Татын улон бугыръяське

Ангелина Снигирева
By Ангелина Снигирева Апрель 12, 2019 13:44
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

5-тӥ оштолэзьысен Ижкарысь Ӟуч театрлэн куноосыз, спектакль учкем сяна, театрлэн историеныз тодматскыны быгатозы: татын 2 арня ӵоже ужалоз «Вся жизнь театр…» адӟытон.

Ӟуч театр
Фото: М. Егоров

Театрлэн арезлы сӥзем выставкаез дасяз Удмуртиысь архивъёсъя кун служба. Ӟуч театрлэсь ортчем сюрессэ возьмато вуж программаос, афишаос, буклетъёс, туспуктэмъёс, реквизит. Нырысетӥез спектакль — Николай Погодинлэн «Аристократы» пьесаез — пуктэмын вал 1935-тӥ арын. Выставкаын адӟыны луоз солэсь программказэ но та спектакльлы рецензиез — «Ижевская правда» газетын печатлам «Прекрасное начало» статьяез.

1939-тӥ-1940-тӥ аръёсы удмурт но ӟуч театръёс огинын вал. Театр интыяськиз Горький нимо ульчаысь Октябрь революция нимо клубын (КОР). 1941-тӥ арын театрлэн вуж юртэз ӝуаз, тросэз артистъёс войнае кошкизы. Озьы ке но театрлэн ужез копак ӧз быры — та сярысь вера, кылсярысь, 1942-тӥ арысен кылем «Мачеха» спектакльлэн афишаез. Театр выльысен ӝужаны кутскиз 1946-тӥ арын. В. Тишин архитекторлэн проектэзъя К. Маркс ульчаын лэсьтэмын выль юрт — пленэ сюрем немецъёс но стройкаын ужаллям. Театрез усьтӥзы 23-тӥ феврале удмурт драматурглэн Игнатий Гавриловлэн «Азин» пьесаеныз. 1961-тӥ арысен театрлы Владимир Короленко писательлэсь нимзэ сётӥзы. 2011-тӥ арысен Ӟуч театр интыяське «Ижмаш» культурая дворецлэн юртаз. Ӵапак татын азьло вал Октябрь революция нимо клуб — озьыен, театр дораз берытскиз.

Выставкаысь адӟыны луэ тодмо артистъёслэн — Михаил Алешковскийлэн, Анжелина Мазилэн — фондъёсысьтызы документъёсты но. Со сяна, адӟытонэз усьтонэ вуэмъёс «улэп» историен тодматскизы: егит дырзэс, театрын ужаны кутскемзэс тодазы вайизы Россиысь дано артистъёс, Удмуртиысь калык артистъёс Ю. Малашин но Н. Ротов.

Ю. Малашин нырысетӥ спектакляз шудэмез сярысь вераз. Азьвыл премьера азьын быдэс труппа но театрын вань ужасьёс спектаклез учко вылэм, бӧрысь кенешо. Егит Малашинэз но Ротовез кенешын быдэс коллектив курлам. Соос понна дурбасьтэм Алексей Грозин — Удмуртиысь дано артист, пе, вераськыны уг яраты вылэм, но, егит артистъёсты ваньзы тышкаськыку, со султэм но шуэм: «Мар ке но пӧрмоз таослэсь». Та кылъёс вань вераськонэз йырин-чукин кариллям, нош кутскись артистъёс, дыр ортчыса, зэм но профессионалъёслы пӧрмизы. Ю. Малашин тодаз вайиз Михаил Алешковскиез но. Со Ижкаре Санкт-Петербургысь вуэм репрессиосын йырин. Ижын М. Алешковский нырысь монтировщикын ужам, бӧрысь театрлэн валтӥсь артистэз луэм.

Кема аръёс ӵоже театрын тыршись Н. Ротов уг меды вылэм артист луыны. Школаез быдтэмез бере кытын меда дышетсконо? шуыса малпаськонъяз вузъёсы пырон дыр ортчем. Свердловскысь театральной училищее набор берлогес йылпумъяськем — соин Н. Ротов отчы мынэм. Али Н. Ротов шумпотэмзэ вера, Ӟуч театрын ужаны кылдӥз шуыса.

Анай-атайзэ — Россиысь дано артистъёсты, Удмуртиысь калык артистъёсты Анжелина Мазиез но Владимир Свечниковез — тодаз вайиз Анжелика Мази, «Моя Удмуртия» телерадиокомпаниысь журналист. Со туж шумпотэ, улоназ пичи дырысеныз театр вань шуыса. Озьы ке но А. Мази ватсаз: бен, быдэс дунне — театр, но театр нокинлы медаз лу быдэс дунне. Со сяна но улонын трос тунсыкоез вань на.

Удмуртиысь культурая министр Владимир Соловьёв вераз: али театрын зол режиссёръёс но труппа. Матысь дыре ТЮЗ-лы (Егит учкисьлэн театрезлы) юрт пуктыны кутскозы, отын интыяськозы Ӟуч театрлэн мастерскойёсыз, репетиция ортчытъян залэз. Ӟуч театрлэн историез узыр, нош азьланез югыт.

Анастасия Шумилова

Ангелина Снигирева
By Ангелина Снигирева Апрель 12, 2019 13:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<