Ульча нимъёс удмуртомо

Ангелина Снигирева
By Ангелина Снигирева Апрель 12, 2019 13:18

Шумпотымон — ӝоген Ижын кылдозы Г. Корепанов-Камский но М. Прокопьев нимо ульчаос.

Данзэ берыктон

М. Прокопьев

Максим Прокопьевез ас вакытаз Татарстанысь Кукмор ёросысь вордскем Нӧръя (Нырья) гуртаз вунэтыны косэмын вал. Удмуртиын солэсь нимзэ шарае поттыны, ӝутыны кутскисьёс пӧлын вал писатель, КГБ-ысь подполковник Н. Кузнецов, филология наукаосъя кандидат А. Шкляев но Нӧръя школаын дышетскем, «Удмурт Кенеш» огазеяськонлэн Красногорск ёросысь ёзэныз кивалтэм В. Спиридонов.

— Совето вакытэ М. Прокопьевлэсь нимзэ поттаны ик ӧз лэзе, — шуэ Василий Спиридонов. — Нӧръя школа бордысь солы сӥзем мемориал пулэз куштӥзы, музеез быдтӥзы. Нимыз табере гуртэ бертӥз ни, нош ачиз — ӧз. Вотской автономной областез кылдытон бордын ужам муртлэн мугорыз Пермь улосысь Кунгур котырын «кӧлэ». Татын быриз 1919-тӥ арын.

1989-тӥ арын, Максим Прокопьевичлы 105 ар тырмон юбилеез пусйыку, Кукморысь огезлы ульчалы нимзэ сётыны решение кутӥзы. Нӧръя школалы но нимыз выльысь берыктэмын. Со аре ик Ленинградысь Нӧръяла вайыны медо вал Прокопьевлэсь бюстсэ — со бронзалэсь кисьтэмын. Сое лэсьтыны колхоз со ас вакытаз машиналы мында уксё висъяз. Бюстэз ӧз вае, но школа борды буре ваён пул шуккизы. Отӥяз Пермь улосысь Бадӟым Гондыр гуртын кылдӥз М. Прокопьевлэн ульчаез, угось татысь школаын ас вакытаз дышетӥз. Ижысь огезлы школа-интернатлы но М. Прокопьевлэсь нимзэ сётъязы.

Удмуртъёслэн нырысетӥ съездзылы 100 ар тырмонэн валче кылем арын Елабугаын бадӟым ужрад ортчиз. Отын Татарстанысь удмуртъёслэн огазеяськонзы кичӧлтонэн потӥз Ижысь ульчалы М. Прокопьевлэсь нимзэ сётон пумысен.

Ёросын ульча ӧз сюр

Кыӵеен туннэ тодазы ваё, кызьы сӥлы каро земляксэс Г. Корепанов-Камскиез дэбесъёс? Ёросын одӥг ульча но нимзэ уг нуллы. Тыловай гуртэ, выль ульча мытыса, 2010-тӥ аръёсы коркаос ӝутыны кутскизы вал. Со ульчалы Г. Корепанов-Камскийлэсь нимзэ сётыны чаклало вал, Тыловайын композитор дышетскиз шуыса. Но ульча ӧз кылды. Г. Корепанов-Камскийлэсь нимзэ Тыловайысь музей-юртлы сётӥзы. Со сяна, Г. Корепанов-Камский улэп дыръя ик Дэбесысь искусствоосъя школалы нимзэ сётӥзы. Талэсь композитор керпотылӥз, улэп дыръям ик, пе, озьы умойтэмгес. Нош гуртоослэн дано землякенызы данъяськемзы потэ. Со угось нырысетӥ удмурт «Италмас» балетлэн авторез, кырӟась, Верховной Советысь депутат. 2001-тӥ арын кулэмез бере Правительство кылдытӥз шаерысьтымы устооссэ крезьгурчи нылпиосты пусъёнъя Г. Корепанов-Камский нимо премия. Отӥяз Г. Корепанов-Камский вужере кыльыны кутскиз.

Г. Корепанов-Камский

Али Дэбес ёрос администрация Г. Корепанов-Камскийлэсь нимзэ ӝутыны, со сярысь тодэ ваёнъёсты улӟытыны выльысь кутске. Миым вордскем Ягвуко гуртаз буре ваён пул шуккизы, Геннадий Михайлович татын будӥз шуыса пусйизы. Ижысь ульчалы композиторлэсь нимзэ сётон пумысен но дэбесъёс ик Иж город администрацие вазиськизы.

— Жаляса верано, Дэбес сяна, али Геннадий Михайловичез данъян понна нокин уж уг нуы, — шуэ ёрос администрациысь культурая управлениен кивалтӥсь Александр Корепанов. — Тау культурая министрлы Владимир Соловьёвлы — ӵектонмылы дурбасьтӥз, город администрацие вазиськыны юрттӥз. 2018-тӥ арысен выриськомы таин. Туэ, оло крезьгурчилэн 90 арес юбилеезлы луыса, оло министерство итӥськемен, уж интыысьтыз вырӟиз. 3 пол материалъёс, проектъёс ысъяй Президентлэн грантъёсъя фондаз — уг удалты на. Геннадий Михайлович сярысь рос-прос кино лэсьтэммы потэ.

Владимир Соловьёв пусъемъя, дано удмурт адямиосмы Г. Корепанов-Камский сяна но вань. Министерство али список дася, соосъя Иж администрацие вазиськыны медэ нимъёссэс историе кызьы ке но кельтон пумысен.

Ньӧмыз понна медаз лу

— Татарстанысь удмуртъёслэн огазеяськонэнызы кивалтӥсьлэсь Андрей Герасимовлэсь М. Прокопьев пумысен вазиськон вуиз, — шуэ Иж город администрацилэн йырызлэн воштӥсез, синпелетъёсты утёнъя, ульчаосты, остановкаосты ниманъя комиссиен кивалтӥсь Дмитрий Чистяков. — Со дырегес ик Дэбес ёрос администрация но Культурая министерство Г. Корепанов-Камский пумысен вазиськонэн потӥзы. 27-тӥ мартэ комиссия решение кутӥз та дано адямиослэсь нимъёссэс выль кылдэм ульчаослы сётыны. Заседаниос дыръя ми куспамы ӵемысь эчешиськомы. Но таяз рад ваньмы огкылысь кариськимы. Комиссилэн решениезъя вазиськимы администрациысь архитектурая но градостроительствоя управление, юнматэм нимъёслы ульчаосты мед быръёзы шуыса. Управление список дасяз ке, сое эшшо огпол эскеромы на: дано адямилы тупась ульча мед сюроз. Ульчаос кылдэмен, оло, ижъёслэн та дано адямиос сярысь тросгес тодэмзы потоз.

Дмитрий Чистяков пусъемъя, матысь дыре комиссилэн кенешаз поттэмын луозы на мукет но дано удмуртъёслэн нимъёссы, соослы но урамъёс утчалозы. Удмурт калыклэн трос дано нылъёсыз-пиосыз, соослэн нимъёссы чебертысалзы городэз, шуиз Дмитрий Александрович.

— Берло дыре, дано адямиослэсь нимъёссэс ульчаослы сётыны курыса, вазиськисьёс трос луизы. Олокызьы ниматозь, геройёсмес тодэ ваёно, пе. Кылем арын ветеранъёслэн кенешсы вазиськиз, Ижысь аэроклубысь бырем лётчикъёслэсь нимъёссэс урамъёслы сётоно шуыса. Озьы Ленин ёросын 7 геройлэн нимыз кылдӥз. Со дано адямиосмес буре ваён, сӥлы карон, — шуэ Дмитрий Чистяков.

Ижын туннэ 1 сюрс 40 пала урам. Кудӥз таос пӧлысь дано удмуртъёслэсь нимзэс нуллэ — та пумысен нокин ноку нимысьтыз список ӧз лэсьтылы. Архивын пукыны кулэ, со понна удмуртъёслэсь историзэс но дано адямиоссэс тодыны кулэ, ми таин ум выриське, шуизы Иж город администрациын. Озьы ик будэтӥзы: М. Прокопьевлэсь но Г. Корепанов-Камскийлэсь нимъёссэс туннэ ик сётыны уг луы, угось буш, нимтэм ульчаос ӧвӧл. Выль пуктэмзэ возьмано. Али Октябрь но Ленин ёросъёсын пуктӥськон мынэ. Кин тодэ, оло, отысь кудаз ке ульчаын ик та дано адямиослэн нимъёссы воректозы. Ижысь Первомай ёросысь Люлли микрорайонын 2014-тӥ арын кылдӥз ук Сьӧлта ёросысь Поргуртын вордӥськем удмурт воргоронлэн, капчи атлетикая чемпионлэн Герман Скурыгинлэн ульчаез. Но ним сётон ньӧмыз понна гинэ медам ортчы вылэм.

— Асьмелы калык пӧлын валэктон уж нуыны кулэ, кинъёслы со ульчаос сӥземын, мар со адямиос история понна лэсьтӥзы, — шуэ «Удмурт Кенеш» огазеяськонлэн тӧроез, Кун Кенешысь ялан ужась комиссиен кивалтӥсь Татьяна Ишматова. — Тани М. Петровлэн ульчаяз улӥсьёс уг ни тодо, «Вуж Мултан» романэз гожтэм писательлэн урамаз корказы сылэ шуыса. Жаляса верано, Удмуртилэсь историзэ ум тодӥське. Удмурт кунлыкез кылдытон понна улонзэс сётэм геройёсмы сярысь урокъёсын тросгес верано. Со дышетӥсьёс бордысь потэ. Ӵемгес ветлоно музейёсы. Кылсярысь, К. Герд нимо национальной музейын Кузебай Гердлы но Иосиф Наговицынлы сӥзем кыӵе узыр адӟытонъёс ужалляло. Дышетӥсьёс нылпиосты музее ӧз нуэ ке, кин валтоз? Йӧскалык музейлы ӵектомы, М. Прокопьев сярысь но адӟытон мед дасялозы шуыса. Памятник пуктон сярысь ке… Егитъёслэн памятникъёс шоры учконзы мукет ни. Кин тодэ, туала вакытэ, оло, нимо-дано муртъёсмы сярысь билбордъёс лэсьтыса умойгес луоз.

М. Прокопьев

Максим Прокопьев вордӥськиз 1884-тӥ арын 19-тӥ январе Татарстанысь Кукмор ёросысь Нӧръя черкогуртын. 1918-тӥ арын Елабугаын радъяз вань удмуртъёслэсь 1-тӥ съездзэс, 1919-тӥ арын Сарапулын — 2-тӥзэ. Удмурт кылэ берыктӥз «Интернационал» кырӟанэз, А. Пушкинлэсь «Сказка о попе и работнике его Балде» произведенизэ. 1919-тӥ арын М. Прокопьевлы валтыны оскизы РСФСР-ысь наркомнацлэсь Вотской отделзэ. Татын Вотской автономия кылдытон бордын выриз. Быриз 1919-тӥ арын 30-тӥ июне Пермь улосысь Кунгур котырын.

Г. Корепанов-Камский

Геннадий Корепанов-Камский вордӥсь-киз 1929-тӥ арын 18-тӥ августэ Дэбес ёросысь Ягвуко гуртын. Йылпумъяз Москваысь П. Чайковский нимо консерваториез но Казаньысь консерваториез. Удмурт драмтеатрын артист луыса ужаз, Удмурт радиолэн хораз солист, Удмуртиысь музыкальной театрлэн директорез вал. Геннадий Корепанов-Камский шаерысьтымы Композиторъёслэсь огазеяськонзэс кылдытӥз, председателез луыса, трос лэсьтӥз композиторъёс понна. Кулӥз 2001-тӥ арын 4-тӥ мае.

Елена Сараматова

Ангелина Снигирева
By Ангелина Снигирева Апрель 12, 2019 13:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<