Мар сярысь вера куаратэм кино?

Ангелина Снигирева
By Ангелина Снигирева 4 апреля, 2019 15:28

Удмуртиын пуктэм нырысетӥ фильмлы — 90 ар

Пичи Пурга ёросысь Улын Юри гуртын 1929-тӥ арын «Соперницы» фильм пуктэмын вал. Москваысь зэмос актёръёс сяна, отын шудӥзы огшоры гуртоос. Та нуналъёсы Улын Юриын ортчиз фильмлы сӥзем конференция.

«Соперницы» фильмлэн афишаез

Кыкетӥ вордӥськон

Ужрадэ пыриськизы Кун Думаысь депутатъёс А. Загребин но В. Бузилов, Пичи Пурга ёрослэн йырыз С. Юрин, ёросысь Депутатъёслэн Кенешсылэн тӧроез В. Москвин, ёросысь муниципал кылдытэтъёслэн, куд-ог хозяйствоослэн кивалтӥсьёссы, гуртоос. Конференция та выллем ужрадъёслэсь висъяськиз туж шуныт, малпаськытӥсь луэменыз, арлыдоосты но школаын дышетскись нылпиосты огазеяменыз. Нош ужрадэз усьтӥз тодмо удмурт тодосчилэн К. Куликовлэн видеое кылем верамез. 1990-тӥ аръёслэн кутсконазы ай Кузьма Иванович шуиз: та фильм — зэмос усьтон, съёмкаосы пыриськем калыклы со юрттӥз аслэсьтыз дунлыксэ шӧдыны… Берлогес ини, кулаке поттон вакытъёс вуэм бере, юриос гуртооссэс но утьыны быгатӥзы, 1 мурт гинэ кулаке поттэмын вал, но сое но Сибире келяны ӧз сётэ…

Улын Юриысь музеен кивалтӥсь Любовь Фёдорова пусйиз:

— «Соперницы» фильмын возьматэмын НЭП, кооперация, индустриализация вакытъёс. Со удмурт сям, дӥсь, йылолъёс, улон-вылон, удмурт калык сярысь быдӟым фильм. Троссэ паймытэ отын возьматэм бадӟым шур, угось Улын Юриын со пичи гинэ. Но съёмкаос Юриын гинэ ортчиллямтэ, оглюкетэз суредъёс Кам дурын лэсьтӥськиллям, куд-огъёсыз — мукет удмурт гуртъёсын. Шуо: фильмлэн 2-тӥ люкетэз но вылэм, со, пе, США-ын утиське. Но та пумысен рос-прос эскеронъёс лэсьтоно на…

Нырысетӥ куаратэм фильм — «Броненосец Потёмкин» — пусъемын вал «Оскар» премиен, нош ми понна сыӵе быдӟым фильм луэ «Соперницы», шуиз Людмила Фёдорова.

Зэм, та фильм сярысь, оло, татчыозь ӧй но тодысалмы, одӥг учыр ке ӧй юрттысал. Людмила Ильиничналэн кузпалыз, Улын Юриысь колхозлэн азьвыл тӧроез Михаил Фёдоров, 1986-тӥ арын Владимир Владыкин профессорен одӥг ӝӧк сьӧры тупаллям. Тодосчи юам: кытысь тӥ? Улын Юриысь, пе. О-о, Улын Юриын аспӧртэм адямиос уло, отын фильм но пуктэмын, паймытэм профессор. Соку Михаил Никандрович та сярысь нырысьсэ кылэм. Вот со фильмез учкыны луысал ке! В. Владыкин вазиськем тодмо режиссёрлы Кондратий Борисович Уховлы, вашкала фильмез шедьтыны курыса. Утчаськон 4 ар ӵоже мынэм. Фильмлэн кыкетӥ улонэз кутскем 1990-тӥ арын. Соку ик сое нырысьсэ учкиллям асьсэос Улын Юри гуртын улӥсьёс. Соку кин ке песянайзэ, кин ке песятайзэ тодмам на…

Фильмысь суред

Улонзэс воштӥсь кино

«Соперницы» фильм пуктэмын 1929-тӥ арын «Межрабпом-Русь» студиын. Сюжетэз таӵе: Улын Юри гуртын (фильмын со озьы ик нимаське, со гинэ ӧвӧл, вывескаоссы но, кылсярысь, кооперативлэн 2 кылын сётэмын) НЭП вакытэ 2 нылъёс — купецлэн нылыз Италмас но кооперативлэн активисткаез Тутыгыш — нюръясько Ядыгар пӧйшурасьлэн яратонэз понна. Огвакытэ ик гуртын вузаськон понна ваче вуо узыр купец Шакмаев но потребительской кооператив. Сюжет пӧлэстӥське удмурт калыклэн со вакытэ улонэныз, сямъёсыныз: шайтанэз уллян йылол, выль кенлэн дӥсяськемез, котырак султыса эктон-берган…

Фильмлы 90 ар тырмон конференциын нылпиос туж тунсыко докладъёс лыдӟизы. Кылсярысь, 8-тӥ классын дышетскись Софья Васильева мадиз гуртоослэсь съёмкаос сярысь тодэ ваёнъёссэс.

— Съёмкаос быдэс гужем ӵоже мынӥллям. Одӥгез актрисазы, сьӧд Зина, туж яратэм валэн ворттылыны, вал пӧсятозь, пе, ворттылэ вал. Актёръёс туж чылкытэсь вылӥллям, манной кеньырзэс гинэ но трос полэс марля пыр олокӧня пол миськылӥллям, нош 1 кукейзэс миськонлы, оло, быдэс ведра ву быдтылӥллям, асьсэос но нуналлы быдэ шурын пыласькылӥллям, — тодазы ваё юриос.

Киноысь Италмас купеч ныл

Зэм, фильме пыриськемъёс пӧлысь али нокин улэп ӧвӧл ни. Но ортчемез сярысь тодазы возё нылпиоссы, внукъёссы. Конференция дыръя вӧзам востэмак гинэ пуксиз песянай — фильмысь крезьчилэн пичиез нылыз — Лелёкапай. Песянай ачиз но крезьгурез туж яратэ, кылбуръёс гожъя, нылпиосыз, нунокъёсыз кырӟало, баянэн, арганэн шудо.

Улын Юриысь калыклы паймемзэс веразы лыктэм куноос но.

— Тодэмъёстэс, сямъёстэс тазьы ик выжыысь выжые пыӵатыса улӥды ке, азьланяз но азинлыко луоды, — пусйиз Пичи Пурга ёрослэн йырыз Сергей Юрин.

— Фильмын луэм учыръёс кемалась ик ӧй вал кадь, но со дыре ик — сыӵе кемалась… Фильмын асьме песятайёс, песятайёсмылэн песятайёссы. Но паськытгес ке учконо, со — ми асьмеос. Тани костюмъёсын, галстукъёсын пукиськом ке но, соос — ми. Малы? Ми тодӥськом асьме выжыосмес. Котькуд калык понна туж кулэ выжыостэ тодон, сотэк калык шимес югдуре вуэ…

— Кемалась ӧвӧл, — шуэ депутат Валерий Бузилов, — ветлӥмы Германие биатлонэ. Отын висисьёс асьсэ спортсменъёссы понна тачыртонъёсын ӵаш потто. Но туннэ «Соперницы» фильмысь люкетэз учки но пайми: сыӵе тачыртонъёссы удмуртъёслэн 90 ар талэсь азьло вылӥллям ни. Нош мон малпасько вал, соосты немецъёс кылдытӥзы…

— Тӥ туж кужмо калык, тӥляд кужымды историдэс тодэмды бордын. Мон данъяськисько, сыӵе визьмо калыклэн нимыныз Кун Думаын ужасько шуыса. Котыр цифровизация мынэ ке но, туж оскисько, адямиос уз вунэтэ выжыоссэс.

Дуннелэн шорыз — Улын Юри!

— Монэ паймытэ, малы та фильмез пуктыны Улын Юри быръемын вал? — мылкыдзэ шараяз «Удмурт Кенешлэн» дано президентэз Валентин Тубылов. — Котькуд гуртлэн аслаз аспӧртэмлыкез, аслыз гинэ тупась сямъёсыз вань. Улын Юриын вераськон манерзы гинэ но бускельёссылэсь висъяське. Со сяна, татысь нылкышноос котьку туж шаплыесь но чебересь вал. Оло, соин режиссёр та интыез быръем?..

Киноысь суред

Малпанэз азинтӥз Пичи Пурга ёросысь Депутатъёслэн Кенешенызы кивалтӥсь Василий Москвин. Улын Юриысь кышномурт, пе, чебереныз, визьмыныз гинэ ӧз висъяськылы, ваньзэ ачиз сямен лэсьтон сямыныз но. Василий Ермолаевич юриослы синмаськемзэ вераз, гуртсэс инбам улысь музеен ӵошатӥз.

— Европаын сыӵе музейёсты миллиард манетъёсын лэсьто, нош тӥляд тани — тӥ асьтэос но, калыкты но, юртъёсты но — музей.

Конференция дыръя кӧня ке пол верамын вал Улын Юриын турмаршрут кылдытон сярысь. Али уж мынэ ни «Соперницы фильмлэн пытьыосызъя» турмаршрут дасянъя. Со понна Улын Юриын рос-прос музей но вань, трос синмаськымон ужъёс лэсьтӥсько.

Ужрадын пусъемын на вал «Соперницы» фильмен герӟаськем трос ужпумъёс. Кылсярысь, арлы быдэ ортчытъяно фильмлы но этнографилы сӥзем научно-практической конференциос, экспедициос но трос мукетсэ.

Конференция бурдъясь удмурт кырӟанъёсын йылпумъяськиз. Огъя хорын 3 удмурт гуртысь — Улын Юриысь, Шорын Юриысь но Выль Мӧннялась — нылкышноос кырӟазы, гуртлы сӥзем гимн люкаськем калыклэсь мылкыдзэ бугыртӥз.

Пичи Пурга ёросысь культурая управлениен кивалтӥсь Надежда Степанова, юриослы тау карыса, тодэ вайытӥз: фильм гинэ ӧвӧл, быдэс Пичи Пурга ёрос но туэ 90 аръем юбилейзэ пусъе. Таин валче ёросын «Пурга берга» акция азинске. Акцилэн пусэз — гуртысь гуртэ ветлӥсь кубок — куролэсь лэсьтэм бадӟым удмурт мунё. Табере со Улын Юри муниципал кылдытэтысь кошкиз Брангуртэ. Брангуртысь культурая юртлэн кивалтӥсез Ольга Туктарева ваньзэс ӧтиз туэ 15-тӥ мае доразы ортчоно фольклор фестивале.

— Туннэ та ужрадады вуылыса, валамы: ми тӥ сярысь, юриос, кабзэ ум тодӥське вылэм, — паймемзэ вераз Ольга Туктарева. — Тӥ дунне пыдэсын уд улӥське вылэм, тӥ дунне шорын улӥськоды!

Елена Миннигараева

Ангелина Снигирева
By Ангелина Снигирева 4 апреля, 2019 15:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<