Шундыез пумитало бусыын

Ангелина Снигирева
By Ангелина Снигирева Апрель 26, 2019 10:43

Уйпал ёросъёс но пумен бусые кыстӥсько ни. Тани Эгра ёросысь «Колос» хозяйство вырйылъёсысь мускытэз ӝегатыны потӥз ни.

Эгра ёросысь «Колос» хозяйство бусые потӥз ни
Фото: И. Гришин

— Бусыосмы нюкъёсын, нюлэс кушъёсын интыяськемын. Пичиесь. Отын вырйылъёсын гинэ лымыез шунамын ай. Котыр лымы пуке. Но вырйылъёс шунды но тӧл шорын тӧлӟыса медам вуттэ шуыса, 2 хозяйство техниказэ поттӥз ни. Али музъемысь мускытсэ ӧм кутэ ке, со син куспын тӧлӟоз, котькыӵе ӟеч кидыс отчы пон — будыны кужымез уз тырмы. Соин ик лымы вылтӥ но, нӧдылыса но бусые потӥськомы. Вожъяськиськом Дэри но Вавож ёросъёслы — соос кизьыны кутскизы ни, — шуэ Эгра ёрос администрациысь гурт удысъя управлениысь валтӥсь агроном Михаил Емельянов.

Озьы гуртоос лымы шунамъя бусыосазы выльысь но выльысь берытсконо луо. Эшшо ке соос ог-огзылэсь ог 10 иськемлы но палэнын интыяськемын. Дизтопливо чиньы пыртӥ кадь кошке. Техникаез но бусые уд кельты, шуэ агроном.

Ёросын 10 хозяйство. Ваньзы туннэ ик бусые потыны дасесь. Ог 2 сюрс гектар озимойёссы умой потэмен, гуртоос бурдъяськемын. 8 сюрс 300 гектарез кизьыны кылемын ни. Паскаез возьмало. Бусы ужъёсты Паска бере котьку мытылӥзы угось. Зорысал ке, вань лымыез огкадь гылтысал но ваньзы дэмен гырыны, кизьыны потысалзы ни.

— Трактористъёс гинэ уггес тырмо. Соин ик хозяйствоос бадӟым но трос ужез огдыре быдэстӥсь техника басьтоно луо. Туэ «Чутырский» но «Рассвет» эштосъёс трактор басьтӥзы. Али «Мужбер» трактор вуттыны дасяське, — вера Михаил Васильевич.

Эграослэн дасям кидыссы пӧлысь 91 процентэз ӟеч лыдъяське. Котькуд гектаре 8,8 килограмм удобрение поттыны чакламын. Бусыоссэс йылтэмзы потэ, но вӧл-вӧл кизёно-гыроно лудъёссы ӧвӧл. Интыысь интые тэтчаса, трос уд кизьы, шуо.

Берло дыре «Колос» хозяйство синмаськымон азинскыны кутскиз. Кӧня ке ар талэсь азьло гинэ бере кылись вал. Предприятиен Сергей Балобанов кивалтыны кутскемен, Итадур гурт котыр ик чеберскиз. Фермаос пуктӥзы, техника басьтӥзы. Дисциплинаез но юн кутӥз. Бусые но ужасьёссэ вань хозяйствоослэсь вазь поттӥз. Тырмоз ляб хозяйствоос радын ветлыны, банкрот кылемлэсь мырдэм кылимы, верало гуртоос. Нялтас вераса, Сергей Балобанов эшшо «Рассвет» хозяйствоен но кивалтэ. Шундыен ӵош султӥськод ке, котьмае лэсьтыса вуттӥськод, шуэ.

Елена Сараматова

Ангелина Снигирева
By Ангелина Снигирева Апрель 26, 2019 10:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<