Кытчы ми нылпиостэк, нош соос — митэк?

Ангелина Снигирева
By Ангелина Снигирева Май 16, 2019 13:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

15-тӥ мае дуннеын пусйиське Семьялэн нуналыз. Удмуртиысь адӟем карымон кузпалъёс пӧлын — Пичи Пурга ёросысь Куреггуртысь Ольга но Владимир ИЮДИНЪЁСЛЭН семьязы. Соос 35 арлэсь кема ӵош уло ини, бурд улазы — 7 нылпизы. Таяз арняе кузпалъёсты сӥлы каризы «Анай-атайлэн данэз» пусэн.

Июдин кузпалъёс

Яратон арлыдэз ӧз юа

Семьялэн йырыз — Владимир Алексеевич Июдин — ачиз но бадӟым семьяын будэмын. Мемей-дядяезлэн 8 нылпизы вал, Вова — кыкетӥ нылпи, бӧрсяз эшшо шальтыр-шальтыр пиналъёс будӥзы. Семьяосыз 10 класс одно ик дышетскыны косӥзы — соин, дыр, школазэ быдтытозяз ик, жуммиз кадь. Нош Вовалэн сюлмыз трактор борды биниськемын ни. Гужем котькуд каникулзэ со механизаторъёс вӧзын ортчытъяз, солярка зын йырзэ поромытэ, мылкыдзэ ӝутэ. Соин, аттестат басьтыса, соку ик «1-тӥ Май» колхозэ мынӥз.

— Котькуд тулыс кизьыны потон праздник кадь луэ вал. Тракторъёс радэн султытэмын. Азьмынӥсьёслы гадь ваментӥзы горд лента кертто. Туж шулдыр ужамы, — тодаз вае Владимир Алексеевич.

Нош собере пинал трактористлы мукет сюлмаськон сюриз: ӵош дышетскем эшъёсыз армиын ни, нош Воваез уг басьто — я мугорыз пичи шуо, я секталаез ӧжыт, пе. Военкоматысь вуэ но — нырыз ошиськемын. Ма, бадӟым семьяын со аръёсы сиёнзы но укыр бусьтыр ӧй вал, дыр. Соин, Воваез жаляса, сузэр-вынъёсыз весь асьсэ пайзэс но сётыны выризы: буд, агай, буд шуыса. Вова армие мынӥз ик — огъёзо пиослэсь 1,5 арлы бере кыльыса. Службазэ нуыны сюриз Туркменистанысь Ашхабадэ. Татын ӝыны ар ӵоже учебкаын дышетэмзы бере келязы Афганистанэ — озьы 1,5 арзэ пӧсь интыын ортчытӥз. Со аръёсты тодаз вайыны Вова агайлы али но секыт, ортчемзэ верамез уг поты семьяосызлы но. Кин ке быгатэ мадиськыны, адӟемъёссэ вераны, нош Вова агай понна со секыт адӟон но чидан луиз, уката мӧйымыса вань лулпушез бугырске кадь.

Нош пинал дыръя ваньмыз трослы капчигес. Армиысь вуэм солдатэн тодматскиз 10-тӥ классын дышетскись Оля Акулова. Куреггуртэ со Пичи Пургалась куное вуылэ вал. Озьы егитъёс ог-огзылы синмаськизы. Олялы — 17 арес, Вова 5 ареслы бадӟымгес. Олялэн мемеез нылзэ сётыны пумит вал, уродъяськиз но — дышетсконо, пе, нырысь. Нош яратон вань могӟетъёсты вормиз — Олялы дышетскон но кулэ ӧз луы ни, Вова гинэ вӧзаз мед луоз. Июнь пумын куреггуртъёс Пургала кен кураны ветлӥзы. Но егитъёслы сюан шудыны ӧз кылды. Вовалэсь вынзэ ӵапак армие келяло вал, соин ӵош ик огъя юондыр но каризы. Озьы, тӧдьы дэрем дӥсятэк, загсэ ветлытэк, кылдӥз егит семья. Оля апай ноку но ӧз жаля, вазь бызиз шуыса, солэн вӧзаз оскымон пиосмуртэз, улыны дышетӥсез вань.

— Вова бычкыен пу вандыны ӧтиз. Мынам тазьы ужаме ӧвӧл, бычкыез кысканы уг валаськы. «Ма, мар мон тонэ кышно басьтӥськем, номырлы дышетӥллямтэ ук гуртад», — серекъя Вова. Скал доры но кудласянь лыктыны ӧй валалля — кыскыны дышетӥз ни Вовалэн Тая сузэрез, — валче улыны кутскемзэс тодаз вае Ольга Васильевна.

Июдинъёслэн семьязы 1983-тӥ арын кылдӥз ке но, загсын гожтӥськыны дыр таки ӧз шедьтэ. Та арын ик пинал кузпалъёслэн Коля пизы вордскиз. Соку но, кышнояськоно шуыса, тодазы ӧз лыкты. 1985-тӥ арын гинэ, юнме шорысь мыныса, загсэ пыризы но кышноен карт луыса потӥзы.

Картэзлэн бадӟым семьяяз ар но ӝыны улыса, егитъёс яна потӥзы. Кыкназы ласянь мемей-дядяйёссы кирпич корка ӝутыны юрттӥськизы. Озьы 1985-тӥ арын 7-тӥ мартэ выль корка улыны потӥзы — ӵапак Оля апайлэн вордскем нуналэзлы таӵе вунонтэм кузьым тупаз.

Пи борды ныл, ныл борды — пиос

Кӧня нылпи луыны кулэ семьяын — та пумысен пинал кузпалъёслэн тодазы ӧз лыктылы. Коля пизы бере, 3 ар ортчыса, Оксана нылзы вордскиз. Собере эшшо 3 ар вис карыса — Олесязы.

Бадӟым семья

— Али сямен декретын но гань-гань пукыны ӧз кылдылы азьло. Коляелы 9 толэзь дыръя ужаны потӥ ни, Оксанамес 11 толэзьын пересь мемеймылы кельтӥм. Озьы ваньмыз улӥзы кадь. Али малпаськод но — ма, мемейлы соку 79 арес вал, пичиосты учкыса, жаде но вал, дыр. Я, Олесяен коть 1,5 аресозь ачим пуки ик, — тодаз вае Оля апай.

Егит нылкышнолэн мылкыдыз ӝуткаськылӥз на дышетскон пумысен. Малы ке шуоно уж пумысен шугъяськон кылдылӥз. Нырысь-валысь Оля апай вуриськисьын ужаз, собере выльдӥськон аръёсы та мастерской но ворсаськиз. Озьы кышномуртлэн дышетсконэз малпанэн ик кылиз. 1991-тӥ арысен колхозын пӧртэм ужъёсты быдэсъяз.

Вылаз ик, Олеся нылзы висьысагес будӥз. Кузпалъёс вошъяськыса я больничное потазы, я эмъясьёс дортӥ ветлӥзы. 1990-тӥ аръёсы уждунэз но ӝегатъяны кутскизы.

Вова агай соку но колхозысь кошкыны ӧз дырты. Председатель ӵектӥз лэсьтӥськисьёслэсь бригадазэс кылдытыны, уго гуртъёсын пуктӥськон уж котьку вань. Озьы Вова агай лэсьтӥськон удысэ кошкиз. Кытчы ӧтё — со капчияк ӝутске, калыкез люканы быгатэ. Бусы ужъёс дыръя комбайнэ но пуксьылыны пумит ӧз кариськылы.

Куреггуртэ газ кыскон но Вова агайтэк, оло, ӧй пӧрмысал. «1-тӥ Май» колхоз чагыр эстӥськонэз вуттӥз Баграш-Биграе, табере вӧзысь Куреггуртын но газ возьмало. Нош ужзы уг мыны: я техника куашка, я трактористсы «тӥяське». Нош ик Июдинлы вазиськытэк ӧвӧл. Экскаваторе пуксьыса, со траншеяос гудӥз. Со бӧрсьы гумыос кыскизы, озьы гуртэ газ вуиз.

— Вова ужтэк улонэз ӧз тоды. Соин ӵош ик котьку тодаз семьяез, нылпиосыз. Пиналъёслы канфет-печення со котьку но коробкаен басьтоз, емыш ке — ящикен, — вера кузпалыз Ольга Васильевна.

Таӵе оскымон пиосмурт вӧзын кышномурт ӧз кышка нылпи вайыны. Озьы 1994-тӥ арын вордскиз Андрей, 2000-тӥ арын — Антон. Семьязы будэмъя кузпалъёс корказы борды тапалаз но, сопалаз но пристрой ӝутӥзы — интызы вӧл-вӧл луиз.

Адӟонъёсты пырпотыса

Июдинъёслэн семьязы адӟонъёсты но пырпотоно луиз. 1995-тӥ арын вань юрт котырзы ӝуаз.

— Гужем вал со. Ум йылтӥм адӟисько: югак-югак маке воректэ. Собере тачыр-тачыр кылӥське. Укное учки но — пожар. Коргидъёсмы ӝуало ни! Шифер пильылӥське. Нылпиосты чаляк дӥсяй, ураме поттӥ, мемейёс доры мыныны косӥ. Нош ачим бызьыса ӝуась коргидэ пыри — пудомы гид тыр вал. Вань пудо-животэз улляй, нош мумы парсьме поттэме уг луы, солэн пичи парсьпиосыз чир! кесясько. Парсе уг вырӟы. Мар кароно? Парсьпиосты гид укноетӥ картофка пуд пӧлы куяй, соос кыллё, уг но вырӟо. Соку гинэ мумызы гидысь потыны валаз, — тодаз вае со кӧшкемыт учырез Оля апай.

Берло гинэ нылкышноез кышкан шуккиз: нош коргидэ тылпу пушкы ачиз но пачкасал ке? Пудо понна озьы пыр ай тыл пушкы! Ярам, вань пудозэс утьыны быгатӥзы. Гурт калык туж юрттӥськиз, корказэс но тыллэсь утизы, тылпу бервылэз но кысыны-утялтыны лыктӥзы.

Ма, кӧня ке ар талэсь азьло кузпалъёслэсь ужам-тыршемзэс нош ик тыл ньылӥз. Андрей пизылы шуыса выль ульчаын инты басьтӥзы вал. Татын выль ӝутэм лапасъёссы ӝуазы. Отчы, толлы чакласа, люкамын вал турынэн рулонъёс но. Татчы пичиос вутскиллям — «шашлык пыжыса» шудӥллям.

Антон пизэс армиын дыръяз эскерыны ветлӥзы

Уката секыт адӟонэз Июдинъёс чидазы 2005-тӥ арын. Соку бадӟымез пизы — 21 аресъем Колязы — ассэ быдтӥз.

— Паска нунал вал со, ми бӧлякен коркась корка ветлӥськом. Нош асьме доры вуим но… Колямы маке со дауртэм. Милемлы ваньмылы али но валантэм: марлы озьы луиз? Колямы Асанысь техникумез быдтӥз, пӧртэм техникаен ужаны быгатӥз, папаез интые тракторе но пуксе вал, Иже гурт удысъя академие дышетскыны пыремын. Нокыӵе сюлмаськонъёссэ милемлы но, сузэръёсызлы но ӧз вера, сямызъя но копак ватӥськись ӧй вал кадь. Сомында ар ортчиз ни ке но, со нуналэз малпаны ик секыт, — шуэ Оля апай.

Сюлэм шунытсы тырме

Но улон бугор пӧлэстӥське, азьлань бызе. Куреггуртысь бадӟым шулдыр семьяын но нылпиоссы бурдъяськыны кутскизы. Нырысь огзы бӧрсьы огзы нылъёссы бызизы.

— 2007-тӥ арын Оксана бызиз. Соберегес ик 18 аресъем Олесямес, университетысь 1-тӥ курссэ гинэ быдтыса вуэм нылмес, кураны вуизы. Пыд йылысьтым пограсько вал. Сыӵе-сыӵе дышетсконэ выемын вал, школаын но, Россиысь Дышетонъя министерстволэсь быгатӥсь егитъёслы чаклам премизэ басьтыса, дышетскиз. Соку асме но тодам вайи, монэ но мемеелэн сётэмез ӧзгес поты ук, — серекъя Оля апай.

Нылъёс бере ветеринарлы дышетскыны кошкиз Андрей пизы но. Со дыре ик Вова агайлэн дядяез кулӥз. Мемейзы бадӟым коркан огназ улэ шуыса, Июдинъёслэн пичиез пизы Антон ӵемгес но ӵемгес сое чакланы ветлӥз. Собере воксё но песянаез дорынгес улыны кутскиз. Вова агаен Оля апай бадӟыматэм коркаязы ӵемгес кыкназы улӥзы. Шыпыт, буш, мӧзмыт. Нылпиоссы шутэтскон нуналъёсы гинэ берто — часталы вуо но кошко. Кузпалъёс куспазы кенешизы: ойдо вордосэ нылпиосты басьтом, сюлэм шунытмы тырмоз на. «Нылъёс кулэ вал, соосын огъя кыл шедьтыны капчигес луысал», — ас понназгес сюлмаськиз Оля апай.

2011-тӥ арын, асьсэ пиналъёссылы номыр вератэк, Июдинъёс Иже опекунъёслы радъям нимысьтыз дышетсконэ ветлӥзы.

— Глазовысь нылъёсты басьтыны ӵектӥзы вал, собере — артэ Агрыз районысь. Со куспын Пичи Пургалась опекаын ужасьёс жингыртӥзы: нылпи больницае 2 вынъёс интыямын, оло, учкоды? — шуэ Оля апай.

13 аресъем Воваез но 4 аресъем Данилэз песянайзы март толэзе ураме поттыса лэзем. Вылазы дӥськутсы но йӧнала вылымтэ. Анайзы юэ, нылпиосыз пӧртэм воргоронъёслэсь. Ижысь соос кӧчиллям Можга ёросысь Пычасэ, собере вуиллям Пургала.

Кема ӧз малпаське кузпалъёс, басьтом шуизы. Нош кызьы та сярысь будэм нылпиоссылы верано, валалозы-а соос? Табере Оксанаен Олеся асьсэос егит анайёс ни, шуозы: малы тӥледлы мурт нылпи, тани внучкаосты будо…

Ӝӧк сьӧры ӵош пуксьыса, Оля апаен Вова агай веразы кутскем ужзы сярысь. Паймоно кадь: нылпиос огзы но пумит ӧз кариське, котькудзы гожтӥзы соглаш луэмзы сярысь документ — опекае басьтыку, сыӵе уж радъяське вылэм.

Зэм, пушказы нылпиослэн оломар но малпанъёс бугыръяськизы, дыр. Выль басьтэм нылпиослы мамаен папазы саклык но тросгес висьязы, уката 4 аресъем Даниллы. Таиз пияш уг но вераськы вал, кема дышыны выриз ӝӧк вылысь трос сиёнлы но. Кин ке талалоз шуыса, Данил ваньзэ азяз кыске, люка вал, нокинлы но номыре ӧз сётъя.

— Паймоно кадь, бадӟымез пи милемыз мама-папа шуыны чалякгес кутскиз. Картэ борды со биниськиз, тракторысь ӧз васькалля. Со ик техникаен эшъяськемез луиз, — шуэ Ольга Васильевна.

Ижысь цирке вуылыкузы

Сюлмаськизы Июдинъёс вордос пизылы улон инты радъян пумысен но. Вовалы, азьвыл мумы-бубыезлэсь кылем пайзэ вузаса, вӧзаз уксё ватсаса, Ижын квартира басьтӥзы. Пияш али но Куреггуртэ бертылэ, Июдинъёсты аслаз каре.

Асьсэлэсь нылпиоссэс кузпалъёс ужатыса будэтӥзы ке, 12 аресъем Данилэз жаляло. Пичи пияш весь шудон бордын.

— Кызьы жалятэк, милям со мугорын но пичи. Врачъёслэсь вань косонъёссэс быдэсъяськом, вань гожтэм эмъюмзэс но сётъяськом ке но, пайдаез сокем уг шӧдӥськы. Алигес Даниллэн Пургалась песянаезлэн бускеленыз пумиським.

— Тодӥськод-а, со пичи пизэс кыре но уг лэзьяло вал, кыӵе адями луоз ни со, — шуэ.

— Ма, ми 4-тӥ классэ вуим ни, одӥг классын 2 ар пукыса но, каллен-каллен азьлань мынӥськом, — пумитаз вераз Оля апай.

Сыӵе дыръя анайлэн сюлмыз ик бугырске: кызьы со Данилэз ваем кышномурт, юон вылэ чӧлскыса, вордэм нылпизэ учкымтэ. Дыраз вешасал ке, маяллясал-утялтысал ке, таӵе сюлмаськон но ӧй луысал.

Куреггуртын вордосэ басьтэм пиос удмуртомизы но. Уката ик бадӟымез Вова чаляк дышиз удмуртлы.

— Ми солы ӟуч вазиськом, нош со пумитамы удмурт вера ни вал, — шуэ Владимир Алексеевич.

Табере Данил но кыштыр-кыштыр удмурт кылзэ потта.

Нылпиослы юрттыны кулэ

Нимысьтыз вераны кулэ Июдинъёслэн бадӟымъёсыз пиналъёссы сярысь но. Владимир Алексеевич но Ольга Васильевна тыршизы котькудзылы тодон-валан сётыны. Тани Оксана Агрыз городысь 3 номеро школаын покчи классъёсты дышетэ, йылпумъяз Можгалась педколледжез но Глазовысь пединститутэз. Солэн аслаз 2 пиналъёсыз будо ни.

Олеся, бызьыны дыртӥз ке но, 2 вылӥ тодон-валан басьтӥз ни. Нырысь Удмурт кун университетысь удмурт филологияя факультетэз йылпумъяз, школаын англи кыллы дышетӥз. 2 нылъёсыз вань ни. Собере Олеся экономикаен герӟаськем тодон-валан люказ на, табере Пичи Пургалан банкын ужа, кивалтӥсезлэн воштӥсез луэ.

Андрей ужа «Первый Май» хозяйствоын пудо першал луыса. Вордскем гуртэзлэсь палэнэ кошкыны уг малпа, анай-атаез юрттэмен, Куреггуртын корка ӝутэ. Алёна кышноеныз будэто Аделина нылзэс.

Антон йылпумъяз Ижысь лэсьтӥськонъя техникумез. Али Санкт-Петербургын службазэ ортче.

Пизы кышнояськон нунал дыръя выль кузпалъёсты нянен куноятӥзы

Вордосэ басьтэм Вова пизы школа бере техникумез йылпумъяз, али Ижысь гурт удысъя академиын дышетске.

Июдинъёслэн табере семьязы со быдӟа — нокыӵе куно ӧтьытэк, асьсэос корка тыр луо. Ӵош ужало но, шулдыръясько но. Тани 6-тӥ январе — соку Антонлэн вордскем нуналыз — быдэс семьяен пельнянь куто. Пушкес пӧлы ог-огзылы сӥзёнъёс тыро.

Нош 26-тӥ июне ваньзы ӵош пусъё семьязылэсь кылдон нуналзэ — ӵапак та гужем нуналэ Ольга Васильевнаез кен куразы вал. Соку инкуазе потыса, чорыг лым сиё, сӥль пыжо, гань-гань вераськыны-кенешыны быгато.

— Нылпиослы юрттыны кулэ. Тани кенмы дышетске ай, соин пичи Аделинамы ми вӧзынгес будэ. Нылъёсылэн пиналъёссы висьыны кутско ке, кельтэ ми доры, шуисько. Мон табере пенсиын ни. Нылпиослэн тыриськонъёссы вань, ужамзы, уксё басьтэмзы потэ. Кытчы ми соостэк, нош кытчы соос митэк? Валче улоно, — шуэ Оля апай.

Алёна Ионина

Туспуктэмъёс басьтэмын Июдинъёслэн архивысьтызы

Ангелина Снигирева
By Ангелина Снигирева Май 16, 2019 13:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<