяны кутскизы. Монэ Москвае кыльыны косо вал. Квартира но сётом шуылӥзы. Эшъёсы ӧз кыле бере, огнам ӧй дӥсьты. Доре но бертэме потэ ни вал. Вордскем палъёсме 3 ар ӧй адӟылы ук. Июле гинэ лэзизы. Ижысен Шайтангуртозь 30 иськемез пыдын ортчи. Корка пырытозь, вордскем музъем вылтӥм вамышъясько шуыса, сюлэм ӧз оскылы. Пель сьӧрын ялан чузъяськылӥзы на ыбылӥськем, пуштылэм куараос. Али ке но уйвӧтам аэростатэз нуллӥсько, постын сылӥсько.
Иже интыяськыны малпасько вал. Но агае шуиз: сиськытэк улыны-а, пе, городэ мынод? Гуртэ ик кыль, отын коть картошка мерттод, нянь будэтод, пудо вордод. Колхозын но ужась ӧз тырмылы. Та ик луиз колхозэ берытскеме. Можги Таня председатель луыса уг ужа ни вал — оло, етӥз кылызлы луыса ик, гуртын сое чидаллямтэ ни, городэ кошкытӥллям.
Шайтангуртэ бертыкум, созэ но малпай: выны но ӝоген фронтысь вуоз, дэмен каньылгес луоз. Сое войнае 17 арес тырмемез бере ик 1944-тӥ арын басьтӥзы. Украинаын самолетъёсы бомбаосты ӝоктэ вылэм. Со 1952-тӥ арозь служба нуиз на. Ми Вормон Нуналэз пусйыкумы, со ожмаськиз на. Война угось соку ик ӧз чалмы.

Кузпалыныз

Гуртэз ӝутон

— Шайтангуртэ берытскеме бере 5 ар ортчыса, гуртысьтымы ик Геннадий Князевлы бызи. Дорам ветлыны кутскемезлэсь азьвыл мон сое рос-прос уг тодӥськы вал. Войналэсь азьвыл огпол гинэ синъёсаз учкеме вань. Пызь выписать кариллям, песянаеныз ӵош кладовкае лыктэм. Ачиз угось городын улэ ни вал со. Оло, мынэсьтым 3 ареслы пиналгес луэмысьтыз, нокыӵе ик ӧз йӧты. 1942-тӥ арын, 18 арессэ тырмытэмез бере, Геняез фронтэ нуиллям. Быдэс Европаез — Австриез, Румыниез, Югославиез, Чехиез, Венгриез — ортчемын. Десантной войскаосын службазэ нуиз. Парашютсы усьтӥськымтэен, соку туж трос эшъёсыз музъем вылэ усьыса из кадь пазьгиськылӥллям. Уйин но, усе кожаса, сайкалляз. 2 пол ранить луэмын, шораз тушмонъёс ыбылыса. 1945-тӥ арын 7-тӥ мае Шайтангуртысь сузэрезлы похоронка но вуэм. 2 толэзь ортчыса гинэ, Геня солы гожтэм, Венгриысь госпитальын эмъяське «Буре ваён» книгаын но быремын шуыса пусъемын вал. 2001-тӥ арын кулӥз. Нош тятяез, Николай Князев, Курской дугаын 1941-тӥ арын быриз.
Куддыр малпасько, кыӵе секыт вал улонэ. Но нылъёсы буйгато: нэнэ, озьы эн шуы, тон шудо ай, война бере туж тросэзлы карт ӧз ни сюры, нош тон картэн улӥд. Со, зэмен ик, озьы.

Вормон нуналэз арлы быдэ возьма

1947-тӥ арын фронтысь бертэмез бере Генадийез колхоз кладовщике пуктӥзы. Пиос война бере ӧжыт вал. Нылъёс уж дораз ик лыкто вылэм. Теткаез шуэм: ужась анайлэсь нылзэ кышнолы вай, азьтэмез кулэ ӧвӧл. Нэнэ туж ужась вал. Киосыз но пиосмуртлэн быдӟаесь вал. Эшъёсызлэн араны вӧзаз султэмзы уг поты вылэм. Жадьытэ, сьӧраз уйиськыны секыт, пе, шуо вал. Вӧзаз мукет уд буды ук. Соин но Геня монэ бырйиз, лэся. Ачиз но адӟымон, визьмо вал. Огзэ фермаез ӝутэ, мукетаз лэзё. Котькытын порядокез яратылӥз. Куспамы тани пырисьёс сюрылӥзы. Котьмае чидай. Но монэ ноку ӝож ӧз кары. Кизэ вуттэмез, лек кылзэ верамез ӧвӧл.
Генялы луыса, нылпиос вордӥськыса, аслам но улонэ каньыл луиз. Солэсь азьвыл угось ялан секыт уже — нюлэс дасянэ — ысъяллязы.1950-тӥ арын январь кутсконын дораз улыны тубеме бере гинэ нюлэскы ӧз келялэ ни. Колхозын ик кытчы ыстозы, отын ужай. Кунян сюдӥ, скал кыски. Отӥяз бакча сиён будэтонъя бригадаен кивалтӥ. Кубиста, помидор, огреч маке кузьда теплицаосы кизьылӥмы, отысь сое бусые поттылӥмы. Соку колхоз «Свобода» нимаськылӥз, миллионер лыдъяськылӥз. 1970-тӥ аръёсы быдэс Ижез бакча сиёнэн сюдӥськомы вал. Студентъёсты, школьникъёсты гужембыт бусыын ужатъямы. Помидорез гинэ но кӧня-кӧня уроно, ӝутъяно, урожайзэ бичано вал. Уборка кутскыку, складэ 2 сменае ужаны поталлямы. Калык соку кылзӥськись вал, кытчы гинэ косӥсько — кылзэс ӧз вералэ, ваньзэ быдэстылӥзы.

Нылпиосыз бордаз

Жаль, 1980-тӥ аръёсы теплиаосты ваньзэ быдтӥзы, интыяз коркаос ӝутыны кутскизы. Фермаосты но быдтыны кутскизы. Шайтангуртын 3 скал ферма, 1 кунян гид, вал гид возьылӥзы. Уж ваньзылы тырме вал. Али 1 гид кылемын. Таӵе улон понна ожмаськимы шат? Калыклы огвакытэ ужаны ик нокытын вал ни. Али артысь Ожмос гуртын «Бабинское» предприятие ужа, гуртоосмы отчы ветло. Ярам, воксё бырыны ӧз сётэ. Но Шайтангурт воксё кулэсмиз. Ог сюрс юртъер гуртамы сылэ вал. Али ульчаямы 7 коркан гинэ на улӥсез. 9-сэз буш сылэ. Куд-огез кемалась кесямын ни. Аслам 6 нылпиосы пӧлысь 4-ез гуртын ик уло. Огез нылы — Рязаньын. Ижысь нылы кӧня ке ар талэсь азьло бордазгес карыны выриз. Квартира басьтыны сертификат висъязы. Соин мыным квартира висъязы. Гуртын газ ӧвӧл, эстыны толк уг тырмы ни. Весь кынмемысьтым но, городэ карыны выриз. Кызьы ке городысь улонлы ӝог дыши. Гуртэ бертэм потылэ ик. Но султыса гинэ уд кошкы ни. Бакчаын но бугыръяськысал на. Но йыры кыска. Суйы 4 ар талэсь азьло тӥяськиз но ӧз бурмы ни — лыосыз ваче ӧз лякиське ни. Но керттӥськыны, черсӥськыны турттӥсько ик. Тэк пукыны секыт — нунал туж кузь. Нылпиос но трос. Пӧзьыен-носкиен ке но юрттыны мед быгатом. Али капчи улон. Пудо утён, гурт эстон ӧвӧл. Мон сомында нылпи вордӥ. Уйин но выжъёсты миськыны, сиён пӧраны султӥсько вал. Огпол но пась но кырсь дӥсен ӧз ветлэ.
Ижын больницаез но, аптекаез но, черкез но артэ. Машинаослы гинэ паймисько: малы соосты сомында потто? Мон улонам Иже пыдын ветлӥсько вал — ог 30 иськемез пыдын ортчылӥ. Соин но тазалыке таӵе кема улыны тырме, дыр. Нылпиос ӵемысь куное вуыло. Куддыр квартирае но уг тэро — сомында кузя люкасько. 100 аресозь ул ай, шуо. Сокема улыны быгато-а — ӧйтӧд. Сием потон азьло кадь ӧвӧл ни. Нылы силом косэ. Сиён но кӧш потэ, номыр ческыт уг йӧты ни. Но улонэз яратон уг кысы. Золгес висьыны усьыкум, куло ни кожасько. Бурмисько но, нош ик катьяськисько. Нылы шуэ, кулон сярысь весь эн вера, ачиз лыктоз, уз юа тынэсьтыд. Соиз озьы — уд пыкиськы ни. Быдӟым Вормонлы сӥзем парадэ мыныны дасяськисько. Арлы быдэ сое возьмасько. Шудо улонмы понна быризы ук эшъёсы. Ми войнаысь бертэм бере, отӥяз но трос аръёссэ та праздникен ӟечкыланы, сӥлы карыны тодазы ӧз лыкытылы. 1980-тӥ аръёслэн кутсконазы гинэ фронтовикъёслы тау карыны ӧдъязы. Табере дырын-дырын школаосы но ӧтчало. Милесьтым адӟеммес медаз адӟе шуыса, урокъёсазы вуылӥсько. Эрико но кӧттыр улонлэсь номыр ӟечез ӧвӧл!

Елена Сараматова

Ангелина Снигирева
By Ангелина Снигирева Май 8, 2019 14:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<