Кызьы воштӥськоз Ижысь шор площадь веразы город администрациын

Ангелина Снигирева
By Ангелина Снигирева Май 23, 2019 10:24

Ижысь Шор карлуд ӝоген выльдӥськоз — али отын уен-нуналэн сямен лэсьтӥськон ужъёс мыно.

Шоп площадьын лэсьтӥськон ужъёс мыно

Ужъёслэсь мынэмзэс та нуналъёсы эскеризы Иж городлэн йырыз Олег Бекмеметьев но лэсьтӥськонъя, ЖКХ-я но энергетикая министр Дмитрий Сурнин. Операя но балетъя театр вадьсын — бадӟым лэсьтӥськонлэн нырысетӥ люкетэз. Отын мур гу гудэмын, солэн пыдсаз 60 метр кузьдалаен но 40 метр пасьталаен бетон борддоръёс ӝутэмын ни — со вуоно фонтанлэн инъетэз. Пуктӥське инвесторлэн уксёеныз, висъямын 98 миллион манет. Лэсьтӥськисьёс та фонтанэз йылозяз-пумозяз вуттыны кулэ туэ 1-тӥ августозь, нош 1-тӥ сентябрь бере со калыкез шумпоттыны кутскоз ни. Ӵапак соку ик усьтыны чакламын Шор карлудлэсь та выльдэм интызэ. Азьвылэныз фонтанэн ӵошатыса, таиз чылкак туала луоз: крезьгур чузъяськем улсын вуэз 80 интыетӥ пызъёз, тылъёсын югдытӥськоз но лазер голография амалэн чебертэмын луоз.
Та вакытэ ик фонтанлэн улӥязгес гумыос кыско. Таиз уж йылпумъямын луыны кулэ 31-тӥ июлёзь. Отӥяз кутскозы шутэтскисьёслы-поръясьёслы чаклам интыосты радъян ужъёс, выль сямен вӧлдэмын луоз выжлёг. Нош 20-тӥ август бере мерттыны чакламын 60-лэсь ятыр яблокпуос — озьы Шор карлудын кылдоз улмопу сад. Со сяна, мерттозы на 30-лэсь ятыр бадяръёс. Лэсьтэмын луозы нылпи площадкаос.
Уно вазиськонъёс вуизы Шор карлуд котырын будӥсь писпуос ласянь: Ижын улӥсьёс соосты утьыны куризы. Шоркарлэн йырыз Олег Бекмеметьев буйгатӥз: одӥг писпу но корамын уз луы, соос азьвыл сямен ик шулдыртозы та интыез. Утялтомы кустарникъёсты гинэ: соос алямын, шуш луэмын ни, пусйиз со. Городлэн йырыз лэсьтӥськисьёслэсь тунсыкъяськиз: вань кулэ луись материалъёс дыраз вуо-а, уз кылдэ-а та ласянь ӝеганъёс? Шор карлудэз выльдонэн вырись «Дельта-Строй» огазеяськонлэн кивалтӥсез А. Чебыкин верамъя, ӝеганъёс кылдыны кулэ ӧвӧл, угось вань кулэ луись арбериос складъёсы вуттэмын ни.

Лэсьтӥськонъя, ЖКХ-я но энергетикая министр Дмитрий Сурнин ивортӥз: Шор карлудэз Иж тымет дорозь выльдыны туэ ум вуттэ — лэсьтӥськыны тупась куазьмы-гужеммы кема уг кыстӥськы. Вуоно арын ужъёс азинтэмын луозы. Выльдыны чакламын «Россия» кинотеатр вадьсысен «Пыраклы Россиен» монумент дорозь интыез. Вылӥысьгес люкетъёссэ сямен ик, та интызэ но выльдыны 200 миллионлэсь ятыр манет чакламын. Та уксё вуыны кулэ «Улыны ярась город» программа чотын.
Шор карлудлэн быдэсак дась луыны кулэ вуоно арын Удмуртилэн кунлык басьтэмезлы 100 ар тырмонэз пусъёнозь.

Елена Никитина

Туспуктэмъёс авторлэн

Ангелина Снигирева
By Ангелина Снигирева Май 23, 2019 10:24
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<