Вуоно арын кизёнлы дасясько ни

Ангелина Снигирева
By Ангелина Снигирева 15 мая, 2019 14:07
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вотка ёросысь «Мир» хозяйство котырысьтыз 8 гуртэз сюдэ, шуыны луоз. Татысь 9 сюрс гектарез кизе угось — та ог 5 пичиесь хозяйствоосын мында. Туэ котькуд гектарысь 50 центнер ю тысь люканы медэ.

«Мир» хозяйствоысь агроном С. Кузьмин

Вотка ёрослэн йырыз Илья Прозоров пусъемъя, районын туэ, кылем арын сярысь, быдэс арнялы вазьгес кизьыны кутскизы — 25-тӥ апреле. 6-тӥ майлы 27 процентэз бусыоссы киземын ни вал. Берло дыре ёросысь «Пихтовка» но «Мир» хозяйствоос Белоруссиысь технологиосты пыӵатыны ӧдъязы — сӥзьыл ик бусыосы удобрение лачак потто. Таин валче котькуд гектарысь 70 центнер йыды люканы пӧрмыто. «Мир» хозяйствоын Даниын но Германиын поттэм кидысъёсын ужало. Соос эшшо но тросгес урожай мед сётозы шуыса, котькуд гектаре ог 80 килограмм удобрение потто. Ӵошатон вылысь верано ке, шаерамы котькуд гектаре шорлыдын 12 килограмм сяна удобрение уг согиськы.

— Россиын поттэм кидысъёс начаресь, — шуэ «Мир» хозяйствоысь валтӥсь агроном Степан Кузьмин. — Соин ик уксёмес ум шыръяське, кидысъёс 3 поллы дуногес усё ке но, басьтӥськомы. Пайдаез шӧдскымон луэ угось. Кылсярысь, кунгож сьӧрын поттэм 1 ю-нянь кидысысь 7 модос потэ, ваньмыз тыро шепо луэ. Кызьы сое уд яраты? Туэ куазен но удалтэ. Соин ик котькуд гектарысь шорлыдын 50 центнер ю люканы малпаськомы. Кылем арын 30 центнер калтӥмы. Вуоно арын урожаймес эшшо но йылтон бордын али ик ужаськом ни. Планъёс бадӟымесь луыны кулэ.

Урожай сьӧры уйиськыса ик, татын люцерна кидыссы но Даниысь вуттэмын. Кылем арын кизьыса утчазы ни — кельшиз. Степан Кузьмин верамъя, Даниысь люцерна лымы улысь куаръяськыса потӥз ни. Россиын поттэмез али гинэ чебертӥськыны кутскемын ке, кунгож сьӧрысез ог 12-15 сантиметр кузьда будэмын, куаръяськемын ни. Со нокыӵе кезьытъёслы, шуак усем лымылы уг сётӥськы. Со сяна, 3 арнялы вазьгес вуэ бере, сомындалы ик вазьгес утялтыны луэ. Эшшо ке одӥг бусыысь 4 пол урожай калтыны пӧрме, октябре но чебер будэ на угось. Нош Россиын поттэм люцернаез троссэ 2 пол утялтыны луэ.

— Модосэз но вакчи — та тужгес валтӥсез, — шуэ егит агроном. — Модосаз угось пудо понна номыр ческытэз ӧвӧл. Со понна куаръёсыз бадӟымесь, протеинэз лачак. Ӟечлык сьӧры уйиськытэк уг луы. 5 сюрс сюро таза пудоез сюдоно ук. Ар пумозь уллёмы эшшо 800 йырлы будоз.

Хозяйствоен кивалтӥсь Елена Собина матысь дыре пудо уллёез эшшо 5 сюрс йырлы будэтыны малпа. Али утчало пудо вордонъя комплекс пуктон инты. Соин ик валтӥсь агрономлэсь выль технологиос котыре кыстӥськемзэ Елена Собина умоен пумита, котьку валаны но юрттыны тырше. Кылсярысь, хозяйствоын матысь дыре рапс кизён борды басьтӥськыны чаклало. Со понна выль техника, кидыс куасьтон тӥрлык но вӧй поттонъя цех вуттыны ӧдъяло.

Хозяйствоысь специалистъёслэсь, кивалтӥсьёслэсь азинскыны мылкыдъёссэс ужасьёс адӟытэк уг кылё. Соин ик ужаны но рос-прос тыршо. Люцерна кизёнзэ куспетӥ карись журналистъёсты, кылсярысь, механизатор Николай Иванов мылкыдтэк пумитаз. Тӥледын йырин уж ӝега, пе. Сотэк но, шуэ, 12 час руль сьӧрын уг тырмы — ӝоггес кизем потэ. Киземез бере угось мышказ музъемез паньгатӥсь-лёгись техника ортчыны кулэ на — кидыс озьы шаплыгес но умойгес ӝужа.

— Умой ужась муртэ хозяйствоын дунъяны но быгато. Милям шоро-куспо уждун ёросын сярысь вылӥынгес, — шуэ Николай Иванов. — Соин ик пенсие потэме бере но кошкыны уг дыртӥськы. Дорын пукид ке, ӝоггес пересьмод. Бусыын ик шулдыр.

Бусыоссы нош ог-огзылэсь ог 15 иськемлы но палэнысь гуртъёсын интыяськемын. Соин ик техникаез трасса кузя солань-талань кыскантэм вылысь куддыр тракторъёсты бусыын ик кӧлто, куддыр муртлэсь арендае куто. Асьсэлэн но техниказы узыр. Котькудаз ГЛОНАСС система пуктылэмын — чакланы быгато, кыӵе бусыын ужало, кытчы удобрение, топливо вуттоно. Инженеръёс но котьку дась: кытын ке маке тӥяське ке, соку ик кулэ запчасть вутто. Механизаторъёс асьсэос но техниказэс жаляны тыршо, оломае но быдэстыны быгатӥсь, энергонасыщенной техниказылы асьсэос но паймо. Кылсярысь, огдыре кизись, удобрение бусые поттӥсь агрегатсылэн захватэз 12 метр, озьыен, ю-нянь кизён ужзы 2 поллы ӝоггес мынэ. Зэм, Степан Кузьмин пусъемъя, оглом ю тысь кизён ужъёссы 15 нунал котыр мынозы — бусыос паськытэсь. Сомында ик дыр кулэ кукуруза кизьыны. Берлозэ котькуд гектарысь 350 центнер люканы медо.

Елена Сараматова

Туспуктэмъёсыз авторлэн

Ангелина Снигирева
By Ангелина Снигирева 15 мая, 2019 14:07
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<