Кытын вордӥське удмурт книга?

Ангелина Снигирева
By Ангелина Снигирева Май 20, 2019 09:00

Шаерысьтымы «Удмуртия» издательство пичи гинэ. Но солэн книгаосыз Россиысь 5 сюрс 500 издательствоос пӧлын ӵемысь вормисьёс радын. Мар понна сокем дунъяське удмурт книга? «Удмуртия» издательстволэн 100 аръем юбилеез азьын кенешиськом директореныз Юрий КУЗНЕЦОВЕН.

Г. Грязев, В. Атеева, Ю. Кузнецов

— Книга яратӥсьёс али но тодазы ваё на, кызьы тӥ нырысьсэ Москваын ортчись «Красная площадь» нимо книга фестивале пыриськиды. Кунысьтымы туж кужмо издательствоосты азьпалтыса, книгаосты пӧртэм наградаосын пусъемын вал, «Удмуртия» издательство сярысь материалъёс пӧртэм газет но журнал бамъёсы вуизы, телесюжетъёс федерал каналъёсын бергазы. Маин сокем паймытӥды?

— Уноез паймизы, сыӵе пичи республикаын сыӵе ӟеч книгаос поттыны быгатӥськом шуыса. Адӟытонын вормисе потӥзы вань мылкыдмес поныса лэсьтэм книгаос: «Я живу в Удмуртии», «Сарапул — жемчужина Камского берега». Нош «Удмуртские народные мифы и легенды» книгамы 3 диплом басьтӥз. Мур пуштросъем суредъёссэ туж быгатыса лэсьтӥз элькунысьтымы калык художник Вячеслав Михайлов. Солы туж бадӟым тау кариськомы.

Пусъёно: та фестивальын улосъёсысь издательствоос Василий Блаженныйлэн соборез но Мавзолей вискын интыясько. Тужгес ӟеч инты! Вань мынӥсь-ветлӥсь калык отӥ ортче. Пӧртэм улосъёслэн книгаоссы ӵемысь огвыллемесь луо, нош национальной республикаослэн — огезлэсь пӧртэм мукетыз. Ай фестивале вуэмъёс асьсэ калык дӥсен пӧрмытскемын. Тазэ модаез ми, удмуртъёс, усьтӥм. Адӟытонэ нырысьсэ лыктыкумы ик, «Айкай» театрлэн дэремъёсыныз пӧрмытским, горд ӵушкон, асьме кибашлыослэсь лэсьтэм етӥн мунёоссэс кутӥм. Соку нокинлэн йыраз таӵе малпанъёсыз ӧй на вал. Вань журналистъёс, оло, ми котырын гинэ бергазы. «Россия 24» телеканал соку ик меӵак эфирын ми сярысь сюжет сётӥз. НТВ-ос но дорысьтымы уг ни кошко, озьы-тазьы снимать каро. Юало: мар понна, пе, та книгады сомында награда басьтӥз? Тодӥськоды-а, шуисько, азьвыл аръёсы но, али но калык туж быгатыса пӧртэм мадёсъёс малпа. Тани «Быдӟым пӧйшурась» мадёсэз лыдӟом-а? Мон книгамес усьтӥсько но лыдӟисько. Гожтэм йылпумъяське тазьы: «Нош со пӧйшурасьлэн нимыз Ленин вылэм…» Журналистъёс воксё чабкисько!

Туэ нырысьсэ, издательствомылы 100 ар тырмонэз пусъён дыръя, ӵапак фестиваль усьтӥськон нуналэ, 1-тӥ инвожое, луонлык сётозы «Горд площадь» ужрадын асьмелэн вормонъёсмы, малпанъёсмы, ужпумъёсмы сярысь лыдӟисьёсын кенешыны, мукет элькунъёсысь но улосъёсысь куноослы Удмурт шаер но удмуртъёс сярысь вераны. Со понна милемлы нимысьтыз инты но дыр висъялозы.

— Шӧдӥське: берло дыре тросгес саклык висъяськоды шаертодонлы, Удмурт элькунлэн историезлы, удмурт чеберлыклы сӥзем книгаос поттонлы. Маин со герӟаськемын?

— Калыклэн та ласянь тунсыкъяськонэз будӥз. Москваын адӟытонын но дорамы лыкто: удмурт выжыкылъёс вайиды-а? Нош удмурт пӧраськонлы сӥзем книгады сюроз-а? Удмуртилэн историезъя маке вань-а? Нош Удмуртиысь тунсыко интыос сярысь? Куд-огез соку ик гожъяса лыктэ ни, кыӵе книгаос солы кулэ, азьлапал ик Российской книжной палаталэн яке милям сайтысьтымы учке. Шуо: тӥляд таӵе книгады вань, вае мыным 5-сэ, нош таӵезэ — 10-сэ. Озьы книгаосмес ӵемысь басьто Москваысь бадӟым библиотекаос, куд-огез кунгож сьӧры но кошке. Шаерен, калыкен тунсыкъяськон будӥз Удмуртиын но. Книгаосмес ӵемысь кузьымлы басьто.

— Нош макем мыло-кыдо али лыдӟо чеберлыко литератураез? Вань-а выль произведениослы кулэяськон?

— Таосыз берло дыре шугенгес мыно. Удмурт сямен лыдӟиськисьёслэн лыдзы, совето вакытъёсын ӵошатыса, кулэсмиз. Сюлмаськытэ соиз но: прозаен гожтэм бадӟым произведениез рос-прос чебер книгаен поттон понна трос коньдон кулэ. Нош кызьы одӥг кеч куэз 7 изьылы люкод? Ми таӵезэ но, сыӵезэ но поттысалмы, но коньдон туж ӧжыт висъяське. Ӵапак та муген али издательствоын асьсэ дырзэс возьмаса уло П. Кубашевлэн «Кайсы» романэз, Р. Игнатьевалэн «Игнаш сайкемын» бадӟым эпической романэз. Огзэ ке но али поттӥм ке, быдэс арлы коньдон запасмес сиём. Нош соос воксё ӧз вузаське ке? Милемлы но рыноклэсь кулэяськонъёссэ лыдэ басьтытэк уг луы. Мукет ласянь, ми валаськом: чеберлыко литература туж кулэ анай кылмес азинтон, вӧлмытон понна. Но ӵемысь со векчигес книгаос луо ни…

— Котьку но лыдъяське вал: «Удмуртия» издательство поттэ вылӥ ӟечлыко книгаос. Соин ик авторъёслы дорады книгаоссэс поттон — бадӟым дан. Туала вакытэ книга поттыны быгатэ котькуд мылкыд карись, коньдонэз гинэ мед луоз. Ваньзэс-а сыӵе вазиськисьёсты дорады кутӥськоды? Мылкыдды шуг уг луы-а, куд-ог книгаослэн пуштроссы лябгес шуыса?

— Рынок вакытэ издательстволы кызьы ке улоно, ужасьёслы уждун тыроно, соин ми но сыӵе заказъёс борды басьтӥськиськом. Куддыръя вазисько гуртысь гожъяськисьёс, тодэ ваёнъёссэс, статьяоссэс книгаен поттыны куро. Редакторъёсмы со текстъёсын ужано луо. Но туж ӵемысь та бичетъёс нимаз книгаосын но уг лыдъясько, соослэн ISBN номерзы ик ӧвӧл. Автор аслаз ӵыжы-выжыосызлы, эшъёсызлы кузьман понна гинэ сое поттэ, шумпотэ, гожтэмзэ кияз воземез луэ шуыса. Малы солы юрттонтэм?

— Азьвыл издательство трос ужаз ӟуч классикаез удмуртэ берыктон бордын. Валамон, туала вакытэ А. Пушкинэз, Л. Толстоез удмурт сямен лыдӟыны мылкыд карисьёс трос ик уз луэ. Нош тужгес тунсыко удмурт произведениосты ӟуч кылэ берыктоно ке? Соку, оло, мукет калыкъёс пӧлын удмурт литератураен тунсыкъяськон будысал?

— Кулэяськон мед луоз шуыса, со ужен вырыны кулэ. Но туала вакытэ кылысь кылэ берыктон школа воксё бырыны кутскиз. Ӟеч берыктӥсьёс вал В. Емельянов, А. Демьянов. Н. Витруклэн юрттэмезъя «Ӟуч классика удмурт кылын» быдэс серия поттамы, Н. Некрасовлэсь, А. Пушкинлэсь, М. Лермонтовлэсь, А. Кольцовлэсь, С. Есенинлэсь кылбуръёссэс удмурт кылэ берыктон бордын ужазы С. Матвеев, В. Ившин, Р. Яшина, В. Михайлов. Та уж юромо лэсьтӥськиз удмурт кылэз вӧлмытон, узырмытон понна. Али но кулэ вылэм. Юрттэт луысал ке, асьмеос ик шедьтысалмы кылысь кылэ берыктӥсьёсты, кыштыр гинэ кылдысал быдэс система. Малы озьы шуисько? Тани 2000-тӥ аръёслэн кутсконазы республикаямы кылъёс сярысь законэз пыӵатонъя программа кутэмын вал. Ми могӟим: яркыт удмурт книгаос поттон понна суредасьёсмы быриллям. 1990-тӥ аръёсы кин кыӵе удысэ кошкем — кин ке воксё суредаськемысь дугдэм, кин ке огинтыяз лёгаське, номыр выльзэ дэмланы уг ни быгаты, кин ке республикалэн палэназ кошкемын. Но, та программа ужатозь, будӥзы ук выль суредасьёс! А. Васильев, Л. Гузаева, А. Гладыш, Г. Иванова, А. Бронникова, мукет улосъёсысь но суредасьёс дорамы йыгаськылӥзы. Татын но озьы луоз. Берыктэм произведениослы заказ луиз ке, будозы кылысь кылэ берыктӥсьёс но, нош филологъёс, литераторъёс ватсаса уж шедьтысалзы.

Удмурт выжыкылъёсын выль книга

— Тӥ уд кышкаське ужады выль амалъёсты кутыны, ӵемысь сюрес усьтӥсь луиськоды. Тани али но издательстволэн валтӥсь редакторез Г. Грязев вуылӥз Санкт-Петербурге, отын Россиысь но кунгож сьӧрысь фин-угор калыкъёслэсь егит азьветлӥсьёссэс дышетӥз ӝӧк выл шудонъёс лэсьтыны, пичиос анай кылзэс медаз вунэтэ, сое мед яратозы шуыса. Мынам тодэмея, туннэ нуналлы «Удмуртия» издательство 15 пала сыӵе шудон поттӥз ни.

— Озьы. Та уж кутскиз Нациосын ужан политикая министерство кичӧлтэмъя. Туж ӝутказ министрлэн азьвыл воштӥсез Павел Орлов. Шудонъёс чакламын 3-9 аресъем нылпиослы. Соосты нылпи садъёсын, школаосын но дорын семьяен шудыку кутыны кулэ. Соос, пиналлэсь психологизэ лыдэ басьтыса, лэсьтэмын.

Россиысь мукет фин-угор элькунъёсын таӵе шудонъёссы ӧвӧл. Одӥг шудонэн ик пӧртэм аресъем пиналъёс но соослэн анай-атайёссы, воспитательёс шудыны быгато шуыса тодэмзы бере Санкт-Петербурге семинаре лыктэмъёслэн ымъёссы ик усьтӥськизы.

Пиналъёс ярато на удмурт но фин-угор дӥсьлы, батыръёслы, эпослы сӥзем буяськонъёсмес. Суредъёссы япон аниме амалъя (геройёс — бадӟым синмо мунёос кадь) лэсьтэмын. Зэм, та борды кутскыкумы, сюлмаським: калык валалоз-а? Угось куд-огез азьлапал ик визьманы выриз: суредъёс удмурт шӧмоесь луыны кулэ — удмурт ныллэн ымнырыз питырес, синъёсыз сюбегесь, мугорыз лап-лап. Но, малпасько, удмуртъёслэн но тусъёссы воштӥськемын ни. Собере, та раскраска ук, быдэс дуннеысь нылпиос ярато япон мультфильмъёсты. Озьыен, мед со луоз удмурт дӥсен, удмурт нимъёсын аниме. Яратоно сюжетъёс, геройёс пыр удмурт пужыен, калык дӥсен тодматско ке, урод шат?

— Вуоно арын Удмуртия пусъёз кунлык басьтэмез дырысен 100 ар тырмонэз. Тодӥсько, юбилейлы сӥзьыса, тӥ лыдӟисьёсты выль ужъёсын шумпоттоды. Маин?

— Ваньзэ шараяммы уг поты на. Одӥгез бадӟым ужмы — удмурт калык выжыкылъёсын бадӟым дуно книга — потӥз ни. Ӝоген лыдӟись доры вуоз Лӧпшо Педунь сярысь веранъёсын книга, шумпоттыны чакласьком на Удмуртиысь тунсыко интыослы сӥзем книгаен. Луоз элькунмылы сӥзем эшшо одӥг бадӟым кузьым — но тазэ шараяны вазь на.

— Кызьы огшоры гуртысь адями тӥлесьтыд книгаостэс басьтыны быгатоз?

— Ог 40-50 процентэз книгаосмы вузасько магазинмы пыр. Со интыяськемын Ижысь Пастухов ульчаысь 13 номеро юртын, 3-тӥ этажаз, «Удмуртия» издательствоын. Мукет люкетсэ вузало нимаз адямиос. Но, валамон ини, соос пыр книга дуногес усе. Луэ udgiz.ru сайтмы пыр но заказтыны. Но почта дунэз ватсаса, со озьы ик дуногес луэ. Соин тужгес ӟеч амал — дорамы вуыны. Куд-огез одӥг лыктэмен аслыз но, эшъёсызлы но кузьым басьтыса кошке.

Научно-популярной но чеберлыко литература сяна, ми бадӟым саклык висъяськом удмурт учебникъёс, методпособиос поттонлы. Республикаямы милемлы гинэ сыӵе ужоскет сётэмын. Учебникъёсты мыло-кыдо басьто шаермылэн палэназ улӥсь удмуртъёс но.

Оглом учконо ке, туннэ нуналлы адями книгаез 2 муген басьтэ. Нырысь ик, кузьымлы. Кыкетӥез — тодон-валанзэ будэтыны. Улон воштӥське ке но, кие кутыса лыдӟоно книга ноку уз быры!

Елена Миннигараева

Ангелина Снигирева
By Ангелина Снигирева Май 20, 2019 09:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<