«Вунонтэм полке» пыриськиз 83 сюрс адями

Ангелина Снигирева
By Ангелина Снигирева Май 15, 2019 14:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртиын 6-тӥ арзэ «Вунонтэм полк» акция радъяське ни. Арысь аре Быдӟым оже пыриськем ветеранъёслэсь, фронт мышкын ужамъёслэсь туспуктэмъёссэс нуисьёс йыло. Туэ ужрадэ пыриськиз 83 сюрс адями.

«Вунонтэм полк» акцие пыриськиз 83 сюрс адями

Асьсэлэсь геройёссэ данъяны потӥзы пичиез но, бадӟымез, городъёсын но пичи гуртъёсын улӥсьёс. Бадӟымез ужрад ортчиз Ижын, туэ шоркарысь акцие пыриськизы 35 сюрс адямиос. Соос Пушкинской урам кузя вамышъязы, война сярысь кырӟанъёсты быдэстыса, уноез пушкыз тырыса, синвуаськиз но. Трос учкисьёс сылӥзы «Вунонтэм полклэн» кык палаз ик, соос, портретъёсысь геройёсын быдэс колонна кошкытозь, ялан чабизы.
«Вунонтэм полкын» вамышъяз 78 аресъем Ижын улӥсь Тамара Сакеева. Быдӟым ож дыръя кышномурт анай-атайтэк кылиз. Cолэн Иван Яблочкин атаез 1943-тӥ арын ож бусыын быриз.

— 3 ар талэсь азьло нылпиосы атаелэсь бырем но ватэм интызэ шедьтӥзы, озьы Псков улосэ вуылӥ, — вераз нылкышно. — 9-тӥ май мон понна Быдӟым нунал, арлы быдэ Ялан ӝуась тыл доры лыктӥсько, нош берло аръёссэ «Вунонтэм полке» но пыриськисько. Мон музозь йыбырттӥсько Вормонэз дурем ветеранъёслы, тау карисько та акциез малпам адямиослы. Куке оградын ваньмыныз ӵош вамышъяськод, пуш тыре, кунэнымы, вӧзамы улӥсь адямиосын данъяськон мылкыд пачыла.
Арлы быдэ «Вунонтэм полкен» ӵош вамышъяло «Удмурт дунне» газетын ужасьёс но. 2-тӥ арзэ акцие пыриське янгышъёсты тупатъясьмы Алёна Шкляева. Туэ со шоркармылэн урамъёсыз кузя военной формаен вамышъяз.

— Вормон парадэ чебер дӥсяськыса лыктэмъёслы синмаськылӥ, туэ ачим но военной дэрем, пилотка, сумка шедьтыса, пӧрмытски, — вераз Алёна. — «Вунонтэм полкын» мынӥ Григорий Васильевич Смирнов но Архип Григорьевич Васильев песятайёсылэн туспуктэмъёсынызы. Малпасько, та акцие пыриськон — со тужгес ичиез, мар ми та вакытэ лэсьтыны быгатӥськом Быдӟым оже пыриськем песятай-песянайёсмылы тау карон, соосты буре ваён, тодамы возён, но данъя понна.
6-тӥ арзэ данъян акциез радъяло ни Сьӧлта ёросысь Югдон школаысь нылпиос но.

— Пичиез но бадӟымез, дышетӥсьёс но пӧраськисьёс ожысь ветеранъёслэн туспуктэмъёсынызы вамыштӥмы гуртысь синпелет доры, — вераз Югдон школалэн директорезлэн воштӥсез Зинаида Вежеева. — Шӧдӥськиз: нылпиос потретъёсты данъяськыса нуизы, ог-огзылы песятай-песянайёссы, соослэн кин луэмзы но кытын ожмаськемзы сярысь веразы. Туж умой, пиналъёс асьсэлэсь геройёссэс тодыса будо шуыса, соос кадь кышкасьтэм луэмзы потэ. Та сярысь сочинениос но гожъямы. Туэ школаысь 10 нылъёс но пиос Быдӟым Вормон нунал азьын юнармеецъёс луыны мылкыд каризы. Табере соос ӟеч ужъёс лэсьтыны мылкыдын уло — инкуазез утёзы, шаертодон ужен вырозы, спортэн золгес эшъяськозы.
6-тӥ арзэ «Вунонтэм полк» акциен урамъёсазы пото ни Якшур-Бӧдья ёросысь мукшиос но.

— «Вунонтэм полкен» ортчеммы бере Быдӟым ожысь ветеранъёслы синпелет дорын митинг ортчиз, война сярысь кырӟанъёсты быдэстӥзы нылпиос, — вераз клубын ужась Татьяна Кайсина.
Геройёссэс данъяны потӥзы сюмсиос но. «Знамя» газетысь эшъёсмы кӧня ке ар ӵоже «Вунонтэм полке» пыриськыло ни. Раиса Волкова журналист та ужрадэ ӵыжы-выжыоссэ но кыскиз, бадӟым семьяеныз валче черкогурт урамъёссы кузя вамышъязы. Нош Дэбес черкогуртын улӥсьёс ветеранъёслэн туспуктэмъёсынызы сяна, басма юдэсъёслэсь вурем знамяен урамъёссы кузя мынӥзы — отын гожтэмын аспал ожгарчиоссылэн нимтулъёссы.

Сергей Захаров

Туспуктэмъёс басьтэмын udmurt.ru сайтысь

Ангелина Снигирева
By Ангелина Снигирева Май 15, 2019 14:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<