Ӟеч малпанъёс быдэсмыны кулэ

Ангелина Снигирева
By Ангелина Снигирева Апрель 25, 2019 16:39

«Удмурт Кенеш» огазеяськонлэн Пичи кенешез араз 2 пол люкаське. Соку республикаысьтымы вань ёросъёсысь кенешчиос, удмурт диаспораосысь азьветлӥсьёс удмурт калык азьын сылӥсь тужгес шугъяськытӥсь ужпумъёсты эскеро.

Т. Черноваез но Т. Захароваез Ашальчи Оки нимо премиен пусъё
Фото: Л. Гонин

Огазеясь юбилей
Пичи кенешлэн пумиськонэз радъяськиз Кун Кенешлэн юртаз. Люкаськем калыклы ужазинлык сӥзьыса, вераськизы Кун Кенешлэн Тӧроез Алексей Прасолов, Удмуртилэн Тӧроезлэн администрациеныз кивалтӥсь Сергей Смирнов но Удмуртиысь валтӥсь федерал инспектор Сергей Панов. Ужрадэз нуиз «Удмурт Кенеш» огазеяськонлэн кивалтӥсез Татьяна Ишматова.
Кивалтӥсьёс пусйизы, азьланяз элькунмес трос бадӟым юбилейёс возьмало шуыса.

— Вуоно арын Удмурт элькунлы 100 ар тырме. Удмуртия — трос калыкъёсты огазеясь бадӟым кунлэн оглюкетэз. Автономилэсь ӵуказе нуналзэ сыӵеен ик адӟемзы потэ вал, дыр, 1918-тӥ арын нырысетӥ удмурт съездэ лыктэм делегатъёслэн. Туэ ар пумын Удмуртилэн Конституциезлы 25 ар тырме, оскисько, «Удмурт Кенеш» мыло-кыдо пыриськоз сое пусъёнэ. Нош вуоно арын «Удмурт Кенеш» огазеяськонлы аслыз 30 ар тырмоз, — тодэ вайытӥз Алексей Прасолов.

— Удмуртилэсь кунлык басьтэмзэ пусйыку, асьмелы тыршоно, юбилей мед возьматоз кунлыклэсь инъетсэ, республикалэсь Россилэн улоназ интызэ. Асьмеос тодамы возьыны кулэ кунлыкез кылдытон бордын ужамъёсты. Валтӥсь ужпумъёс пӧлын — Удмурт культурая центрез кылдытон. Но со понна трос лэсьтоно на, — пусйиз Удмуртилэн Тӧроезлэн администрациеныз кивалтӥсь Сергей Смирнов.
Удмуртилэн кунлык басьтэмзэ пусъёнлы дасяськон сярысь кенешчиослы мадиз Нациосын ужан политикая министерствоысь ёзэн кивалтӥсь Елизавета Ложкина. Со пусйиз, план вань ни ке но, дэмланъёс али но сётыны луэ. Юбилей ужрадъёс сярысь Интернетысь тодыны луоз, портал иворъёсъя «Удмуртия» агенстволэн бурд улаз ужалоз.
Бадӟым юбилейлы дасяськонэн валче вунэтоно ӧвӧл туэ ортчоно яркыт ужрадъёс сярысь но. Мур пуштросо луыны кулэ Гербер шулдыръяськон. Со сярысь мадиз Ижысь Эшъяськон юртлэн директорезлэн воштӥсез Татьяна Фёдорова. Гербер ортчоз 29-тӥ июне Эгра ёросысь Мазьги гурт вӧзын. Туэ солэн пусъёсыз — удмурт нылкышно, кубо, черсӥськон… Элькун Герберез ортчытыны 1 миллион 125 сюрс манет висъяськоз.

Удмурт центр луоз!
Удмурт элькунлэн кунлык басьтэмезлы сӥзем ужрадъёс пӧлысь одӥгез бадӟымез — Удмурт центрез пуктон. Зэм, тазэ ужез ӝог быдэстыны уз луы. Малы? Та сярысь люкаськемъёслы ивортӥз культурая министр Владимир Соловьёв:

— Удмурт центрлэсь юртсэ пуктон понна Короленко нимо театрлэсь али юртсэ быдэсак куашкатоно луоз, угось со ярантэм луэмын ни. Туэ 1-тӥ июльлы центрез пуктонъя проект дась луыны кулэ.
Зэм, ассэ юртэз 2020-тӥ арозь пуктыса уз вуттэ. Но Владимир Михайлович буйгатӥз: Удмуртилэн Тӧроез Александр Бречалов Россиысь культурая министрен Владимир Мединскиен пумиськылыкуз, Удмурт центрез пуктон сярысь ужпумез кӧня ке пол ӝутъяз. Федералъёс нырысь та малпанлы ӧз дурбасьтэ вал, Удмуртиын культурая учреждениос сотэк но трос шуизы. Но Александр Владимирович ӧз сётскы. Соку Россиысь культурая министр нялтас кариськиз: сокем кулэ шуиськоды бере, озьыен кулэ.
Юртэз пуктонлы федерал бюджетысь 320 миллион манет пала кулэ луоз, Удмуртилэн кисыысьтыз — 75 миллион. Озьы Удмурт культурая центр 2021-тӥ арлы дась луыны кулэ. Со аре ик Удмуртиын усьтӥськыны кулэ Национальной библиотекалэн выль юртэз. Сое лэсьтон туэ май толэзе кутскоз ни. Нош Лятушевичлэн юртаз (али буш сылэ, Национальной библиотекалэн ваньбурез луэ) усьтын чакламын литературалы сӥзем музей.
Нош макем шӧдӥськоз матэктӥсь юбилейёсын удмуртлык? Нациосын ужан политикая министрлэн воштӥсез Людмила Соковикова пусйиз, котькуд ужрадын соос удмурт кылэз, удмурт аспӧртэмлыкез лыдэ басьтыны куро. Нош Владимир Соловьёв дэмлаз: тодмо удмурт азьветлӥсьёслэн нимъёсынызы список дасяно, выль ульчаос кылдӥзы ке, соослы со нимъёсты сётыны мед луоз.

Нош малы Удмуртие пырыку, уг адӟиськы солэн удмурт шӧмыз, элькунмылэн шоркарез шуыса возьматӥсь пусэз? Вань ук асьмелэн суредасьёсмы но архитекторъёсмы.
Та пумысен кенешчиос но культурая министерство но сюрес хозяйствоя министерствое вазиськоно кариськизы.
Нош ик анай кыл сярысь
Пичи кенешын трос ужпумъёс ӝутэмын на вал, кылсярысь, телевидение цифровой амалэ выжемен табере кытысь но кызьы удмурт передачасты учкыны луоз. Нош «Удмуртия» издательстволэн директорез Ю. Кузнецов ивортӥз асьсэлэн проектъёссы сярысь. Туэ издательстволы 100 ар тырме, книгаос сяна, отын ӝӧк выл шудонъёс лэсьто, Москваысь Горд площадьын ортчись адӟытонъёсы пырисько. Асьсэ ужзы сярысь мадизы «Удмурт Кенешлэн» Ува ёросысь ёзэзлэн кивалтӥсез Г. Сидоров, «Удмурт Кенешлэн» Красногорск ёросысь ёзэзлэн кивалтӥсезлэн воштӥсез В. Спиридонов, Татарстанысь удмуртъёслэн автономиенызы кивалтӥсь А. Герасимов но.
Татьяна Ишматова шугъяськонзэ вераз школаосын нылпиослы одно ик 2 кунсьӧр кылэз дышетыны курись закон сярысь. Соин сэрен пиналъёс анай кылэз дышетонлэсь уз палэнске-а? Югдурез пыр-поч валэктӥз дышетонъя министерствоысь отделэн кивалтӥсь Валентина Корепанова.

Та пумысен трос шугъяськонъёс, угось кадръёс ласянь но сюлмаськонъёс вань. Федерал министерствое дэмланъёс келямын ни, малпаськом кыкетӥ кунсьӧр кылэз одно ик дышетон интые пусъёно: анай-атайёслэн мылкыд каремзыя но со кылъёсты дышетонлы условиос вань ке. Нош али субъектъёс уг быгато стандартъёсы пыртэмезлэсь палэнскыны, соослэн сыӵе полномочиосысы ӧвӧл…
Нош ик лэчыт вераськон ӝутскиз Удмуртиысь киужъёсъя центрлэн ӵуказе нуналыз пумысен. Азьвыл та центр культурая министерстволэн бурд улаз ужа вал, табере сое экономикая министерствое выжтӥзы. Ваньзы сямен ик кенешчиос пусъё: сыӵе вамыш шонер ӧвӧл. Ужпум эскеремын ни «Удмурт Кенешлэн» исполкомаз, экспертной кенешаз. Огазеяськонлэн нимыныз Т. Ишматова, В. Тубылов, Г. Сидоров пыро Общественной палата бордын ужась комиссие. Но люкаськемъёс оскем муртъёсты дэмлазы на та ужпумъя Удмуртиысь Правительствоен вераськыны…
Пичи кенеш шуныт ӟечкыланъёсын йылпумъяськиз. Туэ ар понна А. Оки нимо премиосын пусъемын вал тодмо кылбурчи Татьяна Чернова но Балезино ёросысь Исак школаысь удмурт кылъя но литературая дышетӥсь Татьяна Захарова. Нош Алнаш ёросысь пиналъёс но Ижысь Первомай ёросысь «Чильтэр» ансамбль А. Окилы сӥзем постановка возьматӥзы.

Ангелина Снигирева
By Ангелина Снигирева Апрель 25, 2019 16:39
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<