Сюлмыз ненег вал…

Ангелина Снигирева
By Ангелина Снигирева Апрель 12, 2019 13:37

Ми Фёдор Пукроковен 40 арлэсь кема эшъяськимы.

Ф. Пукроков

Пинал мылкыд

Ф. Пукроков механической институтлэн 3-тӥ курсаз дышетскиз но милям общежитиямы (пединститутлэн) эшез доры ветлылӥз. Пединститутысь студентъёс пӧлысь одӥгез но выль эшеным артэ пуктымон ӧй вал, огзы но (визьмынызы но, сямынызы но) бордазы ӧз кыске. Сокем но сокем сюлэмъям вал эше, соин ог арня адӟиськытэк ӧй чидалля.

Ф. Пукроков «витьёслы» дышетскиз. Но 4-тӥ курсысен вечерний амалэн дышетсконэ потӥз, радиозаводэ технолог луыса ужаны пыриз. Со шӧдӥз угось: солы техника мусо ӧвӧл, сюлэмызлы матын кылбуран. Тодмоосыз, тае валатэк, визь тыро, институтсэ куштыны уг лэзё, «дурак» шуэмзы потэ. Мон гинэ мылкыдзэ валасько, кузяз мынӥсько, нялтас кариськисько. Соку солы каньылгес луэ.

Маиныз бордаз кыскиз эше? Нырысь ик лэчыт визьмыныз, шаплыеныз но дӥсьтӥсь луэменыз: редакциостӥ ветлэ, писательёсын кусып возе, кылбур пӧра. Пӧрамзэ милемлы ушъяськыса лыдӟе, нылъёсмылы сӥзьыса, сонетъёс гожъя, ваньзэс паймытъя.

Федяен кусыпмы матынлэсь но матын вал. Кудмылы кӧня коньдон сётъяммес ноку ӧм лыдъялэ: берат ужаны кутскеме бере, Москваын дышетскыкуз, мон солы переводъёс ысъялляй, нош мон армиын дыръям со семьяелы ысъяз.

Башкир удмурт

Фёдор Пукроковлэн аспӧртэм произведениос кылдытъямез но МГУ-ысь философияя факультетэз йылпумъямез пумысен, оло, кин ке паймытскоз: ма, кызьы Башкортостанысь гондыр кушын будыса, со бадӟым сюрес вылэ потыны быгатӥз но тодмо адями луиз?

Валэктонэ туж огшоры. Мон Башкириысь Вязовкаын, вордскем гуртаз, уно пол кунояй, вуылӥ Татышлые, Вильгуртэ, Бигинее, Кызыл Яре. Соку адӟи, кыӵе шырыт сямо, сабырлы, ужась, кырӟаны-вераны но шулдыръяськыны быгатӥсь, улонэз яратӥсь отын калык.

Анай-атаез — зэмос крестьянъёс, йӧноесь, рос-просэсь, философъёс сямен зэмлыкез утчасьёс.

Ф. Пукроков дунне шоры паськыт учке вал, соин валче 60-лэсь уно публицистической статьяос но очеркъёс гожтӥз. Туж уно выриз, кивалтӥсьёс дортӥ ветлӥз, колхоз предъёсыз лӥятылӥз гырон музъемез умоятон пумысен, трос гожъяз муэз плуген берыкъятэк гырон но чик гырытэк кизён сярысь. Жаль, соку нокин верамзэ пеляз ӧз поны. Али таӵе амал кутӥське куд-ог эштосъёсын, кылсярысь, Вавож ёросысь Мичурин нимо колхозын. Соин валче отын арлы быдэ юоссы удалто.

Мынам шуэме потэ: Фёдор Пукроков, ӵапак гондыр кушын будыса, улонэз умоятон понна нюръяськись, син шоры йӧтымон писатель луиз, котькуд жанрез серметаны быгатӥз. Башкириысь удмуртъёс угось удмуртлыкез, Удмурт Элькунын сярысь, юнгес утё, соин отысь туж золэсь адямиос пото.

Пукроковлы философ луыны университет гинэ ӧз юртты, юрттӥз улонысь ваньзэ сюлэм пыртӥз но визь пыртӥз поттон. Ми ог-огмес философ каримы, пумтэм вераськыса, угось дунне вылын мар гинэ вань, ваньзэ сӥсъямы-поръямы, авторъёсты но книгаосты ӵошен эскеримы. Темамы быронтэм: инкуазь, таза мугоро но юн лулсэро луон, инсьӧр, цивилизация, удмуртлык, вашкала культура, Инмарлы вӧсяськон, семья кусыпъёс, нылпиез будэтон, школаын дышетонэз радъян, гурт улонэз тупатон, колхозъёсты выльдон, урожаез ӝутон…

Куарамес жалятэк, куаш! карыса вераськиськомы — тодмотэм адями керетӥськомы кожалоз. Семьяосмы нырысь вожаллязы — ма, кышноосмес воксё вунэтылӥмы ук! Берат валазы: милям философствовать карытэк улэммы уг луы. Огпол Галя кышноез шуиз: «Мынэ мукет комнатае, кӧтты тырымон вераськелэ». Галя Федяя кариськылӥз, рукописьёссэ, машинкаен печатласа, дасялляз.

Романзэ гожтӥз трамвайын

Федялэн гань-гань гожъяськыны дырыз но, интыез но ӧй вал: нуназе семьязэ сюдыны коньдон дуроно, нош ӝытъёсы дораз нылпиосыз люкето: телевизор учко, ӵашето… Мар кароно? Амал шедьтӥз: уж дураз Буммашысь мынэ-бертэ трамваен, огпала гинэ мыныны ӝыны час пала дырыз быре, тӥни соку гожъяськыны шӧтаз.

Выль вуттэм произведенизэ шумпотыса мыным сётылӥз, нырысетӥ критикез мон луылӥ. Визь-кенеш сётъяй, яратоно эшелэсь гожъямъёссэ умоятыны тырши. Озьы ке но пиртэш интыосыз кыльылӥзы, лэся. Кылсярысь, кылбураса гожтэм «Ошмес син» романзэ пумаз вуттӥз, нош отчы яратон сярысь сюжет пыртыны вунэтӥськеммы. Тае авторлы бӧрысь вераз ини литератураез эскеронэн вырись Фома Ермаков. Мар карод, выль романзэ «кышъяно» луиз.

Ф. Пукроков, гожъяськыны сяна, быгатэ вал чебер эктыны, тальянкаен шудыны, кырӟаны. Ачим но крезьгурез яратӥсько бере, мон солы шуисько: «Ойдо, шори вылэ тальянка басьтомы». Озьы ик каримы. Тальянкаеныз со Башкириын но эктытъяз, калыкез шулдыртон понна удмурт ужрадъёсы но поталляз, дораз но ӵемысь шудылӥз.

Студент дыръямы (берат но) ми ӵем удмурт но ӟуч кырӟанъёсты нёръяллямы. Кӧня ке крезьгур но кылдытӥмы: мон мандолинаен нота утчасько, нош со кырӟа.

Коньдонмы тырмымтэен, ӟудылӥмы ке но, грузовой станциын пуэн, музъем эгырен, из-кӧльыен вагонъёсты бушатъяллямы ке но, куректытэк, шулдыр улӥмы.

Коммуна

Студент дыръям библиотекаосты яратӥ, нуналлы быдэ Ленин нимояз вуылӥ. Отын ӵем гинэ тунсыко ужрадъёс ортчылӥзы. Огполаз выступать каризы Ижкарысь дружинникъёс. Соос, ог 40 кузя егит пиос но нылъёс, куашкам колхозэз коммуна карыны малпаллям. Соослэсь мылкыдзэс комсомоллэн обкомез сӥлы карем, дурбасьтэм. Кӧня ке нунал ортчыса, пе, Красногорск ёросысь Архангельское гуртэ мыномы. Тае мон со нуналэ ик Федялы ивортӥ. Эше соку ик ӝуалтӥськиз, мон но, пе, мыно. Сое вуоно коммунаръёс сьӧразы кутӥзы, асьсэлы комиссар каризы.

Куд-ог писательёс паймизы, уг оско, шузияськон, пе, со. Федялэсь юало: «Ку, гуртысь пегӟыса, Ижкаре берен вуод?» Федя ке шумпотэмын: «Мон коммунар луо, эрико выль улон лэсьто, кырӟаса ужало, нош тӥ Ижкарысен мыным вожъяськоды».

Коммунаязы шулдыр улӥзы, гуртэз выльдыны кутскизы, пытсам черксэс клуб каризы, спортэз радъязы. Федя Т-40 тракторен музъем гыриз. Соос доры Москваысь тележурналистъёс ветлӥзы, газетчиос гожъязы. Коммунаязы куриськыса, СССР-лэн пӧртэм сэрегъёсысьтыз егитъёс сюосын но сюрсъёсын гожтэт ысъязы. Жаль, ар но ӝыны ортчыса, коммуназы куашказ.

Нош малы коммунаръёслэн чебер малпанъёссы ӧз быдэсме? Куашканзылэн мугез 2 вал. Огласянь, коммуназы хозрасчётэ ӧз поты, нимаз счёт ӧз лэсьты но, ужаса поттэм табышсы жуммем колхозлэн пыдэстэм вышкыяз выйиз. Мукет мугез — коммуназылэн тӧроез коммуналэсь табышсэ аслыз капыртэм, сое суд улэ кыскизы.

Но Ф. Пукроковлэн Ижкаре берыктӥськыны кынарыз ӧз сузьы, супыльтыны яратӥсь писательёсты ӧз шумпотты — кутӥз но МГУ-е дышетскыны пыриз, Иже берен вуиз, философ луыса.

Мылкыдзэ ӧз ватылы

Фёдор Пукроков улӥз, зэмлыкез утчаса, идея понна нюръяськыса, ноку аслыз капчи улон ӧз утча, кивалтӥсьёслы ӧз пыриськы, бадӟым пукон яке квартира кураса ӧз ветлы. Котьку вераське но гожъяське вал, мылкыдзэ ватытэк. Котьку дурбасьтылӥз репрессия улэ шедем удмурт писательёслы. Кузёбай Гердэз но Фома Ермаковез сантэмасьёсын вожвылъяськонэ вуылӥз. Соин валче эше юн куректӥз, гожъяськон мылкыдыз лапказ, лулсэрез тэшказ. Жаль, Федялэн быгатонэз пумозяз ӧз усьтӥськы.

Лулчеберетэн вырись — огшоры адями ӧвӧл, угось со ненег сюлэмо. Соин валче чаляк тӥялтӥське…

Альберт Разин

Ангелина Снигирева
By Ангелина Снигирева Апрель 12, 2019 13:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<