Ваньмыз вал, ваньмыз вал…

Ангелина Снигирева
By Ангелина Снигирева Май 15, 2019 17:08
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Улӥ Шудӟалуд гурт Дэбес ёросын тужгес вашкалаез лыдъяське. Улон азьлань питырамъя татысь коркаослэн лыдзы уг но буды, уг но кулэсмы. Но улӥсез арысь аре синэ.

Инты быръён

Гуртлэсь кылдэм арзэ туннэ кин кызьы вера. Но шудӟалудъёс сое 1660-тӥ аръёсын герӟало. Гуртсылэн историеныз тунсыкъяськись, почтаын ужась Любовь Чиркова, люкам материалзэ бугыръяса, тазьы шуэ:

— 1662-тӥ арын переписной (лыдъян-чотан) книгаын гуртмы сярысь гожтэмын: «Починок Ондрюшки Нюнина между речками Сувоварка и Яговарка». Нош 1678-тӥ арысь переписной книгаын «деревня Шудзялуд» шуыса пусъемын ини. Бӧрысьгес, 1868-тӥ арын, места ярамтэен, гуртоос пичи гинэ Пернэзь шур кузя интыясько. Ита шур угось бакчаоссэс тулыслы быдэ «ньылыны» кутскиз, ӟеч музъемзэс шуре гылтылӥз. Но калык туннэ ке но гуртлэсь азьло бервылзэ тодма. Пуктӥськем нюк-гоп бервылъёсъя, садъёсъя но со адӟиське. Куспазы сое али ке но Вужгурт шуыса нимало.

Выль интые пуксем ульчазэс шудӟалудъёс Вылӥ ульча нимазы. Со сяна, татын туннэ вань вакчиесь Зарека но Колтома урамъёссы. Берлояз ульчаын 1911-тӥ арын земской школа усьтӥзы вал. Солы гуртысьтызы купечъёс, нырысетӥ грамотной адями Илья Павлович но песятаез Сергей Ильич Никитинъёс, коньдонэн юрттӥсько. Нылпиос гуртамы лачак вал угось, соосты визьмо каремзы потылӥз, шуо гуртоос. 1900-тӥ аръёслэн кутсконазы татын 240-лэсь ятыр улӥсез лыдъяськиз. 1935-тӥ арын школаез выль интые выжто, паськытато, 7 классъем каро. Отӥяз 1953-тӥ арын школаез артысь Вылӥ Четкер гуртэ выжто. Шудӟалудын 1975-тӥ арозь начальной школа возьыны выризы ик. Отӥяз со пытсаськиз.

Школаез ворсан гуртэ бырон ваем кадь луиз. Калык кин кытчы пазьгиськыны кутскиз. Гуртын 100 пала коркаос лыдъясько вал ни. Соос пумен бушаны ӧдъязы. Туннэ ке но калыклэн мылкыдыз ӝож: школаез быдтӥзы, гуртлы но бырон сюрес усьтӥзы, шуо.

Гурт ульча

Бусыос пашмо

Пытсам школа интые ас вакытаз клуб усьязы. Калыклы люкаськон интылы пӧрмылӥз со. Отӥяз люкаськисез кулэсмиз, юртэз эстӥсез но, ужасез но рос-прос ӧз сюры ни. Со кабен клуб гуньдӥз. Али отын частник пилорама возе. Вандэм-пилем куараез гуртэз шори пилем кадь чузъяське. Егит семьяос но гуртын воксё ӧвӧл ни. 31 улоно корка вань на. Отын 120 котыр адями прописать каремын, но зэмос улӥсез 90 котыр лыдъяське. Гуртысь Вылӥ Четкер школае ветло 3 дышетскисьёс. Эшшо 6 тэшкылиосты Вылӥ Четкер гуртысь ик нылпи садэ нулло.

— Трос нылпиё семьяос пинал ваё на, мукет пинал калык гуртамы воксё уг кыльы ни, — вера Данёгурт поселениен кивалтӥсь, Шудӟалудын улӥсь Нэлли Коробова. — Бадӟымесь семьяослы луыса тырттэм сылӥсь коркаос Шудӟалудын туннэ ӧвӧл. Зэм, отын улӥсез арысь аре кулэсме. Выль юрт пуктӥсез уг шедьы ни. Берлозэ татын 2000-тӥ аръёсы корка ӝутӥзы. Улон условиоссэс умоятон вылысь Гурт удысъя но сиён-юонъя министерство субсидия висъяны дась, но черодэ султӥсез ӧвӧл. Куд-огез черодэ султэ ке но, пуктӥське Дэбесэ. Егитъёс дырын-дырын гинэ бертыло на. Куд-огез бертысал, гуртын улысал, уж ке рос-прос шедьысал, шуо. Гуртамы хозяйство вань. Отын пичи-пичи уждун тыро ик. Но шутэтскон нуналъёстэк уен-нуналэн хозяйствоын ужаны мылкыд карисез уггес шедьы ни, минимум быдӟа уждун табере тросэзлы уг яра.

Гуртоос пӧлын музъемен ужаны турттӥсез но сюре. Кылсярысь, Сергей Никитинлэн, ӵыжы-выжыосызлэсь пайёссэс кутыса, фермер кариськемез потэ. Гуртоос ужзэ пӧрмытэмезлы осконзэс верало. Солэсь адӟем карыса, кин тодэ, оло, мукетъёсыз но басьтӥськозы. Гуртын пудо вордэмысь уг дугдо ук. Зэм, скалъёссэс кулэстӥзы ни — мӧйы калыклы турын дасяны секыт йӧтэ. Соин ик 9 юртын сяна сюро таза пудо уг вордо ни. Но со понна кеч, ыж, чипы-курег котькуд азбарын лачак.

1980-тӥ-1990-тӥ аръёсы гуртын асьсэлэн соцобъектъёссы вал. Ваньмыз пумен пытсаськиз. Магазинзы гинэ на ужа. 21-тӥ дауре выжон аръёсы колхозын туж секыт югдур кылдӥз угось. Хозяйствоез банкротэн ялӥзы. Соин но син азьын, соцобъектъёс сяна, куашказ ю куасьтон но шертон комплекс. КЗС-эз, ужась комбайнъёсты, резь-куаж вандылыса, кортлы вузазы. Гурт син азьын начармыны кутскиз. Выль кузё — Олег Бадерин — кӧня ке ар талэсь азьло колхозэз кутэмен гинэ, гуртоослэн мылкыдзы кӧня ке капчияз. Артысь гуртъёсын угось фермаос но выльдӥськыны кутскизы, уж пумен кылдыны ӧдъяз. Но бусыос гырисько, паськытало шуыны шуг на.

— Син азе туж ӝож суред пуксе, бусые потӥськод ке. Пудо ичиен нюкъёс-гопъёс уг утялтӥсько ини. Ма, Ита шур кузя возь выл но уг турнаськы ни. Жаг турын пӧлы медам вые вал, — шуэ Любовь Чиркова.

Н. Коробова пиеныз

Сюрес лэсьтозы

Гуртсэс шулдыртон вылысь сельский сход дыръя огкылэ вуизы: пытсам медпунктлэн юртаз люкаськылон инты усьтоно. Нэлли Коробова верамъя, сое гуртоосын дэмен тупатъязы, тыл кыскизы, буязы, пушказ гур пуктӥзы. Али документъёс лэсьто. Табере кыӵе ке праздник я сход дыръя шудӟалудъёс асьсэос ик сое эсто, утялто, концерт радъяло.

— Азьвыл аръёсмес малпаса но, люкаськон инты лэсьтэммы потӥз. Азьвыл нылпиос но, арлыдоос но, егитъёс но ох! кыӵе концертъёс возьматъяло вал. Нош Выль арез пумитаны гурт калык гинэ уг — бускель Четкер, Орехи гуртысь но васькало вал дорамы. Кӧня калык чеберъям кыз котырын шулдыръяськылӥз. Нош туннэ кыл вылын ялан «Ваньмыз вал, ваньмыз вал, ваньмыз вал…» кырӟан гинэ берга на. Кин тодэ, клуб нергеямы рос-прос ужаны кутскимы ке, оло, нош ик котырысь гуртъёсты бордамы кыскыны быгатомы ай, — шуо гуртоос.

Ульчаосазы гинэ зор-кот дыръя пырыны уг луы. Нэлли Коробова пусъемъя, гуртоос сюреслэсь кӧсамзэ туж возьмало. Субботнике но потэмзы потэ ни угось, котырзэс чылкыт утялтыса возьыны ярато. Но куазь уггес сёты на. Таин сэрен соос огкылэ вуизы: туэ котькуд азбарысь коньдон бичалозы но валтӥсь ульчае — Колтомае — гравий вӧлдозы. Гурт поселениын озьы ик вуоно арын нылпиослы шудон площадка лэсьтыны медо. Гурт удысъя но сиён-юонъя министерстволэсь интыысь проектъёсты азинтонъя грантсэ утыса, туэ Такагуртэ сыӵе площадка лэсьтыны луонлык кылдӥз ук. Вуоно арын Шудӟалуд понна вожвылъяськомы, шуэ Нэлли Коробова.

Елена Сараматова

Туспуктэмъёс лэсьтӥз В. Коробова

Ангелина Снигирева
By Ангелина Снигирева Май 15, 2019 17:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<