Кылдӥз-а выль удмурт драма?

Ангелина Снигирева
By Ангелина Снигирева Май 22, 2019 14:43
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Выль авторъёсты но пьесаосты усьтон понна Ижысь Туала драматургияя но режиссурая центр (ЦСДР) кылем арлэн пумаз ялӥз «Шудом» конкурс. Асьме удмурт литературалы со туж пайдаё луиз.

«Шудом» конкурсын Дарали Лелилэн «Алнаш зомби» пьесаез вормисьёс пӧлы пыриз.
Фото: А. Шкляев

Паймытӥзы кылбурчиос Анастасия Шумилова но Ольга Бородина: драматургия удысын усто луэмзэс возьматӥзы. Нош Дарали Лели та ӵошатсконлы луыса поттӥз ӝӧк пушказ ог 5 ар кыллем «Алнаш зомби» пьесазэ. Жюрие пыриськем Лукерья Шихова удмурт инстаблогерлэн верамезъя, Дарали пьесаяз туала вакытэз суреда, сое, пе, вужмемезлэсь азьло одно ик печатланы но пуктыны кулэ.

ЦСДР-ысь режиссёр Павел Зорин устооссэ пьесаосты шара лыдӟон ӝыт радъяз. Les Partisans театрысь артистъёс лыдӟизы Екатерина Бронниковалэсь «Кастинг» пьесазэ но Анастасия Шумиловалэсь Виталий Савиновен валче гожтэм «Год театра» ужзэс.

Е. Бронникова — Екатеринбургысь автор, пьесаоссэ пукто тодмо ӟуч драматурглэн Николай Колядалэн «Коляда-Театраз». Одӥг актёр понна гожтэм «Кастинг» пьеса «урал драматургия» шуон ӧрез азинтэ. Та ӧрын гожтэм пьесаос ӵемысь возьмато туала адямилэсь нуналысь нуналэ секыт улонзэ. Е. Бронниковалэн но героиняез — Сарапулысь куанер егит нылмурт, со миллионерлы кышно луон понна кастинг пыр ортче. Конкурсэ дасяськон сямен амало нылаш вань улэм-вылэменыз тодматэ. Дышетскемез ӧвӧл, уксё поттэ, лавкаын вуз карыса, пичи нылыз вань, нош туган шуонэз — пытсэт сьӧрын. Яратоно муртсэ отчы ачиз ик келям, мукет нылэн вожаса. Табере, пе, миллионерлы бызи ке, нуналлы быдэ гажанэ доры таксиен адӟиськыны ворттыло…

Пьеса туж тунсыко, со возьматэ шудо улонэз адӟымтэ адямилэсь сямзэ. Улэм-вылэмзы геройёслэн сокем урод — номыре ыштыны кадь… Таӵе шӧмо спектакльёс ӵем пуктылэ Павел Зорин аслаз театраз но. Кылсярысь, алигес Les Partisans возьматӥз Дэри ёросысь драматурглэн Миша Соловьёвлэн пьесаезъя «Деликатес» спектакль. Отысь геройёс, адями радын возись законъёсты нуналлы быдэ тӥяса, адями вылтуссэс пумен ышто.

А. Шумиловалэн но В. Савиновлэн «Год театра» пьесазы секыт мылкыд кельтӥсь пьесаослэсь кӧня ке висъяське кадь юморен тырмыт луэменыз. Но серекъян пыр туала улонысь вӧсь интыосы йӧтске.

Пьесаысь геройёс — удмурт мифологиысь персонажъёс (Коркакузё, Мунчокузё, Гидмурт), гурт калык, ёрос клубысь ужасьёс но ёрослэн кивалтӥсез. Театрлэн арезлы ёрослэн йырыз культработникъёссэ туала спектакль дасяны косэ. Постановкаез пуктыны юрттэ ассэ «режиссёрка» нимась егит студентка Саша. Солэн постановкаез укыр туала луэ: спектакль дыръя ик куатаськем но вожомем учкисьёс черекъяса сцена вылэ тубо но артистъёсты жугыны туртто.

Пьеса тодэ вайытэ индийской кинолэсь сюжетсэ, абсурд театрез. Читкае зэмос залын пукись учкисьёс но пыриськизы — соослы пьесаысь вожомем учкисьёслэсь кылъёссэс верано луиз. «Год театра» тодмо театральной критиклэсь Виктор Вилисовлэсь перформанссэ, Дарали Лелилэсь «Удмурт действие» вакчи абсурд пьесазэ но туала масс-медиаын вӧлмем темаосты (феминизмез, гендерной ужпумъёсты) тодэ вайытэ.

Та читка бере Ижысь Александр Митряков кылбурчи мылкыдзэ усьтӥз: «Год театра» пьесалэн, пе, историез медаз дугды вал. А. Митряков малпамъя, со кельшысал туала постановкаосты яратӥсьёслы но, традиционной театре ветлӥсьёслы но. Пуктозы-а куке но А. Шумиловалэсь но В. Савиновлэсь усто ужзэс, улыса адӟом.

Лариса Дмитриева

Ангелина Снигирева
By Ангелина Снигирева Май 22, 2019 14:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<