К. Герд нимо гимназиысь нылпиос Е. Миннигараевалэн книгаеныз тодматскизы

Ангелина Снигирева
By Ангелина Снигирева Май 22, 2019 12:50
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

15-тӥ куартолэзе Ижысь Кузебай Герд нимо гимназиысь пиналъёс доры вуылӥз тодмо удмурт прозаик Елена Миннигараева.

К. Герд нимо гимназиысь нылпиос
Туспуктэм: А. Тронин

Кырӟалляз писпуос вылын

Елена Васильевна пумиськиз 7-тӥ классын дышетскись пиналъёсын. Пумиськонлэн кутсконаз ик гожъяськись тулкымъяськемез сярысь вераз.

— Ёросъёсы калыкен пумиськыны кӧня ветлӥськом, кышкан ноку ӧй вал. Нош тӥ доры мынон азям малы ке но кышкай, — усьтӥськиз пиналъёслы Е. Миннигараева. — Со пичи дырен, быдэ вуонэн пумиськон кадь. Тӥ кадь дыръям мынам будэме туж зол потэ вал. Йырын мар гинэ ӧз берга, будыса кин но уд лу кадь. Нош али мынам тӥ кадь луэме потэ, мон вожъяськисько тӥляд луонлыкъёстылы, егит дырдылы. Тӥляд азяды ваньмыз али гинэ усьтӥське ай.

Е. Миннигараева нылпиослы пичи дыръяз ик гожъяськон сюрессэ мытэмез сярысь вераз. Туж кылзӥськись вылэм, со дыре ик пушказ приключениосты яратонэз улэм, паймымон учыръёс, дуннеос сярысь книгаос но лыдӟыны яратылэм.

— Ку ручкаез киям кутӥ, соку ик гожъяськыны кутски, — вера Елена Васильевна. — Нош солэсь азьвыл весь кырӟаса ветлӥсько вал: мае адӟисько, со сярысь ик кырӟан вордске. Гуртысь эшеным, писпуос вылэ тубаса, кырӟаны яратӥськом вал. 2-тӥ классысен ачим пичи книгаос лэсьялляй. Тетрадьёсты вандылыса, отчы пичи мадёсъёс, веросъёс гожъясько вал, гожъямъёсме бӧрысь эшъёсылы лыдӟылӥ. Мыным удалтӥз: со дыре Пичи Пургалан усьтӥзы литературной студия, сое нуиз тодмо удмурт писатель Никвлад Самсонов. Пиналъёсын туж быгатыса ужаз. Ильинск школаысьтымы 4 кузя со студие ветлӥм. Одӥгез соос пӧлысь — «Мынам Удмуртие» телерадиокомпаниын ужась журналист Елена Слесарева. Та уж милемыз бурдъяз, шуыны луоз. Мылкыд басьтон вал со.

Е. Миннигараевалэн газетъёсын-журналъёсын пичи дыръяз печатлам ужъёсыз бадӟым тетрадьын люкамын, огез бӧрсьы мукетыз лачмыт лякылэмын. Соосты учкыса, адӟоно писательлэсь будэмзэ. Отысь ик лыдӟыны луэ «Тодмо тополь» вероссэ. Елена Васильевна тодаз вайиз, макем со паймиз, куке та гожтэмзэ газетын печатлазы: зэмос писательлэсь кадь.

Малы кулэ вераськись ӵушъял?

Пумиськонын Е. Миннигараева пыр-поч мадиз таяз арын потэм «69, яке Кытчы кошко дэймонъёс» фэнтези жанрен гожтэм романэз сярысь. Сое «Удмуртия» издательство печатлаз Удмуртиысь Нациосын ужан политикая министерство ӵектэмъя. Гимназие вуылӥз министерствоын тыршись Елизавета Ложкина.

— 2015-тӥ арын министерствомы ортчытӥз «Бадӟым лыдӟет дауре» литературной конкурс, соку экспертъёсмы фэнтези яке детектив жанръёсъя номинациын вормисе Елена Васильевналэсь романзэ огкылысь бырйизы, книгаен поттыны ӵектӥзы, — шуиз Е. Ложкина. — Шумпотӥськом, та книга потӥз шуыса. Табере солэсь азьланьтонзэ возьмаськом.

Нылъёс Е. Миннигараевалэн книгаеныз тодматско

Пиналъёс «69, яке Кытчы кошко дэймонъёс» роман пумысен мылкыдъёссэс веразы. Тросэзлы кельшем Мани героиня. Нылпиос пусйизы, книга ог-огедлы юрттыны, эшъяськыны, сям-йылолъёсты утьыны дышетэ шуыса. Куд-огез романъя суредъёс дасям — ужъёссэс пиналъёс гожъяськисьлы кузьмазы. Со сяна, пиналъёс писательлы трос юанъёс сётъязы. Кылсярысь, соослы тунсыко потэм, кызьы произведениын вераськись ӵушъяллэн образэз кылдэм.

— Мон яратӥсько ӵушъялъёсты, тодӥсько на: пичи дыръям соос бакча берамы улӥзы, — валэктӥз Елена Васильевна. — Куке романам геройлы юрттӥсь кулэ луиз, мон огдырлы ӵушъялэз пыртӥ. Геройёсылэн нимъёссы но озьы ӵем кылдо: огдырлы яралоз, бӧрысь мар ке мукет малпало шуыса гожтӥсько но, ужамъя дышиськод соослы, озьы ик кыле. Романэ потэм бере ини мынэсьтым юазы: тодӥськод-а, трос калыкъёслэн выжыкылъёсазы, мадёсъёсазы ӵушъяллэн бадӟым пуштросэз шуыса? Куд-ог калыкъёслэн ӵушъял — улонлэн символэз, пе.

Е. Миннигараева ачиз но пиналъёслы юанъёс дасям. Со эскериз, макем сак лыдӟизы пиналъёс выль книгазэ, макем умой соос тодо удмуртъёслэсь мифъёссэс. «Вераськись ӵушъялъёс», «Дэймонъёс» но «Кылчинъёс» командалы люкиськыса, нылпиос юанъёслы валэктонъёс сётъязы. Нош бӧрысь ваньзы ӵош малпаськизы, кызьы роман азьланьтӥськыны быгатысал. Оло, дэймонъёс, асьме дуннее выжыса, гимназиысь дышетскисьёс доры вуысалзы…

Анастасия Шумилова

Ангелина Снигирева
By Ангелина Снигирева Май 22, 2019 12:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<