Пыд улаз берга музъем

Ангелина Снигирева
By Ангелина Снигирева Апрель 12, 2019 10:37

Светлана КОРОТАЕВА — Глазов ёрос администрациысь культурая но егитъёсын ужан политикая отделлэн кивалтӥсез. Чырмыт тыршемез дунъямын Удмуртиысь Культурая министерстволэн таукаронэныз но Удмуртиысь Правительстволэн Данъян грамотаеныз.

С. Коротаева

Мылкыдын — азьветлӥсь

— Вань пичи дырме мон дышетӥсьын «ужай». Глазов ёросысь Коротай гуртамы нылпи садмы ноку но ӧй вал. Соин ас поннам будэмын. Кытысь дышетӥсь луон мылкыд кылдэм — уг но тодӥськы ни. Выжыямы дышетӥсьёс воксё ӧй вал — анай но, атай но ужамын гурт удысын. Мамалэн верамезъя, 5 аресад, пе, мынӥд соседка — дышетӥсь Рита Алексеевна Иванова — дӥне но солэсь удмурт кылын азбуказэ курид. Ӵап со дырысен, школаен шудыса, вакытэ ортчиз.

Нош 17 аресам мон анай луи — 10-тӥ классын дышетскыкум, бызи, пинал вайи. Быдэс школалы, ма, гуртлы но вераськон вал: комсомолка, активистка, спортсменка — кызьы озьы. Нош мон аслэсьтым 5 ареслы бадӟымгес пилы синмаськи. Со армиысь бертэмын, сыӵе оскымон. Дорын мон самой бадӟымез пинал. Ваньмыз понна кыл кутон мыным лякиське: анай-атай ужын, нош мон сиён пӧрась но, корка эстӥсь но, пичиосты чаклась но. Озьы ӝог быдэ вуи, дыр.

Глазовысь пединститутын заочно дышетсконо луи ни. Мамаелы тау шуисько, со ке ӧй косысал, оло, ӧй но вырӟысал. Мамае нодъяз: мын, заявленидэ институтэ сёт. Нырысетӥ араз мон ӧй вутты — беромиськем. Озьы 1994-тӥ арын дышетскыны пыри. 1998-тӥ арын Куреггуртысь школае лаборантэ ужаны кутски (ӵапак та школаез мон ачим но йылпумъяй), собере вожатой вал, дышетӥсьлэсь но удыссэ кӧня ке шӧмъяса вуттӥ.

Со вакытэ ик гурт поселенилэн йырыз Василий Иванович Наговицын дэмлаз егитъёсты котырам люканы. Мон общественной ужлы дась вал, уката ик оскемзэс верало ке, егит муртлэн соку бурдъёсыз кылдо. Зэм, егит дыръям виры пӧсь вал, муртлэсь янгышсэ вылам погыльтӥзы но, ӧй чида — школаысь кошки. Озьы 2000-тӥ арын мон ужтэк кыли. Мынӥ Глазов ёросысь калыкез уже интыянъя центре. Собере маке муген ёрос администрацие кожи. Татын пумиськи семья политикая, спортъя но егитъёсын ужанъя управленилэн кивалтӥсеныз Ирина Васильевна Зотинаен:

— Ма татӥ бызьылӥськод? — юаз.

— Уже интыянъя центре лыктӥ, — шуисько.

— Ма, кызьы ужтэк кылид? — сюлмаське со. — Али гинэ управлениям нылашез уже кутӥ вал — табере ӝыны ставка сяна номыр но ӵектыны уг быгатӥськы ни. Ӝыны ставкае лыктод-а? Мыным маке шат: 4 час ужалод-а, тросгес-а, но ужед быдэстэмын медло.

Анай-атаеныз но выныныз

Мон соглаш луи. Нош ачим Глазовлэсь 30 иськемлэсь кыдёкын улӥсько, автобусъёс я вань, я ӧвӧл, сюрес вылын машинаос но шер. Пыдын но ветлылоно луиз Глазове. Ӝыны ар ортчыса, мыным быдэс ставка шедьтӥзы ни. Нош вуоно араз Егитъёслы социальной юрттэт сётонъя центрлы директоре пуктӥзы. Бӧрысь солы «Диалог» ним сётӥмы. Мыным соку 28 арес вал. Со самой шудо ужан аръёсы вал кадь потэ. Кие но ӧз шуккылэ, кымесэ но ӧз кокалэ. «Ужалэ, янгышалэ, тупатске» девиз улсын тыршимы кадь.

Та ик луиз мынам городэ кошкеме. Нош семьяе — нылы но картэ — гуртын. Городэ выжытозям, мыным валантэм вал: гуртын коркаед вань дыръя кызьы мурт патерын улод? Нош солы, зэм ик, дышиське вылэм. Мон нырысь огез эше доры калъяськи, собере мукетсэ улон корка шедьтӥ. Нырысь городэ нылы лыктӥз, собере кузпалы но выжиз.

Егитъёсын 10 ар ужаса, малпаськонэ уси: мар луоз ӵуказе? Ачим мӧйымисько, егитъёс но мукетгес луо. Мае ке но воштоно, дыр. Утчаськи, Москва улосысь уж шедьтӥ, колледже директорлы воштӥсь утчало вылэм. Малпасько, вай дышетон удысэ ик берытско. Уката ик Глазовын улон интымы ӧй вал на — весь мурт квартираостӥ ветлӥмы. Выль интые собеседование ӧтизы. Малпанъёсы сярысь поттылӥ ёрос йырмылы Юрий Дягилевлы.

— Юрий Николаевич, кошкон сярысь малпаськисько, — шуисько.

— Кытчы? — юа со.

— Москва пала, — шуисько.

— Тон, татын ужаса, Глазовлы но ёрослы но тодмо ини. Нокин азьын возьматоно ӧвӧл ни, кин тон сыӵе, мар карыны быгатӥськод. Нош выль интыын та сюрестэ выльысь ортчоно луод.

Кивалтӥсь сюлме пырись кылъёс шедьтэм, лэся. Мон озьы пуксьытски.

Кӧня ке улыса, Ю. Дягилев ик шуэ: тынад, пе, егитъёс пӧлын ужан штанэд вакчи кылем ни. Иське, будыны кулэ. Али, пе, культурая отделэн кивалтӥсе инты вань. Конкурс ялэмын. Отын астэ эскерод-а?

Мынам, конечно, удмурт сямы сайказ: кытын мон но кытын культура, уг быгаты, дыр.

Но кивалтӥсе монэ малы ке ӧз сюлворы — уг ке поты, мар косонэз, пе. Нош мынам солы пумит асме эскереме потӥз. Зэм, оген кышкыт. Конкурсэ пыриськыны эшме ӧти на. Озьы 2013-тӥ арын культура удысэ вуи. Тани 6-тӥ арзэ ужасько.

Юлия нылыныз сюаназ

Культураын — утчаськись

— Со аръёсы ӵапак кутэмын вал 131-тӥ федерал закон. Вань полномочиос соку выжизы поселениен кивалтӥсьёслы, соин ӵош ик — культура удыс но. Кӧня ке улыса, кивалтӥсьёс валазы: децентрализация ӟече уг вутты вылэм. Культураын огъя радлык вакчи дыр куспын куашказ. Культура учреждениос, нимаз государство сямен, ас понназы уло, мар ужамзы потэ — озьы ик каро. Нокин соосты уг радъя, уг косъяськы.

Озьы 2014-тӥ арысен клубъёсты выльысь огазеяны кутским. Нош культурая учреждениос эрикез шӧдыса вуизы, соин капчи ӧз сётӥськы та уж. Ми сомында кыл кылӥм, сомында бензин быдтӥм, сонямында сюресъёс лёгамы. Ваньмызлы валэктыны вырим: номырдэс но уд ыштэ, кӧня коньдон поттоды — со асьтэлы ик кылёз, нимаз спецсчётты кылдоз. Уго культура валаз коньдон шӧмез. Нош ми мар сӥзим, озьы ик лэсьтӥм. Туннэ ёросысь 26 клубъёс огазеямын, кылдытэмын Культурая но туризмъя центр. Кылем арын усьтӥськиз историяя но культурая «ДондыДор» паркмы.

Огласянь, милемлы капчи ужаны город бордын. Мукет ёросъёс паймо: кытысь сомында калык вуэ ужрадъёсады. Зэмзэ вераса, милям 30 процентэз учкисьёсмы ёросысь, нош 70 процентэз лыктэ Глазкарысь. Уго культура удыслэн валтӥсь сюлмаськонэз — ужрадъёсы тросгес калыкез кыскон. Город администрациысь культура удысэн ми вожвылъяськыны ум тыршиське — котьку валче ужаны дасесь.

Инты пумысен гинэ шугъяськонъёсмы вань. Лыдъяськиськомы район шуыса, нош райцентрмы ӧвӧл. Соин милем туж секыт кыӵе ке огъя бадӟым ужрад ортчытыны. Тани Вормон нуналэз ик радъяно ке, кытчы калыкез люкано? Городэ ми ум пыре, отын парад ортче. Кытчы кариськоно Первомай демонстрация, кунлык басьтэм нунал дыръя? Озьы берло дыре Штанигуртэ калыкез ӧтчалляны кутским. 2016-тӥ арысен ми сое ёросысь культурая юрт карим, отчы тыршиськомы тросгес коньдон но кыскыны, выльдыны-тупатъяны.

Глазов ёросын культура удысын 120 адями ужа. Милям ужасьёсмы — ваньмыз сямен вылӥ тодон-валанэн. Талы туж юрттэ Глазовысь пединститутлэн матын луэмез. Жаль мукетыз: ми дорын ужаны кутско, опыт люкало но бадӟымгес городэ кошко ни.

Тужгес бадӟым сюлмаськонмы — со аккомпаниаторъёслэн тырмымтэзы. Синмес кыниськом но лэзиськом соосты 3-4 ужын тыршыны.

Кылем арын ёросысь культура удысэ вуиз 3 миллион 700 сюрс манет. Интыысь бюджетлэн со 16,5 процентэз. Та коньдон мынэ уждун тырыны, автобусъёслы но машинаослы эстӥськон басьтыны, крезьгуро техникаез выльдыны. Нош ужрадъёс ортчытъяны ми тросгес спонсоръёсты утчаськом но проектъёс гожъяськом.

Историын — паймись

Воршудъёслэн кнешсы дыръя

— Берло дыре котькуд ёрос ӵектэ аслэсьтыз турмаршрутъёссэ. Тани шарканъёслэн Тол бабайзы вань, гракъёслэн — Баба-Ягазы, юкаменскъёслэн — «Тылыс» базазы, Кам шур кузя ортче «Камский берег». Нош мар ӵектыны быгатозы уйпалъёс? Ӵош ужась эше Евгений Баженов Донды батыр сярысь выжыкылъёсын «висьыны» кутскиз. Ма, ми пичи дырысен со мадьёсты кылзыса будэмын. Батыръёссы вылӥллям вавожъёслэн но, сьӧлтаослэн но.

Идна батыр сярысь тодмо ни, Иднакар городище но усьтэмын, музей но ужа. Ми кырмиським Донды батыр сярысь веранъёс борды.

Донды — со тодмо удмурт батыръёслэн бубызы. Солдыр гурезь вылын со Идна но Гурья пиосыныз улэм, собере эшшо вордскиллям на Весья но Зуй. Ваньмызлы одӥг интыын улыны ӝикыт луэм. Соин вашкала карзэ Идна пиезлы кельтыса, Донды шур кузя тубем. Та интылы Дондыкар ним сётӥллям. Нош Гурья мукет кар кылдытэм. Озьы ик нимам сое — Гурьякар. Будыса Дондылэн мукет пиосыз но асьсэ крепостьёссэс ӝутӥллям. Соос кужмоесь удмурт князьёс вылӥллям.

Милям Глазов ёросамы али но вань Дондыкар гуртмы. Со туж вашкала. Но Глазовлэсь кыдёкын — ог 25 иськемын — интыяськемын. Шурез но ӧвӧл ни. Татын азьло пеймыт нюлэсъёс вылӥллям.

Утчаськон сяменымы Лариса Князева историкен ӵош потамы Утэм гурт (Нижняя Богатырка) доры шур дуре. Ӵапак тулыс, бусыосты гыро-кизё. Кызьы ӧрӟи сак адӟе сиёнэз, озьы ик Лариса Феликсовна синйылтэ историен герӟаськем чыры-пырыосты. Тани кувшин бордысь чалеп, тани адями лы, шуэ. Нош мон уг адӟиськы, синмы дышымтэ солы. Озьы котькуд вамышлы быдэ — история. Татын вашкала городище интыын нокин музъемез гудыны уз лэзьы. Уго 40 сантиметр мурдалаын «культурной слой» кутске ни.

Кутским йырмес тӥяны: кытчы мыноз турист? Автобусъёс но отчы мед ветлозы, сюресэн но шугъяськон медаз луы, археология ласянь но номырлы ыштон медам вае. Озьы дугдӥм Адам гуртэ. Автобус татчы 20-30 минутлы быдэ ветлэ — городлэсь 10 иськемын гинэ. Азьло отын бадӟым шутэтскон база вал. Озьыен, тыл но, ву но матын. Ярам, инты шедиз, нош тужгес секытэз азьпалан на вылэм: кутскизы пумтэм-йылтэм экспертизаос. Уго кӧня иськем кыстӥське ёросамы Чупчи шур, сомында ик со котырын «культурной слой», отын сомында вашкала каръёс, селищеос но шайвылъёс.

Озьы кылдӥз бадӟым проект — «ДондыДор» парк. Сое быдэстыны 100 миллион манет кулэ. Туннэ нуналлы объектын лэсьтэмын пырон ӟезьыез гинэ, ӝутӥське Дондылэн коркаез, лэсьтӥсько шутэтскон базаос. Вань отын арт-объектъёс — кылем арын сыӵе ужрад ортчытӥм вал. Туннэ но со киужъёс чебер сыло, вань лыктӥсьёс котыраз фотое пуксьыло.

«ДондыДорын» радъяллямы ни воршудъёслэсь кенешсэс, «Пестросаес» фестивалез, «Огни ДондыДора» ужрадмес но трос мукетсэ.

Гужем лэсьтӥськон ужъёсмы эшшо азьланьтӥськозы. Шумпотымон: милемыз кылӥз Удмуртилэн Тӧроез Александр Бречалов. Глазове вуылыкуз, Адамысь егит семьяос вазиськизы культурая юрт пумысен. Колхоз куашкам бере гуртысь клубез — бадӟым типовой зданиез — нимаз муртлы вузазы. Отын, конечно, ужбергатӥсь зол ремонт лэсьтӥз, уй клуб усьтыны чаклаз, но ужзэ радъяса малы ке ӧз вутты. Ӵап сое милем берлань сёто. Юртэз 6 миллион манетэн басьтыны кенешемын, коньдонлэн нырысетӥ люкетэз вуиз ни, туэ гужем ик отын ремонт лэсьтыны кутскозы. Нош вуоно арысен со клуб ми доры берытскоз ни. Адамын табере таӵе бадӟым юртмы кылдоз: оло со визит-центр луоз, оло сое хостел каромы, пумозяз ӧм на малпаське

Вордскем палъёсаз — ӧтчаськись

— Асьме шаерамы улӥсьёс ӵемгес вуо зарезь дуре, нош улытозязы огпол но уз лыктэ уйпал ёросамы. Нош милям туж потэ возьматэммы тунсыко интыосмес. Тани Пусошур гуртын ужа «Шӧмпи азбар» маршрутмы. Татын 3 нылашъёс котькинлэсь зол ужало — турмаршрутсэс азьпал радэ поттӥзы ни. Отчы туж трос ветло Глазов городын улӥсьёс, нылпиос, ветеранъёслэн огазеяськонъёссы, Киров но Пермь улосъёсын улӥсьёс. Куноос пулэсь «табань» вандо, «блинбей» шудо. Собере асьсэос ик зэмос табань пыжо, чай юо, гармошкаен но шудо-экто. Азьло Пусошурын ичигес калыкен ужало вал, табере 50 но солэсь трос куноосты огдыре пумитаны-утялтыны быгато ни. Татчы Глазовысь ужбергатӥсьёсмес гинэ но ӵошатскыны нуиськом, тумошо учкыны, кызьы куспазы вожвылъяськись вуз карисьёс, бычкы кырмыса, куаш вандо «табань».

Одно ик мыноно Октябрьской муниципал кылдытэтэ — со дано удмурт азьветлӥсьлэн Иосиф Наговицынлэн вордскем интыез. Отысь ик потэмын кылбурчи Александр Эрик. Та палъёсын ик — Трубашурын — вордскемын нырысетӥ нылкышно педиатр, учёной Александра Перевощикова, тодосчи Виктор Шибанов. Соос сярысь ваньзэ тодыны луоз черкогуртысь музее, библиотекае вуылыса. Омутница гуртысь культура юрт но — быдэс история. Азьвыл со школалэн юртэз вылэм, татын ай Иосиф Наговицын дышетскем. Али отын историе зымылыны луоз — пероен гожъяськыны но дышетозы, кылзӥськисьтэмъёсты кӧжы вылын сылытозы.

Та гуртэтӥ ик ортче Сибирь трактлэн оглюкетэз. «Омуты Сибирского тракта» турмаршрутэ трос калык ветлэ. Экскурсие вуэмъёс быгато арестантлэсь дэремзэ дӥсяны, пыдъёссэс кандал жильыосын кульчояны, вал уробое пуксьыса мыныны. Одӥг пол татын туж паймымон учыр тупаз. Огез кышномурт, арестантлэсь дӥсьсэ бордаз ӝиптэм, вал сьӧры вамышъя но бӧрдэ. Мар луиз, паймо мукет адямиос. Озьы экскурсие лыктэм кышномурт паймымон учырез вераз. Со, пе, Сибире келям арестантлэн кыдёкысь-кыдёкысь внучкаез луэ ни.

Та палъёстӥ каторжнойёс кошко вылэм. Соос сьӧры ик кияз пичи пиналэн мынэм кышномурт. Воргоронэз солы индылэм: эн мыны ни, кыле, мон огнам кошко. Ӵап со учырез адӟыны тупаллям Красногорск палась Глазысь базаре лыктэм кузпалъёс. Соослэн нылпизы вылымтэ. Картэз сьӧры Сибире кошкись кышномуртэ куриллям нылпизэ кельтыны. Соиз озьы нылзэ Удмурт шаере сётэм, нош ачиз арестантъёс сьӧры ик кошкем. Кӧня аръёс ортчемын со дырысен, нош кинлэн ке вӧсез али но буйгамтэ.

Ми ёросын арлы быдэ радъяськомы театр постановкаослы сӥзем конкурс. Ӵапак та учырез возьматӥзы Октябрьской культурая юртын ужасьёс. Быдэс залысь учкисьёс бӧрдӥзы кадь соку. Калыкез кырӟан-эктонэн гинэ шумпоттоно ӧвӧл, таӵе малпаськытӥсь учыръёс но кулэ.

Вань милям инкуазен кузьмам данъяськымон интыосмы: Красная Горка, Трёхструйный родник, кедръёсын рошша. Со сяна, Тимченко фондлэн юрттэмезъя Коӵышгуртысь культурая юртын усьтэмын Улэп куаралэн храмез. Ваньзэ тае адӟон понна одно ик Глазов пала вуылоно.


Сыӵе со — пуксёнэз тодӥсьтэм Светлана Викторовна. Пыд улаз берга музъем, гань-гань вамышъянэз но со уг тоды — котьку бызьыса, дыртыса. Ужан куспетӥм ӧй но валалля, кызьы Юляе быдэ вуиз, шуэ. Табере нылыз бызиз ни, Коротаевъёсты ӝоген песянай-песятай кароз.

— 2012-тӥ арын Глазовын музъем но корка басьтыны быгатӥмы, юртмес рос-прос лэсьтӥм но шумпотыса улӥськомы: городын кадь, но музъем вылын, мунчоед но, бакчаед но вӧзад. Картэным ми одӥг нуналэ вордскемын, висмы гинэ 5 ар. Котьку серекъясько вал: пенсие потон дырмы ӵош вуоз ай. Нош со пӧсь цехын ужаз но пенсие потӥз ни, монэ азьпалтыса кошкиз, — пальпотэ Светлана Коротаева.

Елена Скворцова

Туспуктэмъёс басьтэмын геройлэн архивысьтыз

Ангелина Снигирева
By Ангелина Снигирева Апрель 12, 2019 10:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<