Ужен гинэ уд гочаты

Ангелина Снигирева
By Ангелина Снигирева Апрель 12, 2019 12:48

Мар кароно гуртъёсын экономикаез, производствоез, улон-вылонэз огӵош азинтон понна? Та юанлы валэктон утчазы Ижын 9-тӥ-11-тӥ апреле ортчем агрофорум дыръя.

Агрофоруме пыриськисьёс вылӥ дунъязы Удмуртиын поттэм сиён-юонэз.

Асьмелэнэз медло!

Форуме пыриськизы Кун Думаысь депутатъёс, Россиысь бадӟым предприятиосын, агрохолдингъёсын но ассоциациосын кивалтӥсьёс, гуртоос. Гурт удысъя но сиён-юонъя министр Ольга Абрамова пусъемъя, ваче син кенешыса, луонлык кылдэ чакланы, кудласянь азинскыны луоно, мар борды Удмуртилы гижысь-пиньысь басьтӥськоно, мукетъёслэсь кыӵе ужан амалъёссэс шаерамы пыӵатоно.

Россиысь картошка будэтӥсьёслэн огазеяськонэнызы кивалтӥсь Алексей Красильников пусъемъя, февральысен июнёзь Египетэн, Израилен вожвылъяськоно луиськомы: соослэн картошказы дунтэмгес угось. Миым 50 процентэз картошка вуттэмын вал кунгож сьӧрысь. Удмуртиысь огез предприятие куасьтэм бакча сиён (вегенс) лэсьтон борды басьтӥськиз. Сое Казахстанэ келя. Сырьёез уг тырмы. Алексей Красильников верамъя, бусыосты паськытатыны та сяна но муг вань. Липецк котырын усьтӥськиз фри картошка поттӥсь завод — сыӵеез Россиын ӧй вал на. Араз 200 сюрс тонна картошка пыжыны ӧдъяло. Со выллем проект борды басьтӥськыны медэ Москва улос.

Удмуртия тросгес рапс будэтыны дась. Уката ик ог 400 сюрс гектар бусыос аналтэмын, соосты выльысь оборотэ поттоно. Россиын рапс улэ 5 миллион гектар висъяны медо — али 1,2 миллион гектар. Россиысь Гурт удысъя министерстволэн чакламезъя, 2024-тӥ арын 33,5 миллион тонна рапс вӧй кунгож сьӧры келяны луоз. Форуме пыриськисьёс пусйизы, селекция бордын ужаны кулэ шуыса. Туннэ Россилэн реестраз пыртэмын 240 пумо рапс. Та пӧлысь ог 70 процентэз — кунгож сьӧрын поттэмын.

Сюрес, школа, медпункт…

Удмуртиысь «Комос групп» огазеяськон Китаен эшъяськиз — йӧл сиёнъёсты отчы келя. Асьсэлэсь производствозэс йылтыны ӧдъяло Сьӧлта ёросысь Умопуд гуртысь Эшмаковъёс. Удмурт семья 5-тӥ поколениын муш вордэ, чечы вуза. Нош алигес выль производство борды басьтӥськизы: чечызэс сураны ӧдъязы пӧртэм мульыосын, имбирен, прополисэн — чечызылы вожмаськон кылдӥз. Форуме лыктэмъёс но сое дунъязы. Озьы ик веръязы Удмурт шаерын поттэм мукет продукциез. Ӟечлыкезлы синмаськизы.

Асьмелэнэз ческытгес

— Юн хозяйство кылдытэмен, уждун тыремен гинэ уг тырмы — адямиослэсь улон-вылонзэс умоятоно, сюрес лэсьтоно, газ, ву пыртоно. Гуртоослэн но ӟеч улэмзы потэ. Соин ик та бордын матысь аръёсы ужаломы, — шуиз Удмуртилэн Тӧроез Александр Бречалов.

Озьы ик Тӧро вераз, трос йӧл кыскисьёслы, производствозэс ӝутӥсьёслы нимысьтыз юрттэт сётӥськоз. Но туннэ мукет ужпум но вань: кадръёс уг тырмо. Кун Думаысь депутат Аркадий Пономарёв пусъемъя, таин валче али дасяське гуртъёсты азинтонъя кун программа. Тазалыкез юнматон, дышетон, ужбергатонэз азинтон, соцобъектъёсты ӝутон — та понна али пӧртэм министерствоос кыл куто. Азьланяз чакламын вань программаосты огазеяны.

— Уж секыт, эшшо ке ужан но улон условиос уродэсь, — шуэ Аркадий Пономарёв. — Калык амалтэк гуртысь пегӟе. Адямиослы льготаос чаклано. Распределениез но берыктоно, гуртэ мынӥсь егит специалистъёслы подъёмной сётоно.

Кун Кенешысь депутат, Ува ёросысь «Авангард» хозяйствоен кивалтӥсь Фарит Халитов шуэ:

— Калык нокытын но уз улы, солэн ужез, эмъяськыны, шутэтскыны луонлыкез ӧз луы ке. Туннэ гуртоослэн нылпиоссэс но котыр ласянь дышетэмзы потэ. Городысь нылпиослэсь медам висъяське, шуо. Котькуд гуртын луыны кулэ медпункт, спортзал но школа. Эмъян сярысь гинэ сюлмаськоно ӧвӧл — профилактика ортчытон пумысен но бызьылоно. Механизаторъёсы шоры учкисько — ваньмыз сямен остеохондрозэн курадӟо. Соин котькуд ужасьмылы шорлыдын 28 сюрс манет висъяськомы, тазалыксэс юнматыны мед быгатозы шуыса. Кужмысь больницае я санаторие келятэк но уг луы. Гурт калык чигиськытозяз больницае уз мыны. Соин ик предприятиосын кивалтӥсьёс соос понна сюлмаськыны кулэ.

Елена Cараматова

Туспуктэм басьтэмын Гурт удысъя но сиён-юонъя министерстволэн пресс-службаез

Ангелина Снигирева
By Ангелина Снигирева Апрель 12, 2019 12:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<