Адӟисьтэм но кылӥсьтэм тодосчи

Ангелина Снигирева
By Ангелина Снигирева Май 22, 2019 11:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

15-тӥ куартолэзе Ижкарысь Калык творчествоя элькун юртын ортчиз Москваысь тодосчиен, психология наукаосъя докторен Александр Суворовен пумиськон.

А. Суворов
Фото: Национальной библиотекалэн «ВКонтакте» бамысьтыз

Александр Васильевич тодматӥз «Встреча Вселенных, или Слепоглухие пришельцы в мире зрячеслышащих» книгаеныз. Сукыр но сонгро адямиослэн улонзы, соослэн быдэ вуэмзы, мукет адямиосын кусып возьыны дышемзы сярысь А. Суворов ачиз умой тодэ — 3 аресказ со адӟемысь дугдӥз, кӧня ке ар ортчыса, кылэмез но ӧз ни луы. Пичи дыръяз со сюриз Загорскысь адӟисьтэм но кылӥсьтэм пиналъёслэн нылпи юртазы. Бӧрысь та юртысь 4 пиналэз сонгро но сукыр нылпиосты дышетонъя экспериментальной группае кутӥзы. Талы луыса А. Суворов быгатӥз Москваысь М. В. Ломоносов нимо кун университетысь психологияя факультетэз йылпумъяны. Александр Васильевичлэн улонзэ наукаен герӟамез потӥз: со психологияя кандидатскойзэ гожтӥз, собере докторскойзэ но утиз. Али Александр Васильевич Москваысь психологияя но педагогикая университетлэн но Россиысь тодон-валан сётонъя академилэн университетэзлэн профессорзы луэ. Эскерон ужен вырем сяна, со кылбурчи но писатель луэ, пӧртэм интыосы вуылэ, трос адямиосын кусып возе.

Пумиськонын тодосчи вераз книгаез бордын ужамез сярысь. Книгазэ 33 ар ӵоже гожтӥз, пе. Отчы пыремын адӟисьтэм но кылӥсьтэм нылпиосты будэтон сярысь малпанъёсыз, пӧртэм пиналъёсты огазьын дышетон пумысен ӵектонъёсыз, аслаз улонысьтыз мадёсъёсыз. Быдэс улонзэ А. Суворов тыршиз аспӧртэм нылпиослы юрттыны, огшоры адямиослэсь но сукыр но сонгро муртъёслэсь дуннеоссэс огазеяны. Огшоры лыдӟисьлы книга аспӧртэм адямиослэсь дуннеез шӧдэмзэс валаны юрттоз, нош педагогъёс но анай-атайёс книгаез, сукыр но сонгро кылем пиналъёсты будэтыкузы, уже кутыны быгатозы.

— Инвалидъёсын капчи ӧвӧл, — шуэ ачиз А. Суворов. — Куд-огез аслыз юрттыны уг лэзьы, юрттэт кулэ ке но. Мукетыз юрттэмез гинэ возьмаса улэ. Сыӵе адямиен кусып возён — ӵушъялэз маяллян кадь, солы дышетскыны кулэ.

Александр Васильевич ужез но улонэз сярысь серем пыр вера. Тодмоосыз верамъя, со борды нылпиос но кыстӥсько. Тодосчи возьматэ: адями вань шуг-секытъёсты вормыны, номыр шоры учкытэк, маин потэ, соин вырыны быгатэ.

Ижкарын А. Суворов пумиськылӥз на Удмурт кун университетысь студентъёсын но социальной продюсированиея «Журавейник» центрысь пинал журналистъёсын. Пумиськонъёсты радъяз Удмуртиысь Национальной библиотека. «Встреча Вселенных, или Слепоглухие пришельцы в мире зрячеслышащих» книгаен кӧня ке форматэн тодматскыны луоно: сое чиньыосын лыдӟыны, кылзыны луэ.

Виктория Крамова

Ангелина Снигирева
By Ангелина Снигирева Май 22, 2019 11:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<