Пичи Пургалан 30 жаг возён контейнерной площадкаос лэсьтозы

Ангелина Снигирева
By Ангелина Снигирева Май 29, 2019 16:34
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Пичи Пурга черкогуртын басьтӥськизы жаген контейнеръёсты возён площадкаос лэсьтон борды. Куронъёслы тупась жаг люкан интыос калыклы но, жаг нуллӥсь предприятилы но пайдаен берыктӥськозы.

Контейнеръёс липет улын но кенерамы луыын кулэ
Фото: Ангелина Снигирёва

Черкогуртын жаген нюръяськонъя выль радлык пыӵаны кутскем дырысен люкаськись отходъёслэн лыдзы 2 поллы унояз, шуиз ёросысь кылем-мылемъёсты поттонъя предприятиен кивалтӥсь Эдуард Султанов. Калыклэсь жагзэ дырыз-дыръя утялтон понна контейнеръёс пуктылоно на.

Туж умой, жаген выль сямен нюръяськыны кутскизы шуыса, — вераз воргорон. — Солэсь азьвыл ёросын 5 поселениосысь жаг чик уг поттӥськы вал, гурт калык кылем-мылемъёссэ юнме шорысь кылдэм свалкаосы нуллӥз, нюкъёсы куялляз. Табере бусыосмес, нюлэсъёсмес жаглэсь утиськом, шуыны луоз, угось котькуд гуртын жаг поттон радъямын. Нырысь-валысь, уката ик лымы шунам бере, калык ӧч карыса-а, йырыз курен-а жаге поттаны кутскиз кыедлы ярась кылем-мылемъёссэ, кылсярысь, сисьмем картошсэ, мешокъёсы сюй тырыса вайылӥз, куд-огез жагзэ юри кисьтыса но кельтылӥз. Зэм, берло дыре таӵе учыръёс ӧвӧл ни, калык валаны кутске выль сямен ужамлэсь кулэлыксэ но пайдазэ.
Пичи Пурга черкогуртын выль системая ужаны азьлапал ик дасяськыны кутскиллям. Озьы 2019-тӥ ар кутскон азьын куд-ог урамъёсы 30 контейнеръёс пуктылэмын вал ини, солэсь азьвыл гуртоослэсь жагзэс мешокъёсын поттазы.

— Контейнеръёс пуктылэмлы калык шумпотэ, угось котькин аслыз тупась дыре, машинаез возьматэк, отходъёссэ отчы куштыны быгатэ, — вера Пичи Пурга муниципал кылдытэтлэн йырыз Любовь Логинова. — Но выль системаез улонэ пыӵатыны тыршыса дыртӥмыгес, озьы контейнеръёс пуктылӥм ке но, котькытын соос санитарной куронъёслы уг тупало, кытын ке улоно коркалы матынгес, кытын ке кыдёкынгес. Соин, адямиослэсь мылкыдзэс лыдэ басьтыса, перевозчикъёсын вераськыса, басьтӥським нимысьтыз площадкаос лэсьтон борды.
Та вакытлы черкогуртын 5 выль площадкаос тупатэмын ни, контейнеръёс липет улэ пыртэмын, кенерамын, нимаз люканы луэ векчи но бадӟым жагез, угось соосты пӧртэм вакытэ, пӧртэм техника поттыны кулэ. Сыӵе площадкаосы зор-кот но уз шедьы ни, пакетъёс но тӧлъя уз кошке, пуныос но жуг-жагез тус-тас уз каре.
Поселениын оглом ог 100 интыысь жаг потто, ваньзэ липыны, кенераны 1 миллион манет пала кулэ, вераз Л. Логинова.
Площадкаос лэсьтон ӝега, коньдон окмымтэен. Но пичи пургаос та ужез лэсьтон понна шыръян амал шедьтӥзы. Ёросысь жаг поттон понна кыл кутӥсь предприятие контейнеръёсты корт листъёслэсь ас кужыменыз лэсьтыны ӧдъяз, озьы арберилэн дуныз трослы кулэсме, пе. Та амалъя ужзэс радъяны быгатӥзы ке, черкогуртын 2 ар ӵоже мешокъёслэсь чылкак куштӥськыны пӧрмытозы.
Нош быдэс Удмуртиын 7 сюрс 214 площадкаос лэсьтэмын ни, отчы 17 сюрс 286 бакъёс пуктылэмын. 40 процентаз учыръёсы жагез контейнеръёсы люкало ни, но 60 процент учыръёсын мешокъёсын выро на. Мешокъёслэсь воксё куштӥськон понна 5 сюрс 600-лэсь трос площадкаос кулэ, вера «Спецавтохозяйство» улос оператор.
Валэктон вылысь: площадкаос лэсьтон, отчы контейнеръёс басьтон, соосты чылкыт возён понна кыл кутэ музъемлэн, кытчы жаг люкан радъямын, кузёез, со быгатэ луыны муниципал кылдытэт, трос квартираем юртъёсын улӥсьёс, предприятие.

Ангелина Снигирёва

Ангелина Снигирева
By Ангелина Снигирева Май 29, 2019 16:34
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<