Миро нуллӥсь нылкышноос

Ангелина Снигирева
By Ангелина Снигирева 20 мая, 2019 09:20

12-тӥ куартолэзе пусйимы православиысь нылкышноослэсь нуналзэс.

Мироносицаослэн оброссы
Фото басьтэмын vidania.ru сайтысь

Со асьме доры вуэмын вашкала вакытъёсысь, гер­ӟаськемын Иисус Христослэн кулэмысь улӟыса султонэныз. «Ӟеч иворысь» но мукет святой гожтэмъёсысь асьмеос тодӥськомы: Иисус Христосэз нырысь ваньзы сӥлы ӧз каре. Тросэз иудейёс сое татчыозь Инмарен уг лыдъяло на, ялан витё мессиялэсь вуэмзэ. Соос уго соку эксэез возьмало вал, со вуоз но израиль калыкез мозмытоз шуыса. Нош татын лыктӥз огшоры калыкъёс пӧлын улэм, пуэн ужам адями, кудӥзлэсь семьязэ но, анай-атайзэ но котькин тодэ вал. Вордӥськиз но со пудо возьман пещераын. Улӥз огшоры адями кадь. Соин ик сое валаны но сӥлы карыны дышыны кулэ вал. Апостолъёслы но нырысь та учырлы дышоно вал. Соос Инмарен ӵош ветлӥзы, соослы Со уно пол валэктылӥз, озьы луоз шуыса, но апостолъёс Солы соку ик ӧз оске. Кулэмысь улӟыса султэмез бере Мария Магдалина вераз: «Инмармы улӟиз, со тӥледыз Галилеяын возьма». Озьы но апостолъёс ӧз оске на. Фомаез но тодамы вайиськомы ке, со «аслам синъёсыным яраоссэ ӧй ке адӟы, чиньыосыным соосты ӧй ке йӧтылы, уг оскы» шуиз. Апостол Пётр но «мон тон сьӧры мыно, тынэсьтыд мон ноку но уг куштӥськы» шуиз. Но Иисус Христос солы «атас чоръятозь, тон мынэсьтым куинь пол куштӥськод» шуиз. Озьы ик луиз: куке Сое Гефсиман садысен кутӥзы но куке Иуда Сое «вузаз», вань апостолъёс Со дорысь пегӟизы.

Иисус Христослэсь улонзэ чаклано ке, Солэн юрт-тӥськисьёсыз трос вал, Со сьӧры тросэз ветлӥзы. Собере, Солэсь верам кылъёссэ кылыса, кин ке но палэнтӥськиз. Со шуиз вал ук: «Кин мынэсьтым мугорме сиёз, со улэп кылёз». Кызьы адямилэсь мугорзэ сиёд шуыса, тросэз соку кушетскизы но Солэсь куштӥськизы. Апостолъёс но кошкизы бере, шугадӟон луиз соку. Нош нылкышноос — Инмар Анай, Мария Магдалина но мукетъёсыз — ӧз кышкалэ. Асьмеос соосыз мироносицаос шуиськомы. Соос миро (юри дасям ческыт зыно вӧй) вайизы. Соос Иисус Христослэсь вань курадӟемъёссэ адӟизы, чидазы, асьсэос но туж куректыса улӥзы. Соос чаклазы, кытчы Сое понозы шуыса. Иисус Христосэз Киросысь басьтэм бере, иудейской Паскаез пумитаны дыртыса, коросэ бинялтыса гинэ понӥзы — иудей калыклэн куронъёсызъя лэсьтоно сямъёсты ваньзэ быдэстыса ӧз вуттэ. Соин ик та нылкышноос, Солэсь мугорзэ вӧйын — мироен — зырано шуыса, вазь ӵукна ик дораз лыктӥзы. Священной гожтэмъёсысь асьмеос тодӥськомы: соос шугъяськизы вал, коросэз пытсам изэз кызьы меда палэнтыны вормозы шуыса. Но Магдалина лыктыса учкиз но паймиз — из палэнтэмын. Кытчы мынэсьтым Инмарелэсь мугорзэ понӥзы шуыса, со бӧрдыны кутскиз. Святойёс таӵе тодметэз валэкто Евалэн сьӧлыке пыременыз. Татын кинлы нырысь ик Инмар возьматӥськиз, кулэмысь улӟыса, со ӵапак Мария Магдалина вал. Иисус Христос доры со 3 пол ветлэмын. Ӵапак куинетӥзэ лыктыкуз, солы Инмар усьтӥськиз. Сокем юн вал соослэн яратонзы.

Мария Магдалина вор-дӥськемын Галилеяысь Магдала (отысь Магдалина) карын. Инмарен пумиськытозяз, сьӧлыкаса улэм. Но Иисус солэсь со сьӧлыкъёссэ палэнтыны быгатӥз. Собере Мария апостолъёсын ӵош Христослы юн оскыны кутскиз но Со сьӧры мынӥз. Ӵапак та нылкышно Христослэн улӟемез сярысь калыклы вераз. (Но та ласянь гожъямъёс пӧртэмесь. Куд-огез лыдъяло, Со усьтӥськиз аслаз Анаезлы Мариялы шуыса. Нош Матфейлэсь «Ӟеч иворын» шуэмын, Со, пе, возьматӥськиз вань мироносицаослы ӵош.) «Христос улӟыса султэм!» шуыса веран — Мариялэн кылъёсыз. Императорлы, озьы вераса, со курегпуз кузьмам. Соиз оскымтэ: кызьы, пе, та курегпузлэн гордэктэмез уз луы, озьы ик адями но кулэмысь улӟыса султыны уз быгаты. Но гожъямъёсъя, курегпуз соку ик гордэктэм. Ӵапак та бордысь, пе, потэмын Паскалы курегпузэз буян сям. Иоанн Богословлэн гожъямъёсызъя, бӧрысь Мария Магдалина Христослэсь верам-дышетэмъёссэ калык пӧлы вӧлдыны сюлмаськиз. Нылкышноослы соку сыӵе ужен вырыны лэземын ӧй вал ке но, со мылысь-кыдысь тыршиз. Трос ӟеч ужъёсыз понна со апостолъёсын оградэ пыртэмын но солы «равноапостольской» ним сётэмын.

Миро нуллӥсьёс пӧлысь одӥгез — Иоанна — узыр, тодмо но гажано кышномурт. Со Ирод эксэйлэн Хуза юрттӥсезлэн (домоправителезлэн) кышноез. Христос сьӧры со вамыштӥз, куке солэсь пизэ Со эмъяз. Пияш кулон калэ вуэмын вал ини, нокин сое йӧнатыны ӧз быгаты. Соку вазиськизы Иисуслы. Солэн отчы мынэмез уг поты вал, малы ке шуоно отын Иоанн Предтечаез виизы. Но Хуза Сое сюлмысь ик куриз но, таиз кылзӥськиз. Пияшез со туж ӝог йӧнатӥз. Та учыр бере Иоанна, пиез понна тау карыса, Христос сьӧры кошкиз. Вань узырлыксэ сьӧраз басьтӥз но вузаз. Поттэм коньдонзэ Христос вӧзысь калыкез сюдыны сётӥз.

Иоанна тодмо луэ на соин — ӵапак со Иоанн Крестительлэсь йырзэ умой интые ватӥз, сое медаз сантэмалэ шуыса. Святой гожъямъёсъя тодӥськомы: Иоанн Крестительлэсь йырзэ ӵогем бере, со кулэмысь улӟоз шуыса кышкаса, мугорзэ ученикъёсыз ӝогак ватӥзы. Но йырзэ соку соослы ӧз сётэ, сое жуг-жаг пӧлы сэрпалтӥзы вал.

Саломея — зэмлыкез гажась Иосиф Обручниклэн нылыз. Заведейлы бызьыса, со 2 пи вордӥз, Иаковез но Иоаннэз, кудъёсыз апостолъёс луизы.

Сусанна — таиз нылкышно сярысь чик тодмо ӧвӧл, шуыны луоз. Евангелист Лука гинэ со сярысь кӧня ке поттылэм.

Мария Клеопова — верамын, со Иисуслэн ӵыжы-выжыез, пе, вал. Куд-огез лыдъяло, Мария Иосиф Обручниклэн Клеопа вынызлэн яке нылыз, яке кышноез луэ шуыса.

Мария Иаковлева — Иосиф Обручниклэн пичи нылыз вал шуыса верамын. Священной гожтэмъёсъя, со Инмар Анайлэн матысь эшез вылэм. Иаковлева сое шуиллям пиезлы апостол Иаковлы луыса. Куд-огез лыдъя, Мария Клеопова но Мария Иаковлева — со одӥг мурт шуыса.

Марфа но Мария — Христослэн матысь эшезлэн Лазарьлэн сузэръёсыз. Лазарь кулэм бере Иисус туж кайгырем. Ачиз тодэм ке но, солэн улонэз тазьы уг йылпумъяськы на шуыса. Лазарез Иисус ньылетӥ нуналаз кулэмысь улӟытыса султытэм. Бӧрысь Марфаен Мария кошкиллям Кипре, кытын соослэн Лазарь вынзы епископ вал.

Инмар Анай — чакламъя мироносицаос пӧлы уг пыры. Куд-огез лыдъяло, Мария Иаковлева яке «мукетыз Мария» — со Инмар Анай. Озьы ке но со Нырысетӥез нылкышно лыдъяське, малы ке шуоно со котьку Иисусэн ӵош вал. Бӧрысь со Солэсь дышетэмъёссэ калык пӧлы вӧлдыса улӥз. Кема дыр ӵоже вал со Афонын, кытчы со вуиз, Кипре Лазарь доры мыныкуз шторме шедьыса. Кулӥз Иерусалимын, ватэмын Гефсиман садын. Но коросаз мугорыз ӧвӧл — преданиосъя Инмар Пиез кулэмез бере куинетӥ нуналаз сое Инме ӝутскытӥз.

Куд-огез лыдъяло, мироносицаос тросгес вал шуыса. Но тодмо 7-ез гинэ: 5-ез Галилеяысь, нош Марфа но Мария — Вифаниысь (со Иерусалимен артэ интыяськемын). Обросъёс вылын но соос 7 кузя возьматэмын. Христиан осконъёсын асьмеос соосты сӥлы кариськомы Паска бере 3-тӥ арняяз. 8-тӥ Март выллем, со — православиысь нылкышноослэн нуналзы.

Протоиререй Павел Григорьев

Ангелина Снигирева
By Ангелина Снигирева 20 мая, 2019 09:20
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<