Паймытъяз быдэс дуннеез

Ангелина Снигирева
By Ангелина Снигирева Апрель 26, 2019 10:32

23-тӥ апреле улонысь кошкиз Анатолий Васильевич Мамонтов — Удмурт Элькунлэн дано гражданинэз, Россиысь искусство удысысь дано ужась, Россиысь но Удмуртиысь калык артист, Трудовой Красной Знамя орденлэн кавалерез. Анатолий Васильевичлы 82 арес вал.

А. Мамонтов «Италмас» ансамбленыз

Нокин уз вошты

Владимир Лебедев, Удмурт Элькунысь академической хоровой капеллаысь кырӟась, Удмуртиысь калык артист:

— Анатолий Васильевич туж бадӟым профессионал но туж умой адями вал. Удмурт лулчеберетэз со кадь азинтыны быгатӥсь быдӟым артистъёсмы, дирижёръёсмы али ӧвӧл. Малпасько, соос будозы на, но Анатолий Васильевичез нокин но уз вошты.

А. Мамонтовен ми 20 арлэсь трос ӵош ужамы. Кунгож сьӧры ӵем поталлямы, странаетӥмы ветлӥмы, быдэс Удмуртиез ортчимы. Котькыӵе дыръёс вал. Куддыр кырӟан пумысен малпанъёсмы мукетгес вал, но ми котьку огкыл шедьтылӥмы. Со быдӟым дышетӥсь вал. Кырӟасьёсты, балетысь артистъёсты, оркестрантъёсты будэтӥз. Туж трос адями солы тау шуэ.

А. Мамонтов котьку аслэсьтыззэ лэсьтэ вал, номыр шоры учкытэк, ужзэ быдэстэ — та сямзэ котьку гажай. 1990-тӥ аръёсы, куке Россилэн но Эстонилэн алама кусыпъёссы вал, Москваын концерт сётӥмы. Милемыз программаысьтымы эстон эктонэз куштыны косӥзы. Анатолий Васильевич шуиз: эктон янгыш ӧвӧл, со культура, политика ӧвӧл. Эктонэз пуктӥм, калык туж умой пумитаз, бӧрысь тау каризы. Сыӵе учыръёс луыло вал.

Анатолий Васильевич кошкемен, удмурт культуралэн быдэс эпохаез кошкиз. Музъем небыт мед луоз солы.

Выжыкыл дуннеын улӥмы

Михаил Чернов, «Италмас» ансамбльысь артист:

— Быдӟым мастеръёс 100 арлы одӥг пол вордско, шуо. Анатолий Мамонтов ӵапак сыӵе вал, солэн кошкемез — Удмуртилы бадӟым ыштон. Удмурт шаертӥ концертъёсын ветлыкумы, калык сое туж умой пумита вал, аслэсьтыз дано пизэ сямен.

Анатолий Васильевичен 4 ар ужай. Дышетскеме бере «Италмасэ» интыяськи. А. Мамонтовлэн ансамблез мыным туж бадӟым школа луиз. Коллектив бадӟым ке но, со котькудӥныз кыл шедьтэ вал.

Удмуртиын со кадь номеръёс нокин уг пуктылы ини. Кузпалыныз — Леонора Викторовна балетмейстерен — соос огкылысь ужазы. Анатолий Васильевичлэн режиссёрской адӟонэз но туж зол вал. «Италмасын» постановкаос театрын кадь ортчылӥзы. Артистъёслэн учкисен кусып возьыны асьсэлэн кылзы вал. Концертной программа одӥг номерысь мукетаз лякытэн выжылӥз: эктонъёс кырӟанъёсын герӟаськемын вал. Постановкаосмес учкыса, милемлы шуылӥзы: тӥ, дыр, кыӵе ке выжыкыл дуннеын улӥськоды.

Мон малпасько, «Италмас» ансамбльлэн но А. Мамонтовлэн нимъёссы люконтэмесь луо.

Атай, эш, дышетӥсь, кивалтӥсь

Алексей Хитрин, «Италмас» ансамбльысь артист, Удмуртиысь калык артист:

— А. Мамонтовен ӵош мон 30 ар ужай. Со артистъёслы атай но, дышетӥсь но вал. Соосты со будэтэ вал: адями ыльнянь кадь лыктэ, нош Анатолий Васильевич солэсь пирог лэсьтыны быгатэ. Дышетӥз, кызьы кырӟаны, эктыны, дӥсяськыны… Анатолий Васильевичез бадӟым ансамбльёслэн кивалтӥсьёссы гажазы, тросэныз со эшъяськиз. Со кивалтэмъя «Италмас» ансамбль Советской Союзысь конкурсъёсын лауреат луылӥз. Быдэс Союзысь коллективъёс пӧлысь 1-тӥ инты басьтэ ай! Ансамбльмы Удмуртиысь Кун премилэн лауреатэз луиз, «Дружба народов» орден басьтӥз, академической ним солы сётӥзы. Ми кырӟаллям классикаез но, удмурт маскаръяськон кырӟанъёсты но. Солэсь музыкальной обработкаоссэ «Италмас» но Удмуртиысь хоровой академической капелла али но кырӟало на.

Анатолий Васильевичен кӧня даллашо вал, удмуртъёс озьы уг кырӟало, уг экто шуыса. Со критикъёслы пумит шуэ вал: сцена вылын ӝӧк сьӧрын кадь медам лу. Удмуртъёсты керпотӥсесь шуо ук, нош со меӵак верась вал.

1980-тӥ аръёсысен «Италмаслэн» хорез эктыны кутскиз. Хор ветлэ вал кырӟаса, шудон номеръёс кылдӥзы. Сое Игорь Моисеев, Москваысь быдэс дуннелы тодмо хореограф, адӟиз но паймиз: хорды, пе, эктэ. «Сон пастухов» номермы вал на. Пиос экто но умме усё, бӧрысь хорысь нылъёс веттан гур кырӟаса кошко но — сцена вылын эктӥсь нылъёс сыло ини. Та номер сярысь А. Мамонтовлэсь но И. Моисеевлэсь вераськемзэс кылӥ вал. Игорь Александрович шуэ: мынам, пе, «Ночь на Поклонной горе» казакъёслэн эктонзы вань. Казак изьыны выдэ но, чёртъёс пото. Уг, пе, тодӥськы вал, кызьы виссэ карыны, кызьы тон сыӵе герӟад ваньзэ. Огшоры но туж чебер адӟиське.

Ачиз но со огшоры адями вал. Котькуд гужем Удмуртиетӥ концертъёсын ветлӥмы. Ёрос центрын улӥськом, ӝытазе гуртъёсы потаськом. Нуназе шутэтскиськом: кин волейболэн, футболэн шудэ, кин чорыганы ветлэ. Анатолий Васильевич чорыгалляз но, милемын футболэн, волейболэн но шудылӥз. Нуназе — эш, ӝытазе ужын — кивалтӥсь. Дисциплина ласянь чурыт куронъёсыз вал. Со сюлмаськиз, ваньмыз мед профессионально луоз шуыса.

Туж жаль: али коллективысьтымы тросэз артистъёс Новороссийске кошкемын. Арнянуналэ гинэ бертозы, ватон нуналаз уз вуэ. Бӧрдо, пе, отын соос. Ми туж яратӥськом вал сое. Анатолий Васильевич кырӟанъёсыныз котьку улэп луоз: кырӟакумы сое тодамы вайылом. Малпасько, шонер луоз «Италмас» ансамбльлы солэсь нимзэ сётыны.

Ангелина Снигирева
By Ангелина Снигирева Апрель 26, 2019 10:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<