Муос зорез витё ни вал

Ангелина Снигирева
By Ангелина Снигирева Май 16, 2019 15:22
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Алнаш, Вавож, Камбарка, Сарапул но Можга ёросъёс ю тысь кизёнзэс йылпумъязы ни. Шаерамы 15-тӥ майлы шорлыдын 85 процентэз ужъёс быдэстэмын. Миым та вакытэ лыдпус 57 процент вал.

Умой ужало Кизнер, Юкаменск, Яр, Пичи Пурга, Грак, Вотка, Дэри, Кияса но Сюмси ёросъёс. Татын 80 но солэсь ятыр процент ужъёссы быдэстэмын ни. Со дыре ик Красногорск ёросын 58 процентэз гинэ ай кизёнзы йылпумъямын, Якшур-Бӧдьялан — 61 процентэз, Балезиноын — 69 процентэз. Гурт удысъя но сиён-юонъя министерствоысь будосъёсъя но музъем кусыпъёсъя ёзэн кивалтӥсь Алевтина Бурдина верамъя, бере кылемлэн мугез потэ хозяйствоослэн ужзэс радъяны быгатымтэзы бордысь. Но ӝеган отӥяз шуккыны быгатоз.

— Кизён вакыт 2 арнялы вазьгес кутскиз бере, гужем но 2 арнялы вазьгес йылпумъяськыны быгатоз, озьыен, кышкытлык вань кидыссэс музъеме бер согисьёслэн урожайзы кисьматэк кыльыны быгатоз шуыса, — вера Алевтина Михайловна.

Вылаз ик Удмуртиысь куазез эскерисьёс матысь дырлы зоръёс сӥзё. Шутэтскон нуналъёсы уйин воксё но -1-2 градус кезьыт луоз, нуназе 4-9 градус шуныт возиськоз, пе. Кынтылыса кема улӥз ке, озимойёс бырыны быгатозы. Татчыозь шаерамы 2 сюрс 328 гектар вылысь гинэ тол улэ кизем юос быремен пусъемын вал ай.

— Зор усем вылэ кынтӥз ке, сокем кышканэз ӧвӧл, — шуэ Алевтина Бурдина. — Узьымлэсь йылъёссэ чепыльтоз, но будос выль кужымен ӝужаны быгатоз на. Озьы ик турынъёс но, кукуруза но. Кӧс музъем вылэ кынтон уродэн берыктӥське. Нош зоръёсты муос возьмало ни вал: кӧсаса вуттӥзы, кидысъёс ӝоканы кутскизы. Табере буй-буй ӝужалозы. Зориз ке, ӝутӥськись рапс, ю-нянь нымы-кибыослэсь но гань-гань шокчоз — ляб дасям-утялтэм бусыосты, кидысъёсты пычей сиыны кутскемын ни.

Куазь сётӥз ке, арня куспын кизён йылпумъяськыны кулэ. Бусы юдэсъёс гинэ на кылемын угось.

Секыт югдур туэ етӥн кизёнэн. 4 сюрс гектарлэсь улӥе усьыны уг яра шуыса, министерство ужпум пуктӥз вал. Но Дэбес но Эгра ёросъёс воксё но етӥн будэтонлэсь куштӥськоно кариськизы. Озьы Эгра ёросысь гинэ 3 предприятие лыз буртчин ум будэтэ ни шуизы, ыштонъёс бадӟымесь, нош барыш поттыны уг луы, пе. Зэм, Можга ёросысь «Луч» хозяйство бусыоссэ туэ паськытатӥз ик, етӥнзы но, пызьыртэм вӧйзы но Китае трос кошке угось — кунгож сьӧрысь рыноке сюрес лёгыны быгатӥзы. Асьсэлэн переработказы ванен, собыдӟа ужез берыктыны пӧрмытӥзы. Ваньзылы тазьы уг удалты. Озьы оглом шаерамы 3 сюрс 670 гектар вылэ етӥн кизёмы. Та культураен ужало на Кез, Кизнер, Можга, Сьӧлта, Шаркан, Юкаменск но Яр ёросъёс гинэ, отӥосыз аналскизы. Юкаменск ёросын али етӥн сэстонъя заводэз выльдыны малпало. Реконструкцилы 4 миллион манет висъязы ни. Татын переработка кылдӥз ке, ужзы каньылгес мыноз, оло, бусыоссэс но етӥн улэ будэтозы.

Елена Сараматова

Туспуктэмез авторлэн

Ангелина Снигирева
By Ангелина Снигирева Май 16, 2019 15:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<