Дӥсьтон кузьма дышетӥсь

Ангелина Снигирева
By Ангелина Снигирева 31 мая, 2019 16:23
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Италмас лицей-интернатысь химия дышетӥсьлэн Наталия Воробьёвалэн вормонъёсыз синмаськымонэсь. Школаын со 28 ар ӵоже ужа. Наталия Евгеньевна «Дышетон» нацпроектъя вормись луылӥз 2008-тӥ но 2014-тӥ аръёсы. Эшшо 2008-тӥ арысен огъя кун экзаменэз эскеронъя элькун комиссилэн экспертэз луэ.

Н. Воробьёва
Фото: Е. Скворцова

Химилы синмаськытэ опыт

— Мон Удмуртие вуэмын Киров улосысь. Школаме йылпумъяй Дэбесын. Азьланяз медицинае мыно шуыса малпай, малы ке шуоно вань предметъёс пӧлысь тужгес яратӥ химиез но биологиез. Нош анае ӵапак эмъян удысын тыршиз. Малпанъёсме ӵогыса кадь, шуиз: мон вамен вамыштыса гинэ, медицинае мынод. Пумитъяськыны ӧй дӥсьты. Озьы дышетскыны пыри Удмурт кун университетэ, бырйи биология но химия факультетэз. Татын биология уката кельшиз. 1991-тӥ арын ужаны лыктӥ Италмасысь шор ёзо школае. Но биологиен дышетӥсе ӧз кутэ — интызы ӧй вал. Ӵектӥзы химиез нуыны. 2001-тӥ арын лицей-интернат усьтӥськем бере ӧтизы выль интые ужаны. Озьы 2 школаын химилы дышетӥ. 2014-тӥ арын лицей-интернатын директорлэн воштӥсез луи, соин ӵош ик предметэз но нуисько, — вакчияк ачиз сярысь вера Наталия Воробьёва.
Школаын химилы дышетыны кутскемез бере Наталия Евгеньевна ачиз но валатэк кылиз, кызьы яратоно биологизэ мукет удыслы воштӥз.
Пиналъёс предметэз мед яратозы шуыса, соослы кыл вылын гинэ верано ӧвӧл. Со понна ӟеч лаборатория но медло. Италмасысь лицей со ласянь туж узыр. Татын пӧртэм эскеронъёс ортчытыны вань реактивъёссы тырмо. Озьы котькуд урокын опытъёс ортчыло. 8-тӥ-9-тӥ классъёсын котькуд занятиын опытъёсын выро. Нылпиос тодо, кӧня грамм тазэ яке созэ веществоез басьтоно. Нош дышетӥсь Наталия Евгеньевна ассэ консерватор шуэ — со пумит луэ виртуальной нимаськись лабораториослы. Компьютерын шудонын сямен, луэ пробирка кутыны, отчы порошок кисьтыны, реактив ватсаны. Нош мар пӧрмоз, янгышад ке? Куддыръя книгаын гожтэм сямен уг луы ук. Биология, химия но физика — со практической наукаос, татын маке но лэсьтыны, кылдытыны кулэ. Сотэк нылпи та предметлы уз синмаськы, оске дышетӥсь.

80 но 20 процент
Химия предметъя огъя кун экзамен огез секытэз лыдъяське. Рособрнадзорлэн ивортэмезъя, естественно-научной предметъёс пӧлысь ӵемгес быръё обществознаниез, физикаез, биологиез. Химиез сётыны мылкыд каро 14 процентэз пиналъёс. Ӵапак та предметъя ЕГЭ сюрес усьтэ медицинаен, фармацевтикаен герӟаськем вузъёсы.
Озьы ик Италмасысь лицей-интернатын но нылпиос котькуд аре быръё химиез. Туэ 14 пинал мылкыдзэ вераз та предметъя огъя кун экзамен сётыны.

ЕГЭ-ын ӟеч результат басьтон понна 80 процент кужымзэ сётыны кулэ пинал, нош 20 процентэз потэ дышетӥсь бордысь. Педагог быгатэ валэктыны, выль ивор сётыны, сюрес возьматыны. Нош нылпилэн мылкыдыз ӧз луы ке, номыр уз быдэсмы. Косыса нылпиез дышетскытыны уг луы, — шуэ Наталия Воробьёва.
Химия удысэз быръемед потэ ке, сое нырысетӥ араз ик рос-прос дышетыны кутсконо, пусъе педагог. Тани химия али 8-тӥ классын кутске. Татын предметлэн огъя инъетэз кылдэ. Паськытгес ивор сётӥське ни 9-тӥ классын, нош 10-тӥ-11-тӥ классъёсын азьланьтӥське. Зэм, тросаз школаосын огъя программая ужало — соя химилы арняяз 1 урок висъяське. Со туж ӧжыт. Нылпиос та дыр ӵоже химиысь веществоосын тодматскыса гинэ вуо. Нош ку соосты ЕГЭ-лы дасялод на? Соин лицей-интернатын 8-тӥ-9-тӥ классъёсын химия арняяз 2 урок пуктэмын, нош бадӟым классъёсын 3 час луэ ни.
Наталия Евгеньевна огъя кун экзаменэз эскеронъя элькун комиссилэн экспертэз луэ. Солэн аслаз но 4 дышетскисез ЕГЭ-зэс 100 баллы сётъязы ни.

Нырысетӥез шумпоттӥсе вал Маша Бывальцева. Со Дэбес ёросысь нылаш, 2010-тӥ арын вылӥ балл люказ. Капчиен пыриз Санкт-Петербургысь химико-фармацевтической унивеситетэ, йылпумъяз ни.
2012-тӥ арын Эгра ёросысь Зура гуртын вордскем Алёша Леонтьев озьы ик 100 балл люказ вал. Со Москваысь кун университетэз бырйиз. 1-тӥ курс бере лыктӥз лицее, туж секыт дышетскыны, шуэ, мон, пе, химиез уг валаськы кадь. Тон химиез туж ӟеч тодӥськод, дышетскондэ эн кушты шуыса буйгатӥ сое. Кылзӥськиз. Табере со магистратурае мынӥз ни. Наукае выемын, кыӵе ке бадӟым проект бордын ужа, Удмуртие вуылӥз партнёръёс утчаны.
2014-тӥ арын кыкез пиналъёсы 100 балл люказы. Огез Россиысь химико-технологической университетэ пыриз, Италмасысь ныл вал. Кыкетӥез — Марк Марков — Пичи Пурга ёросысь, таиз МГУ-ын дышетскиз, — пиналъёссэ нимын-тулын тодаз вае, соослэсь улон сюрессэс тодэ Наталия Евгеньевна.
Кылем арын но солэн дышетскисез ӧжыт гинэ 100 балл ӧз люка. Одӥг янгыш лэсьтыса, 98 балл басьтӥз. Наталия Евгеньевна ӝожомиз ик, нош дышетскисез понна со зэмос трагедия луиз.
Н. Воробьёвалэн рос-прос дышетэм мукет нылпиосыз но огъя кун экзамензэс ӟеч сётыны быгато. Соин дӥсьто учкыны нимо-дано вузъёс шоры. Быръё Казань, Пермь, Москва, Санкт-Петербург городъёсысь университетъёсты но академиосты. Тросэз азьлань сюрессэс герӟало эмъян удысэн. Удмуртиысь котькуд больницаысь пумитаны луоз, дыр, дышетэм пиналъёсме, шуэ Наталия Евгеньевна.
Анаезлэсь быдэсмытэ малпанзэ улонэ дышетӥсьлэн пыӵатӥз пиез. Медициная академиез йылпумъяса, врач-нейрохирург луиз, ужа Нырысетӥ элькун больницаын.

— ЕГЭ нылпиослы паськыт вамыштыны луонлык сётэ. Экзамен — котьку ик секыт луэ. Со понна куриськыны луэ туж дано вузъёсы. Ку ай гуртысь пиналъёс МГУ-э пырысалзы нимысьтыз направленитэк? Нош али со понна трос ик кулэ ӧвӧл. Нырысь, яратоно удыстэ шедьтоно. Собере, дышетсконо но дышетсконо, азьтэмъяськонэз вунэтоно. Куинетӥез, дыртон сямлэсь куштӥськоно. Озьы лад-лад, малпаськись нылпилэн инвисъёсыз паськыт усьтӥсько, — шуэ Наталия Ворбьёва.

Ангелина Снигирева
By Ангелина Снигирева 31 мая, 2019 16:23
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<