Сюрессэ кузёмытэ ачиз

Ангелина Снигирева
By Ангелина Снигирева Апрель 30, 2019 12:53

Сюрессэ кузёмытэ ачиз

Пичи Пурга ёросысь Уча (Ильинск) черкогуртын улӥсь Прохор Иванович Павлов 83 аресаз вамышъя. Туннэ но тэк пуконэз уг тоды. Юртъер котыраз берга, мугорзэ кыдатэ, со сюлмаськемен Учалан кылдытэмын бызьылыны яратӥсьёслэн «Муравей» клубзы. 34 ар ӵоже гуртазы пыдын бызьылонъя ӵошатсконъёс ортчытъя.

П. Павлов

Ожысь салам

— Выжымес учконо ке, Ыбдэс гуртысь луиськомы, пичи дыръя семьямы нокыӵе куректонэз-курадӟонэз тодытэк улӥз кадь, — веранзэ мытӥз Прохор Иванович. — Ваньзэ сураз-пожаз Быдӟым ож. Дядяймес (атаймес) Иван Прохоровичез нырысетӥ араз ик оже басьтӥзы. Ленинград фронтын ожмаськемын асьме палась пиосын Степан Михайловен но Захар Фёдоровен. Эшъёсыныз ӵош вордскем гуртаз кӧня ке гожтэт гожтыса но вуттӥз. Ожмаськиськомы сыръясь интыын, тушмонъёс ялан пуштытъяло, танкъёсмы выё, гусеницаос улэ адями шӧйёсты но тыриськомы».
Отӥяз гожтэтъёсыз трос ӧй вал ни, нош одӥг полаз быдэс батальонзэс пуштытӥллям. Улэп кылем солдатъёс пӧлысь дядяймес шедьтӥллямтэ. Озьы 1943-тӥ арын 21-тӥ сентябре гуртамы похоронка вуиз, ивортэк ышиз. Анаймы но, ми но, выж вылын погылляськыса бӧрдӥмы. Нош 3 толэзь ортчыса, зэм, оло даур, атаймылэсь таӵе-таӵе гожтэт вуиз: «Пуштытъян дыръя контузить кариз, музъемен шобыртӥз. Сюй пушкысь киы гинэ адске вылэм, киме кутылӥллям но сюлэм жугиськемме валаллям. Озьы монэ госпитале вуттӥзы». 3 толэзь йӧнатӥськемез бере атаймес нош ик оже басьтӥллям.
Ожмаськон дыръя со 3 пол кулэмлэсь кылемын, война йылпумъяськиз ни, нош атаймы ялан ӧз берты. 1946-тӥ арын август толэзе гинэ дорамы вуиз. Отӥяз со 4 ар ӵоже колхоз председательын ужаз, ялан сюлмаськылӥз гурт ужез капчиятон сярысь. Быдӟым ож йылпумъяськиз ни ке но, гуртын улон туж секытэн сётскиз. 1947-тӥ арын тулыс кизёно ни, нош колхозмылэн ю-тысез ӧй вал. Озьы гуртысьтымы 20 ужасьёсын ӵош, мешок кутыса, Гожняе пыдын мынӥзы но отысен поездэн Кечолысь «Заготзерное» тысьлы ветлӥзы. Тыро мешокъёссэс поездэн ик вайизы. Гожняысен соосты пумитазы ни, уробое тырыса гуртозь вуттӥзы. Война бере гуртын валъёсмы ӧй вал, соосты ошъёс воштӥзы.
Атаймылэн бертэмезлы туж шумпотӥмы. Ваньмон дыръя нуныяськеме потэмен, ал вылаз пукыны яратӥ. Нош со, мугорысьтыз сӧсырмем интыоссэ возьматъяз, таосыз, пе, ожысь салам. Киыз ранить каремын, мугораз но пуля бервылъёсыз кылемын на вал. Самой со «саламъёс» ик атаелэсь тазалыксэ пуш ласянь сюпсизы. Озьы со 43 аресаз улонысь кошкиз «ожысь» ваем саламъёсыныз.

14 аресказ

Лыдъяськон но гожъяськон

— Война вылтӥ трос секыт улонэз чидано луиз. Пыдэ пононъёс — кутъёс, соос но ӝог котмылӥзы, кӧтмес тыримы пыд улысь сиёнэн, сиськем картошкаез бичаса ветлылӥмы, — шуэ Прохор Иванович. — Гуртысьтымы 4 классъем школаез йылпумъяса, Учаысь 7 классъем школае вамыштӥмы. Сое мон умой отметкаосын йылпумъяй, котькинлэсь ӟеч лыдъяськи, трос книгаос лыдӟи, туж кельшо вал математика но физика урокъёс, нош сочинение яке диктант гожтон дыр вуыку му пыр вияны дась вал. Уд но оске, пичи дыръям но чебер гожъяськыны ӧй быгаты, али но туж секытэн та уж сётске.
7 классэз йылпумъяса, колхозын ужай. 1952-тӥ арын, мыным соку 16 арес ни вал, гуртамы ФЗО-ысь вербовщикъёс вуизы. 4 пиосты сьӧразы нуизы. Куд-ог эшъёсы медкомиссиез ортчытэк ик доразы бертӥзы, нош монэ дышетскыны кутӥзы. Группаысь 22 мурт пӧлысь тужгес покчиез вал: арлыдын но, мугорын но. 6 толэзь дышетсконо вал ке, 2 толэзь ортчыса, милемыз «Ижсталь» заводысь «пӧсь» (прокатной) цехе ужаны практикае нуизы. Отӥяз со цехе ик ужаны кыли. Чугун котёлъёс 60 градусозь ӟырдаллязы, пыдысьтымы кирза сапегъёсмы пӧзён калэ вуылӥзы. Пыдъёсынымы кезьыт вуэн тырмытэм ведраосы султылӥмы. Кезьыт вуэз ведра дурысь юылӥмы.
Озьы одӥг смена 8 час ӵоже кыстӥськиз, станокъёсты ӝыны часлы гинэ дугдытъязы. Таӵе пичи киосынымы пӧсь кортэз смена ӵоже 50-60 тонна дурылӥмы. Яке мукет сямен вераса, быдэс вагон тыр кортэз. Вераны луонтэм секыт вал, вань тазалыке отчы быриз кадь. Одӥг полаз пӧсь корт вылам усиз, мугоры сутскыны шедиз. Эшъёсы эмъясьёс доры нуизы. Нош соосыз мугорысьтым супыльӟем куме ишкизы. Ох и кесяськи соку, улэп уг кыльы ни кожасько вал. Висьыны маза ӧз сётэ.
Мукет дыръя гадьы пачкатыны ӧдъяз, шоканы секыт, киосме ӝутканы ӧй быгаты, скорое мынӥ но мон шорам ик «симулянт» шуыса вазизы. За-ар кеськыса бӧрдӥсько. Со вакытэ мон гуртысьтымы Одотья апай дорын патерын улӥ, уд но оске, уй куспын йӧнатӥз. Одӥг стакан водка, одӥг стакан сема вӧй азям пуктӥз но юыны косӥз. Ноку вина юылымтэ адями понна со туж кышкыт вал, но юи. Ӵуказеяз кочон кадь султӥ.

Семьяеныз 1960-тӥ аръёс

5 ар заводын ужатозям мотоцикл басьтӥ, родняослы юрттӥськыны тырши. 2-тӥ араз возьытэ усьылэме но вань. Егит дыръя сюлэм гуртэ кыске ук. Гырон быдтон праздникъёсмы туж шулдыр ортчылӥзы. Шулдыръяськыны бертылэме одӥг полаз туж дуно усиз. Ӝытазеяз кема шудӥмы, шулдыръяськимы, нош ӵукнаяз вазь ик Агрызысь поездэ вуоно вал. Бызьыса мынӥ ке но, 10 минутлы бероми. Заводын Сталинской режимъя ужазы, 1 прогул понна 6 толэзьлы тюрьмае пуктылӥзы, 2 нунал понна — толэзьлы 8 яке 1 ар но 2 толэзьлы. Заводэ вуисько но мынэсьтым фамилиме стенгазетае гожтӥллям. Сое адӟыса, интыям ик шальтрай. Пытсэт сьӧры пуктозы кожаса, заводысь потаны ик ӧй дӥсьты, цехлэн сигаз кӧлӥ. Суд дыръя вань ужасьёсы мон пала дурбасьтӥллям. Соос монэ тюрьмалэсь утизы ке но, судлэн решениез туж чурыт вал — быдэс ар ӵоже уждунысь 25 процентсэ кельтылӥзы.
20 аресам монэ армие басьтӥзы. Служить кари Дальний Востокын, 2 ар ортчыса, военной заводысь лушкем цехе ужаны интыяськи. Кӧня ке ар ужатозям тодмо инженер-оружейникъёсын пумиськылыны кылдӥз.
1959-тӥ арын вуоно кузпалэным Шаркан ёросысь Петуньки гуртысь Галина Дмитриевнаен пумиськи. Городын 12 ар улытозямы асьмелэн квартирамы но вал.

Сюлэмез йырйись сельпо

— Кин тодэ, кытын мон азьланяз ужасал. Нырысь ик кузпалме Галина Дмитриевнаез ужаны ыстӥзы Пичи Пурга ёросысь (нош со вакытэ Ижевской ёросысь) Улӥнь Юри школае ӟуч кылъя но литературая урокъёсты нуыны, — вера воргорон. — 2 пиналъёсынымы гуртэ бертӥз. Мон но сьӧраз. Улӥнь Юриысь калык кельшиз, отчы юрт пуктыны но малпасько ни вал, 3-тӥ араз милемыз Учаысь школае ужаны ӧтизы. Труд урок нуод яке завхоз луод шуизы но, мон соку ик кыкетӥзэ бырйи.
Та школаын центральной котельной лэсьтыны малпай, сыӵеез ёросамы ӧй вал на. Тодмоосы пыр Ижысь гумыос, батареяос, котёл вуттӥ. Ужаны быгатонлыкъёсме ёросын но синйылтӥзы. Соку ик юнматӥзы быдэс ёросысь школаослы завхозэ.

Гуртоосыныз

Школаын но кема ужаны ӧз кылды, 1970-тӥ арын Пичи Пурга райисполкомлэн председателез дорам лыктӥз но Учаысь сельпоен кивалтод, тынад, пӧрмоз, шуиз. Со вакытэ ёросамы 4 сельпоос ужазы: Яган-Докъяын, Кечолын, Уромын но Учаын. Выль удыс туж секытэн сётскиз. Учаысь сельполэн бурд улаз 35 магазин, 6 пекарня, 4 школа столовой, 4 буфет.
Гурт калыклы кулэ луись вуз вуттон сярысь сюлмаськоно вал. Одӥг полаз улмолы пырак Молдавие ветлоно луиз. 4 вагон улмо вайимы. Мурт шаерын улӥсьёслэн культуразылы синмаськи, сюрес кузя писпуос будо, отын улмоез но, мульыез но трос, нош соосты тӥясь-ишкась ӧвӧл. Нош милям!? Магазинамы тылпулэсь утиськон щитысь тӥрез яке мукет арбериосты гинэ но лушкало вал.
Мукетыз тужгес сюлмаськытӥсь ужпум вал калыклэсь вуз — курегпуз, вӧй, ыжгон, сӥль, картошка — бичан. Планэз быдэстымтэ дыръя райкоме ӧтьылӥзы. Одӥг полаз курегпуз бичанъя планэ ӧз тырмы. Ёросысь кивалтӥсьёсты оскытыны вырисько, ӝыны ар понна планме одно ик быдэсто шуыса. Жалязы соку, кылдэ ӧд быдэсты ке, ёросысь уллянэн кышкатӥзы. Сыӵе учыръёс ужаны мылкыдэз куашкатылӥзы.
Сельпое 35 магазин пыре вал ке, ӧжытсэ толэзьлы одӥг пол котькудаз вуылыны тырши. Гурт магазинъёсысь кытын кыӵе вуззы кылле, ваньзэ вераны быгатылӥ. Бен, вузаськисьёслэн ыштонъёссы но вал. Пичи недостачаосты ёросэ ӧм ивортылэ, нош бадӟымъёссэ вератэк ӧз луылы. Прокуроръёслэн вуз карисьёсты янгыше уськытэмзы потылӥз, малы, пе, соос тынад лушкасько. Ӵемысь асме тюрьмае пуктонэн кышкатъязы. Куд-ог дыръя югдурез сэрттэм-пертчем интые асьсэос сьӧраз ортчылӥзы. Ветлэмзылы быдэ ӟеч-ӟеч куноятэмез витизы. Вань сюлмы кисьтӥське вал сыӵеослы.
Озьы-а, тазьы-а но вань улонме вуз карон удысын ортчытӥ. Уча сельпоысь магазинъёслэн ӝажыоссы котьку тыро улӥзы. Умой ужаме понна Пичи Пургаысь райпоен но кивалтӥсе ӧтьылӥзы, Вавоже, Алнаше, Киясовое, Шарканэ — одӥгаз но ӧй мыны. Вордскем гуртысьтым нокытчы кошкеме ӧз поты ни, со понна шат городысь бертӥ?

Мынам бурдъёсы- бызьылон

— Школаын дышетскыкум но, городын ужакум но котьку спортэз гажай, — веранзэ азинтэ Прохор Иванович. — Туж яратӥ куасэн бызьылыны, пӧртэм ӵошатсконъёсы пыриськылӥ. Ужаны кутскыса нюръяськонэ ветлӥ, 1-тӥ разрядэ но вал. Одӥг залын спортъя мастеръёсын Михаил Земляновен, Никита Байковен, Алексей Михайловен но мукет спортсменъёсын нюръяськылӥ. Мытэм ужме аналтоно луиз, тазалыке лябӟыны кутскемен. Гуртэ ужаны бертыса но мугор кыдатыны луонлыке ӧй вал. Соку ик веськрес мугоры тазамыны кутскиз. Одӥг пол пыэдэн секыт виси, кема курадӟеме бере тазалыкме юнматон сярысь малпаськонэ уси.

Эшез — спорт

1980-тӥ арын кузпалы Галина Дмитриевна Пичи Пурга черкогуртсь «Раздумья о здоровье» книга басьтэм. Сое мон 2 нунал куспын лыдӟи но ӝытазеяз ик бызьылыны потӥ. Нырысь ик пеймыт куазен бакчаетӥ ортчи. Лушкемен бызьылыны выри ке но, гурт калык синйылтэм сое. Прохор Ивановичлэн, пе, кыдыз бертыны кутскем-а, мар-а. Отӥяз урамъёстӥ бызьылӥ, бадӟым сюрес кузя. Ар ортчыса, асме умоен шӧдыны кутски, эшшо ар ортчыса, 10 иськемез но капчиен бызи ни.
Ас поннам кӧня вырысал уг тодӥськы, 1985-тӥ арын КПСС-лэн ЦК-лэн Пленумаз юонэн нюръяськон сярысь постановлениез потӥз. Юонэн нюръяськонъя ёзъёс яке бызьылыны яратӥсьёслэсь клубъёссэс, пе, кылдытоно. Гуртысьтымы Михаил Фёдорович Михайловен кенешыса, Учалан клуб кылдытыны малпамы. Гуртысь клуб борды ялонмес ошимы. 12 мурт вазиськиз, клубмес «Муравейник» нимамы. Кузьыли кадь кужмо луэммы потӥз. Со аре ик ӵошатскон но ортчытӥмы.
Аръёс ортчыса, бызьылыны мылкыд карисьёслэн лыдзы 80-лэсь ортчиз. Соку ик Удмуртиысь спортсменъёслэсь тазалыксэс эскеронъя диспансерын ужасьёсты дорамы ӧтимы. Соос быдэс автобусэн ветлӥзы. Вань бызьылӥсьёслэсь тазалыксэс эскеризы но котькудӥзлы нимаз визь-кенеш сётӥзы. Ужмы эшшо но золгес пӧзьыны кутскиз. 5 ар ортчыса, Москваын ортчем марафонэ пыриськи ни.
Висёнъёс палэнэ кылизы кадь, мылкыд лӧптӥз. Туж потэ вал атаелэн ожмаськем бервылъёстӥз бызьылэме. «Дорога жизни» марафонэ пыриськи. Отӥяз 7 пол Москваын ортчем калыккуспо марафонъёсы ветлӥ на. 42 иськем 195 метрез 3 час 10 минут куспын ортчи. Кузь сюресэз ӟеч ортчон понна нуналлы быдэ мугорме кыдатӥ. Со понна нимысьтыз план кылдытӥ: понедельнике 10-15 иськем, собере ялан тросгес, нош пятницае 20-25 иськем, арнянунал — 30 иськем бызьылӥ. Со сяна, нуналаз 700-800 приседание, 600-700 наклон, 100 пол отжимание лэсьтылӥ, 25-30 пол турникын ӝуткаськи. Нуналлы быдэ ӵукна 5 часысен бызьылыны потасько. Али но та сямылэсь ӧй куштӥськы на, гуртысь котькуд урам мертамын. 40 ар ӵоже 80 сюрс иськемлэсь кузь сюрес ортчемын. Музъем шар котыртӥ 2 пол котырскем выллем.

Тамара но Анфиса сузэръёсыныз

Писэй, курегъёс но газет

— Быдэс улон со нюръяськон выллем, ялан маке понна сюлмаськоно. Бызьылон мыным улыны кужым пыӵатэ, тазалык сётэ, жаляса верано, та дунне вылын ваньмыз капчиен уг сётскы, — шуэ Прохор Павлов. — Синмаськисько кузпалъёслы, кудъёсыз 80-90 аресозязы ӵошен улыны быгато, нош мон озьы данъяськыны уг быгатӥськы. Кузпалы Галина Дмитриевна ӟеч дышетӥсь вал, жаляса верано, 64 аресаз улонысь кошкиз. Висёнэз но пичи гинэ кадь вал, но эмъясьёс дыраз ӧз валалэ, утьыны ӧз быгатэ. Табере кызё ар пала огнам улӥсько, шумпотто 2 пиналъёсмы, пимы Ижын улэ, нылмы Можга ёросысь Горнякын. Табере 4 внукъёсмы, 3 правнукъёсмы будо.

Нылпиосыныз

Ваньмон дыръям юртъер котырын бергасько, вазенгес гид тыр пудо вордӥ, табере курегъёсы но писэе сяна ӧвӧл. Со понна бадӟым бакчае, пӧртэм емышо садъёсы вань. Виноградэ но сиыны вуэ. 6 сотка музъем вылын виктория будэтылӥ, арлыд будэмъя со убоосме 2 поллы пичигес кельтӥ. Туж яратӥсько чеснокез. Сое но 40 метр кузьда убоын будэтӥсько, сиыны но, вузаны но тырме. Ачим вузаськонэн уг выриськы, нылпиослы сётӥсько но соос интыяло.
Улонын мон лётчик но, дано спортсмен но ӧй луы, уг быгатӥськы шпагат лэсьтыны, со понна ӝыны улонме пыдын бызьылӥсько. Мугорме кыдатыны кутскыса, нимысьтыз дневник нуисько. Отчы пусйисько нуналзэ, куазез, кӧня иськем бызьылэмме. Туэ сентябрь толэзе бадӟым ужрадлы дасяськисько, «Муравей» клублэсь пыдын бызьылонъя ӵошатсконэз 35-тӥзэ ортчытомы. Озьы ми Сосновка, Бажан, Уром пала нуись сюрес кузя бызьыломы. Ӵошатсконэз радъян вылысь коньдон люкан сярысь али ик сюлмаськоно ни.
Эшшо одӥг висёнэ пичиысен пыӵаса кылемын — лыдӟиськон. Тужгес яратӥсько «Удмурт дунне» газетэз, сое 45 ар ӵоже басьтӥсько ни. Газет мынам бурдъясе но ӵуказе нуналлы кужым сётӥсе луэ.

Валентина Емельянова

Ангелина Снигирева
By Ангелина Снигирева Апрель 30, 2019 12:53
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<