Небыт кыл бурмытэ

Ангелина Снигирева
By Ангелина Снигирева Апрель 24, 2019 12:03

Небыт кыл бурмытэ

Алина Николаевна КРАСНОВА — медицина наукаосъя кандидат, Ижысь лулсэр висёнъёсты эмъянъя элькун нылпи больницаысь ёзэн кивалтӥсь. Секыт висёнъёсты бурмытон понна выль амалъёсты ужаз кутэ. Невролог луыса ужа на Ижысь 6 номеро поликлиникаын. Озьы ик нылпи юртысь пичиослэсь тазалыксэс чакласа возе.

А. КРАСНОВА

Ерпечка

Пичи дыръяз Алина Николаевна ӧз ик малпалля, куке-соку врач луоз шуыса. Песянаез Надежда Краснова Быдӟым ож вакытэ госпитальын медсестра вал, отӥяз Сарапулысь огаз больницаын быдэс даурзэ фельдшерын тыршемын. Анаез Ирина Краснова Нырысетӥ элькун больницаын врач-лаборант луыса ужа. Татысь эмчиосты Алина Краснова пичи дырысеныз тодма. Анаез угось ялан сьӧраз кутылӥз, ерпечка луэмысьтыз, нылзэ огназэ келляны ӧз дӥсьтылы. Нылашез больницаысь омыр, пӧртэм тӥрлык бордаз кыскылӥз ке но, аслыз вералляз: калыкез йӧнатытозь, мон нылпиослы книгаос суредалляло. Суредам дунне — чебер выжыкыл дунне, аслым ачим дунне кылдыто, шуылӥз.

— Ачим соку уг ик тодӥськы вал, со художник-оформительлэн профессиез шуыса, — вера Алина Краснова. — Но карандаш, кисточка киысьтым ӧз усьылэ. Суредаськонъя кружоке но ветлыны кутски. Зэм, интыям кема пукыны ӧй чидалля. Ой, шаян вал ук мон. Кечыръяськытэк кылем кенер, писпу городын ӧз кыле кадь. Атаслэн араз вордскемын, соин, дыр. Ымы но ноку ӧз пытсаськылы. 2-тӥ класс понна дневникме усьтӥсько ке, али сереме ик потэ. Дышетскеме понна «витьёс» но «ньыльёс» пуктылэмын, нош асме школаын воземе понна дневниклэн котькуд бамаз дышетӥсьлэн пыкылэмъёсыз. Урокын я вераськисько, я, пуконэз тӥятозь, интыям бергасько. Сям сыӵе: ваньзэ ӝог лэсьтоно. Задачаосты лэсьтӥсько но тэк пукыны уг чидаськы мӧзмыса. Мар карыны ёрмыса, огзэ, кыкетӥзэ эшме ёртӥсько. Ватсаса уж сётыны дышетӥсьлэн тодаз ӧз лыктылы-а, мар-а.

Но дышетӥсьёс монэ яра-тылӥзы. Киысьтым книгае ноку ӧз усьылы. Котьку тырши, учебникын сяна, эшшо мукет книгаосын бугыръяськыны. Кин ке доска азьын кыӵе ке темаез валэктэ ке, бордазы итӥськылӥ. Тодон-валанме, юлтошъёсылэсь кытӥ-отӥ визьмогес луэмме возьматэме потылӥз, лэся (серекъя).

Пичи дыр

Будэмъям тунсыкъяськыны кутски сюратаелэн уженыз. Со сюрес вылын кылдэм учыръёсты эскерылӥз, следовательын ужаз. Юрист, экономист луон модае потӥз. Егитъёс та ӧръёсы кыстӥськемен но, шуи: адвокат луо, калыкез утё. Адвокатлы математика но, химия но кулэ уз луэ шуыса, та предметъёс шоры чиньы пыртӥ кадь учкыны кутски. Озьы 9-тӥ классын химиен ӧжыт гинэ «кык» ӧз поты. Собере анай-атай шуизы: дыр вуиз бырйыны, кин азьланяз луод. Ижысь медакадемие пыроно, ужмес азинтоно, шуиз песянаймы. Аслаз угось врач луон быдэсмымтэ льӧль малпанэз вал. Мылкыдъёссылы сётски. Классэн кивалтӥсьмы, тае кылыса, алыны ӧдъяз: уд быгаты, химиез но аналтӥд. Соку анае пумитаз вазиз: дыр вань на, пельтӥз кыскыса но, ӝутомы, визь тыромы. Ачим но асме киям кутӥ, сабыргес кариськи. Химиялы дышетӥсен но удалтӥз (али ке но эшъяськиськом). Та предметэн «витьёслы» гинэ дышетскыны кутски. Паймисез соку трос вал.

Нялтас вераса, Алина Николаевналэн выныз атайзылэн сюрестӥз мынӥз: со али Ижысь адвокатъёслэн палатаязы адвокат луыса ужа. Алина Николаевна со шоры учкемезлы быдэ малпа: ярам ай, та ӧре ӧй кошкы.

Стипендиат

Ижысь медакадемие пырыны дыр вуиз но, юан кылдӥз: кыӵе факультетэ? Терапевт я акушер-гинеколог луоз шуыса малпанъёсыз вал. Но соку анаезлэн тодмоосыз ӵектӥзы педиатрияя факультетэз бырйыны: нылдылэн быгатонлыкъёсыз бадӟымесь, нош та удысын умой врачъёс уг тырмо, отчы мед мыноз. Соку Алина нырысьсэ ас вылаз мертаз кадь педиатрлэсь профессизэ. Со малпан аслыз но кельшиз. Та ик луиз нылпиосты эмъянэн герӟаськемез. Со сярысь огпол но ӧз жаля. Дышетскон борды рос-прос басьтӥськиз. Умой отметкаос басьямез, медакадемилэн мероприятиосаз пыриськемез, студентъёслы адӟем карымон луэмез понна, 5-тӥ курсын дышетскыкуз, солы сётӥзы президентлэсь стипендизэ.

Инкуазез яратэ

— Удмуртиысь президентлэн резиденцияз ӧтизы, студентъёслэн нимынызы кыл верано луод, шуизы, — тодаз вае Алина Николаевна. — Ачим мазэ-созэ уг валаськы на. Оло шумпотод, оло куректод. Александр Волков, киосме кутылыса, ӟечкылаз, соку гинэ буйгай. Студент понна со вакытэ толэзьлы быдэ 400 манет басьтон — со туж бадӟым шумпотон вал. Но мон уксёлы ӧй ёрмылы. 3-тӥ курсысен угось медсестра луыса нылпи больницаосын ужалляй. Мынам уксёме быдтыны дыры ик ӧй вал.

Медакадемиез горд дипломен йылпумъям нылмуртлы наукая проректор Николай Кирьянов ӵектӥз ординатураез врачъёслэсь тодон-валанзэс будэтонъя кафедраын ортчыны.

— Соку кафедраен кивалтӥз тодмо профессор Маргарита Колесникова, — шуэ Алина Николаевна. — Со монэ врачез сямен будэтӥз. Солы луыса мон эскеронъёс борды басьтӥськыны дӥсьтӥ, аслым оски. Озьы наукае сюрес лёги, аспирантурае пыри.

2001-тӥ-2008-тӥ аръёсы Россиын 15-17 аресъем нылпиослэн тазалыксы шӧдскымон лябӟыны кутскиз. Удмуртиын югдур пӧртэм ӧй вал. Быдэ вуымтэослэн ӝуш, сюлэм висёнъёссы нырысетӥ интые потӥзы. Лыоссы, быгытъёссы вылэ ӝожтӥськыны ӧдъязы. Тазалыксэс утён, умоятон понна маке лэсьтоно вал. Соку Алина Николаевна эскероно кариськиз Камбарка ёросысь нылпиослэсь тазалыксэс. Та ёрос со вакытэ Удмуртилэсь люкиськемын вал, шуыны луоз. Машиностроительной заводзы рос-прос уг ужа. Уж шедьтыны шуг. Гурт хозяйствоос кӧня ке гинэ. Шаеренымы герӟась выж ӧвӧл — паромен трос уд ветлы. 10 процентэз семьяос юо, нылпиос но, анай-атайёссылэсь адӟем карыса, урод сямъёсын вазь ик кушласько. Ӵошатон вылысь Ижлы матысь Якшур-Бӧдья ёросысь нылпиосты кутӥз.

Та эскерон борды басьтӥськемзэ тодыса, Удмуртилэн президентэз егит аспирантэз эшшо огпол стипендиен пусйиз. Со уката кужым сётӥз малпанъёссэ йылаз-пумаз вуттыны.

— Юнмамтэ пиналлэн тазалыкез вылын уката зол шӧдӥське начар улэм-вылэм, — шуэ врач. — Соку та 2 ёросъёсын нырысьсэ котыр ласянь эскеремын вал нылпиослэн тазалыксы, улонлы, пӧртэм воштӥськонъёслы макем дась луэмзы. Шараяськиз: дасесь ӧвӧл. Нылъёслэн тазалыксы начаргес, пиослэн сярысь. Котькуд 3-тӥез пинал тамак кыске. Умой сиськон, пӧртэм ужрадъёсы пыриськон тазалык вылын умоен шӧдӥське шуыса возьматӥз Якшур-Бӧдья ёрос.

Алина Краснова эскерон ужъёсыныз, кандидат уженыз Москваын ортчем калыккуспо конференциосы но пыриськылӥз. Сое дунъязы шаерамы но. Нылпиослэсь тазалыксэс утёнъя программа кылдытыкузы, троссэ ӵектонъёссэ ёросъёсын кутӥзы. Кылсярысь, 80 процентэз 15-17 аресъем нылпиос висёнъёссэс ватыса возё бере, соосты золгес эскерыны-чакланы кутскизы. Ёросъёсын кылдӥзы подростковой кабинетъёс. Нылпиосты дунтэк кружокъёсы, секциосы юнматӥзы, кулэтэмез сярысь малпаськыны дырзы медаз кыльы шуыса.

Анай

Алина Николаевна отӥяз но наукаен выроз шуыса кафедраын шораз учкылӥсьёс вал. Но со семья кылдытӥз.

— Эшъёсы пыласькыны ӧтизы, — тодаз вае нылкышно. — Учкисько но, руль сьӧрын тодмотэм пиосмурт. Руслан, пе. Мон машиналэн мышказ пукси бере, туссэ рос-прос адӟыса ӧй вутты. Нош со синучконэтӥ монэ ялан чаклам, та мынам кышное луоз, малпам. Ӝоген кураз. Зэм, соку ик верай: ныл фамилиме уг вошты. Врачъёс пӧлын, наукаын мынам нимы тодмо ни вал. Трос наукая статьяосы поталлязы. Соин но фамилиме воштонлы мыр-мыр пыкиськи. Русланлы нырысь-валысь та ӧз кельшы. Кин тодэ, али но, оло, сюлэмыз вырӟылэ. Но 2 нылъёсмы атайзылэсь нимзэ-тулзэ нулло. Кин ке дорамы куное лыктэ ке, Гибадуллинъёс доры мыном ай, шуо. Озьыен, ми одӥг семья, мон-тон шуыса люконэз ум тодӥське.

Егит анай

Нырысетӥ нылыз вордӥсь-кем бере Алина Николаевна декретын пукыны малпа вал. Но 7 номеро больницаысь маза ӧз сётэ. Маргарита Колесникова профессорлы вазиськиллям, кинэ, пе, ӵектоды ужаны. Со дэмлам Алина Красноваез. Ӝыны нуналлы ке но ужаны поталэ, шуизы солы. Но больницае пыриськод ке, отысь, кӧня ке час улыса гинэ, уд поты. Соку угось татчы быдэс городысь аллергиен, гастритэн но мукет секыт висёнъёсын курадӟись нылпиосты вуттылӥзы. Куд-ог врачъёс, трос ужез чидатэк, мукет азе кошкылӥзы.

— Картэлы тау, — шуэ Алина Николаевна. — Руслан нырысетӥ нылынымы но, кыкетӥеныз но (таизлы али 2 но ӝыны арес) возиськонэз-утиськонэз ас вылаз басьтӥз. Мон ӵукнаысен ӝытозь ужасько, нош со — ӝытысен ӵук-наозь. Соин ик нылъёсты со будэтӥз. Мон солы толэзьем нылмес но оскыса кельтӥсько вал: сюдоз, дӥсялоз. Огпол но ӝожтӥськемез ӧвӧл, мукет пиосмуртъёслэн кышнооссы нылпиосынызы пуко, сиён пӧрало, корка утялто шуыса. Руслан дышетскемезъя инженер, но инженер луыса нокытын но ӧз ужа. Туж яратэ пӧраськыны. Мар но уг малпа, маин но уг кунояты! Мынам пӧраме солэнэз вӧзын воксё бездыт адӟиське. Но мон но пумен пӧраськон искусстволы дышисько ни. Русланлэн повар луыса ужамез потэ. Соин ик али та удысын ассэ эскере. Со валамен, юрттэмен, медицинаын мон будыны-ӝутӥськыны, отӥяз неврологлы дышетскыны быгатӥ. Али ке но тодон-валанме будэтэмысь уг дугдӥськы. Россиын ортчись пӧртэм конференциосы но семинаръёсы пыриськисько. Врач ваньзэ тодӥсько ни шуэ ке, озьыен, со кизилияське, йыроме но будэмысь дугдэ.

Эмчи

Диагноз ӝог пуктыны быгатонлыкъёссэ адӟыса, анай-атайёсын ужаны пӧрмытэмзэ синйылтыса, коллективен огкыл шедьтэмзэ шӧдыса, Алина Красноваез ёзэн кивалтӥсе пуктӥзы. Зэм, ӝоген 7 номеро нылпи больницаын реорганизация ортчиз — та больницаез огазеязы лулсэр висёнъёсты эмъянъя «Нейрон» элькун больницаен. Татын но Алина Николаевна ассэ умоен возьматӥз, татын но ёзэн кивалтӥсь луиз. Кивалтэм сяна, стационарысь нылпиосты эскере-эмъя. Анай-атайёслэсь ӵемысь кылоно: кытӥ но ӧм ветлэ, кыӵе но врачен ӧм пумиське — юнме дыр быдтӥм, Алина Николаевна гинэ диагноз пуктыны, югдурмес капчиятыны быгатӥз.

Кузпал

— Адямиосын ужаны капчи ӧвӧл. Кин гинэ тон доры медам пыры, со аслэсьтыз пытьызэ тынад мылкыдыд вылын кельтэ ук. Котьку чакласьконо луэ, кыӵегес адями тон доры пыриз. Угось адямиен со кылын вераськоно, кудӥныз со тонэ умойгес валалоз, тонэ рос-просгес кылоз. Эмъянын кылон-шӧдон туж кулэ угось. Анай-атайлы валэктыны быгатэм бордысь потэ пиналлэн тазалыкез. Куалектэменызы мумы-бубыос куддыр врачез уг ик кыло кадь. Ми доры угось ляб пиналъёс вуо, куддыр туж секытъёссэ ваё. Сыӵе дыръя ачид котькыӵе жадемын мед луод, но нылпиез но, анай-атайзэ но буйгатыны кужым но мылкыд шедьтоно.

Берло дыре ӵем пумиськыны кутскизы висьылӥсь йырзы, ӝутӥськем давленизы вылэ пичиысен ӝожтӥськись нылпиос. Милям ужмы — солэсь мугзэ тодыны. Кин ке йырсазьзэ ыштылыны кутске. Ӵемысь али школаосысь ик шуге-леке вуэмъёсты дорамы «скороен» вутто. Школаын нагрузка йылэ ке, анай-атаез пиналзы азе тросгес куронъёс пукто ке, ляб нылпи висьыны кутске. Котькуд анай-атай тырше угось, солэн пиналыз, ачиз сярысь, визьмогес, кужмогес, умойгес мед луоз шуыса. Но вань нылпиос сыӵе луыны уг быгато. Эшшо ке дышетӥсьёс куро на умой луыны. Нылпи тырше ке но, уг чида ни. Кин ке изьыны умой уг быгаты, кинлэн ке давлениез шудыны ӧдъя, кин ке куалекъяны кутске. Соин ик анай-атайёслы шуэм потэ: ми йӧнатомы, но та висён толон ӧз бугырскы, со ӵуказе ик уз ортчы. Тӥ нылпиды шоры учкондэс воштыны кулэ. Неврологиен герӟаськем висён — со аппендицит ӧвӧл: вандӥд но быриз. Нылпи мае ке уг лэсьты ке, со одно уг возьматы на, азьтэмъяське шуыса. Нылпиды шудо мед луоз шуыса, оло, асьтэ куронъёстэс воштоно. Нылпиос сотэк но весь парта я компьютер сьӧрын. Соослэн тыбыръёссэс но шонертэмзы уг луы ни. Тыбырзы купырскемын, йырвиымазы вир умой уг лыкты. Азьвыл урамын уногес шудӥськомы вал.

Эскерись

Лулсэр висёнъёсты эмъянъя элькун больницаын тужгес секыт висисьёс — со эпилепсиен но ДЦП-ен курадӟисьёс. Берлооссэ эмъян понна татын нимысьтыз саклык висъяське. Алина Николаевна али басьтӥськиз ботулинотерапия борды. Тазэ туннэ, татын сяна, частной клиникаосын гинэ лэсьто. Дуно усе угось. Ботулинлэсь токсинзэ кулэ интые но тырмыт пуктоно. Соку со пиналлы кӧня ке толэзьлы ке но шонертӥськыны, эгесысьтыз потыны, бурдъёссэ вӧлъяны сётэ. Ӵапак сыӵе дыръя массаж, гимнастика лэсьтоно, мукет юрттӥсь амалъёсты уже кутоно.

— Воксё ветлыны быгатӥсь-тэм пинал вамыштыны ӧдъя ке, шуген ветлӥсез шонер-тӥське ке, талэсь бадӟым шумпотон ӧвӧл, — шуэ Алина Николаевна. — Нош анайёссы макем лӧпто. Нылпиос асьсэос но шумпото. Соин ик та терапиез больницаямы пыӵатоно кариськимы.

Алина Красноваез коллективын туж гажало. Со кивалтыны кутскемен, врачъёс кошкемысь дугдӥзы. Но татын сяна, солэсь визь-кенешсэ ялан возьмало мукет больницаосын но. Алина Николаевна эскерыса возе нылпи юртысь пиналъёсты. Ижысь 6 номеро нылпи больницае но туж куризы кутскыны. Табере отын но приём нуэ. Ку дорзэ адӟыса вуттэ на, паймоно.

— Нылпилэсь школаын кыӵе отметка басьтӥд шуыса юан бордысь гинэ яратон уг поты. Бадӟыменыз нылыным ми урокъёс ӵош лэсьтӥськом ик. Таиз мынам уже. Но яратонлэн тупатэм дырыз ӧвӧл. Нылъёсы вӧзтӥ ортчыкум, мон котьку соосты ӟыгыртӥсько, чупасько. Соин ик уж дурын но мон тодӥсько, соос шӧдо яратэмме.

Кузпалэным огкылэ вуимы: шутэтскон нуналъёсы огмы но нокытын но ум ужалэ, семьяен дырмес ортчытомы. Озьы эшъёсын люкаськиськомы. Куазь умой дыръя одно ик инкуазе потӥськомы. Дэмен малпаськомы, мар ческытсэ пӧраны. Туж потэ азьланяз но ӟеч анай но кузпал, кивалтӥсь но врач огдыре луэме.

Елена Сараматова

Туспуктэмъёс басьтэмын геройлэн архивысьтыз

Ангелина Снигирева
By Ангелина Снигирева Апрель 24, 2019 12:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<