5, 4, 3, 2, 1, азьлань!

Ангелина Снигирева
By Ангелина Снигирева Апрель 12, 2019 09:28

Мар сярысь гожъяз дуннеысь нырысетӥез космонавт Юрий Гагарин Ижысь школьникъёслы? Кызьы шаерамы утьыны выризы инсьӧре лобам Звёздочка пуныез? Та но мукетыз сярысь туж умой тодо Ижысь 62 номеро школаын.

Школалы — Ю. Гагаринлэсь нимзэ

1961-тӥ арын 12-тӥ апреле Юрий Гагарин ӝутскиз космосэ, нош ӵуказеяз, 13-тӥ апреле, Ижысь 62 номеро школа нырысетӥ космонавтлэсь нимзэ нуллыны кутскиз ни — татын туж умой ужа вал ракетаос лэсьтонъя кружок. Нылпиос ас киосынызы бичаллязы ракетаос, школа азбарысен соосты лобӟытъязы. Соин ик кудӥзлы школалы Ю. Гагаринлэсь нимзэ сётоно — Ижысь кивалтӥсьёслэн юанзы ӧз ик кылды.

1965-тӥ арын та школаын ик космонавтикалы сӥзем музей ужаны кутскиз. Туннэ но со быдэс Удмуртимы понна одӥг. Ма, быдэс Россиын таӵе музейёс трос ик ӧвӧл — 20 пала гинэ лыдъясько. Музеен та вакытэ быгатыса кивалтэ Марина Астафьева, солы мыло-кыдо юрттӥсько пинал гагаринецъёс. Музейчиослэн март-май толэзьёсы уката кысык вакытсы — экскурсия вылысь экскурсия: быдэс классъёсын лыкто школьникъёс. 12-тӥ апрельлы, кылсярысь, 5 экскурсия чакламын.

Экспонатъёс бичало огъя кужымен

Музее экспонатъёс ваньзы бичазы — дышетӥсьёс, нылпиос, анай-атайёс, палэнысь адямиос…

— Одӥг пол дорамы лыктӥз песянай, Валентина Терешкова космонавтлы сӥзем быдэс альбом ваем — мар со сярысь гожъязы газетъёс, ваньмыз отчы лач-лач лякылэмын, — вера Марина Астафьева. — Нунокелы, пе, люкай вал. Нош солы кулэ луымтэ. Мукетъят жингыртӥсьёс луизы — кузьым лэсьтэммы потэ, пе. Вуизы, тӧдьы басмаен бинялтэм кузьымзэс усьтӥзы — Ю. Гагарин но Г. Титов космонавтъёслэн тусъёссы вӧё буёлъёсын суредамын. Кинъёс вайизы — нимзэс вераны пумит луизы, кылемын, пе, песянайзылэсь, нош со уг тоды вал, кытысь со картина доразы вуиз… Ракетаослэсь макетъёссэс ог 8-10 ар талэсь азьло кузьмаз Дэбес школа. Отын куке но кружок вылэм, но пытсаськем — макетъёс подвалын но возиськиллям ни. Но куштыны жаль потэм — милемыз шедьтӥзы.

Нош тросэз экспонатъёс — асьсэлэсь космонавтъёслэсь кузьымъёс. Та дыр ӵоже музее вуылӥзы ни Виктор Горбатко, Геннадий Сарафанов, Александр Серебров космонавтъёс, Владислав Волков космонавтлэн Людмила кузпалыз, Константин Циолковскийлэн Мария внучкаез. Огзы но буш киын уг лыкто. Со сяна, егит гагаринецъёс пыриськыло пӧртэм калыккуспо конференциосы, соку Звёздный городокын улӥсьёсын пумиськыло — нош ик кузьымъёсын берто.

Кылсярысь, одӥгаз витринаын — космонавтъёслы юри чаклам сиёнъёс: нянь, емышъёслэсь пюре, борщ, кофе, чай… Одӥгъёсыз пинь сузян пасталы кадь тюбикъёсы тыремын — вазен, пе, сиёнъёсты озьы возё вал. Нош мукетъёсыз вакуумен каремын ни — таосыз туала сиёнъёс. Но соосыз но, таосыз но юн-юн ӵоксамын: космонавтъёс сиськыку, одӥг пырыез но омыре медаз сюры. Угось соос омырын «уяны» кутскозы, кораблез ӵакмытозы.

Мукет ӝажы вылын — метеоритлэн люкетэз, Толэзьысь мулэн макетэз — со быдэсак тупа Толэзьысь сюйлы.

— Нош таиз «Байконур» космодромысь старт сётон ключ, — вера Марина Александровна. — 5, 4, 3, 2, 1, азьлань! — тазьы чузъяськем бере усьтонэз берыкто, ракета выллань ӝутске!

Дуно кинюртэмъёс

Лачак утялтэмын космонавтъёслэн автографъёссы — берло ог 50 аръёсы инсьӧры тубамъёслэн ваньзылэн ик вань кадь соос.

— Нош таоссэ ачиз Юрий Гагарин ыстӥз, — туж чакласькыса усьтэ музеен кивалтӥсь эшшо одӥг конвертэз.

Отын — 2 туспуктэм но гожтэт.

— Музеймес усьтэм бере материалъёс шедьтыны туж шуг вал, — азинтэ веранзэ Марина Александровна. — Соин ик школаысьтымы пиналъёс но дышетӥсьёс «Пионерская правда» газетэ гожтэт ыстӥзы, юазы, кытын интыяськемын космонавтъёсты дасянъя центр, кытын уло соослэн семьяоссы.

Озьы космонавтъёсын кусып тупатэмын вал. Юрий Гагарин Ижысь школьникъёслы туж ӝог вазиськиз. Келяз туспуктэмзэ, улаз кинюртэмзэ но пуктэм. Но со гожтэтэз почтаын комъяны шедьтӥллям — кинюртэм умой уг адӟиськы ни. Школьникъёс дӥсьтыса но дӥсьтытэк космонавтлэсь 2-тӥ автографсэ куризы. Юрий Гагарин нош ик кинюртэмен туспуктэмзэ келяз! Бордаз — гожтэт но. Ачиз печатлан машинкаен гожтэм. Шумпотэмзэ верам, нылпиос куспазы туж эшъяськыса уло, пайдаё ужъёсын выро шуыса. Со дыре ик ӝожомисько, пе, мылкыдтэк дышетскись нылпиос но вань шуыса. Ваньды валалэ: школаын басьтэм тодон-валанъёсты котьку но котькытын кулэ луозы, шуэ.

Дезик, Цыган, Звёздочка…

Экскурсие вуылӥсь пиналъёс котькуд экспонат котырын кема-кема бергало. Маялляса ик учко пунылэсь синпелетсэ.

— Тодӥськоды-а, кыӵе пуныос лобазы инсьӧре? — юало экскурсие лыктэмъёслэсь.

— Белка, Стрелка, Звёздочка, — вожмаськыса сямен верало пиналъёс.

— Нош нырысь ик лобӟизы Дезик но Цыган, — валэктэ Марина Александровна. — Соос бере эшшо 30 пуныос лобазы на, жаляса верано, 18-эз бырыны шедизы. Бырйылӥзы урамын калгись огшоры пуныосты, соос шуг-секытъёсты капчиенгес вормыны быгато шуыса. Но куронъёс вал ик: пуны 35 сантиметрлэсь ӝужыт, 6 килограммлэсь секыт медаз луы. Эшшо мусо, чебер мед луоз на — газетъёсы туспуктэмзэ сётоно вал ук!

Нош Звёздочка нимоез васькиз удмурт музъем вылэ — Сарапул но Чайковский вискы. Солы юрттӥськиз Ижысь лётчик Лев Оккельман. Москваысь бригада куазь уродэн ӝегаса лыктӥз. Звёздочкаен ӵош капсулаын лобазы на кӧня ке комакъёс но Иван Иванович нимо манекен — солэн пушказ адями вирен капсула понэмын вал. Л. Оккельман быдэс уез ортчытӥз пуныен ӵош, шунтӥз сое, шунтэм лымы вуэн сектаны выриз… Москваысь специалистъёс вуэм но эскерем бере Звёздочка 2 нунал улӥз на Ижысь аэропортын, собере сое нуизы Москвае. 17 нунал ортчыса, космосэ ӝутскиз Юрий Гагарин!

* * *

62 номеро школа пыр потэмъёс пӧлысь 500 палаез нылъёс но пиос улонзэс герӟазы ни авиациен — данакез полковникъёс, подполковникъёс луэмын. Нылъёс стюардессаын ужало. Ирина Поварницина музейын экскурсиос туж мыло-кыдо нуэ вал, табере «Роскосмосын» ужа. Дмитрий Шагалов музейысь ӧз поталля. Табере Звёздный городокын космонавтъёслы планетарийын но бассейнын тренировкаос ортчытъя. Ӝуатскозы на, вылды, эшшо трос мукет кизилиос! 

Элина Кумачёва

Туспуктӥз О. Русских

Ангелина Снигирева
By Ангелина Снигирева Апрель 12, 2019 09:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<