Учебникъёслэн анайзы

Ангелина Снигирева
By Ангелина Снигирева Апрель 10, 2019 14:22

Учебникъёслэн анайзы

Удмурт кылъя нырысетӥ дышетскон книгаослэн авторзылы Алевтина Журавлёвалы — 80 арес

26-тӥ апреле 80 арессэ пусъёз Удмуртилэн Кун премиезлэн лауреатэз, дышетон удысысь дано ужась, удмурт кылъя программаослэн но учебникъёслэн авторзы Алевтина Журавлёва. Та кузь сюресэ пӧлысь 54 арез дышетонын ортчытэмын, шуэ со.

А. Журалёва

Юрт кутӥсь

1957-тӥ арын Можга педучилищеез йылпумъямез бере Алевтина Николаевна Можга ёросысь вордскем Поршур гуртаз берытскиз. Покчиосты дышетыны кутскиз гинэ, сое школаен кивалтӥсе пуктӥзы. Юрт вуж. Интыос ӧвӧл. 1-тӥ классэ лыктыны кулэ 28 пинал. Кытчы соосты пуктод? Сельсоветэ, колхозэ вазиськиз. Кивалтӥсьёс югдурез валазы. Но материал утчан, пристрой лэсьтон — вань шуг-секытъёс — ас вылаз ик усизы. Вылаз ик, урокъёс нуыны нокыӵе пособиос ӧй вал. Соосты аслыд малпано-дасяно.

Востэм, сабырлы нылкышно огез гажамонэз адями луиз. Гуртазы ужаны лыктэм егит врач Александр Журавлёв Алевтиналы синмаськиз. Но кузпалъяськыны куремез пумитэ Алевтина Осипова вазиз: нырысь дышетско ай. Озьы Ижысь пединститутэ пыриз на. Зэм, Александр Журавлёв солы маза ӧз сёты ни. Сюан ортчытӥзы. Егит семьялы Можгае квартира сётӥзы. Картэз судмедэксперт луыса ужаны кутскиз. Алевтина заочно амалэн дышетскыны выжиз, городысь 3 номеро школае интыяськиз.

Можга город соку ӟуч вал. 3 номеро школа гинэ национальной лыдъяськиз. Ӟуч, бигер но удмурт классъёслы люкиськыса, нылпиос нимаз дышетскизы. Удмуртъёс но трос ик ӧй вал — Можга вӧзысь Чебершур гуртысь татчы ветлӥзы.

  • Удмурт кылъя урокъёсты соос туж яратылӥзы, — шуэ Алевтина Николаевна. — Нош мукет предметъя урокъёс соос понна кайгу вал. Учебникъёс угось ӟуч кылын сяна ӧй вал. Тужгес секытэн сётӥськиз математика. Нылпиослы валамон мед луоз шуыса, вань задачаосты, примеръёсты удмурт кылэ берыктоно, оломар но аслыд малпано вал. Туннэ ке но удмурт пиналлэн математикая мышлениез лябгес. Ватсанэз, кулэстонэз тодо ик, нош задачаос пумысен йырзэс ой-ой бергатоно луэ. Асьмелэн выжыямы вузчиос, банкиръёс ӧй вал. Соин ик математикаез яратон сюлэмамы пыӵамын ӧвӧл.

Но математикаез сяна, мукет предметъёсты но удмурт кылэ берыктоно луиз. Кыӵе но картаос ӧз лэсьтылы Алевтина Николаевна. Вандылыса, буяса уг вутты ке, картсэ, анайзэ юрттӥськыны куре вал. Кузпалызлэн огпол серекъяса верамез но вань: тушмонлы но уд сӥзьы дышетӥсез кышно вайыны.

Нылпиосты 7-тӥ классозь вуттэмез бере школаын быдтоно кариськизы удмурт кылъя урокъёсты. Алевтина Журавлёваез выжтӥзы завуче. Но удмурт кылъя урокъёс пумысен сюлэмыз куректэмысь ӧз дугды. Кивалтӥсьёсын, анай-атайёсын кенешыса-кенешыса, дэмен быгатӥзы ик выльысь удмурт кылъя урокъёсты расписание пыртыны. Удмурт кылъя дышетӥсьёсты утчан усиз Алевтина Николаевна вылэ. Можга педучилищеен кусып ялан возиз бере, тодэ вал, кин кызьы дышетске, кинлэсь мае возьмано. Солэн ӵектэм дышетӥсьёсыз Удмуртиысь но Россиысь дано дышетӥсьёс луылӥзы.

Школаосты утчан

Школаын 15 ар ужамез бӧрсьы удыссэ ӧжытак воштоно луиз. Одӥг учыр бере.

— Покчи классысь пиналъёс урокъёс бере продлёнкае кылемлэсь азьвыл школа липет йылэ кечырскиллям, — вера Алевтина Николаевна. — Отысен выль усем лымые тэтчаллям. Мур. Огез пияш ӝутскымтэ ни. Эшъёсыз кир-пазь пегӟиллям. Усись лымы пытьыоссэс согем. Пияшез, 2 нунал ортчыса гинэ, пересь нэнэез шедьтӥз. Уйвӧтам, пе, адӟи школа азбарын кыллемзэ. Ымаз, ныраз лымы пырыса, пияш интыяз ик ӝокам. Та учыр мон понна вормонтэм вал. Быдэс улонэ быриз кадь потӥз, со пияшез жаляса. Аслам 2 пиосы шоры учкемелы быдэ сое малпалляй. Школаысь улляны монэ нокин ӧз выры. Мынам янгыше отын ӧй вал. Но мон ачим адямиослэн, ӵыжы-выжыосызлэн син шоразы учкыны ӧй быгаты ни. Соин ик школаысь кошки.

Ӵапак соку Можга администрациысь дышетонъя отделэ утчало вал национальной классъёсъя методист. Отчы Алевтина Журавлёваез ӵектӥзы. Та ик луиз роное ужаны кутскемез. Кӧня школаосты эскериз, ужзэс радъяны-пуктыны выриз со! 2 ар ужамез бӧрсьы Алевтина Николаевнаез Дышетӥсьёслэсь тодон-валанзэс будэтонъя институтлэн директорез Рудольф Березин ас дораз Иже басьтӥз.

— Аслам Ижын квартирае но ӧй вал на. Но мон мыло-кыдо мынӥ, — шуэ нылкышно. — Кузпалылэн мынэмез уг поты вал. Но огнам кыльыны уг дӥсьтӥськы шуиз но сьӧрам ик лыктӥз. Нимаз ке — семья ӧвӧл ни.

Институтын Алевтина Николаевналы оскизы шаерысьтымы удмурт кылэз дышетонъя азьмынӥсь школаосты синйылтыны, амалъёсынызы мургес тодматскыны но соосты мукет ёросъёсын пыӵатыны. 1990-тӥ аръёсы та ласянь синмаськымон ужаз Якшур-Бӧдья школа. Татын туж зол дышетӥсьёс вал: Анна Загребина но Александра Вахрушева. Нылпи садэ ветлӥсь пиналъёсты школалы дасянъя курсъёс ужазы. Бӧрысь та амалзэс мукет школаосы пыӵатыны луиз. Шаерысьтымы вань синмаськымон школаосты котыръяз Алевтина Николаевна. Кинлэсь марзэ кытчы выжыятыны луэ — ваньзэ эскериз, дышетӥсьёслы пӧртэм семинаръёс радъялляз. Куд-ог школаосын быдэс республикалы адӟем карымон площадкаос усьялляз. Кылсярысь, огез сыӵе площадка кылдӥз Дэри ёросысь Тяма гуртысь малокомплектной школаын. Быдэс республикалы дасязы магнитофонэз урокын кутонъя программа — огдыре 2 классэз дышетыку, магнитофон туж юрттылӥз.

Азбука кылдытӥсь

Секыт ужпум кылдӥз удмурт кылэз анай кыл чотын городысь школаосы пыртон пумысен. Бадӟым юрттэт сётӥзы Удмуртиысь калыкез дышетонъя министр Антонина Лисина но солэн воштӥсез Валентина Ившина. Удмурт кылэз дышетыны соглаш луись школа но удмурт кылъя дышетӥсьёс шедьтоно вал. Нырысь-валысь Ижысь 5 школаос гинэ анай кылэз урок чот нуоно кариськизы: 31-тӥ, 45-тӥ, 49-тӥ, 67-тӥ но 73-тӥ школаос.

— Та школаослэн лыдзы, мынам ужатозям, Ижын гинэ 33-ёзь вуиз, — тодаз вае Алевтина Николаевна. — Со сяна, Вотка, Можга городъёсысь школаос адӟем каризы. Но удмурт кылэз дышетонъя нокыӵе пособиос ӧй вал. Кызьы пиналъёсты дышетод? Со вакытэ мон Дышетон удысысь йӧскалык ужпумъёсты эскеронъя институтын ужасько ни вал бере, вылам ик усиз учебной материалъёс лэсьтон. 1988-тӥ арын поттэм покчи классъёслы удмурт грамматикая таблицаосме дышетӥсьёс яратӥзы вал ни. Соин но мыным 6 толэзь дыр сётӥзы дышетонъя программа кылдытыны, методической пособиос лэсьтыны, дышетӥсьёсты бырйыны. Ӝыны ар ӵоже уйёсме ӧй кӧлалля. Мукетыз, оло, ӧй ик басьтӥськысал, шуысал 6 толэзь — со туж ӧжыт. Сыӵе ужаменым, синъёсы быризы.

Удмурт кылэз тодӥсьтэм пиналъёслы «Анай кыл» нырысетӥ учебник потӥз 1995-тӥ арын. Алевтина Николаевна сое, Дэри ёросысь дышетӥсьлэн, кылбурчилэн Юлия Байсаровалэн дышетонъя амалъёсыз вылэ пыкиськыса, лэсьтӥз, умоятӥз. Отӥяз бӧрсьысь бӧрсе вордскизы на анай кылъя но лыдӟиськонъя эшшо 7 учебникъёс. Кылсярысь, 5-тӥ классъёслы книгаез со быдэсак огназ лэсьтӥз. Со сяна, дышетӥсьёслы пособиос, азбукаос, программаос гожтӥз. Покчи классъёслы кылдытӥз удмурт-ӟуч, ӟуч-удмурт кыллюкам, удмурт-ӟуч-англи кылъёсты дышетонъя пособие но трос мукетсэ. Удмурт кылэз азинтон бордын со туж трос ужаз.

— Быдэс выжымы йӧно, шуыны луоз, — пусъе Алевтина Журавлёва. — Раиса апае Сюмси ёрос больницаын эмсузэр луыса быдэс даурзэ тыршиз. Геннадий выны Россиысь 12 обороная предприятиосысь 60 инженеръёсын кивалтӥз, ракетаослы но военной корабльёслы телеметрияя тӥрлык лэсьтылӥз. Ачим удмурт калыклы маке умойзэ лэсьтон понна сюлмаськи. Книгаосы пумысен верано ке, удмурт кылэз дышетыса, тон удмурт уд луы на. Ӟуч кылэз сомында ар дышетыса, ми но ӟуч ӧм луэ ук. Но 2 культураез тодон — со туж бадӟым узырлык.

Елена САРАМАТОВА

Ангелина Снигирева
By Ангелина Снигирева Апрель 10, 2019 14:22
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<