Малы кулэ эсэпез валан?

Ангелина Снигирева
By Ангелина Снигирева Апрель 30, 2019 15:38
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижысь Эшъяськон юртын «Удмуртия — азинскись улос» бадӟым адӟытон радъяськиз. Со сӥземын вал Удмуртиысь иворъёсты вӧлмытон ёзъёслы. Ужрад огдыре ик праздник но, сюлмаськытӥсь ужпумъёсъя кенешон но луиз.

Ӝӧк вылын — быдэс элькун

Адӟытон усьтӥськиз вазь ӵукнаысен ик Эшъяськон юртлэн фойеаз. Татын шаерысьтымы валтӥсь газет-журналъёс асэнызы, асьсэ проектъёсынызы тодматӥзы. Ӝӧк дорысь ӝӧк доры выжыса, быдэс элькунмес ортчиськод кадь: тани Вавож ёросысь «Авангард» газетлэн адӟытонэз, вӧзазы ик интыяськем Якшур-Бӧдья ёросысь «Рассвет» газет, тӧр шорынгес — «Удмурт дунне» издание, вӧзамы ик республикаямы улӥсь бигеръёслэн «Янарышсы» но анай кылын потӥсь мукет изданиос. Журналистъёс сюлмаськиллям, асьсэ газет-журналъёссэс возьматэм сяна, маин ке паймытыны. «Удмурт дунне» газетлэн азбараз кожасьёс редакциысь журналистъёсын шахматэн шудыны быгатӥзы, удмурт шаертодонъя лотереяе пыриськизы. Нош «Удмуртская правда» газетын ужасьёс музей сэрег кылдытӥзы: совето вакытъёсысь ӝӧк вылын — со вакытысь ик печатлан машинка…
Туннэ нуналлы Удмуртиын пусъемын но ужало 174 СМИ-ос. Со пӧлысь 112-ез — газет-журналъёс (22 журнал, 89 газет но 1 альманах), 62-ез — электрон СМИ-ос (22 телеканал но 40 радиоканал). Россиын но кунгож сьӧрын улӥсьёс Удмуртия сярысь иворъёсты тросгес тодо «Удмуртия», «Сусанин», «Udm-info» агентствоос пыр.
Адӟытонэн тодматскыны вуылӥзы Удмуртиысь Правительстволэн Тӧроез Ярослав Семёнов, Удмуртилэн Тӧроезлэн но Правительстволэн администрациенызы кивалтӥсь Сергей Смирнов, Россиысь журналистъёслэн огазеяськонэнызы кивалтӥсьлэн воштӥсез Алексей Вишневецкий, Кун Думаысь депутат Алексей Загребин но мукет кивалтӥсьёс. Ярослав Семёнов шаерысьтымы изданиослэн валтӥсь редакторъёсынызы котырес ӝӧк сьӧрын нимысьтыз но пумиськылӥз на, пӧртэм юанъёслы валэктон сётӥз. Пусйиз: котькуд журналист, котькуд издание сюлмаське иворъёсты лыдӟись доры ӝог вуттыны, калыкез ас палаз кыскыны. Но журналистлы, пе, зэмос профессионал луыны тыршоно, аслаз кылыныз обществолы урод лэсьтоно ӧвӧл.

Огазеяськоно улэп кылён понна

Данъямын устоосыз СМИ-ос

Форум азинскиз Эшъяськон юртлэн тужгес бадӟым но чебер залаз. Вераськон мынӥз власть но общество вискын кусыпъёс сярысь, та ужын иворъёсты вӧлмытон ёзъёслэн интызы эскериськиз. Журналистъёслэн огазеяськонэнызы кивалтӥсь Елена Капитоненко но Печатья но иворъёсты вӧлмытонъя агентстволэн кивалтӥсезлэсь ужзэ быдэсъясь Приск Мгои ивортӥзы туннэ нуналлы шаерысьтымы СМИ-осъя огъя югдур сярысь. Собере мылкыдъёссэс шараязы куд-ог валтӥсь редакторъёс.

— Газетын ужаса, мон экономикаысь 2 кризисъёс пыр потӥ ни, — пусйиз «Удмуртская правда» газетлэн редакторез Энвиль Касимов. — Озьы ке но мон шудо. Вал сыӵе вакытъёс: газетлэн тиражъёсыз 200 сюрсозь но вуылӥзы. Нош али куд-ог нимаз адямиослэн Интернетысь аккаунтъёссылэн лыдӟисьёссы газет тиражъёслэсь тросгес. Тани Удмуртилэн Тӧроезлэсь аккаунтсэ 62 сюрс адями лыдӟе. Таин валче малпаськонэ усёно, макем кулэ луо туннэ газетъёс? Али изданиослы улыны секыт, ӧжытгес луиз реклама. Соин ик тыршоно ужез мукет сямен радъяны, коньдонэз шыръяны. Милям редакциямы азьвыл 40 адями ужаз, табере — 20. Мукет ласянь, али тыршоно кужымез огазеяны. Тани ми газетчиос ке но, «Удмуртия» ТРК-ын но передачамес лэсьтӥськом, тодмо адямиосын вераськеммес видеое гожтӥськом, Интернетэ поттӥськом. СМИ-ос огъя проектъёс борды кутскизы ке, элькунмылы но со ӟечен гинэ берытскоз.

— Али газет адямилы тужгес кулэ луись арбериос пӧлы уг пыры, — пусйиз «Республика» журналлэн валтӥсь редакторез Владимир Чепкасов но. — Адямилэн газет басьтэмез мед потоз шуыса, солэн лыдӟиськемез потыны кулэ. Нош ку сыӵе мылкыд кылдоз? Куке газет властез но интыысь кивалтӥсьёсты ушъяса гинэ уз гожъя, шугъяськытӥсь ужпумъёсты но эскероз. Нош али интыосысь администрациослэн кивалтӥсьёссы ёрос газетъёсты ӟечез сярысь гинэ гожъяны куро, кыӵе ке критика шеде ке, ваче вуонъёс бугырско ни, редакторез интыысьтыз куштыны куро. Нош кулэ вылэм совето вакытъёсы сямен ужаны. Соку критической статьялы кивалтӥсь ответ сётыны кулэ вал: малы озьы луиз, кин янгыш но мар кароно. Тазьы ужамлэн пайдаез луысал журналистъёслы но, (соос эрикоесьгес луысалзы), кивалтӥсьёслы но (соос шугъяськытӥсь ужпумъёсты адӟысалзы), калыклы но.
Та малпанъёсты Россиысь журналистъёслэн огазеяськонэнызы кивалтӥсьлэн воштӥсез Алексей Вишневецкий умоен лыдъяз но Ульяновск улосысь одӥг учырез тодаз вайиз:

— Отысь городэн кивалтӥсь сярысь ӟечсэ гинэ гожъязы. Собере одӥгез газет зэмос югдурез возьматыны кутскиз. Но ӝоген та СМИ-ез пачкатыны ӧдъязы, пресс-конференциосы ӧз ни ӧтчалэ. Ортчизы быръёнъёс. Та ушъяно кивалтӥсь 12 процент гинэ куара люказ, калык солы ӧз ни оскы, газетъёсын ӟеч гинэ гожъязы ке но…
Вавож ёросысь «Авангард» газетлэн редакторез Роман Чекунов ватсаз:

— Кивалтӥсез ушъяса гинэ гожъяськод ке, калыклэн пумитъяськон мылкыдыз бугырске. Милям но таӵе учыръёс вал ни. Ёросын потӥсь газетъёс мукетъёсызлэсь висъясько. Милемыз калык нимын гинэ ӧвӧл, тусын-буйын ӟеч тодэ, дорамы лыктэ, куаретэ но, сюлмаськонзэ но вера. Но критикаез но валаса лэсьтоно. Ми НТВ сямен ум ужаське. Ми кыл кутӥськом верам кылмы но солэн бервылыз понна. Ёрос газет — со власть но общество вискын кенешонъя аспӧртэм центр. Власть мае ке лэсьтыны уг быгаты ке, озьы ик верано, валэктоно.

Кытчы уг вуы депутат, вутске журналист
«Удмурт дунне» газетлэн валтӥсь редакторез Зинаида Рябинина пусйиз анай кылын потӥсь газетлэсь туннэ нуналлы интызэ:

СМИ-ослы таӵе статуэткаос кузьмамын

— Удмуртия — бадӟым элькун. Сюресъёс но Интернет котькытын ӧвӧл на. Нош милям редакцимы арнялы быдэ тырше гуртъёсы вуылыны. Пӧлаз — туж пыдлось бырись гуртъёс но. Огпол уйпал ёросысь одӥг гуртын журналистмес, йыртэмась кожаса, лапасазы пытсазы. Угось та гуртэ одӥг кивалтӥсь но, одӥг журналист но ноку вуылымтэ на. Али Удмуртиын 1 сюрслэсь трос пичи гуртъёс, нош 311 гуртын улӥсез 10 адями но ӧвӧл. Доразы журналист вуэ ке, со туж бадӟым ужрадлы пӧрме. Соин ик шуыны уг луы, газетлэн кулэлыкез быриз шуыса. Гуртоос ваньмыз аккаунтъёсты уг лыдӟо на…
Кенешез йылпумъяку, вераськон нош ик эсэпсэ валан вылэ выжиз. Сергей Смирнов пусйиз:

Журналистъёслэн валатэк ужамзы уно калыкез шуге-леке вуттыны быгатэ. Кылем арын вуз каронъя «Зимняя вишня» юртын тылпуэз тодэ ваём. Интернетын ивор потэ: власть быремъёслэсь лыдзэс юромо пичиятыса сётэ. Та иворез соку ик мукет блогеръёс, Интернет-СМИ-ос вӧлмыто, пичи но малпаськытэк, зэмлыко-а со, ӧвӧл-а. Озьы кезьыт ульчаосы 10 сюрслэсь трос калык потэ, анай-атайёс пичи нылпиосын кынтӥськыса сыло. Ярам, югдурез тупатыны луиз. Али Ижын дельфинарий ласянь кырсь иворъёс бергало. Вот кыӵе урод условиосын возисько отын дельфинъёс. Но… туннэ нуналлы Иже дельфинъёс ваемын но ӧвӧл на.
Сергей Смирнов куд-ог укыр ӝожтӥськись СМИ-осты но пыкылӥз:

Ми ӵемысь шуиськом: та издание уникальной, но сое быдтэ Интернет. Но кин люкетэ тӥледлы Интернетэ но выжыны, огшоры нуналмысь уждэс искусство дорозь вуттыны? Кин люкетэ тӥледлы зэмос профессиональной статьяос гожъяны? Властьлы кулэ ӧвӧл сое мултэс ушъям, властьлы кулэ, уж пайдаё мед луоз шуыса. Тани Москвалэн мэрез Сергей Собянин тау кариз журналистъёслы. Тӥледлы луыса, пе, мон тодӥсько, мар мон сярысь адямиос малпало. Тӥни сыӵе луыны кулэ зэмос кивалтӥсь.
Нялтас вераса, котырес ӝӧк сьӧрын вераськыку, Ижевск администрацилэн кивалтӥсезлэн воштӥсез Денис Логинов пусйиз, берло дыре СМИ-ослэсь вазиськонъёс 20 процентлы йылӥзы, ар ӵоже 700-лэсь трос луизы. Озьыен, иворъёсты вӧлмытон ёзъёс кивалтӥсьёслэсь кылзэс ӵемгес юаны ӧдъязы.
Форумын газет-журналъёслэн кӧня ке площадкаоссы ужазы на, журналистъёслэсь тодон-валанзэс будэтӥз Москваысь аналитик но психолог Михаил Вершинин.
Юбилейлы сӥзем ӝытэз йылпумъязы «Удмурт дунне» но «Янарыш» газетъёс. Люкаськемъёс понна соос «Перепечъёслы пумит чак-чак» шудон радъязы. Шаерысьтымы журналистика удысын тужгес бадӟым вормонъёс басьтыса ужась журналистъёс но изданиос пӧртэм данъетъёсын пусъемын вал.

Елена Миннигараева

Туспуктэмъёс: Агентство печати и массовых коммуникаций УР

Ангелина Снигирева
By Ангелина Снигирева Апрель 30, 2019 15:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<