Музъем туж чебер!

Ангелина Снигирева
By Ангелина Снигирева Апрель 12, 2019 10:12

Кызьы возьматӥз «Советской Удмуртия» Юрий Гагаринлэсь космосэ лобемзэ? Мар сярысь гожъяз? 1961-тӥ арын 12-тӥ апрель бере потэм номеръёсыз быдэсак сямен ик сӥземын та учырлы. Отын печатламын «Ю. А. Гагаринлэн верамез» материал — отын со вера выжыосыз, космосэ вуылэмез сярысь.

«Советской Удмуртия» 1961-тӥ ар

Гажано эшъёс! Тросэзлэн тодэмзы потэ мынэсьтым биографиме. Кызьы мон лыдӟи газетысь, Америкаысь нодтэм адямиос, Гагарин князьёслэн кыдёкысь ӵыжы-выжыоссы, лыдъяло, мон соослэн кыӵе ке ӵыжы-выжызы луисько шуыса. Но мон соосты шум уг потты. Мон огшоры советской адями. Вордски 1934 арын 9 мартэ колхозниклэн семьяяз. Вордскем интые — Смоленской область, Гжатской район… Мынам анай-атайёсы революцилэсь азьло вал куанер улӥсь крестьянъёс. Мынам песятае но куанер крестьянин вал, ми пӧлын нокыӵе князьёс ӧвӧл…

Мон туж шудо, юн тау карисько асьме партилы, асьме правительстволы та лобанэз мыным оскемзы понна. Та подвигез мон лэсьтӥ асьме Родина понна…

Лобон азьын мынам мылкыды туж ӟеч вал. Та лобонлэн умой йылпумъяськонэзлы юн оскылӥ. Техника туж умой, оскымон.

Лобыку озьы ик мылкыды усто вал.

Активной участокын, перегрузкаослэн, вибрацилэн но мукет нагрузкаослэн действизы дыръя мынам мылкыды озьы ик умой вал но лобыны сётэм программая ужаны быгатӥ.

«Советской Удмуртия» 1961-тӥ ар

Орбитае потэм бере, ракета-носительлэсь люкиськем бере, кылдӥз невесомость. Солэсь действизэ вакчи дырлы мон азьвыл ик шӧдылӥ ке но вал ини, нырысь вакытэ со кыӵе ке умойтэмгес кадь потӥз. Но ӝоген солы дыши но лобыны сётэм программая ужай. Мынам аслам малпамея, невесомость организмлэн ужаны быгатонэзлы, физиологической функциосты быдэсъянэзлы уг люкеты… Лобыкум сиськи, ву юи, Музъемен вис карытэк кусып вози. Мон эскерылӥ корабльысь оборудованилэсь ужамзэ: даннойёсты Музъем вылэ ивортылӥ но бортжурналэ но магнитофон вылэ гожъяй. Вань лобытозям, мылкыды туж умой вал…

Собере лобонлэн программаезъя сётэмын вал лэзькыны команда. Включить каремын тормозной двигательной установка но тупатэмын сыӵе ӝоглык, кудӥз кулэ корабльлы Музъем вылэ васькон понна. Музъем вылэ пукси но мон шумпотыса пумитай родной советской адямиосты. Пукси азьвыл ик чаклам интые.

Кӧня ке кыл вераме потэ космосын дыръя адӟемъёсы сярысь.

175-300 километр кемысен Музъем туж умой адӟиське. Музъемлэн вылыз сыӵегес ик адӟиське, кыӵе сое адӟиськом, реактивной самолётъёсын вылӥетӥ лобаку. Туж умой адӟисько бадӟымесь гурезьёс, шуръёс, нюлэсъёс, ярдуръёс, островъёс. Умой адӟисько Музъемез шобыртӥсь пилемъёс, со пилемъёслэн Музъем вылысь вужеръёссы. Инбам тём-тём пеймыт. Та инмын кизилиос яркытгес адӟисько. Музъем туж чебер, чагыр адӟиське.

Вужерысь потыку, шунды адӟиськиз. Со пиштӥз Музъемлэн атмосфераез пыр. Татын со ӧжытак мукетгес ини. Музъемлэн самой инвожоез адӟиське яркыт ӵуж-гордалэс. Собере пумен адско радугалэн вань буёлъёсыз — чагыр, лыз, фиолетовой но пеймыт. Музъемлэн вужераз туж ӝог пыроно. Соку ик тём-тём пеймыт луэ но, номыр уг адӟиськы. Музъем вылысь соку номыре ӧй эскеры, малы ке шуоно номыр но уг адӟиськы вал. Соку мон океан вадьсытӥ ортчи, дыр. Бадӟымесь городъёс луысалзы ке, тылъёс одно ик адскысалзы.

Материалэз дасяз Е. Никитина

Ангелина Снигирева
By Ангелина Снигирева Апрель 12, 2019 10:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<