Анай-атайлэн данэз но шудэз

Ангелина Снигирева
By Ангелина Снигирева Май 16, 2019 10:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Анай-атайлэн данэз но шудэз

Семьялэн калыккуспо нуналаз шаерамы сӥлы каро тужгес адӟем карымон семьяосты. Та ӟеч сям туэ но улонэ пыӵаз: «Анай-атайлэн данэз» пус сётэмын пӧртэм ёросъёсысь 15 семьяослы.

Калининъёс 9 нылпи будэто
Фото: Можга ёрос администрация

«Анай-атайлэн данэз» пусэн сӥлы каремъёс пӧлын — Можга ёросысь Ӟуч Пыӵас гуртысь Калининъёслэн семьязы. Геннадий Юрьевич но Зинаида Ильинична кузпалъёс будэто 9 пиналъёссэс: 5 нылзэс но 4 пизэс. Соос огезлэсь пӧртэм мукетыз визьмоесь, рос-просэсь. Семьязылы нокин но синмаськытэк уз кыльы!

— Кузпалэным Геннадий Юрьевичен одӥг классын дышетским, — шуэ Зинаида Ильинична. — Школаез йылпумъяса но, люкиськеммы ӧз поты, лэся: 1994-тӥ арын сюан шудӥмы. Озьы ӵошен улыны кутскеммы дырысен туэ 25 ар тырме ни. Кузпалы туж оскымон, ужез яратӥсь, семьяез сярысь сюлмаськись. Таӵе кузпалэн малы пинал ваёнтэм? — капчи мылкыдын вера анай.
Зинаида Ильинична ачиз бадӟым семьяын будэмын: атайзы трос нылпиен огназ кылиз но ачиз кадь ик пал кылем, пиналъёссэ огназ будэтӥсь кышномуртэн семья кылдытӥз. Озьы со 14 нылпиё семьяын быдэсмиз-будӥз. Соин ик пиналъёсты вордон-утён сое чик ӧз кышкаты. Школазэ йылпумъяса, Зинаида Ильинична дышетскыны пыриз Ижысь культурая училищее (али культурая колледж). Сое йылпумъяса, ужаны берытскиз Можга палъёсаз, интыяськиз Ӟуч Пыӵасысь культурая юртэ чеберлыкъя кивалтӥсь луыса. Со кичӧлтэмъя, клубын радъясько пӧртэм тунсыко ужрадъёс. Зинаида Ильиничналэн куараез жингрес, шудыны быгатэ пӧртэм крезьгуро инструментъёсын, нош ваньмон дыръяз яратэ вуриськыны. Анайзылэсь адӟем каро пиналъёссы но: Григорий пизы, кылсярысь, быгатыса шудэ балалайкаен. Нош София, Артём но Капитолина кырӟало-верало фольклоръя нылпи ансамбльын.
Геннадий Юрьевичлэн но киосыз зарни. Али со тырше мувӧй поттон удысын, ваньмон дырыз ӵем уг луылы, но виссэ шедьтэ ке, пулэсь олокыӵе но арбериос лэсьтэ, туж чебер пӧрмо солэн укно наличникъёсыз. Со сяна, Геннадий Юрьевич яратэ волейболэн шудыны, быдэс семьяенызы дэмен кыдато мугорзэс.
Калинин кузпалъёслэн нылпиоссы асьсэос кадесь ик котькыӵе ужлы мыло-кыдоесь. Можга ёросазы, шаерамы ортчись конкурсъёсы сяна, мыло-кыдо пырисько улосъёс куспын радъяськись вожвылъяськонъёсы но. Кылсярысь, валля арын быдэс семьяенызы пыриськизы «Успешная семья Приволжья» фестивале. Отын Калининъёс вормисе потӥзы «Анай-атайлэн данэз» номинациын.
Кемалась ик ӧвӧл Калинин кузпалъёс песянай-песятай луизы: бадӟымез Анна нылзы нунок кузьмаз.

Елена Никитина

Ангелина Снигирева
By Ангелина Снигирева Май 16, 2019 10:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<