Сайкыт дуннеез усьтӥз

Ангелина Снигирева
By Ангелина Снигирева Апрель 12, 2019 10:46

Улонысь кошкиз удмурт кылбурчи, писатель но публицист Фёдор (Фатых) Пукроков.

Ф. Пукроков
Фото: Kultura-tatyshly.ru

1937-тӥ арын Башкортостанысь Татышлы ёросысь Сирпогуртын (Вязовкаын) вордӥськем удмурт пияш быдэс улонзэ Удмурт шаерен, удмурт литератураен но дышетон удысэн герӟаз.

Фатых 6-тӥез, берпуметӥез, нылпи вылэм. Анаез сое 41 арес дыръяз ваем. Башкир музъем вылын, бигер гуртъёс пӧлы пуксем удмурт гуртын вордӥськем пияш пичиысен пӧртэм калыкъёслэсь культуразэс, кылзэс, сям-йылолъёссэс гажаны но валаны дышем. Фатых Ижысь механической институтэ дышетскыны пырем. Но ӝоген валам, та удыс сюлмызъя ӧвӧл, озьы институтысь кошкем. 1963-тӥ арын Москваысь Ломоносов нимо кун университетысь философияя факультетэ дышетскыны пырем. Ачиз верамъя, улонлэсь мургес сӥоссэ, законъёссэ тодэме, пе, потӥз.

1969-тӥ арын дышетсконзэ йылпумъяз, удмуртъёс пӧлысь нырысетӥез дышетскем философ луиз. Ижысь медициная институтын философилы дышетӥз. Кыстӥськиз творчество борды, кылбуръёс, веросъёс, публицистика гожъяз. 1978-тӥ арысен «Удмуртия» книгапоттонниын ужаны кутскиз, 1985-тӥ арысен — «Молот» журналын. Нош 1986-тӥ арысен дораз, ас понназ гожъяськыны кутске. 1988-тӥ арысен — Совето Союзысь Писательёслэн огазеяськонзылэн ёзчиез.

Нырысетӥ кылбур бичетэз потӥз 1969-тӥ арын. Удмурт газет-журналъёсын сяна, печатласькиз «Аврора», «Урал», «Волга» ӟуч журналъёсын но. Ф. Пукроковлэн кылбур дуннеез сайкыт, ӵуказелы оскон сётӥсь. Со дыре ик кылбурчи улонлэсь тырмымтэоссэ адӟе, со понна сюлмыз висе. Та ласянь тужгес тодмо луэ «Ӟеч кыл» поэмаез. Тунсыко солэн кылбуръёсын гожтэм «Ошмес син» романэз но. Писатель ассэ драматургия удысын но эскериз. Нимаз пьесаос сяна, Ф. Холинэн ӵош соос шаерысьтымы Мунё театрлы кӧня ке ӟуч пьеса гожтӥзы. Нош Удмурт театрын 1984-тӥ арын Ф. Пукроковлэн «Корка пырон» пьесаез мынӥз. Бӧрысь, быдэсак литература уже выжыса, писатель тросгес гожъяз философия мылкыдо проза, сайкыт выжыкылъёс, ужъёсаз мистикаез но фантастикаез кутыны кутскиз.

УД

Ангелина Снигирева
By Ангелина Снигирева Апрель 12, 2019 10:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<