Куразы 13-тӥ мае, пятницае…

Ангелина Снигирева
By Ангелина Снигирева Май 24, 2019 11:04
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Семьялэн калыккуспо нуналэз улсын Ижысь Тодосчиослэн юртазы сӥлы каризы Пичи Пурга ёросысь Баграш-Бигра гуртысь Баграшовъёслэсь семьязэс. Кузпалъёс Светлана Михайловна но Павел Петрович 5 пинал будэто. 2-ез быдэ вуыса ас семьяоссэс кылдытӥзы ни.

Баграшовъёс
Фото: Валентина Емельянова

Кышно сётӥз Инмар

Павел Баграшов Баграш-Бигра гуртын вордскемын, бадӟым семьяын будэмын 7 пинал пӧлысь 6-тӥез, бӧрсяз пичи сузэрез будӥз на. Воргоронлэн вылӥ образованиез ӧвӧл ке но, киыз котьмалы мынэ. Трактористлы дышетскиз, колхозын тыршиз, вукоын пызь изӥз, КЗС-ын ужаз, газовик но вал. Нош берло дыре гуртын юрт пуктӥсьёс ваньзы сямен Павел Петровичлэсь визь-кенешсэ юало, со кирпич борддоръёс умой пуктыны быгатэ.

Светлана Михайловна вордскемын Гожня гуртын, пичиысен ик котьмалы шаплы. Туж яратылӥз лыдӟиськыны, пичи дыръяз ялан дышетӥсь луыса шудылэм. Школа бере Можга педучилищеын тодон-валан люказ, отӥяз Удмурт кун университетысь историяя факультетэз йылпумъяз. Кӧня ке ар школаын, гуртысь библиотекаын ужаз, нош берло 2 арзэ Баграш-Бигра муниципал кылдытэтэн кивалтэ.

Егит кузпалъёс нырысьсэ ог-огзэс синйылтӥллям Гожнялан ӝыт шулдыръяськон дыръя.

— Гожняе артысь гуртъёсысь егитъёс трос люкаськылӥзы, мон но куд-ог дыръя ветлылӥ пӧлазы, — веранзэ мытӥз Павел Баграшов. — Одӥг полаз ӝыт шулдыръяськон дыръя ужрадэз нуись егит нылашез синйылтӥ. Оло туж шаплы потӥз, оло укыр етӥз, соку эшъёсылы серекъяса шуи: Инмар мед утёз таӵе кышнолэсь. Нош мар малпаськоды, Инмар ӵапак сое ик кузпал кузьмаз.

— Со нуналэ бигра пиосты ваньзэс синйылтыса но ӧй вуы, — шуэ Светлана Михайловна. — Павликен мон мукет дыръя тодматски ни — Можгаысь педагогикая училищеын берпуметӥ курсын дышетскыкум, практикаме ортчыку. Вордскем гуртам ужаме ӧз поты, артэысяз вамыштӥ. Баграш-Биграысь школае вуи гинэ но, директорлэн нырысетӥ юанэз вал: туганэд вань-а? Мон копак пайми. «Ӧвӧл» шуыны возьыт потӥз, ымы ачиз «вань» шуиз кадь. Угось со вакытэ школаын ужаны инты ӧз шедьылы.

Уд но оске, Баграш-Бигра гуртын практиказэ ортчон вакытэ егит нылаш нылпиосыз но визьноданы вуиз, аслыз туган но шедьтӥз. Январь толэзе тодматскизы, май толэзе Гожня гуртысь нылашез куразы, нош июль толэзе сюан шудӥзы ни.

— 1994-тӥ арын вал со, борддорысь календарь шоры чиньыенызы возьматӥзы но дӥняд кураны лыктом шуизы, — веранзэ азинтӥз кышномурт. — Уд но оске, со вал 13-тӥ май, пятница нунал. Озьы ке но милемлы ӧз люкеты таӵе лыдпус. Бӧрысь, Интернет вотэсысь бугыръяськыса, тодӥ на: ӵапак со аре май толэзе нырысьсэ ялэмын вал Семьялэн калыккуспо арез. Табере сое арлы быдэ пусъё ни.

Визьнодасьёс — арлыдоос

Бадӟым семьяе шедьыса, Светлана Михайловна улонлы котыр ласянь дышетсконо луиз на. Музъемозь ик йыбырттэ кузпалызлэн мемей-дядяезлы. Соос, пе, туж визьмо адямиос вал. Вазь ӵукна ик, чай юон сяменызы, ӝӧк сьӧрын нунал ӵоже быдэстоно ужъёссы сярысь кенешылӥллям. Со веранъёсты Светлана кензы но сак кылзылэм. Ӵем дыръя кышномурт троссэ ужез ачиз радъялляз, нош нылпиос азьын вань лэсьтэмзэ дядяйзы вылэ «гожтылӥз». Озьы со картэзлэсь данзэ уката ӝутылӥз.

— Визьмо кышномуртъёс гинэ озьы вераськыны быгато, — шуэ Светлана Баграшова. — Одӥг пиналзэс но кужмысь ужаны ӧз косылэ. Мемеймы, Мария Николаевна, котькыӵе ужлы шаплы вал, семья кусыпъёсты радъяны быгатылӥз. Дядяймы но, Пётр Петрович, синмаськымон адями вал. Ачиз пал суй вал ке но, котьма ужез милесьтым шаплы быдэстылӥз, бирдыяськонэз вератэк. Вань нылпиосызлы корка пуктӥз. Баграшовъёслэн семьяязы 7 нылпиос вал ке, 2-ез гинэ палэнын уло — Пичи Пурга черкогуртын но Улӥ Посьтол гуртын.

Светлана Удмурт кун университетын тодон-валанзэ будэтыны малпаз. Покчи нылпиосын соку Баграшовъёслэн воргоронъёссы пукизы. Одӥг пол но куаретылӥллямтэ, шуылӥллям: тон, кен, дышетскы, гурт котырысь ужъёсты асьмеос быдэстомы.

Та вакытэ анай-атаез Светлана Михайловналэн гинэ вань на. Юртъер котыразы но бергало, кулэ дыръяз Надежда Васильевна, арлыдыз шоры учкытэк, велике пуксьыса, артысь гуртэ нылпиоссэ чакланы но вуэ.

Баграш-Бигра гуртын котьку данъяло семья йылолъёсты. Сое утёнлы бадӟым саклык висъяло. Туннэ но гуртын бӧлякен-бӧлякен валче уло, ог-огзылы веме но карыны юрттӥсько, ӵош юмшало на.

— Семья со семья ни, пӧртэм вакытъёс луыло. Одӥг пол кышноелы туж воже потӥз, ӧй чида, бамаз чабкемме валатэк кыли, — шуэ Павел Петрович. — Ма малпаськоды, секунд но ӧз ортчы, мынам бамам но сальк! гинэ вуиз. Со ик визьмаськеме луиз. Семьяямы мон йыр, нош кышное — чырты. Маке борды басьтӥськоно ке, котьку ӵошен кенешиськомы.

3 яке 5

Баграшовъёслэн семьяязы нырысь ик Дима пизы вордскиз, эшшо ар ортчыса — Настя нылзы, нош кӧня ке вис карысагес — Аня нылзы.

— Бадӟымъёсыз, кыкто пиналъёс кадь, ӵошен будӥзы, — шуэ Светлана Михайловна. — Кыкназы ик спортэз гажало: Дима — куасэн бызьылонъя спортъя мастер, Удмуртилэн сборной командаяз кутэмын, кылем толэзе сюан ортчытӥмы. Настямы баскетболэн шудэ, ёрослэсь данзэ Гурт шудонъёсын но трос пол утьылӥз. Нылмы Кез ёросысь Зӧк Олып гуртэ быземын, али пиналын пуке.

3-тӥез нылзы Баграш-Бигра школаысь 9-тӥ классын дышетске. Физкультурая урокъёсты гажа ке но, золгес яратэ пӧраськонэз, малпа кондитер луыны. Интернет вотэсын бугыръяськыса, пӧртэм тортъёс но ческыт сиёнъёс пӧраны дышетскиз.

— Одӥг нуналэ Баграшовъёслэн выжыысьтызы ик кышномуртэн пумиськи, милям соин нылпиосмы копак одӥг мында, вордскемын но одӥг аръёсы, — вера кышномурт. — Тодмое куректэмзэ вераз, 4-тӥ пиналэн, пе, секыт луэмын, ма карыны уг валаськы.

Светлана Михайловна тодмозэ бурдъяны выриз. Но аслаз сюлмаз маиз ке вырӟиз кадь. Бертыса Павел Петровичезлы соку ик вань югдурез верам: вот соослэн пизы вордӥськоз, нош тон гочалод, оло, асьмелы но нылпи ваёно на? Озьы кенешемзы бере асьсэос но пинал ваёно кариськиллям. Антонзы туэ школае мыныны дасяське ни. Нош кыӵе кырӟаны быгатэ, эсьмаса, сцена вылын покчи Богдан Анфиногенов кадь выре. Нош 4 пинал — со шоро-куспо лыдпус, семьяын, пе, 3 яке 5 нылпи луыны кулэ. Озьы Баграшовъёс 5-тӥзэ но вордӥзы на. Алёна нылзылы 3 арес. Со но, Антон сямен, кырӟаны-вераны йӧндыре ни.

— Пиналъёсты нуныям сяна, эрик но сётыны быгатоно, «мон ачим» вакытазы котьма ужез асьсэос мед эскерозы, сыӵе дыръязы кузязы ветлӥд ке, бӧрысь соос понна ужаса жадёд, — шуэ Светлана Михайловна. — Милям но семьяын котькыӵе дыръёс луыло. Магазинэн артэ улӥськомы, маке куро ке, малы со кулэ шуыса юасько. Валэктыны быгато ке, басьтӥсько, нош бӧрдыса ческыт сиён куремзэс пелям ик уг понӥськы.

Баграшовъёслэн семьязы туж синмаськымон, ог-огзылы котьку быгатэмзыя юрттӥсько. Бадӟымез пизы куасэн бызьылыны кутскыку, шӧдӥзы, пияшлэн быгатонлыкъёсыз вань, нош спортын басьтэм вормонъёссэ уноятон вылысь ӟеч куас басьтыны кулэ вал. 15 сюрс манетэн оло куас басьтод, оло мисьтаськон машина. Кузпалъёс нырысь ик пизылы юрттӥськоно кариськизы. Озьы тӥни, котькыӵе ужез дэмен но кенешыса быдэсто. Баграшов кузпалъёс шумпото, нылпиос, пе, милемыз егитомыто.

Валентина Емельянова

Ангелина Снигирева
By Ангелина Снигирева Май 24, 2019 11:04
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<