Тэле ветлыны уг яра

Ангелина Снигирева
By Ангелина Снигирева Май 13, 2019 11:34

Тулыс тылпуос йылэмен, пӧсь кариськемен, Удмурт Республикаысь Правительство 7-тӥ майысен 1-тӥ июнёзь шаерамы тылпулэсь утиськон нуналъёсты юнматӥзы.

Шаерамы тылпу потылон учыръёс ичи ӧвӧл
Фото: Л. Козлов

Арлы быдэ тулыс нуналъёс бадӟым шугъяськон ваё спасательёслы: я тудву куашетэ, я тылпуос гомало. Таяз учыре кышкытлык вае «горд» атас. Жаляса верано, кышкыт учыръёслэн потон мугъёссы ӵем дыръя адямиосын ик герӟаськемын луэ: я кысымтэ тамак пумзэс кушто, я тылскем бервылзэс уг эскеро. Апрель толэзь ӵоже 130 пол кӧс турын ӝуан учыръёс пусъемын. Ӵемгес тылпу гомаз Ижевск котырысь бусыосын. Ёросъёсысь спасательёс но трос пол тылпу кысыны потазы. Кылсярысь, Яр ёросын апрель толэзь ӵоже 11 пол тылпу гомаз. Тылпу потон мугъёссы тросэз адямиослэн янгышенызы герӟаськемын. Озьы 18-тӥ апрельысен кутскыса, нуналлы быдэ бусыосын кӧс турын ӝуамын Ворца, Укан, Озёрки гуртъёс котырын, Ярысь ульчаосын.
Май праздникъёс но тылпу кысӥсьёслы трос сюлмаськонъёс ваизы. Чылкыт омырын шутэтскыны но ӵынатэм сӥль сиыны яратӥсьёс соку ик нюлэскы кыстӥськизы. Шулдыръяськем беразы куд-ог адямиос тылскем бервылъёссэс рос-прос кысытэк кельтылӥллям. Россиысь МЧС-лэн Удмурт Республикая Валтӥсь управлениысьтыз пресс-службаез ивортэмъя, спасательёс нуналлы быдэс тылпу кысонэ пыриськизы. Бадӟым тылпу вал 5-тӥ мае Дэри ёросысь Крестовоздвижинское гурт котырын. Ӝуась кӧс турын гуртысь коркаос вылэ вӧлскыны быгатысал, ярам дыраз тылпу кысӥсьёс вуизы.
Кӧс нуналъёс улэмен но тӧласькись куазьлы луыса, Удмуртиысь нюлэсъёсын но 15 пол тылпу гомаз ни, 22,4 гектар муос ӝуазы. Тужгес но кышкытэз вал «Нечкино» национальной паркын, отын 18 гектар вылысь сик пеньӟиз.

— Инкуазез чакласьёс ивортэмъя, матэктӥсь нуналъёсы куазь эшшо но пӧсьгес кариськоз, — шуиз Инкуазь узырлыкъёсъя но инкуазез утёнъя министр Денис Удалов. — Кышкытлыклэсь утиськон вылысь 12-тӥ июнёзь шаерысьтымы нюлэсъёсы пыраны лэземын ӧвӧл: машинаосын но, пыдын ветлӥсьёслы но. Та вакытэ сикетӥ калгыны, бадӟым ужрадъёс ортчытыны, нюлэс дасяны уг яра. Каӵе куронэз тӥясьёсты кыл кутытон улэ кыскозы но нимаз адямиослы 5 сюрс манетозь штраф сётозы, кивалтӥсьёслы — 50 сюрс манетозь, огазеяськонъёслы — 1 миллион манетозь. Тылпу потон учыръёс кылдӥзы ке, уголовной уж ӝутозы.
Тылпулэсь утиськон нуналъёс ялэм дыръя чакласькон ужъёс эшшо но чурытгес луозы. Нюлэс удысын ужасьёс, тылпу кысӥсьёс, дружинникъёс но казакъёслэн огазеяськоназы пыриськисьёс нуналлы быдэ сикъёсты эскерозы. Уже кутозы пилоттэк лобась аппаратъёсты но. Нимаз адямиосты но сакгес кариськыны куро. Нюлэсъёсын тылпу потон учыръёсты синйылтыку, ӝегатскытэк ивортоно Инкуазь узырлыкъёсъя но инкуазез утёнъя министерстволэн диспетчерской службаяз: 56-93-60 но 8-800-100-94-00 номеро телефонъёсъя яке Россиысь МЧС-лэн 01, 101 но 112 номеро телефонъёсаз.
Озьы ик спасательёс ӵекто:

— радиоез, телевизорез лэзьыса возёно но быгатэмъя иворъёсты кылзоно;

— электро тыл кысон дырлы котьку ки улын возёно фонарик, батарейка, тылпоттон но сюсьтыл;

— бакчаысь бекчеосты вуэн тырмытоно;

— жуг-жагез сутоно ӧвӧл, эстӥськись гуръёсты чакласа возёно;

Валентина Емельянова

Ангелина Снигирева
By Ангелина Снигирева Май 13, 2019 11:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<