Сюрес выльдӥськоз, спорт азинскоз

Ангелина Снигирева
By Ангелина Снигирева Апрель 30, 2019 14:10
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Можга карын та вакыт резь-куаж лэсьтӥськон ужъёс мыно: город сюресъёс выльдӥсько, йӧ дворец ӝутӥське, ульчаосы жаг люкан площадкаос пуктӥсько.

Можгаын сюрес лэсьто

5,7 иськем
Удмуртиын мытэмын «Кышкыт луисьтэм но ӟеч сюресъёс» проект. Туэ нырысь ик сое быдэстон борды басьтӥськизы Можгаын. Ужъёс 27-тӥ апрельысен кутскизы.

— Кылем арын городмы сюресъёсты тупатонлы элькунысь висъяськись коньдонтэк кылиз, кызьы быгатӥмы ас кужыменым гинэ тужгес урод сюресъёсты кышъямы, — вераз Можга ёросысь сюрес лэсьтонъя предприятиен кивалтӥсь Марат Нуриев. — Соин ик кивалтӥсьёс но, калык но туэ та проект борды гижысь-пиньысь басьтӥськизы.
Можга городын 14 сюресъёс вылын лэсьтӥськон ужъёс чакламын, оглом выльдӥськоз 5,7 иськем. Кыӵе сюресъёсты тупатоно — мылкыдзэс юамын вал огшоры калыклэсь.

— Туж умой, город кивалтӥсьёс калыклэсь мылкыдзэ кыло шуыса, — вераз Можга карысь «Калык фронтысь» азьветлӥсь Люция Владимирова. — Пролетарской урамез тупатон понна трос адями дурбасьтӥз. Угось татӥ ветлэ маршрутной автобус, со пыр школае, нылпи садэ, нылпи юртэ шедьыны луэ.
Та вакытэ городын нырысетӥ ужъёс йылпумъямын ни Наговицына урамын, али асфальт вылэз басьто Можгинской ульчаын. Лэсьтӥськисьёслэн номырзы уг мыльы — пырдэм асфальтсэс сюрес дуръёсты тупатонлы кутыны ӧдъяло. Можгаос ужъёссэс 21-тӥ июнёзь йылпумъяны чаклало.
Оглом туэ «Кышкыт луисьтэм но ӟеч сюресъёс» проект улсын ужъёс мытэмын луозы 6 муниципал кылдытэтъёсын: Можгаын сяна, Иж, Вотка, Сарапул, Камбарка городъёсын но Дэри ёросын.

Луозы хоккей но фигурной катание
Та вакытэ Можга карын эшшо одӥг бадӟым уж мытэмын — йӧ дворец ӝутӥське.

Йӧ дворец ӝутӥське

— Калык куремъя, спорт комплекс пуктонъя проект дасямын, музъем висъямын вал 2015-тӥ арын ай, — вераз ёрос администрациысь лэсьтӥськонъя но архитектурая управлениен кивалтӥсь Александр Иванов. — Таӵе объектлы калыкмы туж кулэяське. Угось городын хоккеен шудонъя «Луч» нылпи клубмы вань. Но пиналъёсмылы вожвылъяськонъёслы дасяськыны нокытын — асьмелэн липет улын конькиен нискылан интымы ӧвӧл. Соин егит спортсменъёсмы дырын-дырын Вавоже я Татарстанэ ветлыло.
Выль дворецын спорт секциос ужамын бадӟымъёслы но, пичиослы но. Отын хоккеен сяна, фигурной катаниен вырыны луонлык кылдоз, озьы ик луозы тренажёр, хореография залъёс, волейболэн, баскетболэн шудон интыос.
Та Йӧ дворец буш бусыын ӝутӥське, но ӝоген отын коркаос пуктыны кутскозы, али музъем люкылон мынэ.

Кулэ 100 контейнер
Можга ёрос рос-прос басьтӥськиз жаген нюръяськон борды но. Татын жагзэс азьвыл мешокен гинэ поттӥзы, али контейнеръёс пуктыло. Та вакытэ городын 20 пала жаг куян площадкаос вань ни, матысь дыре эшшо 20-ез кылдоз на.

Городлы 100 контейнер кулэ

Кулэ-а жаг куян интыос, кытчы соосты пуктоно калыклэсь мылкыдзэ юамы, — вераз город администрацилэн йырызлэн воштӥсез Руслан Галеев. — Контейнеръёсты юри сюреслы матэгес лэсьтылӥмы, калык, машинаен ортчыкуз, нялтас отчы жагзэ мед куштыны быгатоз шуыса. Озьы тросэз адями пумен вала ни, контейнеръёсын капчигес шуыса. Соин матысь дыре эшшо 20 жаг куян интыос лэсьтыны ӧдъяськомы.
Кивалтӥсьлэн верамезъя, жагез мешокен поттонлэсь быдэсак куштӥськон понна Можгалан ог 100 площадкаос лэсьтоно. Али отходъёсыз мешокен потто на 408 интыосын.
Городын кышкыт луись жагез поттон сярысь но зол сюлмасько. 24 лавкаосын батарейкаосты люкан интыос лэсьтэмын. Вуж батарейкаоссэ калык отчы мыло-кыдо вае, пе.

Ангелина Снигирёва

Туспуктэмъёс авторлэн

Ангелина Снигирева
By Ангелина Снигирева Апрель 30, 2019 14:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<