Улӥ Кечол гуртын «Добро в село» акция ортчиз

Ангелина Снигирева
By Ангелина Снигирева Апрель 30, 2019 13:47
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Удмуртия итӥськиз Россиын ортчись «Добро в село» акция борды. Таяз арня вискын со радъяськиз Пичи Пурга ёросысь Улӥ Кечол гуртын.

Вуоно врачъёс гурт калыкен пумиськылӥзы

Эмъясе дышетскись студентъёс гуртоос доры вуыло, соосын тазалыкез утён, таза улон сярысь верасько. Кечолын ортчем пумиськон туэ 3-тӥез луоз ни. Солэсь азьвыл студентъёс вуылӥзы Вотка ёросысь Болгор но Сарапул ёросысь Мостовинской гуртъёсы.
Та рад Улӥ Кечолэ 8 студентъёс вуизы, ваньзы соос — Ижысь медициная академиын бадӟым курсъёсын дышетскисьёс.
Волонтёръёс нырысь ик гуртысь медпунктэ лыктӥзы. Татчы данак гуртоос люкаськиллям, пӧлазы трогес арлыдоос. Студентъёс мӧйыослы тупамон лекция бырйиллям — гурт калыклы инсульт, сое алон амалъёс сярысь веразы.
Рашад Насибов 6-тӥ курсын дышетске, та акцие нырысьсэ пыриське, но волонтёръёс радын кӧня ке ар ветлэ ни.

— Калык пӧлын валэктон уж нуиськом, вераськиськом ӟеч но валаса сиськон, пӧртэм висёнъёсты алон, диспансеризацилэн кулэлыкез но мукетыз сярысь, — вера пияш. — Гуртоосын пумиськылыса, адямиосты тазагес карон понна пичи ке но азьпала вамыш лэсьтыны луонлык вань. Гуртын улӥсьёс милемыз туж шуныт пумитало, соос лякытэсь, соослы юрттэм потэ.
Кечолэ студентъёслэн вуэмзылы гуртоос сяна, шумпотэмын татысь фельдшер Валентина Дзюина но. Со татысь калыклэн тазалыкез понна 32 ар пала сюлмаське ни. Но нырысьсэ адӟе, вуоно эмчиос гурт калык доры ӟеч акциен мед лыктозы шуыса.

— Шумпотымон, гуртэн тодматскыны егитъёс ас мылкыдзыя лыкто шуыса, — вера фельдшер. — Туннэ соос инсульт сярысь лекция лыдӟизы, али калык пӧлын та висён ӵем пумиськылэ. Ми гуртоосын со сярысь вераськиськом ке но, оло, выль адямиослэсь, уката ик вуоно врачъёслэсь, дэмланъёссэ золгес кылзозы.
ФАП-ын студентъёс калыкен диспансеризацилэн кулэылыкез сярысь вераськизы на, вирзӥбетсэс мертазы, нырысетӥ юрттэт сётыны дышетӥзы но мукет.
Кыкетӥез пумиськон ортчиз Шор Кечол гуртысь школаын. Таяз рад студентъёс котыразы бичазы пиналъёсты но дышетӥсьёсты. Соосын валаса но шонер сиськон сярысь вераськизы. Угось уноезлэн туала егитъёслэн ческыт но ӝог сӥёнлэсь ӝушъёссы сӧриськемын. Та сяна, нылпиосын таза улонэн эшъяськон сярысь кенешизы. Кылсярысь, Павел Кунавин вераз, мар пайдаез скандинав амалъя ветлонлэн, дышетӥз, кызьы бодыен шонер вамышъяно. Но мукетъёссэ дышетэмлэсь азьло со ачиз та амал сярысь трос тодон вылысь Удмуртиысь скандинав амалъя федерациын визь-кенеш басьтӥз.

— Мыным тунсыко потӥз адӟыны, мар со гуртысь ФАП, — вераз П. Кунавин. — Мон Сюмси черкогуртын вордӥськемын ке но, кызьы ужало гуртысь фельдшеръёс, уг тодӥськы вал. Собере врач котькыӵе калыкен кусып тупатыны, вераськыны быгатыны кулэ. Малпасько, акция дыръя басьтэм тодон-валан вуоно ужамы зол юрттоз.
«Добро в село» акциез пайдаё лыдъя Пичи Пурга ёрос больницалэн валтӥсь врачез Наталья Зямаева:

— Таӵе акция ёросамы нырысьсэ уг ортчы ни. Кылем арын эмчиос-волонтёръёс ёросысьтымы куд-ог ФАП-ъёсы вуылӥзы вал. Соос висёнъёсты алон сярысь лекциос лыдӟем сяна, медпунктъёслэсь котырзэс утялтыны, сяська мерттыны, кенеръёсты буяны юрттӥзы. Вуоно врачъёслэн медицина удысъя тодон-валанзы паськыт ини, соос уно темаосъя визь-кенеш, валэктон сётыны быгато. Таӵе акциос дыръя нялтас диспансеризациез но ялӥськомы на. Пичи гуртъёсысь ваньмыз калык уг быгато ёрос больницае сюрыны, нош студентъёс асьсэос адямиос доры ӟеч лэсьтон мылкыдын лыкто, валэкто. Со туж умой. Озьы кӧня ке кечез уйиськомы.
Туэ ар куспын волонтёръёс эшшо Пичи Пурга калыкен 2 пол пумиськылозы на. Оглом туэ соос шаерысьтымы ог 20 ФАП-ъёсы вуылыны чаклало.

Ангелина Снигирёва

Туспуктэмез авторлэн

Ангелина Снигирева
By Ангелина Снигирева Апрель 30, 2019 13:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<