Ваньмы ӵош ке, сильтӧл уз погырты!

Ангелина Снигирева
By Ангелина Снигирева Май 31, 2019 14:15

Вячеслав Беспаловлэн ӧвӧл кыӵе ке бадӟым данъетъёсыз-вормонъёсыз. Но матэгес тодматскыса, паймиськод солэн зэмос воргорон сямызлы, улонын секыт адӟон пыр потыса но, кык полэс шудо, 5 нылпиосызлы зэмос атай но утись луэмезлы.

Вячеслав но Ольга Беспаловъёс

Вячеслав Владимирович, таяз шутэтскон нуналъёсы, 1-тӥ июне, Россиын пусъёзы нылпиосты утён нуналэз. Тӥ, городын улыса но, 5 пинал будэтӥськоды, алигес республикаямы ортчем атайёслэн конференциязы пыриськиды. Марлэсь утёно нылпиосты?

— Соосты нырысь ик яратоно, азинскыны, улонын асьсэды шедьтыны юрттоно. Малпасько, котькуд пинал будыны кулэ семьяын, анай-атай вӧзын. Семья ӟеч инъет сётӥз ке, азьланяз сое нокыӵе шуг-секытъёс уз куасалтэ.

Асьтэдыз улон ӧз нуныя. Нырысетӥ кузпалды улонысь кошкиз, 2 пичи нылъёсыныды кылиды. Сыӵе учыре кин ке чигиське, кин ке юон вылэ чӧлске, нылпиоссэ ӵыжы-выжыосыз доры интыя, нош тӥ воксё мукет сюресэз бырйиды…

— Зэмзэ вераса, егит дыръям мон семья кылдытыны ӧй дырты, гурт хозяйствоя академиез йылпумъяй но Пичи Пурга, Кияса ёросъёсысь куд-ог колхозъёсын ужай. Малпалляй: нырысь корка пукто, собере кузпалъясько. Но колхозын уждунъёс туж пичиесь вал, машина басьтыны сяна ӧй пӧрмыты. Ижкарын одӥг нылашен тодматӥзы. Ог-огмылы кельшим, семья кылдытӥм. Выжи Иже, птицефабрикаын ужай. Гурт удысъя министерстволэн конкурсаз пыриськи, отысь отделэ ужаны кутӥзы. Но семьяен улыны 6 ар сяна ӧз кылды. Кузпалы шӧдтэк шорысь кошкиз улонысь. Мон нылъёсыным кыли, одӥгезлы 5 арес, мукетызлы — 3 арес вал. Ярам, кузпалылэн атаез ачиз доры, Ижысь ик нимаз корка улыны лэзиз. Али но солы тау карисько, быдэс арзэ отын, одӥг висъетын 3 кузя, улӥмы. Нылъёсы весь бордам вал.
Ас поннам малпай: огнам кыли бере, мон уг быгаты анайзэс воштыны, котькызьы мед тыршом — уг быгаты. Малы ке шуоно, мон — пиосмурт. Туж тырши, нылъёсы анайзэс медаз утчалэ шуыса. Азям ужпум пуктӥ: нылъёсме пӧртэм кружокъёсы нуллоно. Уж бере дыртӥсько садике, пиналъёсме басьтӥсько но нуисько Нылпи творчествоя юртэ — эктонъя, суредаськонъя, ритмикае, англи кылъя кружокъёсы. Шутэтскон нуналъёсы но ӵукна вазь ик султыса, я кружоке, я кытчы ке парке, студие, мастер-классъёсы кошкылӥм. Но, жаляса верано, нылъёсы шуак бӧрдыны кутско, кытын мамамы, шуо… Туж секыт…
Кыкетӥзэ кышнояськон сярысь ӧй ик малпалля, йырам пиналъёсы гинэ улӥзы.

Озьы ке но, Инмар тӥледлы 2 полэс шуд но, сюлмаськон но сётӥз на. Та учырез мукет сямен уд но валэкты, дыр…

— Зэмзэ но паймоно кадь пӧрмиз. Оляез адӟылэме вал, со гурт удысъя министерство вӧзын ик ужась огазеяськонын тыршиз. Тодӥсько вал, мынам кадь нылпиосыз вань шуыса. Но кузпалтэк кылемез сярысь ӧй тодылы. Оля но ваньмон дырзэ пиналъёсыныз вырем, номыр мукетыз сярысь малпаськымтэ ни. Тае огъя тодмоосмы синйылтӥллям но милемыз матэ тодматыны малпаллям. Огпол, кык пол дорам лыкто, Оля сярысь верало. Куинетӥзэ лыктӥзы но, шуо: со, пе, ужзэ воштыны медэ кадь, кошкиз ке, кытысь утчалод на… Ачим асме ворми, дораз кабинетэ пыри. Пуким, вераським. Нош ӵуказеяз нылпиосынымы ӵош пумиським ни. Пиналъёсылы соку 4 но 6 арес вал. Солэн но озьы ик. Нылпиос соку ик ог-огенызы шудыны кутскизы, ӝыт куспын одӥг семья луим.
Нырысь ик шуге-леке вуи — кызьы мон табыдӟа семьяме машинаен нуллом? Бадӟым машина басьтоно луиз. Зэм, собере корка пуктыны кутски но, машинаез вузано луиз. Нош огъя пиналмы — витетӥез — вордӥськем бере «Газель» басьтӥм ини.
Нылпиосты пӧртэм кружокъёсы нуллыны матэгес мед луоз шуыса, Ижын ик ипотекаен 3 висъето квартира басьтӥм. Отын вань пиналъёсмылэн асьсэ интызы вань, но, конечно, со уг тырмы…

Одӥг анай-атай но куддыръя нылпиоссэс люко, тӥляд озьы луылэ-а?

— Ноку. Кузпалыным ми одӥг лулос кадь, кызьы милемыз люкыны уг луы, озьы ик нылпиосмес но. Соос ваньмыз — асьмелэн, туж пӧртэмесь ке но. Нырысь вакытаз тодмоос пӧлысь кин ке серекъялляз, мурт нылпиосты но утисько шуыса. Но мон шуисько вал: тани адӟоды ай, кӧня ке ар ортчыса, ваньзы мон тусоесь луозы. Озьы ик луиз. Али ваньзы паймо, кудӥз кинлэн — висъяны уг быгато. Ма, кузпалыныд но одӥг тусоесь луиды ни, шуо.

Бадӟым семья

Нош монэ паймытэ мукетыз: 5-ез ик пиналъёсты спортэн выро — каратистъёс, республикаын но Россиын ӵошатсконъёсын вормисе пото. Кызьы ваньзэс спортэ кыскыны быгатӥды но малы одно ик (тужгес но нылъёсты понна) каратэ быръемын вал?

— Пимы 1-тӥ классэ мынӥз но, ми сое каратее сётӥм. Нылъёсмес ушуэ нуллӥм. Ушу — туж чебер спорт, но дуно потылӥз. Малы ке шуоно гужем одно ик ветлоно вал ушуя лагере. Дунызъя со зарезь дуре ветлэм мында ик луылӥз. Но пинал лагере уг мыны ке, ушу программаысь сое палэнто. Куиньназы понна со дунэз вормыны ӧм быгатэ ни, озьы нылъёсмы та спортысь кошконо луизы, одӥгезлэн бадӟым вормонъёсыз, медальёсыз вал ни ке но. Та пумысен туж куректӥм. Бен, соос ветлӥзы мукет кружокъёсы но, тужгес яратылӥзы суредаськонэз, эктонэз. Но спорт но кулэ ук. Пимес сямен ик каратее сётэммы ӧз потылы, отын зол жугисько, вӧсь луо — нылъёсмы жаль потылӥзы. Кыӵе спортэз быръёно шуыса малпаськон вискын одӥгез нылмы маке изъянтӥз. Мон шуисько: всё, табере каратее мынод. Мон кышкатыны выри, нош со ӵуказеяз ик мынӥз. Сыӵе шудо бертӥз! Сое адӟыса, сузэръёсыз но шуизы: всё, папа, ми но мыном! Табере витетӥез но пиналмы сьӧразы уйиське ни.
Нылъёсмы карате борды шаплы басьтӥськизы, инъетсы вал ини. Эктонъёслы но ушулы луыса, мугорзы ӝог выре, йырзы малпаське.
Али но тодӥсько на республикаысьтымы ӵошатсконъёсы нырысьсэ пыриськемзэс. Со спортъя «Динамо» комплексын вал. Соку ми техникая ӵошатсконъёсы гинэ пыриським, жугиськон люкетаз нылъёсмес ӧм лэзе. Техникая ӵошатсконъёсын соос ваньзы ик медальёс басьтӥзы. Та бере соосты жугиськонъя ӵошатсконъёслэсь но возьыны ӧз ни луы…

Пимы каратеен выриз бере, тодӥсько: тужгес секытэз — ӵошатсконъёсын жугиськемзэс учкон. Пи понна но сокем куректоно ай, нош нылъёс понна? Кызьы анайзы чида?

— Уг чида, соин ик ӵошатсконъёсы уг ветлы. Но одӥгаз но ӵошатсконэ, коть Ижын, коть Москваын мед ортчоз, огназэс ум лэзиське — ачим ветлӥсько. Нылпиосты кулэ дыръяз ӟыгыртыны, буйгатыны но кулэ ук. Карате — со сыӵе спорт — нылпиослэн кыӵе пояссы лыдэ уг басьтӥськы, вожвылъясько огъёзъёс. Озьы куд-огез каратеен 8 ар выре ни, нош милямъёсыз — 3 ар. Соос ваче жугиськыны шедё ке, ой, кыӵе секыт учкыны! Собере мукет атайёс одӥг пиналзы понна висьыны ветло, озьы но вань кужымзы кошке кадь, нош милям соос 4 кузя пырисько.
Мукет городъёсы ӵошатсконъёсы пиналъёсты юри висъям автобусэн нулло, котьку сьӧразы ветлӥсько. Тодӥсько, сюрес вылын олома но луэ, но пиналъёсылэн кӧтсы котьку тыр мед луоз, бордазы кӧт висёнъёс медаз кутске. Жугиськись муртлэн кужымез луыны кулэ, соин ик сое сюдоно но валаса, дыраз. Зэм, куддыръя ӵошатсконысь бертыса, анайзылы чагисько: папа весь милемыз сюдыны выриз. Но сотэк спортсменлэн кытысь кужымез потоз?
Тани Анапаын ӵошатсконъёс ортчо, спортсменъёсты графикъя сюдо. Учкисько но, нылылэн обедэз ӵошатскон кутсконлэсь ӝыны час гинэ азьлапал. Так, шуисько, тазьы умой ӧвӧл. Нылме кутӥ но сюдыны мукет азе вазьгес нуи. Ӵок, тырем уксёмы быриз ке но, со понна ӵошатскон азьын час кылемын на, нош нылы сиськемын но мугорзэ посэ ни. Соку со 2-тӥ инты басьтӥз.

Беспаловъёс эшъяськыса уло

Трос пинал будэтэмлэн мар тужгес секытэз но мар тужгес шумпоттӥсез?

— Тодӥськоды-а, мон 5 ар ӵоже ни отпуске ӧй пота. Кулэ дыръяз пиналъёсы вӧзын ӝог луыны, отчы-татчы нуыны-вайыны мед быгатом шуыса, министерствоысь ужысьтым кошки. Нимаз ужбергатӥсь луыса ужаны кутски, республикаысь хозяйствоосы кунгож сьӧрысь пӧртэм пудо сиён ватсэтъёс нуллӥсько вал. Но ог 5-6 ар талэсь азьло, Америкалэн санкциосыз сэрен, хозяйствоос со ватсэтъёсты басьтыны ӧз быгатэ ни. Соин удысме нош ик воштоно луиз. Али мебель ваёнэн-пуктонэн вырисько. Бергасько, семьяе номырлы медаз ёрмы кадь потэ. Куддыръя туж жадёно. Тодӥсько: кузпалы но жаде. Но нылпиосмы спортын яке дышетсконын кыӵе ке вормонъёсын берто ке, жадён соку ик кытчы ке тӧлӟе, нош ик ужам, эшшо тросгес лэсьтэм потэ.
Кылем арын трос аръёс ӵоже нырысьсэ аслым 2 арняем отпуск лэсьтӥ: со но пиналъёсме Сьӧд зарезь дурын, Анапаын, ортчись ӵошатсконъёсы нуллон понна. Быдэс семьяен ветлӥм. Отын, ӵапак вордскем нуналам, одӥгез нылмы Россиысь ӵошатсконын 1-тӥ инты басьтӥз, солэн медалезлэсь бадӟым кузьым мон понна ӧй вал ни. Нунал ортчыса гинэ, 2-тӥез нылмы 2-тӥ инты басьтӥз. Кызьы уд шумпоты? Та ветлэммы бере Москваын ӵошатсконъёс вал, отысь но ми медален бертӥмы.

Нылпиосты К. Герд нимо гимназиын дышетско, тодон-валан басьтон ласянь куронъёс отын лябесь ӧвӧл. Дышетскыны вутто-а?

— Кыкез «витьёслы» гинэ дышетско, мукетъёсызлэн «ньыльёссы» но вань. Карате — со мыжыкъёсын сэзъян но тэтчан гинэ ӧвӧл ук. Зэм, спортэн вырисьёс пӧлын пӧртэм сямен дышетскисьёс вань — «куинь» но, «кык» но басьясьёс сюро. Но кӧня чакласько, вормисе пото ӟеч дышетскисьёс ик. Угось жугиськонын йырын но ужано на, дырыз дыръя кулэ техникаез, тактикаез кутоно.
Кристинамы журналист луыны малпа, кылбуръёс гожъя. Али йылпумъяз «Моя Удмуртия» телеканалысь пинал журналистъёслы курсъёсты. Машимы биологиен, медицинаен тунсыкъяське, Полинамы — туж чебер причёскаос лэсьтэ. 7-тӥ классын дышетскись Павелмылы техника, физика матын потэ. Та удысъя тродон-валанзэ мед муромытоз шуыса, ИжГТУ-ысь специалистэз ӧтчаськом, ваньмаз уксё гинэ тырмытыны кулэ…
Одӥг пиналмес но ми одӥг ӧръя но кужмысь ум кариське, озьы турскиськом: пинал ачиз со ӧре мед вуоз. Нылпиос асьсэды пӧртэм удысъёсын утчазы, тодон-валанзэс муромытӥзы ке, азьланяз асьсэды шедьтыны капчигес луоз, малпаськом.

Нош асьтэос тӥ кыӵе семьяын будӥды?

— Кияса ёросысь Салья гуртын вордӥськи. Семьяямы 4 пинал вал: ми агаеным но эшшо 2 сузэрмы. Анаймы воксё егит вал ай, атай улонысь кошкиз. Анае вордӥськем Уддяди гуртаз бертӥз, татын эшшо бызиз на. Озьы милям эшшо 2 сузэръёсмы вордӥськизы, 6 пинал будӥмы ни. Агаеным ми бадӟымесь вал бере, сузэръёсын утиськон выламы усиз.
Корка котырысь ужез ми, нылпиос, нокин вератэк, асьмеос лэсьтӥськом вал. Братэ ву пырталляз — пудолы но, адямилы но, мунчое но трос кулэ вал. Нош мон пу понна кыл кутылӥ — пыртамын, куасьтыны тыремын мед луоз. Бадӟымъёсыз апайёссы юрт котырез утялтылӥзы, шулдыртылӥзы. Дышетским но ваньмы «4»-ёслы но «5»-ёслы гинэ. Мамамы паймыса вераллляз: мон тӥледлы мар ужано уг но вераськы вал, асьтэос кызьы ке валалляды…
5-тӥ классысен мон школаысь производственной бригадаын ужаны кутски. Нокинэ сыӵе вазь уг басьто вал, 6-тӥ класс бере гинэ кутылӥзы. Но мон пуриськи. Школаын ик кӧлыса ужаськом вал. Куддыръя вуылӥзы анае-атае, милемыз огдырлы басьяллязы, асьме бакчаысь но картошка уроно, турын дасяно-калтоно вал. Тӥни озьы ужаса будӥмы. Али паймисько, нылпиосты ужаны уг ни лэзё, со понна нимысьтыз бумага бичало. Нош ми быдэс гужем ӵоже бригадаын ужаллям, уждун сярысь но ум малпаське кадь солэсь но бадӟым кузьым — нуллӥзы Ижкаре экскурсие, отысь парке, пӧртэм аттракционъёсы.
Уж пыр, пионер, комсомол огазеяськонъёс пыр адями улонлы дышетскиз. Ӟеч ужаме но дышетскеме понна монэ 1987-тӥ арын Артеке келязы. Озьы мыным пӧртэм выжыысь потэм пиналъёсын тодматскыны, зэмос эшъяськонэз валаны удалтӥз, ог-огмылы гожтэтъёс кема гожъямы на.

Шутэтскыны ярато гуртын

Тӥледыз тодӥсьтэм адями, Интернетысь вотесбамдэс учкиз ке, малпалоз: дышетӥсьын ужаськоды. Туж тунсыкъяськиськоды нылпиосты шонер будэтонэн, педагогикаен, нылпи психологиен. Паймытэ общественной улонэ но пыриськыны тыршемды. Тани арлы быдэ ортчись Бадӟым удмурт диктантэ но быдэс семьяен, пе, ветлӥськоды…

— Кузпалы — ӟуч. Но нылпиосмес К. Герд гимназие сётӥм бере, кызьы удмурт кылэз тодытэк? Кузпалы 2 ар ӵоже быдэс семьяен удмурт кылъя курсъёсы ветлӥз. Ачим ӧй быгаты, ужелэсь ӧй ваньмы. Эн пайме, удмурт кылэз ӟеч тодӥсько ке но, мынам выль кылъёсты тросгес тодэм потэ вал. Семьяе куддыръя монэ паймытъя, олокытысь олокыӵе удмурт кыл шедьтэ, ява. Тау кареме потэ К. Герд гимназиысь дышетӥсьлы Валентина Широбоковалы, со удмурт кыллы туж быгатыса дышетэ.
Удмурт диктантэ ветлыны но туж кельше. Туэ пиеным гинэ ветлӥмы, нылъёслэн мукет ужрадзы тупаз.
Нош педагогикаен тунсыкъяськон — улонлэн куронэз ни. Ваньзэ валаса лэсьтэм потэ. Уг тодӥськы, малы мон ас вакытаз гурт хозяйствоя академие мынӥ, пичи дырысеным техника, электро котыре кыстӥськи ке но. Школаысен ни вань электропроводкаез, телевизоръёсты, магнитофонъёсты тупатъясько вал, гуртоос но техниказэс дорам нуллӥзы. Озьы электрике дышетскон мылкыды ноку ӧз пуксьылы. Малпанэ 41 арескам быдэсмиз ини. Училищее жынгыртӥ, электрике дышетскон мылкыдме верай, нош соос серем каро, басьтэмзы уг поты. Милям, пе, 16-18 аресъемъёс дышетскозы. Шуисько: нош мон — Ломоносов… Кутӥзы. Училищеез горд дипломен йылпумъяй.

Республикаысьтымы атайёслэн конференциязы пыриськон тӥледыз кызьы ке воштӥз-а?

— Мон та конференцие ас мылкыдыя шеди, Интеретысь иворез шедьтыса. Шумпотӥсько, атайёс огазеяськыны тыршо шуыса. Россиын атайёслэн конференцизы ортчиз туэ феврале, асьме дорын — апреле. Но куд-ог ёросъёсын, кылсярысь, Можгалан, атайёслэн кенешъёссы ужало ни вылэм. Конференциын атайёслэн семьяын интызы сярысь вераськон мынӥз, ӟуч православной но мусульманской черкъёслэн азьветлӥсьёссы гинэ но вазиськизы, атайёс нылпиоссылы саклык мед висъялозы шуыса. Семья — со обществолэн оглюкетэз. Нош атай — семьялэн йырыз, азьлань валтӥсез луыны кулэ.

Тӥляд семьяды — со пичи команда кадь. Девизды но вань-а?

— Милям 2 девизмы. Спортын: вормоно! Нош вормемед нокызьы но уг ни луы ке, ваньзэ лэсьтоно, ӟеч келян понна. Собере возьыт медаз луы, отӥ-татӥ тазьыгес-озьыгес кароно вал шуыса.
Нош семьямылэн девизэз: ваньмы ке ӵош — сильтӧл уд погырты! Тодӥськоды-а веник сярысь притчаез? Одӥг ньӧрез чигтыны секыт ӧвӧл, нош со ньӧръёсты венике бинид ке, чигтэмед уз ни луы. Тӥни озьы ик ми но. Кужыммы — семья.

Елена Миннигараева

Ангелина Снигирева
By Ангелина Снигирева Май 31, 2019 14:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<