Нырысь интыын — сад но школа

Ангелина Снигирева
By Ангелина Снигирева 29 мая, 2019 17:02

Воткаын матысь дыре социальной удысысь 59 юртъёсты — школаосты, нылпи садъёсты, музейёсты но мукетсэ — выльдыны чакламын. Мар бордысен кутскозы, кытысь талы коньдон карозы?

А. Заметаев но Д. Сурнин
Фото: udmurt.ru

Та нуналъёсы Вотка каре потаз лэсьтӥськонъя, ЖКХ-я но энергетикая министр Дмитрий Сурнин. Вотка городлэн йырыныз Алексей Заметаевен ӵош со тупатъямез-выльдэмез кулэ карись куд-ог юртъёсы вуылӥз.
Кивалтӥсьёс нырысь ик вамыштӥзы Вотка городлэн историезлы но культураезлы сӥзем музее. Солэн юртэз пуктэмын ни 19-тӥ даурлэн пумаз — 1882-тӥ арын. Берло дыре отын кӧня ке учреждениос интыяськемын вал. Та вакытэ буш сылэ — ярантэм луэмын. Юнматэмез кулэ каро боддоръёсыз, воштоно укнооссэ. Со сяна, липетсэ выльдоно, толалтэзэ лымы отын мед возиськоз шуыса. Угось музей интыяськемын городлэн шораз, вӧзаз ик транспорт дугдылон инты. Озьы кышкытлык кылдэ, липет вылысь лымы, йӧ адямиос вылэ усьыны быгатозы шуыса. Эшшо ке музей культурая ваньбурен лыдъяське — тупатъяку, тае но одно лыдэ басьтоно, нимысьтыз куронъёсты чаклано луоз.
Музейлэн директорез Оксана Фонарькова туж оске, юртэз тупатъялозы шуыса. Со чаклам ни: городлэн историеныз, туннэ улонэныз герӟаськем турмаршрутъёс усьтозы, синпель кузьымъёсын вуз карон радъялозы но мукет.
Выльдэмез возьмало городысь 11 школаос — 10 номеро школалэн директорез Татьяна Задорожная шуиз:

Школа пуктэмын 1961-тӥ арын, со дырысен отын тупатъян ужъёс одӥг пол но ӧй вал. Липетэз туж урод бере, зор-кот быдтыны кутскиз боддоръёссэ но — кирпичен-кирпичен пырдэ. Соин нырысь ик тупатъяно липетэз. Воштоно на укноосты, выж вылысь линолеумез. Лыдъямын ни: талы 10 но ӝыны миллион манет кулэ луоз.
24 номеро нылпи сад 10 номеро школаен огъёз луэ — 1960-тӥ аръёсы пуктэмын. Таизлэсь но липетсэ, укнооссэ выльдоно, ву, шуныт сётон гумыосты воштоно. Садлэн кивалтӥсез Елена Русских пусйиз: та нылпи сад одно кулэ, угось со котырын трос егит семьяос уло. Нылпи садзы 75 интылы чакламын ке, отчы 87 нылъёс но пиос ветло.
Нимысьтыз саклык — трос калык люкаськылон интыослы но. Вотка тымет котырысь оглюкетэз выльдэмын вал, П. Чайковскийлэн юбилеезлы сӥзьыса, 2015-тӥ арын. Солэн кузьдалаез 2 иськем 266 метр луиз. Но 540 метр кузьдаез озьы ик выльдытэк кылиз. Та ужез быдэстыны ог 21 миллион манет кулэ луоз. Оглюкетсэ коньдонэз Вотка городлэн но Удмуртилэн бюджетъёсысьтызы висъяны чакламын, кылемзэ — «Комфортная городская среда» программая.
Воткае вуылэмезлы йылпумъянъёс лэсьтыса, Дмитрий Сурнин пусйиз:

— Выльдыны чаклам социальной объектъёслы оглом 340 миллион манетлэсь ятыр кулэ луоз. Нырысь ик тупатъяно нылпи организациосты. Кытысь уксё кароно — город но, элькун но уртче малпаськизы. Амал сюриз: «Воткинские электрические сети» предприятилэсь ваньбурзэ вузаса.
Министр вераз, та предприятилэн ваньбурез вузамын ке но, ужан интыосыз кулэстэмын ӧвӧл. Предприятиез басьтӥсьлэн вань йӧн-йӧн планэз, кызьы предприятиез юнматон вылысь кӧня ке миллиард манет инвесторъёслэсь кыскыны луоз.
Ватсано на: социальной объектъёсты тупатъям сяна, Воткаын выльёссэ но юртъёсты лэсьтоно. Кылсярысь, туэ ик 4 ясли ӧсъёссэ усьтоз — котькудаз 80 инты. Со сяна, йӧ катоклы проект дасяське ни. Матысь аръёсы озьы ик пуктозы выль школа но поликлиника. Матысь аръёсы город тодмантэм воштӥськоз, отын улон-вылон трослы ӟечгес луоз.

Сергей Захаров

Ангелина Снигирева
By Ангелина Снигирева 29 мая, 2019 17:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<