Артэ вал синкыли но шумпотон

Ангелина Снигирева
By Ангелина Снигирева Май 16, 2019 15:16

9-тӥ Мае, Вормон Нуналэ, котькудӥз ас сяменыз данъяз Быдӟым ожысь ветеранъёсты, буре вайиз Вормон понна быремъёсты: кин ке кылбур лыдӟиз, кин ке ожгар кырӟанъёсты быдэстӥз, кин ке рекорд пуктӥз.

Огазеясь нунал

Ӵукна ик шаерысьтымы вань калык кыстӥськиз ёросъёсысьтызы, гуртъёсысьтызы Быдӟым оже быремъёслы сӥзем синпелетъёс доры. Ижысь Ялан ӝуась тыл дорын быдэс нунал адямиос ӧз бырылэ. 9 часысен, гадь вылазы георгиевской лентаос бырттыса, бадӟымез но пичиез, депутат но заводын ужась — ваньзы сяська керттэтъёсын синпелет доры кыстӥськизы, ог-огзэс праздникен ӟечкылазы.

Сюлэм данъяськонэн пачылаз, ветеранъёслы сяськаос кузьмась нылпиосты адӟыса. Кин ке анай-атаез косэмъя, кин ке ас мылкыдызъя гадьёссы сӥлы карон пусъёсын чильк-вальк кисьтаськись муртъёс доры лыктылӥзы, тау кылъёс веразы.

Ижысь 4-тӥ классын дышетскись Владислав Стрелков арлы быдэ анай-атаеныз ӵош Ялан ӝуась тыл доры лыкто, синпелет доры понэм сяна, сяська ветеранъёслы кузьмало на. Та нуналэ пияш, Быдӟым оже пыриськем песятайзэ Сергей Семёнович Тимеевез сӥлы карыса, «Вунонтэм полк» акцие пыриськиз на.

2 сюрс Вормон кизили

Вормонлы сӥзем синпелет дорын Удмуртиысь Егитъёслэн огазеяськонзы «Вормон кизили» акция радъяз. Ожысь но ужысь ветеранъёслы, война вакытысь нылпиослы ӟеч кылъёсын гожтэм горд кизилиосты люкылӥзы дышетскисьёс. Таӵе ужрад быдэс Россиын, Удмуртиын но, 7-тӥ арзэ радъяське ни.

— Таӵе кузьымъёсты лэсьтыкумы, ми вань лул-сюлэммес, мылкыдмес понӥськом, — веразы акциез радъясь нылашъёс Ксения Курбатова но Екатерина Князева. — Ужрад дыръя ик сётъяськом «Вормон гожтэтъёс», соосты но Россилэн пӧртэм сэрегъёсысьтыз нылпиос лэсьтылӥзы. Отын ветеранъёслы шуныт сӥзёнъёс, Вормон понна тау карон кылъёс. Ветеранъёс таӵе пичи кузьымъёслы туж шумпото, куд-огез синвуаське но, нош куд-огез аслэсьтыз улэм-вылэмзэ вера. Ваньзы соос туж тау каро, соосты уг вунэто шуыса.

Озьы та акция чотын шаерысьтымы нылпиос 2 сюрс кизилиос лэсьтӥзы, 500-эз люкылэмын вал Ижын, мукетъёссэ сётъямын ёросъёсын но гуртъёсын.

Аслэсьтыз Вормон кизилизэ басьтӥз Ижысь Халиса Хажиева. Война кутскон дыръя нылашлы 13 арес вал.

— Ми доры школае вуизы но фронтлы юрттоно шуизы, — тодаз вае ужысь ветеран. — Озьы кӧня ке кузя ас мылкыдмыя 7 часысен «Ижмаш» заводын пушкаослы детальёс лэсьтӥмы. Фронтлы, солдатъёсмылы юрттӥськом шуыса, ӝутскем мылкыдын ужаны ветлӥмы. Нуназе бере 2 часысен школае дышетскыны мынӥськомы вал, озьы котькуд нунал.

Лыдӟизы, кырӟазы война сярысь

Ялан ӝуась тыл дорын быдэс нунал ӵоже ӧз чусомылы микрофон. Татын 11 часысен 20 часозь «Ми лыдӟиськом война сярысь» акция ортчиз. Котькуд мылкыд карись тылож сярысь чуръёсты лыдӟиз, тодэ ваёнъёсты, аслаз геройёсыз сярысь вераз яке вань калыкез Вормон Нуналэн ӟечкылаз.

Синвуэн ӵушкам чуръёсты лыдӟисьёс пӧлын трос вал нылпиос. Юромо Вормон парадэз учкыны Ува каргуртысь атаеныз Иже лыктӥз 1-тӥ классын дышетскись Карина Калабаева. Быдӟым оже пыриськиз солэн прадедэз Александр Иванович Калабаев. Воргоронэз 17 аресказ 1943-тӥ арын войнае кутӥзы, тушмонэз улляса, со Берлинозь вуиз, 2 пол сӧсыртэмын вал. Ож бере кема аръёс ӵоже тыршиз вордӥськем гуртаз, гурт хозяйствоез азинтӥз. Песятаезлы но вань ветеранъёслы тау карыса, нылаш «Солдатушки, бравы ребятушки» кырӟанэз быдэстӥз. Нош Уваын «Вунонтэм полк» акциын песятаезлэн туспуктэменыз вамышъяз солэн Павел агаез.

«Баллада об отце» но «Мама» кылбуръёссэ лыдӟиз Россиысь писательёслэн огазеяськонзылэн ёзчиез Галина Ерёмина. Быдӟым ожлы нылкышно 10 пала кылбуръёссэ сӥзиз. Быдӟым оже пыриськиз солэн атаез Николай Фёдорович Николаев.

— Атае стрелок-радист вал, — вераз кышномурт. — Прибалтийской фронтын ожмаськыкуз, самолётэз, кытын атае но вал, ыбылӥзы, пилотэз быриз, быдэс сутка атае зарезьын уяз. Но шудэз вылэм, вӧзтӥз ортчись корабль сое утиз. Та бӧрсьы атае 8 толэзь госпитальын кыллиз.

Рекорд но «Катюша»

Та нуналэ Удмуртия Россиысь 150 городъёсын валче «Вормонлэн рекордэз» акция борды итӥськиз. Ужрад возьматӥз: егитъёсмы кужмоесь, кунмылы оскымон кивоштӥсьёс будо.

Отжимание лэсьтӥз 600 адями

Аспӧртэм рекорд пуктыны но суй кужымзэс эскерыны мылкыд каризы Ижысь тымет доры люкаськем 600 пала егитъёс. Соос огъя 27 сюрслэсь уногес отжимание лэсьтӥзы. Лыдпус юнме шорысь бырйымтэ — сомында нунал Быдӟым ож йылпумъяськем дырысен ортчиз ни.

Татын ик вань мылкыд карисьёс ГТО-лэсь куронъёссэ сётыны быгатӥзы.

Ижысь зоопаркын ужрадъёс «Ми данъяськом тонэ, вордӥськем музъем» ӧтён улсын ортчизы. Отчы люкаськем калык Мария Толстухина артистэн валче «Катюша» кырӟанэз быдэстӥз.

Зоопарке лыктэм нылпиос, Быдӟым ожын бырем песятайёссылы тау карыса, туннэ улон, асьсэлэн вормонъёссы сярысь ивортыса, гожтэтъёс гожъязы. Озьы ик вань мылкыд карисьёс ожгар кырӟанъёс улсын вальс но кадриль эктыны дышетскизы.

Нош ӝытазе бадӟым сцена вылысен шулдыр концерт возьматӥзы, инме пазьгиськиз яркыт буёлэн салют.

Ветеранъёслы — транспорт

Удмуртиысь 70-лэсь уно ветеранъёсты Быдӟым Вормонлы сӥзем ужрадъёсы дунтэк нуиз-вайиз огшоры калык. «Ветеранлы — транспорт» ӟеч ужрад борды итӥськизы городысь но гуртъёсысь водительёс.

Та акция шаерамы 2010-тӥ арын мытэмын вал, соку отчы 10 волонтёр пыриськиз. Но арысь аре Вормонэз дурем адямиослы тазьы ке но тау карыны мылкыд карисьёс йыло.

Ижысь Анатолий Кропачев акцие 10-тӥ арзэ пыриськиз ни.

— Мон будэтэмын, бад-ӟымъёсты, утисьёсмес данъяны, гажаны дышетыса, — вераз А. Кропачев. — Вормон Нунал — быдӟым праздник. Песятайёсы тылож вакытэ Ижысь заводъёсын тыршизы, кузпалылэн но песятайёсыз оже пыриськизы. 4-5 ар ӵоже ини одӥг ветеранэз — Пётр Григорьевичез — нуллӥсько, со мынэсьтым пиосме аслаз внукъёсыныз лыдъя ни.

Нялтас вераса, атайзылэсь адӟем каризы ни Анатолий Кропачевлэн Сергей но Дмитрий пиосыз. Соос но асьсэ машинаосынызы ветеранъёсты нуллыны кутскизы.

Ветеранъёслы юрттизы волонтёръёс

Вераны кулэ, ветеранъёсты нуллӥсь водительёсты пыр-поч эскере ГИБДД: вань-а соослэн машина нуллон правозы, ӧвӧл-а сюрес вылын ворттылон куронъёсты тӥямзы понна ворсамтэ штрафъёссы но мукет.

— Таяз аре акциез умой радъяны быгатӥм, — вераз ужрадэз ортчытӥсь Елена Мельникова. — Водительёсты утчаны кутскимы апрель толэзе ик, дырыз дыръя ветеранъёсын списокъёс но дасямын вал. Туэ ветеранъёсты трибунаос дорозь ик вайыны быгатӥм. Геройёсмы талы туж шумпотӥзы, угось тросэзлэн тазалыксы лябгес ни, пыдын ветлыны курадӟо.

Ангелина Снигирёва

Туспуктэмъёс басьтэмын udmurt.ru сайтысь

Ангелина Снигирева
By Ангелина Снигирева Май 16, 2019 15:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<