Юсьёслэн дорзы

Ангелина Снигирева
By Ангелина Снигирева Апрель 18, 2019 11:59

Сюмси муниципал кылдытэтлэн йырыз Сергей Кунавин ачиз сак эскерыса возе ӵыпетъёссэс. Бадӟым тудву гуртоослы кышкытлык медаз вайы шуыса, бадӟым йӧосты корало, силёзэ утялто.

Гуртлуд ӵыпет

Муниципал кылдытэтазы, Сюмси черкогурт сяна, эшшо 9 гурт пыре на. Тулыс тудву дыръя калыклы тужгес бадӟым кышкытлык вайыны быгатэ Гуртлуд ӵыпет. Солэн быдӟалаез — 24,5 гектар. Дыраз ӧд эскеры ке, 50 пала коркаос тудву улэ кыльыны быгатозы.

— Ӵыпетъёсмы вашкалаесь, ялан эскерыса, тупатъяса возиськомы, — шуэ Сергей Васильевич. — Валлян гинэ ӵыпетъёсыз эскерыса потӥмы, нош толон отын трактор ужаз, сӥзьыл кельтэм щебенез вӧлдӥз. Тулыс тудву туэ ӧз алякты, дамбаос интыязы, ву кошкон гумыос дорысь гинэ люкаськем лымызэ сузямы на.

Азьвыл аръёсыз лыдэ басьтоно ке, тужгес бадӟым тудву вылэм 1979-тӥ арын. 1960-тӥ аръёсы пуктэм Гуртлуд ӵыпетсы кыриськемен, ву улэ шедиллям Сюмсиысь 7 ульчаысь 150 пала коркаос.

Черкогуртысь мукетыз ӵыпетсы Сюмси нимаське. Гуртлуд ӵыпетэн ӵошатоно ке, 2 поллы пичигес. Таяз шлюзъёсыз вань, бадӟым тудву вуон азьын вузэ ӧжытгес кельто.

— Кылем даурын пуктэм ӵыпетмы кемалась выльдэмез кулэ каре, одӥгезлы коть шумпотӥськомы: туэ арысен проект лэсьтон борды басьтӥськозы. Со понна Инкуазь узырлыкъёсъя но инкуазез утёнъя министерствоысь 1 миллион 500 сюрс манет висъяны чакламын, — шумпотэмзэ уг ваты Сюмсилэн йырыз.

Сюмси муниципал кылдытэтэ 9 ӵыпет пыре, 2-ез муниципал кылдытэт борды юнматэмын ке, мукетъёсызлэн кузёоссы вань. Та ёросысь ӵыпетъёслы синмаськемын чорыганы яратӥсьёс но, кыр тылобурдоос но. Сергей Кунавин верамъя, кылем арын Коӵо-Юс (Верх-Юс) гуртысь ӵыпетын улӥзы 5 юсьёс. Сӥзьыл вуыса, 3-ез лымшор пала лобӟиллям, нош 2 юсьпиоссы кылиллям. Кыр тылобурдоос, кытчы пырыны паймеменызы, ӟазегъёсын ӵош ульчае лыктӥллям. Юсьёсты Ижысь зоопарке интыязы. Сюмси палъёс юсьёслэн дорзы луо бере, кызьы ӵыпетъёс сярысь уд сюлмаськы, шуэ Сергей Кунавин.

Валентина Емельянова

Фото: «Сюмси МО» огинлэн «ВКонтакте» бамысьтыз

Ангелина Снигирева
By Ангелина Снигирева Апрель 18, 2019 11:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<