Нунал бӧрсьы нунал

Ангелина Снигирева
By Ангелина Снигирева Апрель 15, 2019 15:11
Гурт ульча.

ГЛАЗОВ

Тазалыксэс юнматӥзы

7-тӥ апреле Глазов городын ортчиз капчи атлетикая 30-тӥез ӵошатскон.

Ужрад сӥземын вал Космонавтикалэн но Тазалыклэн нуналъёссылы. Ӵошатсконэ пыриськизы Глазов городысь но ёросысь, Балезино, Кез, Пичи Пурга, Сарапул ёросъёсысь, Ижевск но Нефтекамск городъёсысь 220 пала бызьылӥсьёс. Спортсменъёс 4, 10 но 20 иськеме бызьылӥзы. Ас ёзо эшъёссы пӧлын вормизы А. Зямбеков (Ижевск), В. Семидел (Кез), А. Белослудцев (Сарапул), Н. Корепанова (Глазов), Е. Матушкина (Ижевск), Ю. Рудина (Яр) но мукетъёсыз. Тужгес арлыдо спортсменъёс вал 1940-тӥ арын вордскем Галина Копылова (Ижевск) но 1935-тӥ арын вордскем Николай Суворов (Киров улос).

БАЛЕЗИНО

17 нунал ӵоже кизёзы

Ёросысь агрономъёс но механизаторъёс дышетскон семинаре люкаськылӥзы. Озьы ёрос администрациысь гурт удысъя управление хозяйствоослэсь гырон-кизён вакытлы дасяськемзэс эскериз.

Туэ уйпал ёросын 56 сюрс гектар вылын кизьыны чаклало, кылем арлэсь со кӧнялы ке ӧжытгес. Та нуналлы хозяйствоос 60 тонна ю-нянь кидыс, 31 тонна одӥг аръем турын кидыс но 5,5 тонна трос аръем турын кидыс дасязы ни.

Ёросысь техника эскеронъёс пыр потэ на. 87 процентэз тракторъёс ӵуказе ик бусые потыны дасесь. Туэ балезиноос кизён ужъёссэс 17 нунал куспын йылпумъяны ужпум пукто.

ДЭРИ

Контейнеръёс тырмо

Дэри ёросысь куд-ог гуртъёсын уг тырмо на жаг куян контейнеръёс. Та ужпумез сэрттыны-пертчыны соослы юрттӥсько «Калык фронтлэн» ёзчиосыз.

Кылсярысь, шуге-леке вуэмын вал Забегалово гуртын улӥсьёс — контейнеръёс тырмымтэен, жуг-жаг тӧлъя пазяськылӥз. Общественникъёс вуылӥзы, югдурен тодматскизы. Кема ик дыр ӧз ортчы — гуртэ эшшо 3 контейнер пуктӥзы. Озьы соос оглом 5 луизы.

Гуртоос табере ганяк кариськизы — кырсьсы кыре-буре уг пазьгиськы ни. Кылиз на, пе, контейнер пуктылон интыез зор-котъёслэсь шобыртыны.

ВАВОЖ

Гуртэз яратон

«Театр но кырӟан» фестиваль бордаз люказ ветеран коллективъёсты. Вавожъёс ужрадзэс сӥзизы ёрослэн 90 ар тырмонэзлы но Россиын ортчись Театрлэн арезлы.

Ӟамбайгуртсэс яратэмзэс чебер крезьгур пыр веразы «Арама» коллективе ветлӥсьёс. Ӟеч адямиоссы сярысь кырӟазы Какможысь кенакъёс, Брызгалысь Баринова но Зорина Татьянаос гуртсы сярысь кылбуръёс гожтӥллям, соослы гур гожтэм В. Морозов. «Нёжало шаере» кырӟанзэс быдэстӥзы Водӟиысь «Купанчаос».

Уноез артистъёс сценкаоссэс юморен герӟазы — гурт улонэз серемес учыръёс пыр возьматӥзы.

ИЖЕВСК

Куинь полэс шумпотон

Ижын куиньмо пиналъёс вордскизы.

Удмуртиысь Тазалыкез утёнъя министерстволэн ивортэмезъя, Ижысь Перинатальной центрын туэ ар понна нырысьсэ куиньмо пиналъёс вордскизы: 2 ныл но пи. Та вакытэ больницаысь специалистъёс соосты нимысьтыз эскерыса возё. Кӧня ке будӥзы ке, анаенызы ӵош доразы лэзёзы.

Пусйыны кулэ, 2018-тӥ арын Перинатальной центрын 2 куиньмоос но 89 пар эгызоос вордскизы.

КЕЗ

Визьзэс сыназы 2 час

Ёрос библиотекаын «60 секунд» визь сынан ортчиз. Кез ёрослэн историез сярысь тодон-валанзэс возьматӥзы арлыдоос.

Люкаськиз пӧртэм гуртъёсысь 14 команда. Шудон 3 турен ортчиз — «История но учыръёс», «Кезысь адямиос», «Звезда» газетлэн бамъёсаз» — котькудаз быдэн 12 юан чузъяськиз. Одӥг юанлы валэктон шедьтон понна 60 секунд гинэ сётӥськиз ке но, шудон 2 час ӵоже кыстӥськиз. Озьы вожвылъяськонын вормиз «Унтем» команда, 2-тӥ интые потӥзы Бадӟым Олыпысь арлыдоос, Кезысь «Восточный» но Кулигаысь «Истоки» командаос куспазы 3-тӥ интыез люкизы. Вань командаос ужрадлэсь ӟеч мылкыд но трос тодон-валан басьтӥзы.

МОЖГА

Аслаз тусыз

Городысь нылпи библиотекаын Ф. Васильевлэн произведениосызъя конференция ортчиз.

Удмурт литератураез данъяса, Ф. Васильевлэн вордскемез дырысен 85 ар тырмонэзлы сӥзьыса, Можга городысь нылпи библиотекаын ужасьёс но удмурт кылъя но литературая дышетӥсьёс таӵе ужрад ортчытӥзы. 1-тӥ люкетаз бадӟым классъёсын дышетскисьёс квест шудонэ пыриськизы. Озьы соос Ф. Васильевлэн улэм-вылэменыз но творчествоеныз мургес тодматскизы. Нош 2-тӥ люкетэз сӥземын вал кылбуръёсызлы, соослы дунъет сётонлы. Вормисьёс луизы 1 номеро школаысь 9-тӥ классын дышетскисьёс У. Вознякова но А. Безенцева. Та ужрад дыръя ик радъямын вал книгаосын «Аслаз тусыз, аслаз сямыз» адӟытон.

СЬӦЛТА

Дартсэн шудӥзы

Черкогуртэ дартсъя ӵошатсконэ люкаськылӥзы Балезино, Эгра, Кизнер, Кияса, Сюмси но Сьӧлта ёросъёсысь 11 командаос.

Таӵе ужрадэз сьӧлтаос 2-тӥ арзэ радъяло ни. Озьы буре ваё ёросысь ужбергатӥсьсэс А. Тураевез. Воргорон трос сюлмаськиз ёросын спортэз азинтон, черкогуртысь улон-вылонэз ӟечомытон понна. Пиосмуртъёс пӧлын устоез луиз Сьӧлталась А. Степанов, кышноос пӧлын — Сьӧлта ёросысь Выль Мӧнья гуртысь О. Никифорова. Командаос пӧлын 1-тӥ но 2-тӥ интыосты басьтӥзы Сьӧлталась спортсменъёс, 3-тӥ интыез куспазы люкизы сьӧлтаос но эграос.

Ужрадэз ортчытыны юрттӥз А. Тураевлэн кузпалыз Е. Тураева.

ШАРКАН

Калыкез серекъятӥзы

Черкогуртысь культурая юртын ортчиз Серекъянлэн нуналэзлы сӥзем «Шудэлэ тӥ, серектэ» ёроскуспо фестиваль.

Калыкез серекъятӥзы Шаркан, Юкаменск ёросъёсысь командаос. Гуртысь артистъёс быгатонлыксэс эскеризы пӧртэм жанръёсын: стэнд-ап, серемес миниатюра, крезьгуро серемес зарисовка, пародия. Озьы ваньмызлэсь усто юморез шӧдо вылэм Юкаменск ёросысь Ёжгуртысь «Маска» коллективе ветлӥсьёс. 2-тӥ луизы Шаркан ёросысь Шудӟавӧль (Кельдыш) гуртысь «талантищеос», Вортчалась «вуюисьёс» 3-тӥ инты басьтӥзы. Усто режиссёрен лыдъямын «Вуюись» коллективен кивалтӥсь Л. Пьянкова, устоез воргорон актёр луиз Шарканысь пинь эмъясь П. Вахрушев, нылкышноос пӧлын — Кулакысь библиотекарь Н. Перевозчикова.

ЭГРА

Кизилиез яркыт пиштӥз

К. Митрей нимо ёрос библиотекаын буре вайизы Фаина Усковаез.

Ёрослэн дано муртэзлы та нуналъёсы 70 арес тырмысал. Ар талэсь азьвыл со улонысь кошкиз. Но нылпиослы сӥзем кырӟанъёсыз али но чузъясько удмурт радио пыр, кылбуръёссэ лыдӟо ёрос ужрадъёсын. Уно аръёс ӵоже кивалтӥз «Удмурт Кенеш» огазеяськонлэн ёросысь ёзэныз. Со вакытэ юнматэмын вал удмуртлыкез ӝутыны юрттӥсьёс понна К. Митрей нимо ёрос премия. Нош али ёрос библиотекаын ужасьёс Ф. Усковалэсь кылбуръёссэ люкан бордын тыршо, матысь дыре сое нимысьтыз бичетэн поттыны малпало.

ЮКАМЕНСК

32 арганчи

Черкогуртысь культурая юртын «Шуд, Юкаменскысь арган!» ёрос конкурс ортчиз. Вашкала инструментэн шудӥсьёсты уноятон понна таӵе ужрадзэс юкаменскъёс 5-тӥзэ орчытӥзы ни.

Шудыны быгатэмзэ возьматыны мылкыд кариз 32 адями. Озьы пиналъёс пӧлын устоез арганчи луиз Ёжгуртысь Т. Усеев, бадӟымъёс пӧлын — Красногорскысь А. Поторочин, со ик О. Соловьёваен валче дуэтын но вормиз, ансамбльёс куспын усточи луиз Пискорысь «Ӟардон» нылпи ансамбль. Дунъясьёслэн нимынызы пусъемын Пышкетысь «Непоседы» нылпи коллектив.

ЯКШУР-БӦДЬЯ

Устоез скал кыскись — воргорон

Вуж Каравай выселокысь фермаын скал кыскисьёс куспын ёрос вожвылъяськон ортчиз. Тодон-валанзэс возьматӥзы пӧртэм хозяйствоосысь 8 устоосыз ужасьёс. Нырысь-валысь ӵошатскисьёслэсь пудоез сюдон, солэсь тазалыксэ чаклан ласянь тодон-валанзэс учкизы. Бӧрысь соос скал кыскон аппаратэз ӝог но шонер сэрттыны-бичаны быгатэмзэс возьматӥзы, скал кыскон технология сярысь веразы. Озьы устоез скал кыскись луиз Сюровай гуртысь «Исток» хозяйствоысь А. Помосов, 2-тӥ интые потӥз Варавайысь «Родина» колхозысь Л. Перерешина, Н. Пономарёва 3-тӥ инты утӥз — таиз «Старозятцинское» эштосысь. Конкурсын вормем скал кыскись ёрослэсь данзэ элькун ӵошатсконын утёз.

Иворъёсты бичазы А. Снигирева, В. Емельянова, Э. Кумачёва

Ангелина Снигирева
By Ангелина Снигирева Апрель 15, 2019 15:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<