Шуг-секытлэсь ӧз пегалля

Ангелина Снигирева
By Ангелина Снигирева Апрель 26, 2019 12:59

33 ар талэсь азьло 26-тӥ оштолэзе Чернобыльысь атомной станция пуштӥз. Сое утялтонэ вуылӥз мынам ӵужмуртэ Пётр Михайлов но, та понна со трос данъетъёсын пусъемын.

П. Михайлов

Яратоно ӵужмуртэ Пётр Валентинович Михайлов 1957-тӥ арын Шаркан ёросысь Ключи гуртын вордскиз. Семьяязы 7 пиналъёс вылӥллям: 6 апай-сузэръёс но Петя ӵужмуртэ. Военкомат пыр со шофёрлы дышетскиз, собере басьтӥзы армие. Службаез бере берытскиз гуртаз. Ужаз «Кыквинский» совхозын тракторист луыса. Кузпалъяськиз, вордскизы нылпиосыз: Лариса нылыз но Денис пиез. Но шӧдтэк шорысь военкоматысь повестка вуиз: 1987-тӥ арын 1-тӥ куарусёнэ ӵужмуртме Чернобыле келязы.

Пуштэм бервылэз 3 толэзь утялтӥз. Отын со нырысь шофёр вал, берло взводэн кивалтӥз. Котыр кышкыт радиация вӧлмемын вал бере, ӵужмуртэ отысь коркаосты музъем пушкы согылонэ пыриськиз, станция котырысь гуртъёсысь кошкытэк кылем пересьёслэсь коркаоссэс кышъялляз. Котькуд ужез со мылысь-кыдысь быдэсъяз, номырлэсь ӧз пегалля, тодэ вал ке но, радиация тазалыксэ быдтоз шуыса.

Чернобыльын со тодматскиз но эшъяськиз Алнаш ёросысь Константин Мартыновен. Табере соос котькуд гужем пумиськыло, синвуаськыса тодазы ваё Чернобыльын ортчытэм вакытсэс.

Петя ӵужмуртэ али улэ Дэбес ёросысь Бер Шудӟалуд гуртын. Ваньмыз солэн умой кадь — вӧзаз яратоно кузпалыз, будӥзы ни нылпиоссы, соослэн нунокъёссы вордӥськизы. Но, жаляса верано, Чернобыльын басьтэм яраосыз асьсэ сярысь ялан тодазы вайыто, ӵемгес висьыло ни пыдъёсыз. Озьы ке но со тэк уг улы: гурт котырзэ ӝикытатэ, утялтэ, милемлы но, бускельёсызлы но быгатэмезъя юрттэ.

Чернобыльысь пуштэм бервылэз утялтонэ пыриськемез понна Пётр Михайлов данъямын «За спасение погибавших», «Чернобыльский значок», «25 лет Чернобылю» медальёсын.

Мон туж зол данъяськисько Петя ӵужмуртэным. Сӥзисько солы андан кадь тазалык, зарезь быдӟа шудбур, ваньзэ умойзэ, мар вань та югыт дунне вылын.

Мария ГЕРАСИМОВА, Шаркан ёросысь Кыква школаысь 10-тӥ классын дышетскись

Ангелина Снигирева
By Ангелина Снигирева Апрель 26, 2019 12:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<