Трос выльзэ тодӥзы

Ангелина Снигирева
By Ангелина Снигирева 19 апреля, 2019 15:55
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

«Удмурт дуннеосын» тодматскон вылысь Кыква гуртысь клубе люкаськиз мӧйыез но, пиналэз но. Пумиськон огшоры кенешыса ӧз ортчы: калык понна радъяськиз визь сынан.

«Шундыпиос»

Культурая юрт гуртлэн шораз ик интыяськемын. Со бадӟым ӧвӧл ке но, пушказ пырыса, шӧдӥське: татын тыршо ужзэс яратӥсь адямиос. Клубын ужало нылпиослы пӧртэм кружокъёс, ортчыло мӧйыослэн пукон ӝытъёссы, нош кыкетӥ этажын усьтэмын вашкала арбериосын музей. Укно дуръёсты шулдырто пуштыр-вож куаръёсын сяськаос, пу ящикъёсын ӝужало, азбарзэс чебертыны шуыса, кизем вож удъёс — астэ чылкак дорад кадь шӧдыны кутскиськод.

Таӵе ик шуныт мылкыдын ортчиз кыкваос понна радъям брейн-ринг. Но юанъёс чузъяськемлэсь азьвыл шудӥсьёс но соос понна висисьёс учкизы «Удмурт дунне» газетлы сӥзем фильмез. Арлыдоослы но, школьникъёслы но со тунсыко потӥз. Визь сынанын юанъёс сӥземын вал газетмылы, Удмурт Элькунлэн автономия басьтэмез дырысен 100 ар тырмонлы. Вожвылъяськизы кыкваос, 5 командаослы люкиськыса. Визьмо луэмзэс возьматӥзы но вормисе потӥзы Кыква школаысь дышетӥсьёс — «Визьпогъёс» команда. Соослэсь ӧжытлы гинэ бергес кылизы школьникъёслэн командаоссы: «Гудырипузъёс» но «Шундыпиос». Урокъёсын пукыны чидасьтэм пиос но, эсьмаса, ӝӧк сьӧры пуксьыса, дэмен йырзэс тӥязы.

«Визьпогъёс»

— Мыным но, командамылы но юанъёс туж тунсыкоесь потӥзы, — шуэ «Шундыпиос» пӧлысь одӥгез, Кыква школаын 7-тӥ классын дышетскись Саша Никитина. — Кылсярысь, кыӵе кыллэн чузъяськемез но, пуштросэз но турок, бигер, удмурт кылъёсын одӥг кадь? Со кыл «дунне» вылэм. Тазэ бен кытысь тодод? Интернетысь но уд шедьты! Нош ми табере тодӥмы! Эшшо ке йырам кылиз Григорий Верещагин югдытӥсь сярысь юан: солэн кушем нимыз Удмурт вылэм. Тазэ но Интернет пыр шедьтод меда? «Удмурт дунне» газет сярысь мон тодӥсько, киям шеде ке, туж яратско учкылыны фотографиоссэ: соос табере тӥляд пӧртэм буёлоесь. Дорамы куное эшшо лыктэ на!

Саша Никитина борды итӥське покчи классъёсты дышетӥсь Светлана Гуменникова.

— Зэмзэ вераса, гуртамы таӵе интеллектуальной шудонъёс кемалась ӧз ортчылэ вал ни. Тодысалмы ке, такем тунсыко ужрад луоз шуыса, Кыкваысь гинэ ӧвӧл, бускель гуртъёсын улӥсьёсты но ӧтьысалмы. Табере, оло, школаямы но вуылоды, отын но таӵе визь сынан ортчытоно вылэм. Соос туж кулэ, уката но туала пиналъёслы. Вордскем палъёссэс, удмурт выжыоссэс, удмуртъёслэсь валтӥсь газетсэс — «Удмурт дуннеез» — тодыса мед будозы. Адӟиды-а, одӥг пинал но куспетӥ ӧз кошкы ужрадысь — вань пиналъёслы тунсыко потӥз, трос выльзэ тодӥзы.

Елена Никитина

Фото: А. Снигирёва

Ангелина Снигирева
By Ангелина Снигирева 19 апреля, 2019 15:55
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<