Филармониын бурсӥз пароход

Ангелина Снигирева
By Ангелина Снигирева Апрель 30, 2019 09:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртиын азланьтӥське П. Чайковскилы сӥзем 62-тӥ фестиваль. 25-тӥ оштолэзе Ижысь филармониын ортчиз «Реки и улицы. Иосиф Бродский. Путешествие по смыслам и звукам» постановка.

И. Бродскийлэсь кылбуръёссэ крезьгурен «эшъяськытӥз» Артур Смольянинов артист — со гитараен шудӥз, кылбуръёсты лыдӟиз, кырӟаз. Солы юрттӥзы фортепианоен шудӥсь Валерия Коган но виолончелист Борис Андриянов. А. Смольянинов та проектлы крезьгур но ачиз гожтэм. Со сяна, классической произведениос но чузъяськизы.

Крезьгуръёс но кылбуръёс син азе пуктӥзы зарезь дурын сылӥсь каръёсты но, адямилэсь пуш дуннезэ но. Лирической кылбуръёсты валтӥз фортепианолэн ненег куараез. Улон-вылон сярысь кылбуръёсты муромытӥз гитара. Адямилэсь сюлэмшугъяськонъёсыз, вӧсез, лулэз позыртӥсь мылкыдъёс кылӥськизы виолончельлэн чузъяськемез улсын. Виолончель зэм но паймытӥз — Б. Андриянов инструментэныз чайкалэсь кесяськемзэ но, пароходлэсь бурсэмзэ но возьматӥз. Музыкантъёс но тодмо ӟуч кылбурчи учкисьёсты пӧртэм дуннеосы — зэмос но адямиен малпам интыосы — вуттӥзы.

Та проектэн музыканъёс вуылӥзы ини Иже 2016-тӥ арын. А. Смольянинов верамъя, постановка ялан воштӥське: улон вылезлы дышетэ, артистъёс будо. Матысь дыре музыкантъёс проектсэс видеое гожтыса кельтыны ӧдъяло.

А. Смолянинов

— И. Бродскийлэсь кылбуръёссэ лыдӟыса, мон котьку аслым маке выльзэ усьтӥсько, но соку ик выль юанъёсы кылдо, — вера А. Смольянинов. — Та кылбурчиен шӧдонъёсы тупало.

26-тӥ оштолэзе артистъёс та проектсэс возьматӥзы Воткаысь «Юбилейный» культурая дворецын. Со сяна, Б. Андриянов Воткаын Удмуртиысь музыкантъёсын — таяз арын филармония бордын кылдэм струнной квартетэн — репетиция ортчытӥз.

— Зэмзэ вераса, мон вожъяськисько музыкантъёслы, — вера Б. Андриянов. — Струнной квартетлы туж трос чебер крезьгур гожъязы дуннеысь даноосыз крезьгурчиос. Кылсярысь, Бетховен устооссэ ужъёссэ ӵапак струнной квартетлы гожтӥз, озьы ик Дмитрий Шостакович но. Удмуртиысь филармонилэн та туж умой малпанэз. Музыкантъёс но быгатӥсесь, ваньзэ сак кылзо но ӟеч шудо.

«П. Чайковскийлэн дор палъёсаз» фестиваль йылпумъяськоз 7-тӥ куартолэзе Воткаын. Татын шудоз Ульяновскысь кун академической оркестр.

Анастасия Шумилова

Фото басьтэмын Удмурт филармонилэн сайтысьтыз

Ангелина Снигирева
By Ангелина Снигирева Апрель 30, 2019 09:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<