Армилы сяна, улонлы но дышето

Ангелина Снигирева
By Ангелина Снигирева 21 мая, 2019 14:32

Нылпиослэн «Юнармия» военно-патриотической движенизы Россиын ялан юнма. Удмуртиысь 180 сюрс пиналъёс пӧлысь
6 сюрсэз юнармеецъёс радэ пыремын ни. Та лыдпусэз вуоно арын Быдӟым Вормонлы 75 ар тырмон азьын 12 сюрсозь вуттыны медо.

Удмуртиысь 6 сюрс пиналъёс юнармеецъёс луизы ни
Фото: «Юнармилэн» «ВКонтакте» бамысьтыз

«Юнармия» 2016-тӥ арын гужем регистрировать каремын ке но, калык понна кылымон-адӟымон со луыны кутскиз берло дыре гинэ. Шаерамы но угось юнармеецъёс радын нырысь-валысь 8-ысен 18 аресозь 1 сюрс пала пиналъёс пусйиськизы. Табере котькуд ёросын та огазеяськонлэн аслаз штабез ужа. Нылпиосты улонлы дышето, историенымы тодмато, армилы дасяло. «Юнармие» тужгес трос кыстӥсько Иж городысь пиналъёс, ог-огзылэсь адӟем карыса, быдэс классъёсын та движение гожтӥсько.

— Мугорзэс кыдатэм сяна, нылпиосты пыӵал тӥрлык бичаны, ыбылӥськыны дышетӥськом, — шуэ «Юнармилэн» Удмурт ёзэныз кивалтӥсь Алексей Владыкин. — Пӧлазы нылъёс но кыстӥсько, куддыр пиослэсь но сэзь луэменызы паймыто. Нош кыӵе данъясько нылпиос, формазэс дӥсяса, Быдӟым Вормонлы я мукет военной праздникъёслы сӥзем ужрадъёсы потыкузы, строен калык азьтӥ ортчыкузы! Кыӵе данъясько книжкаосынызы: котькуд юнармеецлы сётӥське со, отчы котькудӥзлэсь вормонъёссэ пусйиськомы. Туннэ военной учебной заведениос юнармеецъёслы ЕГЭ-я баллъёссы вӧзы со книжкая ватсаса 10 балл пуктыны дась луо.

Нылпиосмы пӧлын улонзэс военной училищеосын, спецслужбаен но армиен герӟаны мылкыд карисьёс арысь аре йыло. Та бордын угось рос-прос ужаськомы: егитъёслэсь армия шоры учконзэс умой пала воштыны выриськомы. Туннэ тросэз егит пиос армиез дыр быдтонэн лыдъяло. Куд-огез со шоры кышкаса но учке.

Туннэ армия азьло кадь ӧвӧл ни. Мон ачим кемалась ӧвӧл армиысь вуи. Котькуд ӵабтӥськемлэсь, котькуд лыз-вож луэмлэсь мугзэ валэктоно луэ бумага вылын. Котькуд нунал тазалыкез эскеро. Со дыре ик котыр ласянь кужмогес, шаплыгес луыны дышето. Зэм, пӧртэм частьёс вань. Одӥг-огез пуктӥськонэн но выре. Милям куд-ог юлтошъёсмы Москва котырын ӝутӥзы терроризмлы пумит нюръяськонъя центр. Кин но со шуиз ик: стройкаын ужаны лыктӥмы шат? Но кин тодэ, оло, ӵапак объект лэсьтонэн вырись солдатъёс Родина понна тросгес лэсьтӥзы ай, пыӵалэн киязы бызьылӥсьёс сярысь. Соин ик лыдъясько: «Юнармия» нылпиосты армилы сяна, улонлы но дасяны кулэ, шуэ А. Владыкин.

Туэ июле «Ёлочка» лагерьын шаерысьтымы 100 нылпиослы усьтэмын луоз армейской улонлы тупась лагерь. Соосты, боевой подготовкалы сяна, дышетозы инкуазьын асьсэды возьыны. Радъялозы пӧртэм ӵошатсконъёс, шудонъёс, визь сынанъёс.

Нош котыр ласянь тужгес усто 5 пиос но 3 нылъёс пыриськозы Москва котырын Обороная министерстволэн «Патриот» парказ ортчоно «Победа-2019» вожвылъяськонэ. Отчы мынозы Ижысь 31-тӥ школаысь нылпиос. Шаерамы ортчем вожвылъяськонын соос кужмо луэмзэс возьматӥзы ни.

— Нылпиосмы Россиын ортчись пӧртэм ӵошат-сконъёсы пырисько, — азинтэ веранзэ А. Владыкин. — «Юнармия» соос понна асьсэды возьматыны луонлык сётэ. Со сяна, кужмо, шаермес утись, выжыосынызы данъяськись, адямилыко луыны дышетӥськомы. Та бордын ик кужыммы. Юнармеецъёсмы улонын но адӟем карымонэсь луо. Кылсярысь, Яр шор ёзо школаысь 8-тӥ классысь Кирилл Пагин кылем арын выйись пиналэз шурысь поттӥз, сое быронлэсь утиз. Со шоры учкыса, эшъёсыз но котыр ласянь умойгес луыны тыршо.

Формазэ нуллӥсь котькуд пинал йӧногес улыны-дышетскыны тырше. Милемлы оскемзэс веразы бере, кызьы сое тӥялод, шуо нылпиос. Горд-горд пиштӥсь беретъёссы азьланяз вормонъёс дурыны ӧтё кадь. Ог-огзы азьын урод вамышъёс лэсьтыны но кепырало. Ваньзылы угось юнармеецъёс радэ сюрыны уг кылды. Соин ик нимынызы данъясько, сое уськытонлэсь кышкало. Армие сюрыса я военной учебной заведениосы пырыса, соос данзэс уг уськыто, асьсэды но котырысьтызы адямиосты ӝож карыны уг сёто. Озьы «Юнармия» сюлэмзэс кыдатӥсь луэ.

Елена Сараматова

Ангелина Снигирева
By Ангелина Снигирева 21 мая, 2019 14:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<