Ветеранъёслы кузьым

Ангелина Снигирева
By Ангелина Снигирева Май 15, 2019 14:35

10 сюрс манет

Песятаймы Быдӟым Отечественной войнае пыриськемын, ожысь ветеран. 9-тӥ Майлы сӥзьыса, кыӵе ке юрттэт висъяськоз-а солы туэ?

Ветеранъёсын пумиськылӥзы ёросэн кивалтӥсьёс
Фото: Э. Иванова

Николаева Е. Дэри ёрос

Валэктон сётэ Пенсиосъя кун фондлэн Удмурт ёзысьтыз СМИ-осын кусып возёнъя группалэн кивалтӥсез Елена Ананина.

Россилэн Президентэз В. Путин 24-тӥ апреле, Быдӟым Вормонлы 74 ар тырмонлы сӥзьыса, юнматӥз указзэ, соя кунысьтымы 70 сюрс адямилы 10 сюрс манет мында юрттэт висъяськоз. Сое басьтозы Быдӟым Отечественной оже 1941-тӥ арысен 1945-тӥ арозь пыриськемъёс-ветеранъёс, та ожысь инвалидъёс. Юрттэт, Россиын улӥсь ветеранъёслы гинэ ӧвӧл, Латвиын, Литваын, Эстониын улӥсьёсызлы но чакламын. Пусйыны кулэ: та выплата табере тыриськоз арлы быдэ 9-тӥ Май котырын.

Удмурт шаерын 10 сюрс манетъем юрттэтэз басьтозы 241 ветеранъёс, озьы ик инвалид луэмъёс. Выплатаез люкылон понна кыл кутӥсь огазеяськонъёслы Пенсиосъя кун фондлэн Удмурт ёзэз уксё люкылӥз ни. Та вакытэ та юрттэтэз люкылон мытэмын почта пыр пенсия басьтӥсь ветеранъёслы, инвалидъёслы. Кышканэз ӧвӧл: почтаын ужасьёс ветеран доры вуыку, соос доразы ӧз луэ ке, юрттэт 9-тӥ Май бере вуоз.

Пусйыны кулэ: та юрттэтэз басьтон понна Быдӟым ожысь ветеранлы, инвалидлы нокытчы нимысьтыз вазиськоно ӧвӧл. Вань кулэ луись ужез быдэстозы Пенсиосъя кун фондлэн Удмурт ёзысьтыз специалистъёс.

2 сюрс манет

Вордскемын мон Санкт-Петербургын, Быдӟым ож вакытэ блокада дыръя но отын улэмын, «Жителю блокадного Ленинграда» пусэ но вань. Ог 20 арлэсь кема ини татын, Удмурт шаерын, улӥсько. Туэ 9-тӥ Майлы ожысь ветеранъёслы, инвалидъёслы гинэ уксё сётыны чакламын-а? Оло, мыным но кыӵе ке юрттэт висъяськоз?

Антонина Н. Иж

Валэктон сёто Ужъя но калыкез улон-вылонын утён политикая министерствоысь специалистъёс.

Удмурт Элькунлэн Тӧ-роезлэн 22-тӥ апреле юнматэм указэзъя, 2 сюрс манет мында одӥг пол сётӥськись юрттэт басьтозы Быдӟым ожысь ветеранъёс но инвалидъёс, озьы ик «Жителю блокадного Ленинграда» знакен пусъемъёс, быдэ вуымтэ вакытазы концлагерьёсын пукемъёс — таос асьме шаерамы уло ке. Озьыен, тӥ но та нуналъёсы 2 сюрс манет мында юрттэт басьтоды.

Та выплатаез люкылыны уксё висъяськоз улосмылэн бюджетысьтыз. Ожысь ветеранъёслы, инвалидъёслы, озьы ик тӥледлы но со понна нокытчы вазиськоно но нокыӵе документ бичано уз луы. Та ужез ас вылазы басьтӥзы Ужъя но калыкез улон-вылонын утён политикая министерствоысь специалистъёс. Та категориосы пырись одӥг мурт но юрттэттэк уз кыльы.

2 сюрс манетъем выплатаез сётъян борды басьтӥськизы ни городъёсысь-ёросъёсысь калыклы улон-вылонын юрттэт сётонъя ёзъёс.

Юрттэт вуэмысь дугдӥз…

Куинетӥ пиналыным декретын пукисько. Толэзьлы быдэ сётӥськись пособие сяна, та дырозь выплата басьтылӥ. Одӥг ар ӵоже басьтӥ но, вуэмысь дугдӥз. Малы меда?

Е. Савельева. Пичи Пурга ёрос

Валэктон сётэ Ужъя но калыкез улон-вылонын утён политикая министерствоысь социальной юрттэт сётонъя управленилэн кивалтӥсезлэн воштӥсез Светлана Соболева.

3-тӥ но со бӧрсьы вордскем пиналъёс понна юрттэт висъяське Удмурт Республикалэн Тӧроезлэн 2017-тӥ арын 21-тӥ ноябре юнматэм указэзъя — элькунысьтымы трос нылпиё семьяослы юрттон вылысь. Та выплаталэн быдӟалаез пуктӥське нылпилы чаклам улон минимумъя — 9 сюрс 302 манет. Сое басьтыны быгато 2017-тӥ арын 31-тӥ декабрь бере 3-тӥ яке 4-тӥ нылпизэс ваем нылкышноос, семьязылэн шоро-куспо доходэз ичигес люкаське ке улосмыя адямилы быдэ (среднедушевой) доходлэн шоро-куспо быдӟалаезлэсь. Кылем арлэн пумаз солэн быдӟалаез элькунамы вал 24 сюрс 493 манет. Озьыен, семьялэн шоро-куспо доходэз талэсь ӧжытгес люкаське ке, юрттэт курыса, вазиськыны быгатӥськоды. Но дыр сётэмын нылпи вордскем нуналысен 6 толэзь куспын. Ӝегады ке, юрттэт висъяськыны кутскоз куриськон сётэм дырысен гинэ.

Тӥ шуиськоды, одӥг ар басьтӥды но, выплата вуэмысь дугдӥз. Ваньмыз шонер, угось нылпидылы одӥг арес тырмемлэсь 15 нуналлы азьвылгес яке вордскем нуналаз ик куриськон гожтоно вал. Тӥ ӝегаллямды. Но таиз выплата, нылпилы 3 арес тырмытозь, тыриське бере, озьыен, луонлыкты вань на сое басьтыны. Та понна вазиськоно МФЦ-е яке калыклы улон-вылонын юрттэт сётонъя ёзэ (улон интыдыя). Выплата тыриськыны кутскоз со толэзьысен, ку куриськон гожтоды но доходдэс возьматӥсь документъёстэс ваёды. Эн вунэтэ: та юрттэт, пиналлы 3 арес тырмытозь, висъяське бере, озьыен, арлы быдэ куриськон гожтоно луоз. Нылпидылы 2 арес тырмыку, эн ӝегалэ ни, социальной ёзъёсы дыраз вазиське. 2018-тӥ арын 1-тӥ январьысен туннэ нуналозь, та юрттэтэз курыса, вазиськизы ваньмыз-ӧвӧлэз 3 сюрс 614 трос нылпиё анайёс.

Министерствое таӵе ик вазиськонъёс вуо нырысетӥ пинал понна выплатая — вуэмысь дугдӥз шуыса ӝожтӥсько. Таизъя но валэктон сётыны кулэ. Нырысетӥ пинал понна юрттэт висъяське 2017-тӥ арын 28-тӥ декабре Россилэн Президентэзлэн указэзъя. Озьы 2018-тӥ арын 1-тӥ январьысен пыӵаны кутскиз «Нылпиосын семьяослы юрттэт сётон сярысь» федерал закон: со улонэ пыӵа «Демография» нацпроект улсын. Валтӥсь курон: нылпи Россилэн кунмуртэз луыны но 2018-тӥ арын 1-тӥ январь бере вордскемын луыны кулэ. Кыкетӥез курон: юрттэт сётӥське соку, куке семьялэн доходэз ужась калык понна тупатэм улон минимумлэсь 1 но ӝыны поллы ятыргес уг люкаськы. Шуом, кылем арлэн пумаз та минимумлэн быдӟалаез элькунамы 9 сюрс 675 манет вал. Озьыен, та юрттэтэз туэ басьтон понна семьялэн доходэз адямилы быдэ 14 сюрс 513 манетлэсь ятыргес луыны кулэ ӧвӧл. Документъёсты сётыны вуттоно пинал вордскем дырысен 6 толэзь ӵоже — вазиськоно улон интыя социальной юрттэт сётонъя ёзъёсы яке МФЦ-е. Бере кылиды ке, юрттэт висъяськыны кутскоз со толэзьысен, ку куриськон гожтӥды но документъёстэс сётӥды. Юрттэт висъяське 1 ар ӵоже толэзьлы быдэ. Сое нылпилы 1 но ӝыны арес тырмытозь басьтон понна, ар ортчыса, нош ик ӝыны арлы куриськон гожтоно луоз. Закон быдэс Россиын пыӵа, но котькуд улосъя выплаталэн быдӟалаез пӧртэм, со тупатӥське ужась калыклы тупатэм улон (прожиточной) минимумъя. Та закон быдэсъяськыны кутскем дырысен калыкез утёнъя кун ёзъёсы, та выплатаез курыса, вазиськиз ни 3 сюрс 437 мурт.

Пусйыны кулэ: 2-тӥ нылпи понна но таӵе юрттэт висъяське, семьялэн доходэз уг тырмы ке. Но таяз радэ — анайлэн капиталысьтыз. Вазиськоно калыкез утёнъя кун ёзъёсы яке МФЦ-е, доходды уг тырмы шуыса справкаос, мукет кулэ луись документъёс сётоно. Озьы анай капиталысь толэзьлы быдэ уксё висъяськоз.

Выплатаосъя юанъёсты кылдӥзы ке, вазиськыны быгатӥськоды Ужъя но калыкез улон-вылонын утён политикая министерствоысь специалистъёслы (3412) 52-61-80 телефон номеръя. 

Материалёъсты дасяз Елена Никитина

Ангелина Снигирева
By Ангелина Снигирева Май 15, 2019 14:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<