Ӟеч эмъяны мылкыд кулэ

Ангелина Снигирева
By Ангелина Снигирева Апрель 26, 2019 13:06

Ижысь 2 номеро поликлиника Россиысь устоосыз поликлиникаос пӧлы пыре. Солэсь дышетскыны вуыло пӧртэм улосъёсысь больницаос. Ужан амалъёссэ пыӵатыны медо Удмуртиысь мукет поликлиникаосы но.

Депутатъёс Ижысь 2 номеро поликлинкалэн ужаменыз тодматско

Пыд улын, борддорын, тубатысь кутӥськонъёс бордын, лифтын — котькытын бадӟымесь букваосын но яркыт буёлъёсын гожтэмын, кыӵе этажын кыӵе врачъёсты ортчыны луэ. Соин ик югыт но яркыт 2 номеро поликлиникаын йыромыны шуг. Пырон дорын ик электронной табло вылын возьматэмын кабинет номер но номерок. Нялтас вераса, регистратураын черод уг адӟиськы, кабинетъёс азьын но буш. Валтӥсь врач Нина Капачинская верамъя, калыкез кӧня ке толэзь куспын дышетыны быгатӥзы гожтӥськем дырлы лыктыны. Регистратура пыр сяна, татын эмчи доры я анализъёс сётыны гожтӥськыны луэ Интернет яке нимысьтыз кылдытэм колл-центр пыр. Врачъёслэсь ужзэс ӟеч радъямен, котькуд висисез учкон-эскерон дыр кузьгес луиз. Висисьёслэсь картаоссэс электронной амалэ выжтэмен, котькуд врач соку ик быгатэ пациентэз мукет специалист доры гожтыны — адямилы регистратурае бызьылонэз ӧвӧл ни. Нина Капачинская верамъя, азьланяз медо регистратуралэсь воксё куштӥськыны. Озьы 13 терапевтической участок смена ӵоже 570 адямиез учкыны быгатэ. Оглом татчы юнматэмын 28 сюрс адями. Воштӥськонъёс ортчытэмен, берло ар ӵоже татын эмъяськыны мылкыд карисьёслэн лыдзы 4 сюрслы йылӥз. Эмчиослэн шоро-куспо уждунзы 60 сюрс манет лыдъяське, нош эмсузэръёслэн — 30 сюрс манет.

Кызьы ваньзэ тае пыӵатыны быгатӥзы? Ужаменызы тодматскыны кылем арня вискын вуылӥз Кун Кенешлэн Президиумез. Депутатъёс врачъёсын, висисьёсын кенешизы, кабинетъёстӥ ортчизы. Калык поликлиникаысь выльдӥськонъёслы шумпотэмын. Котькуд адями гожтыны быгатэ, мар солы уг кельшы. Поликлиникаын вань куронъёсты лыдэ басьтыны тыршо.

Нина Капачинская пусъемъя, воштӥськонъёс сярысь малпаськыны кутскизы 2016-тӥ арын. Ӵапак соку Россиын вераськыны кутскизы «Бережливая поликлиника» проект сярысь. Со вакытэ заводъёсын гинэ та выллем выльдӥськонъёс ортчизы. Кызьы соосты больницаосы выжтыны, нокин ӧз тодылы.

— Быдэс коллективен малпаськыны кутскимы, мар кароно ужез капчиятон, висисьёслы дыр тросгес висъян, эмъянлэсь ӟечлыксэ будэтон сярысь, — шуэ Нина Евгеньевна. — Адӟем карыны нокинлэсь вал бере, асьмеос ик план гожтон борды басьтӥськимы. Кутскимы регистратура бордысен. Угось ӵапак татын поликлиникаослэн «пӧськызы». Котькуд висись керӟег луэ. Соослэн керӟегъяськемзы ужасьёс вылэ но палаське. Соин ик регистратурае ужаны пуктӥмы психологез. Соку ик омыр каньылаз. 3 толэзь куспын регистратураысь черодэз 4 поллы кулэстыны пӧрмытӥмы. Нялтас вераса, быдэс коллективез калыкен ужаны, секыт мылкыдзылэсь мозмытскыны, жадемзэс веськатыны дышетон понна ӧтчаны кутскимы психологъёсты, нимысьтыз семинаръёс ортчытъямы. Котькуд ужасьлэсь вормонъёссэ премиен дунъяны ӧдъямы. Специалистъёс сюлмаськемез шӧдо ке, асьсэос но умойгес ужаны кутско.

2 номеро поликлиника «Бережливая поликлиника» проектъя Россиысь поликлиникаос пӧлын нырысь ик сертификат басьтыны пӧрмытӥз. Табере со Россиысь 4 устоосыз пӧлы пыре. Но таин гинэ буйганы уг медо. Татын али диспансеризация ортчон кабинетъёссы нимаз, отчы пырон ӧсэз но нимаз. 3 арлы огпол гинэ диспансеризация уг ортчыто. Дырын-дырын пуромылӥсь (хронической) черъёсын курадӟись адямиосты ялан чакласа возё, тужгес но сюлэменызы висисьёсты но лек пыктосъёслэсь курадӟисьёсты. Пыктосъёсты я полипъёсты шедьтыкузы, врачъёс висисьёссэс соку ик гожто онколог доры. Тазьы ужаменызы 75 процентаз учырын лек пыктосъёс вазь, 1-тӥ но 2-тӥ стадиязы, шараясько. Али озьы ик меӵак ужаны медо кардиоцентрен. Поликлиникаын асьсэлэн маммографсы но вань.

Тазалыкез утёнъя министр Игорь Титов пусъемъя, 2 номеро поликлиника сяна, «Бережливая поликлиника» проектэ пыриськизы Ижысь 7 номеро больницалэн нылпи поликлиникаез но Дэри ёросысь «Юськи» нылпи санаторий. Туэ та проект онкодиспансерын пыӵатэмын луоз, шуиз со. Озьы ик 2020-тӥ арозь 136 поликлиникаосын воштӥськонъёс ортчозы. Кутскозы стационаръёс борды но, нырысетӥ интыын — Глазов, Вотка но Сарапул городъёс. Россиын стационаръёсъя проект ӧвӧл на, но вормомы, шуэ министр.

Кун Кенешлэн Тӧроезлэн воштӥсез, тазалыкез утёнъя, демографияя но семьяен ужан политикая ялан ужась комиссиен кивалтӥсь Надежда Михайлова верамъя, поликлиникаос, ёросъёсысь больницаос Ижысь 2 номеро поликлиника сямен ужаны кутскизы ке, висёнъёсты вазь ик шараяны луонлык кылдоз, озьыен, улон даурез кузьгес карыны пӧрмытомы. Мылкыд гинэ мед луоз. Угось вань поликлиникаослэн луонлыкъёссы огкадесь. Тани 2 номеро поликлиника но куке-соку Нефтемаш заводлэн медсанчастез вал. Выльдӥськон вакытэ завод солэсь куштӥськиз. Город пуме интыяськем поликлиникае али ке но калыклы сюрыны шуг — транспорт кыдёке дугдэ. Котьма ке но туннэ больница азинскыны быгатэменыз паймытэ. Калык но татчы ялан куриське. Поликлиникалы та воштӥськонъёсты ортчытыны нокин ватсаса уксё ӧз висъя — татын дунын сётӥськись юрттэт понна лыктӥсь уксёез быгатыса кутӥзы.

Елена Сараматова

Ангелина Снигирева
By Ангелина Снигирева Апрель 26, 2019 13:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<