Одӥг шумпотон, куинь сюлмаськон

Ангелина Снигирева
By Ангелина Снигирева Апрель 25, 2019 16:59

Вуж Эгра гуртысь «Родина» хозяйство Грак ёросысь одӥгез кужмоез. Алигес отын роботэн скал кыскись ферма ужаны кутскиз, эшшо одӥг сыӵе гид ӝуто на. Но гурт одӥг ласянь азинске, мукет ласянь бере кыле: угось татын ФАП-сы, нылпи садзы, клубзы — кемалась тупатъямез-выльдэмез витё ни.

Вуж Эгралась ФАП

Та объектъёсты кылем арня пумын эскериз Удмуртилэн Тӧроез Александр Бречалов. Гуртоос ӝожтӥсько: Колхозмы ёросын одӥгез адӟем карымонэз, отын зол специалистъёс тыршо, ужасьёсмы асьмелэн, палэнысь утчано ӧвӧл. Нош медпунктмы, нылпи садмы, клубмы вераны возьыт — куашкан калэ вуэмын.
Вуж Эгралась ФАП борды та гуртысь но Ӟанкаысь (Гаранькино) 380 пала мурт юнматэмын. Татысь калыклэн тазалыксы понна 29 ар пала сюлмаське ни фельдшер Нина Гордеева.

— Медпунктмы тусызъя сокем урод уг адӟиськы кадь, со 1984-тӥ арын пуктэмын, — вера Гордеева. — Но со нокыӵе шунытэз возись материалъёсты кутытэк пуктэмын. Соин толалтэ пушказ туж кезьыт, гын сапеген, ыжгонлэсь зӧк кофтаен ветлӥсько. Толалтэзэ выжез ӵушылэм бере мучолое ик выж вылэ кынме. Соин но тазалыксэс эскерыны вуисьёсты, уката пиналъёсты, медаз кынмелэ шуыса, заман (ӝог) гинэ учкисько вал. Зэм, кылем арын 3 полэс шуныт кошкон гумыос лэзизы, озьы шунытгес ик луиз.
Фельдшер верамъя гуртэ выль медпункт пуктозы шуыса ог 10 аръёс талэсь азьло Ай, вераськон ӝутъязы вал. Но татчыозь номыр ӧз воштӥськы.
Нылпи садын но югдур умойгес ӧвӧл. Таиз 1982-тӥ арын ӝутэмын, со дырысен одӥг пол но рос-прос тупатъямтэ. Та вакытэ нылпи садэ 22 пинал ветлэ.

Нылпи сад

— Мон 9-тӥ арзэ та садикен кивалтӥсько ни, — вера Галина Крестьянинова. — Со дырысен одӥг копейка но садикмес тупатонлы ӧз висъяллялэ, таизэ кышъятозь-лякылытозь выльзэ пуктоно ни шуыса. Соин арлы быдэ асьме кужымен — ачим но воспитательёсы, милям картъёсмы — штукатур но, плотник но луиськомы — буяськомы, тупатъяськомы. Шифер липетмы зол пырдэмын ни, пасьёстӥз зор вияса, вӧлдэтъёсмы, борддоръёсмы сисьмылэмын. Выжмы нош кыӵе! Пу висъёсын макебыдӟа, чиньы гинэ ӧвӧл, нылпиослэн шудонъёссы тэрымон пасьёс кылдылэмын, отысь кезьыт пыре на. Соин пасьёсты скотчен лякылыса возиськом. Укноосмы но сисьмылэмын ни, йӧтылыны ик кышкыт. Со сяна, арлы быдэ, тулысысен сӥзьылозь, комакъёсын нерад луиськомы, соос нылпи сад котырамы каръяськыны ярато.
Гуртын клуб ласянь но сюлмаськон кылдэмын. Липетэз кытӥ-отӥ пасяськемын ни, зор дыръя клубын но зоре. Но бадӟымгес сюлмаськон — отысь выж.

Нылпиосын пумиськон

— Выжъёсмес туспуктэм вылысь учкид ке, мраморлэсь кожалод, чебер, узыр адӟиське, — шуэ клубен кивалтӥсь Татьяна Овсянникова. — Нош зэмзэ ке, со бетон плитаос. Клубмес ас быгатэмезъя, колхозмы 1974-тӥ арын лэсьтӥз. Сыӵе выженымы сэрен дискотекаос, эктон ужрадъёс ортчытыны ум быгатӥське, угось бетонысь тузон пурӟе, шоканы ик уг луы. Нош клубе гуртоос мыло-кыдо ветло. Праздникъёс дыръя 150 муртлы чаклам пуконъёс ик уг окмо. Эшшо ӟусъёс пуктылӥськомы на. Татын пиналъёс понна пӧртэм кружокъёс ужало, бадӟымъёс кырӟаны ветло. «Жильыртӥсь ошмес», «Эгра кенакъёс» ансамбльёсмы ёросын гинэ ӧвӧл, палэнын но пӧртэм вожвылъяськонъёсын вормыло. Тодӥськом, туэ шаерысьтымы унозэ клубъёсты тупатонлы коньдон висъяськиз. Нош ми выльдоно объектъёс пӧлы ӧм сюре — гуртамы ФАП-ез, нылпи садэз, клубез одӥг липет улэ карыса, юрт ӝутозы шуыса проект кӧня ке ар талэсь азьло дасямын вал ини уго.
Но Удмуртилэн Тӧроез А. Бречалов шуиз, нырысь ик саклык висъяськоз ФАП но нылпи сад пуктонлы. Тӧро оскытӥз, Вуж Эграла выль ФАП 2020-тӥ арын одно ик кылдоз ни. Но али валамон ӧвӧл на, со нылпи садэн одӥг липет улын луоз яке нимаз. Нош ку эграослэн выль клубзы кылдоз — тодмо ӧвӧл.

Ангелина Снигирёва

Ангелина Снигирева
By Ангелина Снигирева Апрель 25, 2019 16:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<